نقطة لقاء

بارت الثالث والثلاثون

حجت احلام : اني ما اريد اطول الموضوع اكثر من هيج اني اجيت اخطب ايد روان لــ ابني يوسف

باوعت بصدمه لـ خاله احلام حجتها طك بطك
ادور روان ضلت صافنه وكاعده نغزتها عاد هي كامت صعدت فوك

ضحكت كالت : يمة باع الخجل

كلتلها : ليوسف ؟

احلام : اي ليوسف

باوعت على خاله رحاب وزوزو صافنين

كلتلها : والله يا خالة ما ادري شكلج اول شي انوا ما مر على وفاة ماما الهام هواي و روان صغيرة بعدها بالمدرسة والسنه الجاية اخر سنه الها وهي تريد تكمل دراسه

احلام : خالة قابل اني كلت ما اخليها تكمل دراسه بالعكس يوسف قابل بهل شي و ميهمه هو قرارها أما على وفاة الهام اوف يا الهام صح مصارلها هواي بس يوسف لح علية هواي وتوسل بية اجي اخطبها كال مجرد خطوبه وبيناتنا

بنان : والله خالة لازم استشير روان يلا اشوف ردها تقبل أو لا

حجت خالة رحاب : ولازم ناخذ شور عمامها هم

احلام : اكيد اخذوا راحتكم

باوعت لريم و رزان صافنات ولازمات الضحكه
هل بنات صايرات تافهات حيل حتى رزان ماخذه منهن

ضلت بيبي زوزو تحجي وياها وبنتها كوثر اصلا متحجي ويانه ومبينة جايه من ورا خشمها

كالت ريم : اكلج بنان روان راح توافق ؟

بنان : اني شمدريني بعد بهاي العوبه

رزان : حصعد يمها اروح

ريم : انتظريني اجي وياج

صعدوا ريم ورزان فوك و ضلينا وحدنا جوا وديحجون بنفس الموضوع ويه خالة رحاب و بيبي بس انتبهت على خالة رحاب شوية ضاجت بس مادري ليش

______

بالصاله
حجى ابو يوسف : احنه اجينه حتى نطلب ايد بنتكم روان لابني يوسف على سنة الله ورسوله

ياسر وجهه صوفر من الصدمه

كال محمد : نتشرف بيكم ونحطكم على راسنا بس اكيد لازم ناخذ رأي البنية بهذا الموضوع هم

زياد : اي لان هي بعدها طالبة وصغيره

يوسف جان كاعد وما حجى ولا كلمه بس جانوا يحجون خواله وأبو وعمامه

بهاي اللحظات همام همس لياسر : ياسرررر شبيك

وجهه انكلب وكام بنص الصاله وكال : عمي اني اقدر جيتكم على عيني وعلى راسي بس بنت عمي روان مننطيها

كام يوسف : ليش متنطوها شنو هي بكيفك ؟

ياسر : بكيفي وغصبا عليك هي بنت عمي واني احبها ورايدها ومتصير الغيري