اسوء فتره جانُ يمرون بيها اهل البيت ومُحبيهم هيَ الفترة اللي حِگم بيها ابو جَعفر المَنصور و أولاده واحفاده من بعده
من بعد ما مات الهادي العباسي
صار بدلهُ اخو هارون الرَشيد .. لعنهم الله
بهاي الفتره جان عُمر الامام الكاظم روحي فِداه ٤٢ سنه
هاي الـ ٤٢ ششاف منهـا بَعد موت والده شي حلو ؟
كلشي ما شاف منها غير بس الاذى والقَهر والظُلم والتَهديد و المُراقبه الشديده لـ مولاي الكاظم في سبيل يردوله زَله صغيره حتى يأذو ويقتلو بـ سببها و تَعرضه لـ الحَبس بـ سجون الكُفار والظالمين لعنهم الله
الفترة اللي حكم بيها هارون الرشيد
جان اكثرررر بعد من ابو واخو قساوة و ظُلم
ما خلى شخص يحب اهل البيت ما قِتله او اخذ فلوسه وبيته وشَرده وحرمه من عيشه
جانت دكتاتوريه بشكل فضيع وظلم طاغي كُلش طاغي وحُرية التعبير عن الرأي معدومة وجان اذا يشوف اي شخص يحجي بـ مُحمد وآلِ مُحمد يحسبه مسوي جريمه و يُقتله بـ دَم بارِد
جان يكره الامام الكاظم ويكره كُل من يتبع الامام الكاظم روحي فداه
كُره شديدد
جان اذا راد يختبر صدق جنوده يبلغهم انُ يروحون للمسجونين من مُحبين آلِ البيت .. يقتلوهم ويرموهم بـ البئر
اذا سوو هذا الشيء معناهـا همَ اوفياء إله
يعني يختبر صدق و وفاء جنوده بـ كُرههم لـ آلِ مُحَمد
وجان اكثر موقف اذه العالم ودمرهم
وطبعًا يعتبر من ابشع واحقر مواقف هارون الرشيد
هوَ منع الناس مِن زيارة .. الامام الحُسين " عليه السلام "
امامي الضامي 💔
السلامُ عليك يا سيدي ومولاي ابا عبدالله الحُسين والسلام على سيدي ومولاي ابا الرضا موسىٰ الكاظم
ولعن الله ظالمين و قاتلين ومُحاربين مُحمد وآلِ مُحمد
الناس جانو يتبعون الامام الكاظم عَ
وكُلش يحبوا كُلش لانُ جان طبعه حَنيّن عليهم ويوكف وياهم يساعدهم ويساند المَظلومين
هنـا هارون الرشيد حس بخطر تجاه الامام الكاظم وخاف لا يسوي انقلاب ضِده وهوَ ياخذ الحُكم
ومثل ما كلت بلبدايه ابو جعفر واولاده واحفاده تربطهم علاقة ويرجع نسبهم لـ العباس عم النبي
والامام الكاظم يرجع نسبه لابائه واجداده لـ سيدي ومولاي الامام عَلي امير المؤمنين و لـ ابو الامام علي وهوَ ابي طالب عَم النبي " عَليهم السلام "
ومن ناحية اخرى لـ سيدتي ومولاتي فاطمة الزهراء " عليها السلام " بنت الرسول اذن همَ احفاد الرسول وقريبين اله من الجهتين قرابة كُلش قريبة من ناحية الاب الامير عَلي ومن ناحية الام فاطمة الزهراء وهمَ احفادهم واحفاد الرسول .. لهذا همَ " آلِ مُحَمد "
اقرب للرسول من اقارب عمه العَباس
فَـ كُلشي يخص الرسول من حقهم همَ مو من حق ابو جعفر واولاده واحفاده
فـ بهذا الوقت استدعى هارون الرشيد … الامام الكاظم " عَليه السلام "
وسئله سؤال يكول :
ليش العالم تكول جدكم النبي مُحمد لكن هوَ مو جدكم .. انتم جدكم علي ابن ابي طالب
فـ جوابه الامام الكاظم عَ : لو بَعثَ النَبي فـ خَطب ابنتك هَل تزوجها لهُ ؟
يعني گ انما دايوجهله سؤال ويكُله لو اجاك النبي وراد يخطب بنتك تكدر تزوجها اله ؟
هارون الرشيد گال : نَعم وافتخر بـ ذلك
الامام الكاظم گال : انا لا افعلُ ذلك
هنا هارون الرشيد صُفن وتعجب وتسائل ليش وشلون ما ينطي الامام بنته ويزوجها للرسول
جِهَل وگ انما نِسه الحرام ونسه صلة القرابه بيناتهم
عَجيب عَجيب هيج انسان جاهِل ما يعرف الحلال من الحرام .. يحكم !
سأل هارون الرشيد بعد ما تعجب من جواب الامام الكاظم وگال : لماذا ؟
فـ جاوبه الامام الكاظم : لانهُ وَلدني ولَم يَلدُك
يعني دا يبينله ويوضحله يكله
اني اصير ابنه اني نسبي يرجع لبنته واصير حفيد الرسول
شلون ازوجه بنتي بعد ؟
وهذا الشيء حرام
لكن انتَ لم يلدك وما يرجع نَسبك لبنته ولا تصير من عندها وبذلك انتَ مو حفيده ونسبك يرجع لعمه
فـ تكدر تزوج بنتك اله
رجع الامام الكاظم كال لـ هارون الرشيد : انتَ النبي يكدر يدخل ويشوف نساؤك بدون حجاب ؟
جاوب هارون الرشيد : لا
رَد عليه الامام الكاظم : لكنهُ يدخل على نِسائي ويجوز لهُ ذالك
وهذا يعني نحنُ اقرب الىٰ الرسولِ مِنكم
يعني يصح ويجوز الرسول يشوف نسائهم آلهِ لان هم احفاده ونساء وبنات احفاده
لكن نساء هارون وبناته لا يجوز يشوفهن بدون حجاب لان يُعتبرن غريبات عنه وقرابته بيهن بعيده ومُمكن جزء منهن يكونون غريبات
فـ المفروض الخلافه تكون للامام الكاظم " عليه السَلام "
لكن هارون الرَشيد سِلبها مِنه
وحتى لَقب الرشيد الروايات تكول
هذا لقب للامام الكاظم لكن اخذو مِنه ولقبو بي هارون و صارو يصيحوله هارون الرَشيد.
