#الختام
متابعيني الاحبة😍
مع نهاية العام نصل لاخر فصل من فصول قصتنا 😊
كل عام وانتم بالف خير💋💋
نسأل الله لنا ولكم الامن والامان وعافية الابدان ☺
...........
وجد:
مغمضة عيوني واسمع صوت عمتي ام رائد تتوسله يعوفني ما هي ثواني وانفكت ايده وروحي تغيب وترجع هسه يلا عرفت معنى كلمة الروح عزيزة
وكعت عالكاع وعمتي تعيط عليه وهو هم حس بروحه وانخبص بقى محاوطني بايديه وكاعد
ام رائد:يبوووو ماتت البنية ول يمصخم راحت روحها يمه وجد فتحي بنيتي يبووو يالمصيبة شنكول وشنحجي
رائد : يمه ما ميته هاي بعدها تتنفس لا تخبصيها ...وجد اخذي نفس يلا يا غاليه لا تموتيني بقهرج
فتحت عيوني كوه روحي رايحه كلش تعبت كعدني وانطتني عمتي ماي وتبجي وتروح وترد فوك راسنا ودخلوا اهلي واهله بهاللحظات فاروق شافنا هيج واني بحضنه ورجع يسب ويصيح وفاضل يسكته لا ننفضح
عقب هالمشكلة بثلاث ايام انطوا خبر للي خطبني انه اني ابن عمي رايدني واستعجلوا بتجهيزي والعقد وكل شي تم بايام معدودة
ما انكر شكد كنت فرحانة وكل شويه اترزل من الحجيات لان بس اضحك شاكه حلكي وهمه يرزلوني يكولون فضحتينا وما همي ابد المهم صار اللي اريده واخيرا صرت لرائد ولو لحد هسه زعلان وما يرضى يحجي وياي ومحملني ذنب اللي صار رغم شكد طلبت السماح يلا ما يهم اصير زوجته وما اله الا يرضى عني بعد شكم يوم
تحدد عرسنا لنهاية الاسبوع ورائد كل ما نلتقي زعلان ما يحجي وياي بهاي الفترة فاروق زعل كلش مني وسود ايامي كل ما يدخل للبيت تنكلب الدنيا يضل يصيح ويغلط عليه وخطيه فاضل واكع بيها لازم يرضي الكل وهو هم زعلان ويه سنا بين قوسين احنا راح نتزوج بس حتى زواجنا هم مو بصفاء قلوب ولا بود مثل كل السنين الفاتت كلها مشاكل
اخواني البقية محد منهم تدخل ولا رفضوا زواجي من رائد مثل فاروق ولو هو فاروق ما كان اعتراضه عالزواج من رائد بذاته زعله عليه خلاه يفكر يمنع زواجي نهائي لا لرائد ولا لغيره بنظره اني وكعت مهابتهم بقولي اني احب وتصرفاتي الغلط بأخر ايامي ببيت اهلي
يريدون ابقى الحجر الساكت واني ادري لو ساكتة وباقية على وضعي القديم كنت انغصب اتزوج صديق فاروق لان همه هيج تمشي عدهم الامور نطوه كلمة للزلمة لازم يوفون وياه بيها ورائد شاف مني اللي يكفي يخليه يكرهني ويبطل وما يفكر يعترض الحمد لله اللي صار كله اني قابلة بي علاقتي بأخواني ما عادت مثل اول وراضية وانضربت لاول مره وكدام كل اهلي وبيت عني وهم راضية بس اللي مقهورة منه رائد مو راضي عني وزعلان وما يباوع بوجهي حتى بيوم المهر شكد تمنيت نكعد نسولف مثل المخطوبين هو عقد وطلع من بيت اهلي ما بقى
