شفاه مخملية

17

[البارت السابع عشر]

"هجران"
سمعت صوت طگطگة ورايه ودرت وجهي، شهگت من شفت زلم ثنين واگفين بباب بيت واشرولي حتى اروحلهم، قوتي بادت واحس عيوني راح يطلعن من هول الموقف واني اشوف زلم محاوطينه من كل جانب والله اعلم شنو حيصير بينه بهالبلد الغريب الي منعرف لغتهم ولا نعرف مكانهم..

شهد عاطت وتبچي بقوة

-شهد: تركووووهه تركوووو اختييييي ولكم كلاااااب عوفوووهه

الزلم الواگفين ورايه صافنين علينه بحيرة، وجواهر لسه تبچي وتحاول تتملص من ذوله الولد الواضح عليهم محششين مخدرات لو سكرانين، علت صرخاتنه من لطمو جواهر ؏ خدهه لطمه خلت خشمهه وشفتهه تطگ دم لان عاندت وماگدرولهه

رهف ماسكتت عن البجي وغزل نفس الشي، ربي رحم بحالنه وذوله الزلم تدخلو وصرخوا ؏ ذوله الولد، گوووة جرينه جواهر منهم واحنه منهارات ودموعنه وحدهه تحچي بشنو مرينه

فلتو ذوله الادبسزيه ماعرف شنو گلولهم ذوله الرياجيل بَـس احس عبالك هددوهم، واندارو علينه يحچون هواي ومنفهم شيگولون ويأشرون ؏ بيتهم يجوز يردونه نطب وياهم؟!!

اشرنه براسنه "لا" ورحنه نمشي سريع وجواهر گوة نسحلهه مبين عليهه داخت من ضربوهه، حسيت بواحد ورايه يدغني من چتفي، گمزت وعطت

-وخرررر لاااا وخرررر !!!!

گمت ابچي قوي وختلت وره جوري الي فاتحة عيونهه بصدمة ومتعرف شتسوي، الرجال تقدم علينه وظل يهدي بينه ويحچي بالفارسي وهم يأشر ؏ بيته، شهد ظلت تحجي وياه وتأشرله نريد نروح للحرم وهمه چنهم افتهموا، هزوا روسهم وگالو "بيا" اووف شگد كرهت هالكلمة

ماكو شي بيدنه غير نروح وراهم ؏ الاقل عرفنه همه زينين ودافعو عننه، ولو الله اعلم يجوز مثلوا او همه يردون يخطفونه ويجوز ياخذونه لبيت ويسوولنه شي وبعدين يتاجرون بأعضائنه ويقتلونه، گلبي گام يدگ وجسمي يرعش ماردت امشي واكمل الطريق بَـس من شفت الشارع العام ارتاحيت شويه

ظلوا يمشون بينه هواي واباوع لجواهر عيونهه حمر وشفايفهه تنزف وحاضنه رهف التبچي لسه ويمشن سريع

اخيييراً بينت منارات الرضا سلام الله عليه، عيوني دمعت من شفتهن حسيت بالامان وكأنما الامام دزلنه ذوله الزلم يساعدونه، گلنالهم نريد صحن طوسي واشروا براسهم اي وگالو "بالي" عرفت معناهه مثلنه من نگول بلي

دخلنه من التفتيش وقبلهه وگفت جواهر يم برادات المي مسويهن ؏ شكل نافورات يجننن وغسلت شفايفهه وخشمهه، رتبت شالهه ولبست الچادر بَـس كل هذا وماحچت كلمه وحده مبين عليهه مصدومه لو يجوز سوولهه شي ذوله الانذال

دخلنه للصحن واني لازمة جوري من ايدهه احس حتى حيلي باد ومابيه امشي، گعدنه ؏ وحده من الزوالي ماطولنه ربع ساعه واذن الفجر بَـس ولا وحده گامت صلت لان الكل منهار ومهدود حيله، اول وحده نطقت وحچت بيناتنه شهد