الفصل السادس
حاول مرارًا وتكرارًا القفز فوق السيارة لكن جميع محاولاته باءت بالفشل الشديد مما جعله يدير ظهره بحزن وهو يقول:
- خلاص أنا فشلت، مش هطلع
قفزت على الفور من فوق السيارة واقتربت منه وهي تقول:
- بص علشان تعرف تعمل أي حاجة وأنت قطة لازم تنسى إنك كنت إنسان، أنت دلوقتي قطة يعني لازم تتصرف على إنك قطة وحياتك حياة قطط، أنت ايه دلوقتي؟ قطة، قول ورايا أنا قطة، أنا قطة
رفع أحد حاجبيه وقال بعدم رضا:
- أنتي بتعايريني ولا ايه، لا طبعا أنا بني آدم مش قطة، أنا بني ادم مش قطة، ميااااو
- شوفت؟! قطة ولا مش قطة؟
لوى ثغره وأجاب بحزن:
- قطة
ابتسمت وربتت على رأسه وهي تقول:
- الله ينور شطور، يلا بقى ننط على العربية، حظنا إن العربية كل ده متحركتش، بص هنط وشوف أنا بنط إزاي وبعدين اعمل زي ما بعمل بالظبط، خلصانة؟
رفع أحد حاجبيه وقال بتعجب:
- خلصانة؟ حتى القطط اتعدت، ماشي يا ستي خلصانة
تحركت وقفزت لتُصبح فوق السيارة في أقل من ثانية مما جعله يقول بترجي:
- معلش ممكن إعادة
أغلقت عينيها ورددت بنبرة تحمل الحزن:
- يارب صبرني، إعادة ايه أنت بتتفرج على ماتش، ركز أبوس فروة دماغك
قفزت إلى الأسفل وعادت القفز مرة أخرى فوق السيارة قبل أن تنظر له وهي تقول:
- ها هتنط ولا نشوف الـ VAR؟
- لا خلاص هنط، يا مسهل يارب
استعد جيدًا من أجل القفز وقام بتقليدها بشكل جيد قبل أن يقفز بقوة وفي تلك المرة نجح أخيرًا وما إن وصل إلى الأعلى حتى ركض بسرعة وهو يقول بسعادة:
- الله يا بلدنا الله، شوفتي النطة؟ وربنا جمدان
لوت ثغرها وهي تشاهده يقفز من السعادة أمامها ورددت:
- ربنا يشفي، أنا ايه اللي وقعني في واحد مجنون بالشكل ده، على رأي المثل يا مستنية العريس في موسم التزاوج بكرا يجيلك قط مجنون يطيرلك آخر برج من دماغك
جلس في مكانه وابتسم وهو يقول بارتياح:
- ياااه على قد ما الواحد زعلان على اللي هو فيه على قد ما هو مبسوط وفرحان إنه بقى خفيف كدا، رشاقة وليونة تقوليش عصفورة
ابتسمت وقالت على الفور:
- قولتلك حياة القطط أحسن بكتير وأنت كل اللي عليك عايز ارجع بني ادم تاني
رفع أحد حاجبيه وقال باعتراض:
- أيوة عايز ارجع بني ادم تاني، هو علشان قولت القطط عندها رشاقة وليونة ابقى قطة طول عمري؟ اسكتي اسكتي كفاية نونوة على الفاضي
رفعت أحد حاجبيها وقالت بنبرة تعبر عن عدم الرضا:
- حاضر هسكت وهبطل نونوة، هم كدا البني ادمين ياكلوا وينكروا
- البني ادمين؟ تعرفي إننا مطلعين عليكم نفس الجملة؟
اتسعت حدقتاها وقالت بصدمة:
- ايه بتقولوا القطط بتاكل وتنكر؟
ابتسم وحرك رأسه بالإيجاب قائلا:
- بالظبط يا قطة
لوت ثغرها وعبرت عن رفضها قائلة:
- لا يا حبيبي دي قطط البيوت مش إحنا، منهم لله بوظوا سمعتنا
جلس مكانه وقال متسائلًا:
- نفسي اعرف ايه سر البغضاء بينك وبين قطط البيوت، هو حد منهم كلمك يا بنتي؟
ابتسم وتابع بمكر:
- ولا القطة غيرانة منهم علشان بياكلوا ويتدفوا ويعيشوا كويس
