သိုင်းနတ်ဘုရားအသူရာ(ချူဖုန်း) အတွဲ(၁)သိုင္းနတ္ဘုရားအသူရာ(ခ်ဴဖုန္း) အတြဲ(၁)

1331------1340

အခန်း(၁၃၃၁) ဂိုဏ်းချုပ်သစ်

''ဒါ စီနီယာဟုန်းချန်ရဲ့ ခွန်အားလား ... သူ ဒီလောက် စွမ်းအားကောင်းနေတာ သူ့ရဲ့ ကျင့်ကြံမှုက ဘယ်လို အဆင့်မျိုးမှာ ရှိနေလို့ပါလိမ့်''
ချူဖုန်းက စိတ်တွင်းမှ လေးစားမှုနှင့်အတူ အလေးအနက် မျက်မှောင်ကြုတ်ရင်း ပင့်သက်ရှိုက်လိုက်မိသည်။

''သူက အမြင့်ဆုံးအဆင့် သိုင်းဧကရာဇ်ငယ်တစ်ယောက် ဖြစ်ဖို့များတယ် ... ဘာကြောင့်လဲဆိုတော့ သူ့ရဲ့အင်အား ဘယ်လောက်ပဲ စွမ်းအားကောင်းကောင်း၊ ဧကရာဇ်အဆင့် စွမ်းအားက မသန့်စင်သေးဘူး ... ဒါဟာ သူက သိုင်းဧကရာဇ်တစ်ယောက် ဖြစ်မလာသေးဘဲ သိုင်းဧကရာဇ်ငယ်တစ်ယောက် ဖြစ်နေသေးတဲ့ အဓိပ္ပာယ်ပဲ''
အက်ဂီက ရှင်းပြလိုက်ခြင်း ဖြစ်သည်။

''အမြင့်ဆုံးအဆင့် သိုင်းဧကရာဇ်ငယ်တစ်ယောက် ဟုတ်လား ... ဒါဆို အဲဒါ စီနီယာဟုန်းချန်က သိုင်းဧကရာဇ် ဖြစ်ခါနီးနေတဲ့ အဓိပ္ပာယ် မဟုတ်ဘူးလား''
ချူဖုန်း အံ့ဩတုန်လှုပ်သွားမိသည်။

ထွတ်မြတ်သိုင်းနယ်မြေသို့ ရောက်ရှိလာပြီးနောက် ချူဖုန်းက သိုင်းဧကရာဇ်ငယ် အတော်များများနှင့် ဆုံခဲ့ရသည်။ သို့သော် ဤသည်မှာ အမြင့်ဆုံးအဆင့် သိုင်းဧကရာဇ်ငယ် တစ်ဦးနှင့် သူ ဆုံတွေ့ရသည့် ပထမဆုံးအကြိမ် ဖြစ်ပေသည်။

ဟုန်းချန် ဤရွေ့ဤမျှ စွမ်းအားကောင်းပြီး သိုင်းဧကရာဇ်ငယ် ပိုင်ယွမ်ပင် သူ့ထက် နိမ့်ကျနေသည်မှာ အံ့ဩဖွယ်ရာ မဟုတ်တော့ပါချေ။

''ဝီး''
ပြင်းထန်သော တုန်ခါမှုနှင့် အုံကြွနေသော လေပြင်းများနောက်တွင် နောက်ဆုံး၌ တစ်လောကလုံး ပုံမှန်ပြန်ဖြစ်သွား၏။

ပြောစရာရှိသည်မှာ အရာအားလုံး ပုံမှန်ပြန်ဖြစ်သွားချိန်တွင် လူတိုင်း၏ အမူအရာများ အကြီးအကျယ် ပြောင်းလဲသွားကြခြင်း ဖြစ်သည်။ သူတို့အားလုံး ကြက်သေသေနေလျက် ရှိကြသည်။ ချူဖုန်းပင် ခြွင်းချက်မရှိပါချေ။

ထိုအခိုက်အတန့်၌ လူအများအပြားမှာ လေထဲတွင် ပက်လက်ဖြစ်စေ မှောက်ခုံဖြစ်စေ လဲလျောင်းနေကြသည်။ ဤလူများမှာ စောစောပိုင်းက ဟုန်းချန် ပြသခဲ့သည့် အင်အားကြောင့် အကြီးအကျယ် သက်ရောက်ခံထားရကြောင်း ထင်ရှားပေသည်။