تكملة باقي حلقات الجزء الرابع من أنت قلبي

الجزء الرابع /الحلقة ١٢٦

#أنت_قلبي٤
__________
الحلقة ١٢٦

في التليفون.. 📞
سهر : طب علشان خاطري يا مليكة متعيطيش بقى.
مليكة وهي بتبكي : بفكر اسيبله البيت وامشي.
سهر : لا يا حبيبتي متسبيش بيتك متخليش حد يشمت فيكي يا مليكة استني بس لما يجي شوفي هيعمل ايه ولو اتخانق معاكي كلميني وأنا اللي هاجي اخدك.
مليكة : أنا تعبت يا مامي كل أما أقول اتغير وخلاص استحمل علشان الولاد يحصل حاجة تثبتلي إن مفيش فايدة.
سهر : معلش انتي برضو كنتي اتكلمتي معاه بهدوء بتقولي هو عصبي بس بتقدري تتعاملي معاه كنتي اخترتي الوقت المناسب وكلمتيه في الموضوع ده وعرفتيه انتي ليه مش حابه تروحي هناك.
مليكة : يعني أنا غلطانه يا مامي؟!
سهر : يا حبيبتي أنا مقولتش إنك غلطانه بس كنتي اخترتي الوقت المناسب وكمان بـ أسلوب أحسن من كدا علشان يقتنع إنك مينفعش تروحي هناك على العموم حصل خير ولو رجع هادي كدا واتكلم معاكي كويس حاولي بقى تفهميه وجهة نظرك وهو هيقتنع طالما بـ أسلوب كويس لكن لو جه اتخانق معاكي متعمليش حاجة غير إنك تكلميني اجي أخدك باباكي بقى يبقى هو اللي يتفاهم معاه.
مليكة : حاضر.
سهر : متعيطيش ولا تزعلي نفسك يحيى كويس؟
مليكة : اه كويس.
سهر : متزعليش نفسك بقى يا مليكة.
مليكة : خايفه تسخنه عليه أكتر.
سهر : يبقى هو حر بقى يستحمل اللي يجرا له.
مليكة : ما أنا مش عاوزه مشاكل يا مامي.
سهر : مش لو هو اللي ابتدا يا بنتي ولا عاوزه يهينك ونسكت ويمكن ميحصلش أنا بس بقول لو حصل يعني قومي كدا اغسلي وشك وروقي شقتك واعمليلك حاجة تاكليها وطنشي حتى لما يجي متكلمش معاكي يبقى تسكتي خالص ولا كإن حصل حاجة عاتبك بقى فهميه إنك مش عاوزه تروحي علشان مش حابه تروحي هناك بس بهدوء كدا وبأسلوب حلو لاقتيه بدأ يشد معاكي في الكلام اتصلي بيه على طول.
مليكة : حاضر يا مامي.
سهر : مع السلامة يا بنتي اسيبك بقى تشوفي هتعملي إيه.
مليكة : تمام حاضر مع السلامة.
________
في منزل العمدة.
حامد : لا يا محمود حصل والواد اللي جه قالك إن في واحد راكب عربية وواقف على الطريق بيسأل عليك جه برضو قالي.
محمود : ايوه.. يعني عاوز ايه دلوقت؟
حامد : مين الراجل ده يا محمود وكان عاوزك في ايه؟
محمود : دا تاجر كبير وكان عاوز يشتري قطن..
حامد : يشتري قطن ايه وهو احنا زارعين قطن من الأساس؟!
محمود : لأ بس كان بيسأل عن حد عنده قطن.
حامد : وجاي يسألك مخصوص وبعدين تعال هنا قولي هو الراجل ده يعرف منين إنك خرجت اصلا من السجن ولا هو متابع اخبارك مين الراجل ده يا محمود وكان عاوزك في ايه؟
محمود : وأنت مالك يا حامد ما تخليك في نفسك يا اخويا هو أنت موركش غيري ولا ايه؟
حامد : لأ عندي مصالحي يا محمود بس اني لما أحسن إن في حاجة غريبة بتحصل لازمًا استفسر عنها وخصوصا حكاية الراجل الغريب ده اللي منعرفوش.
محمود : واحد فيه مصلحه بيني وبينه يخصك فيه ايه ده؟ خليك في حالك يا ابن عمي.
وترك محمود حامد وطلع شقته فوق.
حامد واقف على السلم : عارف يا محمود لو ممشت عدل اني بقى مش عاوزك في الدار.
محمود من فوق : مش لما تكون دارك لوحدك يا حامد لو مش عاجبك أنت اتفضل شوف دار تانية اسكن فيها.
________
في شقة علاء.
فريدة : كريم.. كريم.
كان كريم نايم على الكنبه وفريدة جايبه الأكل وضعته على الطربيزة وبتصحيه.
قعدت جنبه : كريم كريم قوم بقى مش هتفظر احنا بقينا الضهر.
كريم بصوت ناعس : الساعة كام يا فريدة؟
فريدة : اتناشر ونص.
يفرد ذراعيه ويتثائب : طيب هقوم.
فريدة : أنت نايم متأخر ولا ايه؟
كريم : نايم بعد الفجر.
فريدة : طيب الفطار اهو على الطربيزة.
كريم : زين راح يجيب أخته من المدرسة؟
فريدة : اه كلمته قال رايح لها.
كريم : ليه هو فين؟
فريدة : نزل قال رايح لواحد صاحبه.
كريم : طيب وسعي كدا علشان اقوم ادخل اشوف علاء.
قامت فريدة من جنبه فقام هو كمان دخل يشوف علاء.
______
بعد شوية.. في شقة معتز(زوج هدى).
نادين : ايه يا سيف قاعد لوحدك ليه؟
سيف : هعمل ايه يعني.. أكلت وجيت اقعد هنا بعيد عن الدوشة.
نادين : اه اصل لاقيت يوسف وحلا قاعدين جنب ماما استغربت يعني مليكة عامله ايه؟
سيف : كويسه.
نادين : والنونو الصغير؟
سيف : كلهم بخير يا نادين.