تكملة باقي حلقات الجزء الرابع من أنت قلبي

الجزء الرابع /الحلقة ١٠٥

#أنت_قلبي٤
_________
الحلقة ١٠٥

أمام قسم الشرطة.
مراد : أنا عملت إيه لكل دا مش فاهم؟!
هشام بانفعال : علشان غبي وهتفضل عيل وعيل عنيد كمان أنت مين قال لك تعمل اللي عملته ده رايح له وبتتخانق معاه كمان.. عاجبك دلوقت لما مضيت بتعهد بعدم التعرض له يعني بدل ما كان ليك حق ومستني تاخده اديك مش قادر دلوقت تطالب بيه علشان معكش دليل.. أنت بتتصرف من دماغك ليه؟
مراد : الراجل ده باعت ناس تراقبني أنا ومراتي وعارف غرضهم إيه لإن اللي يعرف الواد ده قال لي كل حاجة حضرتك بقى منتظر مني إيه ما أنا قاعد اهو بقالي فترة مستني علشان اوقعهم محصلش حاجة هحبس نفسي في البيت واخاف منهم.
هشام : لأ روح اضربه اقولك اقتله وودي نفسك في داهيه.
مراد : السجن اشرفلي من إني اقعد كدا حاطط ايدي على خدي ومنتظر حد يجيبلي حقي.
هشام : وأنت كدا بقى اخدت حقك؟!
مراد : أنا ماشي.
هشام يمسك ايد مراد بعنف : استنى هنا لما ابقى بكلمك تقف تسمعني لما اخلص كلامي.
كان مجدي(المحامي) خارج من جوه.
مجدي : فيه ايه بس يا هشام اهدا شوية محصلش حاجة لكل ده خناقه عادية وانتهت بالصلح.
هشام : ما هو انت متعرفش يا مجدي إن الراجل ده مصاحب الواد اياه ومتفقين مع بعض انهم ينتقموا من حضرته وهو بغبائه رايح يتخانق معاه بدل ما يدور ازاي يوديه في ستين داهيه.
مجدي : مراد مقالش الكلام ده.
مراد : هما عارفين كل حاجة يا انكل بس كمان أنا مش مضطر استنى أكتر من كدا.
هشام : لأ هتستنى علشان مقدمكش حاجة تانية تعملها وإلا هتبقى بتبوظ كل حاجة زي اللي عملته الليلة.
مراد : أنا ماشي بعد اذنكم.
وركب مراد عربيته ومشي.
مجدي : يلا بينا يا هشام واطمن التعهد دا ليهم هما الاتنين أما بخصوص الواد ده فهيتجاب هيروح فين.
هشام : يروح في داهيه يا مجدي علشان أنا جيبت أخري.
مجدي : معلش اهدا كدا وبينا يلا نمشي.
________
في المطعم..
حمزة : ساكته يعني.
نادين : عاوزني أقول إيه؟
حمزة : هو انتي ليه كلامك معايا كدا؟
نادين : علشان أنا كدا بقى.
حمزة : مفيش حاجة اسمها علشان أنا كدا في حاجة اسمها اني أحافظ على بيتي واتعامل كويس مع الراجل اللي مفترض يعني هتجوزه.
نادين : ومين اللي وصلنا لكدا؟
حمزة : اظن لو قعدنا نتعاتب انتي عارفه مين اللي هيطلع غلطان علشان كدا أنا مضطر انسى اللي حصل ونحاول نبدأ صفحة جديدة ولا انتي ايه رأيك؟
نادين : حلو الطقم دا مش كدا.. اهو أحسن ما كان يروح لواحدة غريبة وفي الاخر أنا أم ولادك برضو.
حمزة : هو بصرف النظر عن التلميح اللي ملوش أي لازمة ده علشان دا كان موضوع كدا وانتهينا منه بس انتي مش أم ولادي بس يا نادين وانتي عارفه كنتي ايه بالنسبه لي لولا دماغك اللي عاوزه تتكسر دي.
نادين : ما بلاش غلط علشان مقومش واسيبك.
حمزة : لا اقعدي رايحه فين.. أنا بس اللي اقصده تهدي كدا وتفكري في كلامك قبل ما تقوليه وتحاولي تعقلي وتهدي على أمي شوية انتي لو لفيتي الدنيا كلها مش هتلاقي حما في طيبة قلبها.
نادين : ماشي.
حمزة : ماشي ايه؟
نادين : ماشي وخلاص.
حمزة : على فكرة الجوازة دي هتكلفني كتير واحنا كنا في غنى عن كل ده.
نادين : خلاص احنا لسه فيها هخلع الشبكة وتروح تبيعيها ولا تسيبها للعروسة الجديدة وبكدا مش هتكون خسرت حاجة.
حمزة : أنا بهزر معاكي وبعدين أنا مخسرتش حاجة بالعكس بس تهدي شوية يا نادين عاوزين نربي العيال بلاش عند يخسرنا كل حاجة.
نادين : ما أنا راجعه علشان خاطرهم.
حمزة : علشان خاطرهم وبس؟
نادين : اه.
حمزة : خلاص ماشي وأنا كمان وافقت بس علشان خاطر الولاد.
نظرت له بغضب.
حمزة : ايه ما انتي قولتي نفس الكلام وأنا متكلمتش.
نادين : اطلبلي حاجة ساقعه علشان اهضم اللي أكلته.
حمزة بابتسامة : حاضر.
_________
في فيلا آسر.
آسر قاعد على السرير وقدامه اللاب بيخلص شغل لانه مراحش الشركة النهاردا.
ملك تخبط..
آسر : ادخلي يا ملك.
ملك بتفتح الباب بابتسامة : بابي حضرتك صاحي منمتش كويس بقى علشان نتعشا مع بعض.
آسر : حبيبتي أنا باكل حاجة خفيفة قبل ما أنام ومامي عملتلي أكل قبل ما نمشي.
ملك : ايه دا بقى يعني اتعشيت من غيري وأنا اللي مرضتش اكل مع عمار وقولتله لما اروح بيتنا هبقى اكل مع خالك.
نظر لها آسر بابتسامة.
فقربت ملك وقعدت جنبه على السرير : بتعمل ايه؟آسر : بخلص حاجة كدا في الشغل ما انتي عارفه مروحتش النهاردا.
ملك : بس انكل حسام قايم بالواجب.. مش كدا ولا ايه؟
آسر : اه حسام تقريبا هو اللي شايل الشغل كله.
ملك : تعرف إن البيت وحش قوي من غير مامي.
سيف آسر الشغل اللي كان بيعمله وقفل اللاب بتنهيدة.
ملك : ايه يا بابي مالك؟
آسر : مفيش يا ملك.
ملك : أنا عارفه إن حضرتك زعلان علشان مامي مش موجودة حقيقي كانت عامله حس للبيت بس طبعا مروحها لمليكة في الوقت ده كان ضروري.. أنا قلقانه على مليكة.
آسر : ادعيلها يا بنتي تقوم بالسلامة والفترة دي تعدي على خير.
ملك : بابي هو حضرتك عرفت مامي ازاي؟
آسر : مامي مين؟
ملك : أكيد مامي اللي هي مراتك يعني.
آسر ابتسم لها : معلش يا حبيبتي أنا مقصدش.
ملك : لأ مش زعلانه أنا مراتك بقى هي مامي بجد.
آسر بتنهيدة : عاوزه تعرفي ايه؟
ملك : حضرتك قولت قبل كدا إن مامي كانت شغاله في شركة جدو حضرتك لما شوفتها نشيطة كدا في الشغل قومت اتجوزت ها؟
آسر : هههه لأ جوازي من مامي مكانش له علاقة خالص بالشغل بالعكس أنا مكنتش حابب إنها تشتغل.
ملك : ليه بقى؟
آسر : يعني مش حابب حد يشوفها غيري.
ملك : ايه دا معقول؟
آسر : كنت بغير عليها قوي.
ملك : هو بصراحة بصراحة يعني حضرتك معاك حق.
آسر : هههه
ملك : ايه دا بقى هو أنا كلامي فيه حاجة تضحك؟
آسر : لا يا حبيبتي هو حقيقي مامي تتحب علشان كدا اتجوزتها.
ملك : عرفتها ازاي بقى؟
آسر : شوفتها أول مرة في الجامعة واتخانقت معايا أنا وحسام ابن عمي.
ملك : هههههههههههه ايه دا بجد؟
آسر : حضرته كان بيعاكس أصله زمان... ولا بلاش.
ملك : هههههههه عمار بيتخانق معايا برضو بسببه بقوله مليش دعوة كلمه هو مش ابن عم مامتك برضو هههههههه
حب من أول نظرة بقى وكدا... اه يا عم هههههههه
آسر : لا مش من أول نظرة ولا حاجة هو كان موقف كدا وعدا عليه فترة وفي يوم لاقيت جدك بيكلمني اني اروح عنده البيت وكدا أنا كنت عايش مع مامتي.
ملك : اه واخده بالي.
آسر : المهم يعني روحت عادي أنا معرفش إن عنده ضيوف هناك لاقيت تيته سهير وجوزها وقتها ومعاهم القمر اللي اتجوزتها.
ملك : امممم حلوة قوي الجملة الأخيرة دي يا آسر بيه.
آسر : هههههههههههه
ملك : وبعدين؟
آسر : وبعدين اشتغلت معانا في شركة جدو وبقيت اشوفها كل يوم بنت في حالها بتيجي تخلص شغلها وتمشي مش مصاحبه حد مبتقعدش مع زمايلها وأكتر من بنت تيجي تشتكي منها.
ملك : ليه؟
آسر : مش على مزاجهم وجودها معاهم في مكان واحد مضايقهم علشان مش شبه حد فيهم.
ملك : وحضرتك عملت إيه؟
آسر : طلبت تجيني المكتب.
ملك : اه وبعدين؟
آسر : لما جات لاقيتني بطلب ايدها للجواز.
ملك : هههههههههههه ايه دا بسرعة كدا.
آسر : هنستنى ايه تاني كل دي كانت علامات بتقولي إن البنت دي شبهك وهي اللي تنفعك.
ملك : وعملت ايه بقى أكيد كانت طايرة من الفرحه ابن صاحب الشركة بقى اللى البنات هتموت عليه هههههههه ميترفضش طبعا.
آسر : بالعكس كل دي كانت أسباب خلتها ترفضني وتهرب بسرعة قبل ما اكمل كلامي.
ملك : غريبة أنا لو مكانها كان ممكن يغمى عليه من الفرحه هههههههه أصل كان نفسي قوي أعيش قصة حب يعني وكدا.
آسر : مش كل قصة حب بتنجح أوقات من كتر الحب بيجيلهم سدة نفس بعد الجواز وتلاقي مفيش حد طايق التاني.
ملك : هههههههههههه دي زي ما الواحد كدا ياكل أكل مسكر كتير فنفسه تجزع من أكل الحلو
ههههههههههههه كمل كمل.
آسر : أكمل إيه؟
ملك : كمل الحكاية.
آسر : بس مفيش أنا أتقدمت واترفضت لكن ميأستش واتقدمت تاني وشرحت موقفي وبدأت بقى اكلم مامتها اكلم جدتها بالبلدي كدا سوقت عليها كل الناس  لاقيتها بتقولي أنت جيبت لي صداع.
ملك : هههههههههههه
آسر : فوافقت بقى واتجوزنا وخلفنا صبيان وبنات.
ملك : قالت لحضرتك جيبت لي صداع هههههههه وسكت؟!
آسر : لا مسكتش ما أنا قولتلك اتجوزنا وجيبتها تعيش معايا هنا.
ملك : هي جميلة وأنا بحبها بحسها أمي قوي ومش متخيله إن ليه أم تانية غيرها.
آسر بيحاوطها بدراعاته : إيه رأيك نشرب قهوة مع بعض.
ملك : اممم حضرتك عاوز تشرب قهوة وبتجيبها فيه صح؟ مامي قالت فنجان قهوة الصبح وواحد بعد الضهر أو على حسب بقى ما تيجي من بره ولو شربت في المكتب هناك في الشركة ها.. مفيش قهوة تاني بعد كدا لحد تاني يوم الصبح.
آسر : انتي بقى قاعدة معايا علشان تحافظي على صحتي ولا علشان تضايقيني؟
ملك : الاتنين هههههههه
آسر : طب ما أنا مشربتش غير واحد الصبح.
ملك : لأ شربت قبل ما نمشي من هنا أنا دخلت ولاقيت فنجان القهوة في ايدك ياريتني صورتك.
آسر : فنجان كمان مش هيأثر.
ملك : على فكرة بقى أنا كدا هخالف التعليمات وهتعاقب.
آسر : لا متخافيش مش هتعرف.
ملك : فنجان واحد بس.
آسر : ايوه.. واحد بس.
ملك بتقوم : حاضر..
_______
في التليفون.. 📞
سيف : طيب مبروك إنك عقلت.
حمزة : أنا عاقل يا سيف عقبال ما بنت أختك هي اللي تعقل.
سيف : اه رجعنا لوجع الدماغ تاني.
حمزة : انت عمال تخبط في ايه عندك؟
سيف : بعملي لقمة أكلها وكوباية شاي بعد ما نيمت العيال.
حمزة : نيمت العيال هههههههه امال فين أم العيال؟
سيف : مليكة محجوزه في المستشفى.
حمزة : إيه!
خير يا سيف.. حصل إيه ؟
سيف : تعبت شوية علشان ميعاد الولادة قرب روحنا هناك قالوا لازم تقعد في المستشفى لحد ميعاد الولادة لإن في إنذار بولادة مبكرة والجنين حجمه قليل وأنا خايف عليها قوي ادعيلها يا حمزة.
حمزة : يا حبيبي ألف سلامة عليها أنا معرفش حتى نادين مقالتليش.
سيف : محدش يعرف أصلا غير مامتها وباباها واخواتها.
حمزة : وأنت قاعد بالعيال بقى في البيت؟
سيف : بروح الصبح اقعدهم هناك ساعتين ولا حاجة واروح أخلص شغلي واستأذن بدري وارجعلهم بقالي يومين على كدا.
حمزة : ومتعرفش تاخد إجازة؟
سيف : لأ ما أنا شكلي هسيب الشغل قريب.
حمزة : ليه بس كدا؟
سيف : مش مستريح هناك معرفش ليه بيحاربوني وعاوزني اكنسل.
حمزة : طب وأنت تديهم فرصة ليه شوف شغلك وبس.
سيف : ما أنا شايف شغلي بس هما مش سايبيني في حالي كل شوية يشتكوا للمدير وكلام كله كدب وأنا بصراحة زهقت وكرهت المكان هناك.
حمزة : طب شوف شغل في شركة تانية.
سيف : لا وعلى ايه أنا اسيب لهم البلد كلها يشبعوا بيها وارجع بلدي.
حمزة : خسارة يا سيف أنت بتقول الشغل عندك كويس والمرتب يعني حلو.
سيف : بس مش مستريح يا حمزة رغم إن معايا الولاد ومليكة بس مش مستريح وبحاول اعدي كتير بس مبقتش قادر اهو بقى زي ما تيجي أنا لا متبت فيها ولا أنا هكون سبب في خروجي منها.
حمزة : طيب أنت هتعمل ايه الفترة الجايه؟
سيف : قصدك يعني هعمل ايه مع الولاد والشغل
لااا ما مامت مليكة جايه هتقعد معاها في المستشفى وهبقى اسيب معاها الولاد فترة الصبح دي وبعد الضهر هبقى اروحلهم اجيبهم البيت أو اقعد معاهم شوية واجيبهم بالليل يباتوا معايا.
حمزة : تعب يا أخي.
سيف : هعمل إيه هي الغربة كدا.
حمزة : طيب اسيبك بقى تاكل لقمه علشان تلحق تنام.
سيف : أنام ايه أنا ساعة كدا وهصحي الولاد علشان رايحين المطار نجيب طنط سهر من هناك.
حمزة : هي جايه الليلة؟
سيف : اه قدامها ساعة ونص وتوصل بالسلامة.
حمزة : طيب ابقى سلملي عليها.
سيف : ماشي يا حبيبي يوصل وألف مبروك على الخطوبة عقبال الفرحه الكبيرة.
حمزة : هههههههههههه
سيف : عقبال البكاري وتجيبوا لنا صبيان وبنات كدا نفرح بيهم.
حمزة : ما احنا جيبنا خلاص لسه هنجيب.
سيف : وماله العيال عزوة برضو هههههه هاتوا تاني.
حمزة : ادعي بس دماغها تلين وتلايمها خلينا نعرف نربي اللي عندنا علشان شكلها كدا ميطمنش.
سيف : لاااا متقلقش هي اتعلمت الدرس خلاص بس بتتقل شوية ما أنت عارف نادين.
حمزة : عارفها!
وهو في حد يعرفها قدي على العموم احنا ونصيبنا بقى تصبح على خير.
سيف : وأنت من أهله.
قفل سيف مع حمزة ونظر في الساعة : يا خبر دا يدوب أكل أي حاجة وأقوم اصحي حلا ويوسف علشان منتأخرش.
_________
في منزل عُمر.
فريدة : حلو يا نادين بس شكله غالي قوي.
نادين : وماله غالي غالي هو في حاجة تغلا عليه؟!
فريدة : لأ مش القصد بس يعني انتي عندك كان لازمته إيه كنتي جيبتي حاجة كدا بسيطة تفرحي بيها وخلاص.
نادين : لا لازم يدفع كل اللي حيلته علشان بعد كدا يفكر ألف مرة قبل ما ينطق ويجيب سيرة الطلاق دي على لسانه.
ياسمينا جايه بالشاي وبتقعد : المهم انتي كمان تكوني اتعلمتي وتاخدي بالك كويس من تصرفاتك وكلامك علشان موصلهوش إنه ينطقها ما هو لكل فعل رد فعل ولا إيه يا أستاذة نادين؟
نادين : بس هو الراجل ومفروض يعني ياخد باله من كلامه قبل ما ينطقه.
ياسمينا : اه وانتي علشان ست بقى تعملي وتقولي ما بدالك ومتتحاسبيش هو بس اللي يتحاسب على كلامه.. مش كدا؟!
فريدة : فيه ايه بس يا جماعة احنا مفروض يعني الليلة نفرح مش كدا.
نادين : لأ ما هو ماما لازم تنكد عليه حتى في اليوم اللي مفروض أفرح فيه.
ياسمينا : أنا مش عاوزه انكد عليكي يا بنتي بالعكس أنا مش عاوزه غير اني اشوفك فرحانه وسعيدة في بيتك ومن واجبي إني انصحك تاخدي بالك من بيتك وولادك وتحافظي عليهم ودا مش هيحصل غير لو احترمتي جوزك وأم جوزك علشان هي معملتش ليكي حاجة امال لو كان عندك حماة زي عمتي أم ابوكي كنتي هتعملي ايه أهو أنا بالرغم يعني إنهم بيقولوا مبسبش حقي بس كنت اوقات اعدي وافوت علشان مش كل شوية اتخانق مع باباكي وهي كانت بتفرح قوي لما تلاقينا متخانقين يلا بقى اهي راحت لحالها.
فريدة : ماما خايفه عليكي يا نادين ومش عاوزه غير سعادتنا زي ما قالت.
ياسمينا : جوزك عامل إيه معاكي يا فريدة؟
فريدة : كويس يا ماما ياسين طيب قوي وأنا لو لفيت الدنيا كلها مش هلاقي راجل زيه.
ياسمينا : سامعه يا نادين؟
نادين : ما هو حمزة كمان كويس بس بيستفزني.
ياسمينا : ولا بيستفزك ولا حاجة الراجل غلبان وفي حاله انتي بس اللي حاطه مامته في دماغك.
نادين : بيحبها قوي يا ماما.
ياسمينا : وماله يا بنتي لما يحبها مش أمه وانتو كمان مش بتحبوني وولادك بيحبوكي طيب فكري كدا وحطي نفسك مكان مامته لما تمر السنين وابنك يكبر ويتجوز تيجي واحدة تقوله انت بتحب مامتك ليه.. ما هو لازم يحبها وطالما الراجل كويس معاكي والست كمان مش بتأذيكي ليه بقى المشاكل دي وتكرهيها ليه علشان ابنها بيحبها يعني عاوزاه يحبك انتي ويكره اللي خلفته وربيته عقل مين اللي يقول كدا؟
فريدة : طب ياريت مامت ياسين عايشه وأنا كنت حطتها في عينيه.
نادين : يا شيخه اسكتي ما هو لو كانت عايشه مكنتيش قولتي كدا.
ياسمينا : يا ستي لو بتأذيكي ابعدي عنها وكل واحد في حاله واظن حمزة قال الكلام ده منعا للمشاكل مع إن الست مبتعملش مشاكل خالص انتي اللي دماغك صعبه يا نادين.
نادين : ماشي هحاول.
ياسمينا : هتحاولي!
أنا داخله أنام تصبحو على خير.
_________
في شقة مراد.
مريم قاعدة على السفرة : مراد مش هتيجي تاكل؟
مراد : لأ.
قامت وراحت قعدت جنبه : فيه ايه مالك؟
مراد وهو مضايق : مفيش يا مريم.
مريم : طب مش عاوز تاكل ليه؟
مراد : كدا مليش نفس.
مريم : مقولتليش عملت إيه في القسم؟
مراد : معملتش حاجة وسيبيني بقى دلوقت.
وقام دخل جوه.. وقربت مريم اخدت الأطباق المطبخ.
ودخلت بعدها علشان تنام.
نظرت لمراد اللي كان قاعد على السرير منامش.
مراد : ايه فيه بتبصيلي كدا ليه؟
مريم : فيه ايه يا مراد هو ممنوع ابصلك كمان؟!
مراد : اطفي النور عاوز أنام.
مريم : وهو أنا كنت شغلته؟!
مراد : فيه ايه يا مريم انتي هتتعبي يعني لما تقفلي النور؟
مريم : مش القصد بس أنا مش فاهمه أنت ليه متعصب دلوقت هو أنا عملت لك حاجة؟
مراد : معملتيش حاجة بس مضايق دلوقت ياريت لما تشوفيني كدا متحاوليش تتكلمي معايا لحد ما اهدا لوحدي.
مريم : حاضر.
مراد بتنهيدة : تصبحي على خير.
نظرت له والدموع في عينها.
مراد : فيه ايه بس يا مريم هو أنا عملت لك حاجة ؟ خلاص متزعليش أنا بس مضايق شوية وانتي عماله تضغطي عليه بالأسئلة اللي مش وقتها دي.
مريم : خلاص يا مراد تصبح على خير.
مراد : وانتي من اهله بس متزعليش مني.
مريم : خلاص مش زعلانه.
________.
في فيلا آسر.
كان آسر قاعد مع ملك بنته أمام التليفزيون قبل
ما يغلبه النوم.
ملك : بابي.. بابي.
آسر بصوت ناعس : هاه.. عاوزه حاجة يا ملك؟
ملك : هات ايدك بس علشان تطلع تنام فوق.
آسر : لأ أنا مش نايم.. صاحي أهو.
ملك : بابي أنت نمت؟ بابي.
آسر قام وهو مغمض عينه ونايم خالص.
ملك : هات ايدك اسندك تطلع اوضتك.
آسر بصوت ناعس : الساعة كام؟
ملك : تلاته ونص.
آسر فتح عينه : مامتك وصلت دلوقت.. صح؟
ملك : تقريبا بس أنا مستنيه سيف يتصل زي ما قال لنا.
آسر : طب هاتي التليفون.
ملك : حاضر.
بتاخد التليفون ولسه رايحه تعطيه لوالدها.
ملك : أهو سيف بيتصل.
آسر : طب ردي عليه.
في التليفون.. 📞
سيف : ألو.. سلام عليكم.
ملك : وعليكم السلام.. مامي وصلت بالسلامة يا سيف؟
سيف : اه اتفضلي يا ملك اهي معاكي.. اتفضلي يا طنط.
سهر : ألو.. ايوه يا ملك.
ملك : مامي حضرتك وصلتي بالسلامة؟
سهر : اه يا حبيبتي أنتم كويسين بابي نام؟
ملك : احنا كويسين بابي مع حضرتك اتفضل يا بابي.
آسر : ايوه يا سهر عامله ايه يا حبيبتي؟
سهر : أنا كويسه يا آسر لسه واصله وسيف واخدني على البيت هنام ساعة وبعدين الصبح هنروح لمليكة علشان مش هينفع يدخلوني دلوقت.
آسر : طيب ماشي لما تروحي عندها ابقي كلميني علشان عاوز اطمن عليها.
سهر : حاضر يا حبيبي نام بقى سهرتك الليلة تصبح على خير.
آسر : وانتي من أهله خُدي بالك من نفسك سلام.
سهر : حاضر مع السلامة.
______
في الصباح.. في فيلا مراد.
على السفرة..
أمل : مقولتليش حصل إيه امبارح في القسم ؟
أنت اتأخرت قوي وأنا النوم غلبني غصب عني.
هشام : كنت قاعد مع مجدي.
أمل : ليه مش خير؟
هشام : خير يا أمل بعد ما انتهينا من موضوع مراد قعدت أنا ومجدي والوقت ااخدنا.
أمل : قعدتوا فين؟
هشام : قعدنا في العربية.
أمل : ليه؟
هشام : كنا بندردش شوية.
أمل : ها ومراد عمل إيه؟
هشام : مضى تعهد بعدم التعرض.
أمل : إيه؟!
هشام : ما حضرته رايح يتخانق معاه في مكتبه يعني هو اللي اتعدى عليه من وجهة نظر القانون ملهمش دعوة بقى مين اللي ابتدا.
أمل : طب بالنسبة للاتفاق  اللي بين الرجل ده وبين الواد اللي كان بيهدد مريم ايه هيعدي كدا؟
هشام : ما هم مستنيين علشان يوقعوه كل دا كلام مرسل من غير دليل.
أمل : ازاي يا هشام وصاحب الواد ده هو اللي قال على الاتفاق اللي بينهم.
هشام : تمام بس مستنيين إنهم يوقعوهم وابنك مش قادر يصبر شوية لحد ما يبقى معاه دليل يسجنهم بيه.
أمل : ما هو بصراحة بقى يا هشام ازاي يعني عاوزه يبقى عارف الاتفاق القذر اللي ما بينهم ده ويسكت لازم يبقى له رد فعل ودا أقل حاجة يعني.
هشام : ما هو كدا يبقى ضيع حقه لإن الاتفاق لسه متمش.
أمل : أنت عاوزهم يخطفوها ويكملوا خطتهم دي علشان الدليل يبقى موجود؟
هشام : لأ طبعا بس على الاقل يتقبض على الواد ده الأول لانه هو اللي بدأ بالتهديد لكن كلام صاحبه مش دليل.
أمل : مراد قال لك إيه؟
هشام : حضرته قعد يزعق في الشارع قدام القسم وعلا صوته عليه.
أمل : معلش يا هشام اعذره.
هشام : ما أنا سيبته يمشي يا أمل كنت هعمله إيه.
أمل : كلمت آسر اطمنت إن سهر وصلت بالسلامة؟
هشام : لأ.. أنا رجعت نمت يدوب هما ساعتين وقومت تاني.
أمل : خلاص لو تعبان بلاش تخرج النهاردا.
هشام : عندنا اجتماع مهم دا غير المواعيد اللي عندي مينفعش تتلغي لاني لاغتهم قبل كدا لما روحت لهشام القسم حاسس إن حياتي كلها بقيت ما بين الشركة والأقسام.
أمل : والبيت مبقاش له مكان وسط دول خلاص!
هشام : أنا راضي ضميرك دلوقت انتي مش شايفه اللي احنا فيه يا أمل.
أمل : فيه ايه يا هشام مكنتش كلمة اتقالت يعني.
هشام : لا يا أمل ما هي مش مجرد كلمة وانتي عارفه.. ليه بتحسسيني بالتقصير من ناحيتك في ظروف زي دي كمان.
أمل : خلاص يا هشام اعتبرني مقولتش حاجة.
هشام : أنا قايم ماشي.
أمل : استنى بس متخرجش وأنت عصبي كدا.. خُدلك وردة.
هشام : وردة!
أمل : لسه قطفاه من الجنينة قولت اهو أي حاجة مبهجه ابدأ بيها يومي بفكر اكلم زينة تيجي تقضي معايا اليوم هي ورهف.
هشام : تمام كلميها.. متشكر على الورد.
أمل : العفو.
بيضمها ليه : معلش متزعليش مني أنا عارف إني مقصر في حقك..
أمل : أنا كنت بنكشك على فكرة أنا عارفه إنك مضغوط اليوم دول ما بين الولاد والشركة بس مش مهم كله بيعدي زي اللي قبله..
هشام : أمل انتي عارفه إنك شريكة حياتي ونص التاني اللي مقدرش استغنى عنه ولما بشيلك معايا ببقى عارف انك قدها.
أمل : مبقتش زي زمان يا هشام وأنت عارف.
هشام : ما انتي زي الحصان أهو بلاش دلع بقى.
أمل : الحصان شكله هيسلم الدفاتر خلاص.
هشام : بعد الشر عليكي يا أموله.
أمل : تعال بدري الليلة.
هشام بابتسامة : حاضر.
أمل : علشان نروح للولاد نطمن عليهم.
هشام : اجي بدري علشان نروح للولاد؟!
أمل : اه امال أنت فاكر إيه؟
هشام : مفكر إنك عاوزاني اجي بدري علشان نقعد مع بعض لوحدنا.
امل: هههههههههههه ما احنا هنروح مع بعض وهنقعد برضو.
هشام : زي ما تحبي أنا ماشي عاوزه حاجة؟
أمل : لا يا حبيبي سلامتك.
______
في شقة إياد.
إياد : شغل ايه يا بنتي؟
سهر : اشتغل يا بابي عادي ما أنا اشتغلت فترة في شركة خالي آسر.
إياد : طب وأنا مالي بحاجة زي دي مليش رأيي فيها؟
سهر : تكلم مازن.
إياد : طب ما تكلميه انتي.
سهر : لأ مش عاوزه اكلمه.
إياد : ليه؟
سهر : حضرتك عارف ليه ومش عاوزه اتكلم في الموضوع ده علشان أنا بفكر حقيقي في الانفصال عنه بس منتظرة قلبي يطاوعني.
منة : تعال يا إياد يلا يا سهر علشان تفطري.
سهر : قولت ايه حضرتك؟
إياد : فيه ايه بالظبط ما انتي قولتي حاجات كتير.
سهر : قصدي عن موضوع الشغل يعني وإن حضرتك تكلم مازن.
إياد : من رأيي تكلميه انتي تعالي افطري.
وتركها وقرب من السفرة.
في التليفون.. 📞
منة : اه يا حبيبتي كويسه والبنات كمان بخير.
مريم : طب ممكن أكلم سهر يا طنط ولا نايمه؟
منة : لا يا حبيبتي صاحيه سهر.. سهر.
سهر : نعم.
منة : كلمي مريم يا حبيبتي.
سهر : مريم!
منة : ايوه.. امسكي بقى.
سهر : ألو.
مريم : ازيك يا سهر عامله إيه؟
سهر : كويسه يا مريم انتي اخبارك إيه؟
مريم : الحمد لله
بقولك انتي هتبقي في البيت النهاردا؟
سهر : ليه؟
مريم : عاوزه ابقي اجي اقعد معاكي شوية وكمان اشوف البنات وحشني قوي.
سهر : اه طيب هشوف كدا وابقى ارد عليكي.
مريم : طب معلش قوليلي دلوقت علشان لو كدا اروح المشوار اللي كنت رايحاه.
سهر : لأ روحي مشوارك متعطليش نفسك.
مريم : كدا طيب.
وقفلت سهر مع مريم.
منة : ايه يا بنتي مالك بتكلميها كدا ليه؟
سهر : حضرتها قال بتقولي انتي في البيت النهاردا ولما سألتها قالت جايه تشوف البنات قولتلها هشوف وارد عليكي قالت لي لأ ردي دلوقتي علشان لو مش كدا اروح المشوار اللي كنت رايحاه النهاردا.
منة : ما هو طبيعي ترد عليكي كدا علشان انتي كنتي قليلة الذوق معاها قالت لك جايه اشوف البنات قوللها اهلا وسهلا تنوري مش تقوللها هشوف كدا وارد عليكي.
سهر : وايه قلة الذوق في كدا مش يمكن خارجة ولا حاجة ايه اعطل نفسي علشان حضرتها جايه تشوف البنات!
منة : فيها الخير مجاتش منك.
سهر : وهو مين المفروض يروح لمين مش أنا اللي جايه من السفر تيجي تشوفني.
منة : اما أمرك غريب ما هي يا بنتي كلمتك وقالت لي جايه تشوفهم انتي اللي معجبكيش الكلام ورديتي عليها بمنتهي قلة الذوق حقها تزعل وتردلك الكلمة طب بجد جدعه إنها ردت عليكي الرد ده.
سهر : حضرتك بتغظيني يا مامي.
منة : سهر انتي مش واعيه لتصرفاتك ولا مدركه بتعملي ايه ودا هيخسرك كل اللي حواليكي خُدي بالك.. تعالي هنا رايحه فين افطري قبل ما تدخلي جوه.
سهر : لأ مش عاوزه.
ودخلت سهر اوضتها.
إياد : منة اعمليلي فنجان قهوة علشان انزل اشوف شغلي.
منة وهي مضايقة من تصرفات بنتها : حاضر.
______
في فيلا كريم.
فراس : أنا قولت اللي يرضيه ضميري مبحبش أأذي حد بس دي كانت شهادة حق وكان لازم أقول كل اللي حصل.
والد فراس : احنا أسفين جدًا يا دكتور كريم إننا ازعجناك كدا على الصبح بس ابني بقاله ليلتين بأمانة مبينمش وعاوز يجي يقولك الكلمتين دول.
كريم : مفيش ازعاج ولا حاجة والبنت هتاخد جزاءها.
فراس وهو متردد ومحرج : هي جميلة عامله إيه دلوقت ممكن حضرتك تطمني عليها؟
نظر كريم لوالد فراس.
والد فراس : طيب نستأذن احنا بقى يلا يا ابني.
كريم : ما حضرتك قاعد يا أستاذ عباس.
والد فراس : معلش بقى تقابل في ظروف احسن من دي.
كريم : تمام.. اتفضل.
بيخرج والد فراس وهو قام بعد والدة..
فراس : حضرتك مقولتليش جميلة أخبارها ايه دلوقت؟
كريم : كويسه.
فراس : طب في إي خدمة ممكن اقدمهالها؟
كريم : نعم!
والد فراس : يلا يا ابني بتعمل إيه عندك؟!
فراس : حاضر يا بابا جاي بعد اذن حضرتك.
كريم : اتفضل.