صحيت الصبح على صوت المطر وقفت على الدريشه و أتامل جمال الجو و في اليوم هذا ما كان عندي شي أسويه كان وقت دوامي على المساء دخلت أخذ لي شور سريع و طلعت و أنا اوقف على التسريحه و أشوف شعري و دقني احس لازم أروح الحلاق صارلي فتره مو محلق طلعت و انا أرفع راسي و أستشعر قطرات المطر لي كانت تجي على وجهي تذكرت اليوم موعد أم شهد مسكت تلفوني و أنا أرسلها
: الصبح صبح الناس و إنتي صباحي على هالجو الحلو
تركت تلفوني بالسياره و نزلت للحلاق حسيت اني تحمست بس بخاطري هالكلام و ما بخليه بخاطري بديت احلق لكن عقلي ما كان معي مشغول بالي فيها و بالرد لي بيجيني منها ..
" شهد "
كانت تتجهز و تلبس عبايتها و طرحتها عشان تأخذ أمها للمستشفى باقي على الموعد ساعه لازم تطلع بدري عشان تأخذ لها قهوه تصحصح مخها أخذت شنطتها و تلفونها دون ماتشوفه
: أمي يلا انا جاهزه انتي جاهزه تبين نطلع؟
ام شهد: جهزت انا بس تعالي أفطري اول و بنطلع
شهد: لا أمي بأخذ قهوه بطريقنا يلا خلينا نمشي
ام شهد: لا ما بطلع لين اشوفج تاخذين لو حتى لقمه يابنتي مب زين تطلعين و انتي مو مأكله شي
شهد: تم على هالخشم
قعدت على الطاوله و بدأت تأكل مسكت تلفونها و هي تشوف الأشعار لي جاها من فارس شرقت بالاكل و هي تقرا الرساله و بدأت تكح و تكح
: ياااا شهد انا كم مره اقولج لاتمسكين تلفونج و انتي تأكلين بسم الله عليج امسكي اشربي ماي
شهد: اهخ يا امي احس عيوني طلعت
ام شهد: لو تاركه تلفونج وقت الاكل ما بتغصين اهدي و اشربي ماي تنفسي شوي
شهد: شبعت انا يلا تبينا نمشي
ام شهد: تحسين نفسج احسن؟
شهد: الحمدلله
طلعوا من البيت و قبل لا تطلع ردت عليه
" شكله نفسيتك حلوه من الجو ان شاءالله دايم "
و ركبت السياره و مرت على الكوفي و خذت لها قهوه و مشوا للمستشفى و هي تحس نفسها مبسوطه من الرساله لي جتها منه و المطر يصب عليهم وصلت المستشفى و أخذت المظله و مسكت بأيد أمها و مشوا داخل كان الجو بارد و الغيوم مغطيه السماء
: يارب يا أمي على هذا الجو و المطر بأنه الله يشفيج و يحفظج لنا و يخليج يارب
ام شهد: آمين يا بنتي و يخليكم لي
تقربت من جبهة أمها و هي تبوسها و راحو لقسم الانتظار و هم ينتظرون دورهم يجي وصلها أشعاره
" صح نفسيتي حلوه لكن الكلام طالع من خاطري
شهد كانت تحاول تخفي أبتسامتها عن أمها ولا تبين لها شي
فتحت الرساله و هي ترد عليه و تغير الموضوع
: انا بالمستشفى الحين أنتظر دورنا
فارس: و أنا جاي بسلم على راشد احس أشتقت له
شهد: لا صدق؟
فارس: صدق بالطريق الحين
شهد: شو هالشوق لي طرا عليك باليوم هذا
فارس: مادري حتى انا أسأل نفسي تصدقين
شهد: تعال يعني الحين انت تسوق و تكلمني ها؟؟
فارس: ايوه تخافين علي
شهد: يلا أنقلع ما برد عليك
فارس: يعني تخافين علي؟
