صبـ(⛅)ـُ(آٍلـٍـً(🌺)ـٍورٍدً)ـ(⛅)ـٍآٍآٍحً...
صباح الامتحانات والتوفيق ان شاءالله للجميع...
دعواتكم لطلاب السادس ابتدائي ووياهم ابني 🥲
ان شاءالله اليوم تكون الاسئلة واضحة ...
حبيت اعلن عن موعد النشر حتى اتحمس بزيادة واكتب والتزم
ان شاءالله راح يكون يوم 20 بشهر 6
اذا الله خلانا عايشين ❤❤
حبيت ويه تحديث الموعد انشر وياها هذا المشهد من القصة....
....
كريمة ؛
دخلت بالأفرع هاي انه وسعود نندلها درب درب من جنا صغار كله نجيهه الظهر نلعب نغافل امي من تنام الظهرية ونجي
مشينا بسرعة واحاجي غفران امشي امشي قووي رووحج
وهي متعجبة كالت كركم وين موديتني ولج تعبت بطني تعورني اريد امي
هدت ايدي وكعدت بنص الدرب جان فرع ضيگ على جانب اكو نهر والجانب الثاني خص (سياج من سعف النخل وجذوع النخل وشرك)
واشجار كثيفة ونخل بحيث ماكو مجال حتى لأشعة الشمس تدخل وتضوي المكان
وورا هذا الخص كياعين جبييرة كلش جبيرة ممتدة من الشارع لحد قريب لشط العرب
ومابيها بيوت كلش قليلة وبعيدة
وكفت تخصرت وانطيتها جنطتها كتلها كوومي كوومي وصلنا هذا الطريق اقرب لبيتكم
رفعت راسها باوعتلي تعبانة تحجي مايعة كالت اكلج مو ابن خالتج جان يم المدرسة ليش شردنه عنه
كتلها يا توها وصلتج الكهرباء صلوات؟؟
رفعت راسها ليفوك كلش ولزمته وغمضت
كالت دايخة روحي راح ابقى هنا جيبي امي وتعاي مابيه امشي بعد كركم
كومتها بسرعة وشلت جنطتها وانطيتها الها
وانه ادردم عزا العزااا كركم وعزاا العزااج وعزاا بشار اكرهه واكرهج واكره رووحي و اكررهكم
كالت يا انه مريضة اكو واحد يكول للمريض هيج
جاوبتها بنفاذ صبر وعصبية كوومي غفران ترى انه موو امج وتدلعين عليه
ردت بفهاوة ونوب تكرهين بشار جا انت مو تحبينه
تنهدت وجريت نفس احس گلبي وجعني
كتلها احبه واكرهه بنفس الوكت مصيبتي هذا
مددت رجليها كالت اكلج كركم مابيه
كتلها بعصبية كوومي مابيج شي وصلنه اصلا كوومي كوومي
سحيتها بعصبية كامت كوة عليها
مشينه خطوتين وكبل لا نوصل لفرع ثاني على الجانب الي يطلعنا من هالمتاهة
فجاة واحنه نريد نتعدة وانا لازمه غفران من قميصها المخبخب وطلع النه رجال لابس قميص الدكم مالته مامدكمة عدل
وصدره نصه طالع بيده بطل وعيونه حمرة طوخ
شافنه شرب البطل كله لأخر قطرة
وانه قطرة دم مابقت بيه المكان الي احنه بيه عبالك بس سمه وكاع والسياج والنهر
عيونه علينه وابتسم ابتسامة تخوووف وفتح ايدينه اثنينهم
وكال بنبرة كلها شهوة
تعاي
وكفت صفصفت اول مرة احس بكمية االخوف هايه
كال تعاي ما اسويلج شي بس... وغمز
انقرفت من نظراته وصوته بثواني اباوعله لا ادري يريدني لا ادري يريد غفران
صرخنااا بصوووت عالي بس منوو يسمعنا فررع منو يتعدى منه غير المخابيل بالعشگ مثلي والسكارى مثل هذا
من صرخنا شفته دنگ ركع البطل بصخرة بالكاع انكسر البطل وتناثر الگزاز جوه رجلينه
درنا بسرعة ونريد نركض وهو يركض ورانا ويهوش بچيييت من الخووف والرجفة بيه
دعيت ربي لا تخليني سبب بمصيبة
ظلينه نركض الفرع صار طووويل مدري هو اصلا طووويل وشيطلعنا منه
غفران ماادري شلون جاي تركض ومنين اجتها القوة وانه جنت توني اسح بيها سح كوة تمشي...
نركض وهالبلوة ورانا بيده البطل المكسور ويركض ويصيح اوووكفي وصوته قريب منه كلش شعره بينه وبيينه
دعيت ياربي سلمنه....
......
بلحظة افتريت فرة قووية احس انهدگت بشي وصوت صياح غفران ترس ذاني
الخوف شتتني وضعفني بطني لوتني وصوتها بعده يوصلني ضعيف ماجاي اكدر افرزن شنو تكول
واصلا هي بالعادة كوة تطلع الكلمة من حلكها....
بلحظة باوعتلها واشوف قميصها الابيض مال المدرسة متروس دم....
....
نورا ناصر
22 أيار 2023
انتظروني
احبكم 😘
YOU ARE READING
في عداد الأعمار
Romanceأعرفُ أنكِ فتاةٌ باردة تشبه الجنازة، تشبه الوطن، وتشبه نفسها أيضاً إنكِ روحٌ لا يستطيع الكل فهمها، وما لا نستطيع فهمه، مقدّس..
