٢٧_______٢٨
خطوبة😍😍
عزيز العاشقين ذليل
البارت. 27
وقنعت باللقيا وأوّل نظرة إنّ القليل من الحبيب كثير😍😍..(المتنبي)
وجد:
رجعت رند من السفر واستقبلتها بشوق ام فارقت بنتها اشهر كنت كل يوم اتصل بيها ولو كان بيدي اروح وراها بس ابقى محكومة بالتقاليد والما يصير والعيب طول عمري احسب حساب لكل شي حتى مشيتي وضحكتي لازم اوزنها بميزان ومعايير فرضوها عليه عائلتي وعلموها الي
البنية عدهم ما يصير تطلع وحدها لو تبات بره البيت الا بأذنهم كلهم مو بس اللي كاعدين بالبيت حتى اخواني الكبار هم لازم اخذ بشورهم يعني لو كانت المسألة بس فاضل كان سهلت فاضل اهون واحد بيهم اخواني الكبار فاروق وفارس ما يتفاهمون ولا اكدر احجي بحضورهم صح يحبوني وما يكسرون بخاطري بس لما شي ما يعجبهم ما يقبلون بي واني ما اجادلهم حتى لا اخرب اللي بيناتنا من اخوة
لحد ما رند رادت تسافر هي وقائد وبقت تتوسلني اروح عليها لان وحدها وباول اشهر زين بس بعدين صرت تستاحش مكانها وتريدني وكل ما اتصل عليها تبجي وتشتكي من قائد كان ببداية علاجه يأذيها هوايه وهي تسكت وكنت اني متنفس غضبها الوحيد مرات تسولف وتبجي ومرات تبقى تحجي عنه شكد يقهرها وضعه وشلون كاعد يعانون اني اسمع واحترك على بنيتي اللي ربيتها تدور مني وقفة وياها واساندها واكون امها الحقيقية واروح الها
كل مره كنت اتعذرها شكل وهي تعصب وتزعل وتسده بوجهي اكول الها عمامج وابوج ما يقبلون بطلعتتي تكوم تبجي وتعيط ترد عليه كل ....عمرهم يسمعوج هسه صاروا ما يقبلون ... ما تدري بسببها ابوها ومحمود صاروا ما يحجون وياي وفاروق باقيله شويه ويقلب عليه لان تعاركنا اني وفاضل وياهم لان هدوا علينا لان اخذناها لزوجها من غير علمهم وتعاركت قبل ايام لان ردت اروح الها ورفضوا وترزلت اول مره بحياتي راح احترامي كلش بسبب بيت عمي ومشاكلهم منا هذا رائد المزعج اللي صار يضوجني بنغزاته بكلمات عبالك ميتة عليه وراكضة وراه ولو هي هاي الحقيقة والا اول تالي اني اتحجج حتى افوت للاستقبال من هو موجود لو لما اروح لبيتهم اشوف ابن فاضل وسنا واضل لازكه يمهم يعني صدك لا ضلت كرامة ولا ضل شخصية صح ما احط نفسي كدامه بس وين ما يروح يشوفني وصار يتعمد يحرجني كدام الناس مرات
صارت رند مثل الكل تكول عني قاسية وباردة يحسسوني اني عديمة مشاعر والله شكد كنت قبل ما اهتم اشو هالكلمات صارت تأذي يمكن كثر ما سمعتها من الاحبهم
المشكلة صرت ما اعرف شلون اتصرف وتاهت عندي شلون ما اتصرف تنأخذ بغير شكل وبعد ما رجعوا من السفر وسوولهم سفرة للشمال لان معاناة رند وقائد ما انتهت وزواجهم معلق وصايرة مشاكل ما عرفتها اني لان رند تستحي تسولف وياي بهيج امور بس الظاهر فاضل وامي وماما عدهم خبر عنها رند ما تقبل تحجي تخجل بس قائد مسولف الاول والتالي لرائد ورائد راد احد من عدنا يروح وياهم فمخبرين امهم ووصلنة الكلام وكله عرفناه وكانت فكرة زينه لان ادري ببيوتنا هنا وبين عمامنا راح يخبلوهم اذا ما صارت شغلتهم
