သိုင်းနတ်ဘုရားအသူရာ(ချူဖုန်း) အတွဲ(၁)သိုင္းနတ္ဘုရားအသူရာ(ခ်ဴဖုန္း) အတြဲ(၁)

171 - 175

''သိုင်းနတ်ဘုရား အသူရာ''
- - - - - - - - - - - - - - - -
အခန်း(၁၇၁) လွှမ်းမိုးခြယ်လှယ်နိုင်လွန်းတဲ့ဆရာ

ထိုအသံ ထွက်ပေါ်လာပြီး ဖိအားက အရာအားလုံးအပေါ် လွှမ်းခြုံလိုက်ချိန်၌ပင် လူရိပ်တစ်ခုက ချူဖုန်းရှေ့တွင် တစ္ဆေတစ်ကောင်အလား ရပ်လျက်ရှိနေပြီး ချူဖုန်းနှင့် စူးရို့တို့အား သူ့နောက်သို့ ပို့လိုက်သည်။

ထိုပုဂ္ဂိုလ်မှာ ပခုံးထက်တွင် အဖြူရောင်ဝတ်ရုံတစ်ထည်နှင့် ရှိနေပြီး ၎င်းက သူ့မျက်နှာကိုလည်း ဖုံးကွယ်ထားလေသည်။ ထိုပုဂ္ဂိုလ်ကား မိုးပြာနဂါးကျောင်းအနေနှင့် အလွန့်အလွန် မြင့်မားသော တန်ဖိုးတစ်ခုဖြင့် ဖိတ်ကြားထားရသည့် ကမ္ဘာ့စိတ်ဝိညာဉ်ထိန်းချုပ်သူဖြစ်ပြီး မိုးပြာနဂါးကျောင်းအတွင်း၌ နံပါတ်နှစ် သိုင်းထိပ်သီးဘွဲ့ကို ပိုင်ဆိုင်ထားသူလည်းဖြစ်သည့် ကျူးကော်လျှို့ယွင်ပင် ဖြစ်ပေတော့သည်။

''ဒါက... ဒါ အကြီးအကဲကျူးကော်ပဲ... ဘာတွေဖြစ်နေတာလဲ... အကြီးအကဲကျူးကော်က ချူဖုန်းကို ဘာကြောင့် ကာကွယ်ပေးနေရတာလဲ... သူတို့နှစ်ယောက်ကြားမှာ ပတ်သက်မှုတချို့ ရှိနေလို့လား...''
အကယ်၍ အကြီးအကဲလီ ထွက်ပေါ်လာမှုမှာ မျှော်လင့်ထားမိသည့် ဖြစ်ရပ်တစ်ခု ဖြစ်နေသေးလျှင်ပင် ကျူးကော်လျှို့ယွင်မှာမူ အသေအချာ မျှော်လင့်မထားမိသည့် အဖြစ်ပင်တည်း။ သူ ထွက်ပေါ်လာမှုက လူတိုင်းအား အံ့သြထိတ်လန့်သွားစေသည်ဟု ဆိုနိုင်ပေသည်။

သိရှိရန်မှာ မိုးပြာနဂါးကျောင်းအတွင်း၌ လူတိုင်းအဖို့ အကြောက်ရွံ့ရဆုံးပုဂ္ဂိုလ်မှာ မိုးပြာနဂါးကျောင်းအုပ်ကြီး မဟုတ်သကဲ့သို့ ကာကွယ်သူခြောက်ဦးလည်း မဟုတ်သလို ကျုံးလီရိဟူလည်း မဟုတ်ပါချေ။ ၎င်းပုဂ္ဂိုလ်ကား ထိုခဏ၌ ချူဖုန်းရှေ့မှောက်တွင် ရပ်နေသည့် အကြီးအကဲ ကျူးကော်လျှို့ယွင်ပင် ဖြစ်လေတော့၏။

သို့သော် ကျန်သူများ၏ စိတ်ရှုပ်ထွေးမှုနှင့် နှိုင်းစာလျှင် စူးရို့က ပျော်ရွှင်သွားမိလေသည်။ ကျူးကော်လျှို့ယွင်က ချူဖုန်းအား သူ့တပည့်အဖြစ် လက်ခံခဲ့သည်ကို သူမကိုယ်တိုင် မျက်မြင်တွေ့ခဲ့ရသောကြောင့် ထိုအဘိုးအိုမှာ ချူဖုန်းအတွက်ဆိုလျှင် သူ့နောက်သို့ နှစ်ပေါင်းများစွာ လိုက်ပါခဲ့သော လန်ဝူးဆွေကိုပင် သတ်ဖြတ်ခဲ့သည်ကိုလည်း သူမ သိရှိထားသည် မဟုတ်ပါလော။ ထိုအခိုက်အတန့်၌ သူ ထွက်ပေါ်လာပြီဖြစ်၍ ချူဖုန်းအား မည်သူတစ်ဦးကမျှ ထပ်မံထိပါးနိုင်မည် မဟုတ်တော့ပေ။