العمدة "مجنون ليلى"💙مكتملة💙

💙الجزء 137💙

‎👑العمـــــــدة👑
‎♡..مجنــــون ليلــى..
‎ف.الثــالت والاخــير:
‎💔من الحـب مـا قت ل💔
137

بعد مرور ست سنوات..

كان افتتاح مركز التجميل ديال لبنات كيف كانت كتحلم ليلى مشاركين فيه البنات معاها …حورية ونور وكنزة …كان كبير بزاف دايرين فيه السبا من تدواش ومصاج وتبريمة…وصال دالرياضة..منتوجات تجميلية خاصة بليلى وباسمها داكشي ديال الكوسميتيك…فين كيتقاد المكياج والشعر..كافي صغيرة …كل ما يخص المرأة عامة..وكل وحدة وشنو تخصصها وخدمو معاهم البنات لي كانو معاهم فالمقر وقراو على يديهم وتعلمو من عندهم الحرفة…عاونو بعضياتهم..ودارو مشروع ستافدو منو كاملين…بكر عاونهم ماديا ومعنويا…الافتتاح حضرو ليه الصحافة ومؤترين ديال الانستقرام والفايسبوك واليوتوب..كان كلشي فرحان …كانو غير لعيالات واجواء زوينين ناشطين…المركز سماوه ..جــمالـك..بالترجمة للفرنسة والانجلزية…ليلى حسات براسها واخيرا قدرات دير شي حاجة. راضية عليها وتحقق حلمهاا وحلم خوتاتهاا..نور مكلفة بالاشهارات والدعاية والعلاقات العامة..كنزة مكلفة بالحسابات وكل الامور المالية..حورية الاستقبال ..ليلى موهبتها تقاد المكياج زادت قرات وولات مايك اب ارتست مشهورة كتخدم للناس لكبار والمشاهير…زادت تعمقات فالحرفة وكتزيد تعاون لبنات فالخدمة مع الكليان وتشوف واش داكشي متقون…كانت غير كوافورة فحي شعبي فمحال عادي دابة ولات بمركز التجميل ومايك اب ارتيست كبيرة…

سلاو الافتتاح فالعشية..
بقاو غير لبنات..
كنزة:صافي عييت ..اوف هدا هو الوقت لي ايجيبلي فيه ادريس ولدي ناري تعطلت
ليلى:خليه يديه للفيلاج نيشان
كنزة:لا ادريس قالي ايسافر هو ومراتو ماعندوش الوقت يمشي تا لفيلاج المهم هنا مشيت
هزات ساكها ومشات
ليلى تنهدات كتشوفها خارجة
نور:كانت باينة فتالي اطلق هي وياه ..طلع ولد الناس فهمها ومادارش معاها المشاكيل
ليلى:داكشي لي كاين المهم جربات وماصدقش..فعلا ادريس ولد الناس دار معاها طلاق اتفاقي بلا مايصعب وخلا ليها الولد وعلاقتو معاها بقات مزيانة ونعم الصديق والله
نور:ايوا الله يدير شي تويل دالخير..المهم نوض نمشي تانا
ليلى:فين اتمشي
نور:ايوا نتي ايجي موراك بكر نمشي نشد الطريق بشوية عليا نتلاقاو فالفيلاج
وسلمات عليها ومشات..
ركبات فالطموبيل يلاه اديماري وهو يصونيلها الطليفون غير شافت اسمو تبسمات وجاوبات سمعات صوتو:عيد ميلاد سعيد
نور بابتسامة:نت ما انتهناش منك
كريم:عمرك تهناي مني ..ست سنين دازت وانا تابعك صافي حني فيا واش هدشي ماكافيش يبين ليك اني كنبغيك واني تبدلت
نور :ولات عندي تلاتين عام الوقت كيطير
كريم:تكون عندك تا ربعين نتسناك حياتي كاملة
عضات على شفايفها:فينك
كريم:فين ما بغيتي نكوون اتلقايني
نور:تحتافل معايا بعيد ميلادي
ناض فرحان:احسن عيد ميلاد دوزيه فحياتك
نور:صافي نتلاقاو فالريسطو (….)
كريم:كنحماق عليك
وقطعات وهي كديماري وتنهدات بغات تعطي فرصة لراسها تاهي ..ست سنين وهي بوحدها وست سنين وهو تابعها فعلا تبدل فكلشي ولا واحد اخور…وبين ليها شحال كيبغبها تاهي تستاهل يبغيها شي حد وتعيش قصة حب …