وفجاه سمعت فتحت الباب عندها وسمعت صوت ابوي وهو يصارخ
: منووو تكلمييين؟ فارس عندج؟ انتي ماتسمعين الكلام ماتفهميييينن ماتفهمييييين
رميت التلفون على نادر و اشر له تكلم تصرف!
نادر: ابويييي شفيك مب فارس انا نادر بس كنت اسولف لها عنه
ابو راشد بحده: والله يا نويدر لو مارجعت البيت و الحين اني أتصرف معاك تصرف ثاني
نادر بطنازه: شو بتطردني من البيت بعد؟
ابو راشد: ناااااااادر
نادر: يلااااا زين برجع الحين
كنت العب باصابعي بتوتر أحاتي مريم اخاف يصير لها شي ابوي لا عصب مايشوف قدامه مابا اكون سبب لضيقة احد حسيت بأيد نادر وهي على كتفي
: لاتشيل هم شي ادري انك تفكر وتحاتي بس انا اقولك لاتفكر و أرتاح وحط كمادات لويهك بدا يورم ترا
فارس بضيقه: الله يسامحك يا ابوي لمهم روح الحين انت البيت و ارسل لي مسج وطمني انتبه ادق لي بس كفايه مشاكل لليوم
نادر وهو يحط ايده على خشمه: تم على هالخشم
مشى للباب وهو يرسل لي بوسات بالهواء هالشي كان قادر بأنه يرسم البسمه على وجهي
. .
مادري كيف نمت وقتها مادري كيف غفت عيني قمت من السرير و احس ظهري ذبحني وقفت اشوف وجهي المس الكدمات لي بوجهي و أنا افكر فاللي صار لي امس مو قادر انسى وجه ابوي وهو داخل علي والشرار يتطاير من عيونه غمضت عيوني وفتحت وتذكرت الحين ابوي قطع بطاقتي عني وخلاني بدون فلوس هذا و هو عنده خير الدنيا! انا شو بسوي الحين كيف بعيش لازم اتصرف و اشوف لي شغله مستحيل ابوي يخليني ارجع الشركه عنده و أكمل فيها مستحيل و الاهم من هذا كله ادور لي صرفه ادور لي حل أبري فيه نفسي! و ارجع اعيش طبيعي بين اهلي بدون لا اشيل هم شي هذا كله كان يدور فبالي كان وقتها العصر نمت هالنوم كله ولا حسيت بنفسي مسكت تلفوني و انا اشوف الاشعارات والاتصالات كلها من نادر و أرسلت له
" كنت نايم ولا حسيت بنفسي ، انت وين؟ "
مامرت ثواني الا وهو راد علي
" عندي دوام اذا ناقصك شي قول لي بجيبه لك و انا طالع "
رديت عليه و تركت التلفون و انا اجهز نفسي عشان اطلع مابا احس بالضيق مابا الحزن يتمكن مني لو دقيقه
جهزت وطلعت متوجه للبحر احس البحر هو المكان الوحيد لي اطلع كل مشاعري و احساسي فيه دايم البحر ونسيمه ملجأي من بعد الله اقدر اطلع كل ألمي ووجعي فيه ، مريت على مطعم يبيع كرك محتاج اصحصح شوي
و بعدها رحت للبحر كنت أتامل الرايح و الجاي اتأمل الحياة لي حولي احس لي صار شي كبير مره علي احس اني باقي تحت تأثير الصدمة وباقي احس بوجع بقلبي كأنه احد يعصر قلبي ماقدر اخفي حزني ماقدر اخفي ضيقتي لاول مره احس بالضعف هذا لاول مره احس اني فعلا ضعيف! نظرات امي وهي تدمع عيونها وتناظرني تمر فبالي مر يوم ونص و هي حتى رساله ماشفتها منها تتطمن علي شي يعور لهدرجه ابوي انسان متحكم وقاسي لهدرجه يا أمي ماتقدرين تطلعين عن شوره وتتطمنين علي حتى لو برسالة؟ تشوفيني بعد الضرب لي جاني حي ولا ميت ماقدرت امسك دموعي كانت تنزل لا إرادي مني الحزن تمكن مني!
التفت اشوف يميني ويساري اذا احد انتبه لدموعي احد انتبه لحزني وضيقتي لكن كان الكل لاهي ومشغول وما دروا عني حمدت ربي الف مره و تنهدت بصوت مسموع
لكن فجأه
جاء صوت من وراي...
: ياخوي فيك شي اقدر اساعدك بشي؟ ماقدرت اشوفك بالحال هذا و أتجاهل و أمشي
عدلت جلستي و صديت وراي اشوف
فارس : لا ما حتاح شي
: امانه صدق اذا اقدر اساعدك بشي قول لي اذا محتاج تفضفض بسمع لك
فارس: ياختي شفيج انتي؟ قلت لج ماحتاج شي ولا فيني شي ولا ادور شفقه احد علي
: خلاص هد و أسفه لو أزعجتك
