The Moon Is Coming To Me (Chapter-62)
Chapter-62
နှစ်သစ်၏မနက်စောစောတွင် ယန်ကျန်းမင်က ထောင်ရှီးကို ကားဖြင့်လာခေါ်ကာ မြို့အစွန်အဖျားရှိ သုသာန်သို့ လိုက်ပို့ပေးလေသည်။ မနေ့ညအပြန်လမ်းတွင် ထောင်ရှီးက ဖန်းဆွေ့၏အုတ်ဂူသို့ သွားချင်ကြောင်းပြောခဲ့သည်။
သုသာန်က တောင်တန်းနှင့်မြစ်ကို ပိုင်းခြားထားသလို တည်ရှိသည်။ မနက်အစောကြီးဖြစ်နေသည့်အတွက် အဖြူရောင်မြူများအုပ်ဆိုင်းလျက်ရှိရာ သုသာန်ကိုပင်မမြင်ရသလောက်ပင်။ ထောင်ရှီးက ယန်ကျန်းမင်၏နောက်မှလိုက်ကာ ဖန်းဆွေ့၏အုတ်ဂူထံ ရောက်ရှိသွားလေသည်။
ထောင်ရှီးက အုတ်ဂူခြားနေသည့် သူ့အမေကို ပထမဆုံးအကြိမ်တွေ့ဖူးပြီဖြစ်သည်။
ယန်ကျန်းမင်က အနောက်ဘက်ခပ်လှမ်းလှမ်းသို့သွားရပ်ကာ ထောင်ရှီးသူ့မိခင်နှင့် စကားပြောရန် ရှောင်ပေးလိုက်သည်။
ထောင်ရှီးက ဖန်းဆွေ့၏အုတ်ဂူပေါ်သို့ အဖြူရောင်နှင်းဆီပန်းတစ်စည်းကို တင်လိုက်သည်။ နှင်းကဲ့သို့ဖြူဖွေးနေသော နှင်းဆီပွင့်ချပ်များပေါ်တွင် နှင်းစက်ကလေးများ တွဲခိုနေကြသည်။ သူက ကမ္မည်းတိုင်ရှေ့တွင် ထိုင်ချလိုက်ပြီး ကျောက်တုံးပေါ်ရှိ ရေးထွင်းထားသောစာများကို လက်ချောင်းများဖြင့် အသာအယာထိတွေ့လိုက်သည်။
ကမ္မည်းတိုင်ပေါ်ရှိ ဖန်းဆွေ့၏ဓာတ်ပုံမှာ မကြာသေးခင်ကမှ လဲလှယ်ထားပုံပေါ်သည်။ လှပသောမျက်ဝန်းတစ်စုံက သူမအားလာရောက်ကြည့်ရှုသူတိုင်းကို နူးညံ့စွာပြန်၍ကြည့်နေလေသည်။ သူမကိုလာကြည့်သူများက တစ်နှစ်ပြီးတစ်နှစ်ပို၍အသက်ကြီးလာကြသော်လည်း ဓာတ်ပုံထဲရှိအမျိုးသမီးမှာမူ ဖူးသစ်စအရွယ်တွင်သာရပ်တန့်လျက်ရှိလေသည်။
ထောင်ရှီးက ဓာတ်ပုံအတွင်းရှိ သူ့မိခင်၏ပုံကို အတန်ကြာငေးကြည့်နေမိသည်။
