More Than Words

Chapter 18

Clarizette Marie's

"Kamusta ang pakiramdam mo?" kaswal na tanong sa'kin ni Hans pagkagising namin. Ang sarap ng pakiramdam ko dahil bawing bawi ang katawan ko sa pahinga.

"Ahm, okay na. Nakapagpahinga na ako nang maayos" sagot ko naman kaya tumango-tango siya at saka bumangon na sa kama. Dumeretso siya sa banyo at ilang sandali pa ay narinig ko ang lagaslas ng tubig.

Napabuntong hininga ako at bumangon na rin. Iniligpit ko ang hinigaan namin at pagkatapos ay kinalkal ko ang maleta niya para ipaghanda siya ng bihisan.

Nang maayos ko ang mga dapat ayusin ay kinuha ko ang phone ko para icheck ang oras. 2 pm na pala. Ganun ba kasarap ang tulog namin? Nasaan na kaya ang anak ko?

As if on cue ay bumukas ang pinto at pumasok mula doon si Isla.

"Mama, Look! Ang daming binili sa'kin ng mga Tito ko!" tuwang-tuwang sabi niya habang isa-isang ipinapatong sa kama ang mga paperbag na dala niya.

"Naku, baka pabili ka nang pabili sa mga Tito mo! Nakakahiya!" nanlalaki ang matang sabi ko sa bata dahil ang dami niya talagang dala.

"Aba, Mama hindi po kaya ako nagpapabili. Pag po may item akong tinitingnan o hinahawakan, binibili na kaagad nina Tito kahit di ko sinasabing gusto ko! Nag-uunahan pa nga po sila sa pagbili" nakangusong katwiran niya kaya napakamot ako sa ulo ko. Bakit ang galante naman masyado ng mga kabarkada ni Hans?

Bumukas ang pinto ng cr at lumabas mula doon si Hans na nakatapis lang ng tuwalya kaya napalunok ako. Bakit naman may pa-show si Koya?!

Nang makita ni Hans si Isla ay hinalikan niya ito sa noo bago kinuha ang mga damit na ihinanda ko kanina. Muli ay pumasok siya sa cr para magbihis.

Paglabas ulit ni Hans sa cr ay naupo ito sa tabi ko. Tiningnan niya ang mga dala ni Isla at natawa siya. "Mukhang bumabawi ng papasko ang mga Tito mo, Love. Siguradong pag humingi ka ng house and lot ngayon ay mag-uunahan magpagawa o bumili ng bahay ang mga lokong yun"

Nanlaki ang mga mata ko at siniko siya. Baka mabigyan pa niya ng ideya si Isla at humingi ito ng kung ano-ano sa mga Tito niya. Natawa lang naman si Hans sa ginawa ko.

Naiiling na kinuha ko na lang ang suklay sa bedside table para ayusin ang buhok niya. Siya naman ay muling binalingan si Isla at nagkwentuhan silang mag-ama tungkol sa mga pinuntahan nina Isla at mga ginawa nila habang nasa galaan. Masayang nagkwento naman ang anak ko at kung paminsan-minsan ay may action pa talaga siya. Ang daldal ng anak ko. Ang sarap pakinggan at pagmasdan.

Matapos magkwento ni Isla ay tumayo na si Hans at saka inalalayan si Isla na makababa ng kama. Binalingan ako nito at saka inilahad ang kamay sa harapan ko "Tara muna sa labas. Hahanap ng makakain"

Kiming tumango ako at atubiling tinanggap ang kamay niya. Magsasaya na sana ako ngunit pagkatayo ko ay kaagad niya ring binawi ang kamay niya. Akala ko pa naman ay sinasapian na ulit siya ng kabaitan.

Pagkalabas namin ng kwarto ay dumeretso kami sa pool area kung saan naroon ang lahat. Naghahanda sa mga iihawing pagkain ang mga kalalakihan, ang mga kababaihan naman ay kumakain habang nagkukwentuhan at ang mga bata ay naglalaro.

Kaagad na humiwalay sa'min si Isla nang makita niya sina Sabrina. Nagtatakbo ang anak ko para makipaglaro sa mga kaibigan niya. Natigilan naman ako nang naramdaman kong umakbay sa'kin si Hans. Marahang iginiya niya ako palapit sa mga kabarkada niya.

"May pagkain pa? Di pa kami nakain" Tanong niya sa mga kaibigan niya kaya makahulugang nagtinginan ang mga ito at nagngisihan.

"Maniwala sayong hindi ka kumain" pang-aasar ni Lynard kaya kaagad na nag-init ang pisngi ko. Hindi ko tuloy alam kung ipagpapasalamat kong hindi ako slow pagdating sa ganung mga bagay.