جنون الغيرة

الجزء 18

من بعد مسرباو العيالات وشطحو شوية على الباف مشاو وناضو كيجمعو الدار على حساب رجال والفقهة للي غيجيو فالليل لعشا حتى يمشيو عاد غيديرو الحنة لخديجة بين المقربين فقط يعني ماشي بحال عرسها اللول للي كيكون بحال شي موسم،
رشيد هز تيليفونو وأكد على اب يوسف يحضرو فلعشا ماشي حتى يدوز وعرض حتى على الحاج بن سليمان للي خدا النمرة من عند أمينة للي عجبها الحال ورتاحت لهاد العائلة كولشي خدام وحتى هي لبست بيجامة وحلفت حتى دير يدها خلاتها زهرة على راحتها وخاطرها حيت عارفاها مشتااقة تحس براسها فوسط فاميلتها.. اما ملاك مخشية فسطح مخبعة على شقا وفنفس الوقت كتنقي ظفار رجليها باش تصبغهم شافت تيليفونها صونا كانت غيثة عوجت فمها وجاوبت

غيثة: حبيبة صاڤا

ملاك: الحمد لله ازين ونتي

غيثة: الحمد لله احبيبتي قوليلي فيها شي شطيح بلاتي

ملاك: داكشي للي دايرين واقلة

غيثة: يييس، شوفي راني عند كاميليا واش صافي تخليلك هاديك التكشيطة

ملاك: الحمرا؟!

غيثة: اه، حيت جات كليانة بغاتها وحنا معودناش رجعنا أكدنا عليها

ملاك: قولها تخليهالي والا صلاح ليها تصيفطلي الكونت ديالها نصيفط ليها فلوس حتى انا تشغلت بزاف ونسيتها

غيثة: اويييلي لا مبيناتناش

ملاك: لا واالو اغيثة غير صيفطيلي عفاك الكونت

غيثة: واخا لالة، وتبغي شي حاجة اخرى نشدلك رونديڤو عندهم على حساب غدا

ملاك: اممم لا بلاش اصلا غنبقى مع خديجة هنا صافي غير شديلي التكشيطة

غيثة: والاكسيسوارات؟!

ملاك: (بإستغراب مالها عروسة) لا

(كملو هضرتهم وبقات جالسة حتى كملت بدا كيتبرد الجو شوية ناضت طلات عليهم واش كملو باش تهبط لقاتهم شاعلين مبيخرة كبيرة وتريتورا هوما للي كيدورو هزت لاتروس ديالها وهبطت لبيت مها لبست قفطان جوهرة مع صندالة عالية شوية عكرت يعكرها الخفيف عاودت دارت ستيك العرق، دارت شالها وخرجت مشات للصالون صغير غير لعيالات كيديرو الكوتي جلست حدا ختها وبدات كتاكل.. بهمس)
شنو جابت ليك ماين مراد

خديجة: واحد الكوڤر كيصطي داكشي دالعرساان وعطات مسكينة لماما 1500 درهم

ملاك: هاه ملعقة

خديجة: ههه الله يكتر خيرها مسكينة شحال راها فرحانة حقا غتجي ماين يوسف

ملاك: يااك!!

خديجة: والله كنت عارفاها غتجي (صونات عليها الكوافورة) واقلة جات خرجي عندها املاك

ملاك: فينها