أعطيت لحبك فرصة فخدعتني

الفصل الحادي والثلاثون

كنا قفلنا الفصل اللي فات علي مقابلة مريم وعمتها وقولنا ياتري رد فعل مريم هيكون ايه ؟؟ يلا بينا نكمل ..قراءة ممتعة ♥️✨
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
مريم وهي تخرج: في ايه ياماما الصوت العالي ده ؟
كريم: في حاجه ياطنط ولا ايه ؟
سماح: لا مفيش حاجه خد مراتك وادخلوا جوة دي واحده غلطت في العنوان ..وتتجه للمرأة: يلا اتفضلي قولتلك العنوان غلط
المرأة باستفزاز: لا فيه متقوليش مفيش لازم اقولها لازم تعرف
مريم بعدم فهم: لازم اعرف ايه انا مش فاهمه حاجه في ايه ياماما ؟
سماح بنفاذ صبر: قولتلك مفيش حاجه يامريم ويلا ادخلي .. وانتي ياست انتي يلا الله يسهلك
المرأة بتحدي: يعني مش هتقوللها خلاص اقولها انا
مريم: في ايه وتقولي ايه ؟؟ انتي تعرفيني منين وايه اللي بيني وبينك يخلي في حاجه بينا ؟ انا مش فاهمه حاجه
المرآة ببرود: انا ابقي عمتك يامريم
مريم وهي تكذب نفسها: عمتي !! عمتي مين بابا مالوش اخوات
سناء: مريم انا عمتك افتكريني اخت ابوكي الله يرحمه
مريم بصدمة وتتصنم مكانها: انتي !!!!
سناء وهي تحاول احتضانها: أيوة يامريم انا عمتك وحشتيني اوي
مريم وهي تبتعد عنها بعنف: وحشتك !! انا كنت نسيتك ونسيت اني ليا عمة ابعدي عني انا مش عاوزه اشوفك تاني ولا اعرف عنك حاجه .. ايه فكرك بيا وعرفتي طريقي منين ووصلتي ليا ازاي؟ ابعدي عن طريقي وانسي إن ليكي بنت اخ لاني انا اعتبرت اني ماليش عمه واعتبرتك انك موتي .. وتنظر لسماح ببكاء: هي تعرفك منين ياماما ووصلتلك ازاي ؟؟
سماح بدموع: اهدي يابنتي متخافيش هفهمك كل حاجه
مريم ببكاء: انا مش عاوزه اشوفها تاني ولا تعرف عني حاجه ابعدي عني بقي حرام عليكي مش مكفيكي اللي كنتي عملتيه فيا انا بكرهك بكرهك بجد وعمري ماحبيتك انتي استحاله تكوني اخت بابا الله يرحمه منك لله عمري ماهقدر اسامحك
سناء وترفع يديها لتصفعها لتجد يد كريم تمنعها بغضب: انتي عاوزه تمدي ايدك عليها قدامي ولا ايه ؟! اوعي تكوني فاكرة إن مريم لسه البنت الصغيرة بتاعت زمان اللي تضربيها وتعذبيها وتطرديها برة البيت وأقسم بالله لو فكرتي تلمسي شعرة منها ماهسيبك وابقي فكري بس مجرد تفكير في انك تأذيها أو تقربي منها ولا تعمللها حاجة
سناء بسخرية: متتحمأش اوي كدة بس ليطقلك عرق وانت لسة في عز شبابك .. احب اقولك يابنت اخويا إن ابوكي كان سايبلك ورث وابقي قابليني لو طولتي منه حاجة
مريم ببكاء: مش عاوزة حاجة وحقي لو عاوزاه هعرف اجيبه بالقانون و ..ليقاطعها كريم قائلا ببرود اخافها: اهدي ياحبيبتي انا اللي هرد عليها .. ويوجه نظره اليها بثقه وتحدي: اصل الهانم شكلها متعرفش إن جوزك محامي اد الدنيا ويقدر يجبلك حقك وإن حماكي وكيل نيابة بكلمة منه يمشيلك كل حاجة هي ياحرام متعرفش انك مسنودة وانك لو عاوزة حقك هتاخديه وتترمي هي في السجن كمان لو تحبي .. وكل حاجة بالقانون ونفتح بقي في القديم كله اللي محدش عارف عنه حاجه ونفتح الدفاتر بقي وكل واحد يتحاسب ولا ايه رأيك ياهانم ؟!
سناء بخوف حاولت إخفائه: وانت كده بتهددني يعني ؟! هي مالهاش حاجة عندي مانا صرفت عليها وهي صغيرة
كريم باستفزاز: واحنا مش عاوزين حاجة بس مريم هتاخد حقها مش عشان هي محتاجاه لا هي الحمد لله مش ناقصها حاجة ولو طلبت نجمة من السماء هجبهالها ..بس هتاخده عشان ده حقها من ابوها لان ده تعب ابوها وامها وهي الوحيده اللي تستحقه مش حد تاني
سناء: اعمل اللي تعمله وانا قولت اللي عندي مالهاش عندي حاجة والكلام مع عمها الكبير ..سلام يابنت اخويا
كريم وهو يحتضن مريم: خلاص بقي محصلش حاجة اهدي
مريم: انا خايفة اوي ياكريم
كريم: ياحبيبتي خايفة من ايه وانا معاكي محدش يقدر يلمس شعراية منك طول مانا جنبك ماتقلقيش وابقي خلي حد يفكر ييجي جنبك بس
سماح بخجل: بجد انا مش عارفة اقولكم ايه بس انا محرجة منكم اوي حقيقي سامحيني يامريم اني حطيتك في الموقف دة
مريم: ماما انتي بتقولي ايه انتي ماعملتيش حاجة ولا ليكي ذنب في حاجة هو القدر بس حب أنه يجمعنا وانا كنت عاملة حسابي للحظة زي دي أنها هاتيجي واهي جت
سماح: ماتقلقيش ياحبيبتي احنا كلنا جنبك وحقك هيجيلك
مريم: صدقيني ياماما انا مش عاوزة حاجة غير انهم يبعدوا عني ويسبوني في حالي كفاية اللي عملوه فيا زمان
كريم: هتاخدي حقك وبالقانون وغصب عنهم ويبقوا يوروني هيمنعوكي ازاي
مريم: عشان خاطري ياكريم صدقني انا مش عاوزة حاجة خليهم يبعدوا عني
كريم: بس ده حقك يامريم وهتاخديه غصب عنهم ..وخلاص بقي اقفلي الموضوع ده احنا جايين عشان تتبسطي مش عشان يتنكد عليكي مش ماما سماح وحشاكي هتفضلي بقي تعيطي كده ومتقعديش معاها
مريم وهي تحتضنها: لا خلاص انا كانت وحشاني اوي اصلا والقاعدة معاها
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
أدهم: اتفضلي مين حضرتك ؟
وفاء: لا حضرتك ماتعرفنيش بس أنا عارفة حضرتك اعتبرني فاعل خير جاية ابلغك بحاجة واخلص ضميري
أدهم: خير اتفضلي !!؟
وفاء بتردد: جاية اقولك ..ا ..م ..قاطعها أدهم بنفاذ صبر: ممكن تتكلمي علطول عشان انا مش فاضي
وفاء بتوتر: تمام حاضر .. جاية اقولك اني اعرف مين السبب في المشاكل بينك وبين خطيبتك وجيت اعرفك عشان اريح ضميري
أدهم وهو يعتدل في جلسته: تعرفي مين اللي عمل كده اكيد ؟؟ متاكده ؟؟
وفاء: اه طبعا متاكده وانا لو مش متأكدة كنت جيت واتكلمت معاك ؟؟
أدهم: طيب احكيلي اللي حصل بالظبط وليه عمل كده ويعرفنا منين ؟؟
وفاء: انا هقولك علي كل حاجة بس بشرط
أدهم: شرط ايه ؟
وفاء: انك ماتأذيهاش
أدهم: انتي تعرفيها ؟
وفاء: مش مهم المهم اوعدني
أدهم بنفاذ صبر: اوعدك .. ها يلا قولي
وفاء بتنهيده: حنان اللي عملت كل ده وهي اللي كلمت ياسمينا قالتلها انك مع واحده في الكافيه وهي برضو اللي زقت الشاب اللي شوفته مع ياسمينا عشان تخليك تشوفهم مع بعض وهي اللي صورتهم وهي اللي رتبت كل حاجه عشان تبوظ علاقتكم ببعض عشان بتحبك ونفسها انك تبقي معاها وعشان بتكره ياسمينا خصوصا أما خطبتها واتخطبت لحازم مخصوص لانها عارفه أنه أقرب حد ليك وعشان بخطوبتها منه يبقي كده بتقرب منك وأنه كان مجرد كوبري وعشان كده اول أما خطبت ياسمينا هي سابت حازم
أدهم بصدمة: كل ده يطلع من حنان كل ده هي اللي كانت مرتباه
وفاء: انا كده خلصت نيتي من ناحيتك عشان انتو مالكوش ذنب تروحوا ضحية لعبتها دي وحياتكم تبوظ بسببها وعشان خطيبتك مالهاش ذنب تظلمها وتظن فيها وتكسر قلبها وانا بنت وعارفة كسرة القلب وكسرة القلب وحشة اوي
أدهم: انا بشكرك جدا جدا .. وكأنه تذكر شيئا: بس حنان عرفت ازاي اني مع امال في الكافيه ؟!
وفاء: كانت في الشركه وبالصدفة شافتك وانت نازل معاها قررت تمشي وراك وتراقبك وطبعا كانت عارفة قصة امال معاك من حازم لأنها كانت شافتها هنا قبل كده وسألت حازم وقالها بحسن نية وأما شافتها معاك عرفتها واستغلت الفرصة أنها تبعت الرسالة لياسمينا بأنك قاعد مع حبيبتك القديمة لأنها مالقتش فرصه احسن من كده تبتدي بيها المشاكل بينكم ولأنها عشان كانت عارفة أنها كدة بتعمل بينكم مشكلة وانكم هتسيبوا بعض وهي تجيلك وانت تحبها وتتجوزها هي رتبت كل حاجة ورا بعضها عشان كل حاجة تيجي ورا بعض متلحقوش تتصالحوا ولا تلحقوا تربطوا خيوط ببعض وكانت قاصده أنها تطلعك غلطان في نظرها وتطلعها غلطانه في نظرك عشان كده كل واحد فيكم هيشد قصاد التاني علي غلطه ويستحيل الرجوع بينكم وكانت حريصه إن متدكوش فرصه في انكم تفكروا في اللي بيحصل عشان لو كل حاجه كانت مجتش ورا بعضها كان هتكتشفوا الحقيقه إنما هي كانت طول الوقت حريصه إن يكون معندكوش فرصه للتفكير وتحصل بينكم المشكله وتبعدوا ونجحت في ده بالفعل
أدهم: انا حقيقي مش مصدق بجد مش مصدق كل ده يطلع منها
وفاء: انت وعدتني انك مش هتأذيها انا مش عاوزاها تتأذي لأنها صحبتي في الاخر برضة وفي نفس الوقت كان صعبان عليا ياسمينا فأنا كده خلصت ضميري ناحيتكم وعملت اللي يريح ضميري عشان ده كسر قلوب وحرام وكنتو هتظلموا بعض
أدهم: بجد انا بشكرك جدا علي موقفك ده وانا بوعدك مش هأذيها ولا هعرفها حاجة عشان ماتأذكيش برضو بس انا عارف هعمل ايه كويس ..تقدري تيجي معايا تقولي الكلام ده لياسمينا قدامها عشان تصدق
وفاء: معنديش اي مشكلة شوف حابب تروحلها امتي وقولي
أدهم: يلا دلوقتي لو مش وراكي حاجة
وفاء: لا مش ورايا حاجة
أدهم: تمام يلا بينا دلوقتي
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
حازم: مالك ياحنين انتي لسه زعلانة مني ؟
حنين بابتسامة: لا طبعا خلاص
حازم: اومال مالك ؟؟
حنين: مفيش ممكن اكون سرحت شوية بس
حازم: اكيد طبعا سرحتي في اللي حصل بينا صح ؟
حنين: ليه بتقول كده ؟
حازم: انتي لسة بتحبيه ؟؟
حنين: هو مين ده ؟
حازم بغيرة واضحة: كمال
حنين: ايه لازمه السؤال ؟؟
حازم: عادي بسأل مجرد سؤال
حنين: مش مجرد سؤال ياحازم وبعدين هو دلوقتي خلاص الله يرحمه معتقدش حتي لو قولتلك لسه بحبه انك تغير من واحد ميت صح ولا ايه ؟!
حازم: يعني افهم من كلامك انك لسه بتحبيه صح ؟!
حنين: حازم كمال خلاص مات وكان خطيبي وكان هيبقي جوزي .. كان كام شهر ولا سنه وكنا هنتجوز وكنت بحبه وحزنت عليه حزن متتخيلهوش وفضلت ٣ سنين قافله علي نفسي وقلبي حفاظا علي حبه وإن محدش هيدخل حياتي بعده بيتهيألي مفيش سبب يخليني اكرهه خصوصا وهو دلوقتي مات خلاص ومفيش سبب برضو يخليك تغير منه عشان اكيد مش هتغير من واحد ميت
حازم: مش حكايه غيرة انا سؤال بس جيه في بالي سألتك
حنين: لا ياحازم مش مجرد سؤال انت عاوز تتأكد من اني بحبك ولا لسه بحب كمال عاوز تتأكد اني بحبك وحب كمال مش مآثر علي حبي ليك عاوز تطمن من مشاعري ناحيتك وإن مفيش حاجه مقصرة عليها عاوز تتأكد اني معاك ليك انت مش عشان انسي كمال بيك صح ولا لا ؟؟
حازم: لا مش كده وحقي اعرف اذا كنتي بتحبيني ولا لسه قلبك متعلق بيه وانك معايا كده وخلاص
حنين: وانت تفتكر اني ممكن اظلمك بالطريقه دي ؟! ازاي هفضل مع حد ممكن اكون مش بحبه ؟؟ انت لسه معرفتنيش ياحازم
حازم: يعني انتي معايا عشان بتحبيني ؟! مش عشان تدي نفسك فرصه تنسيه ؟؟
حنين: انا عمري ماعرفت أنساه وانا لو مش حاسه بمشاعر من ناحيتك مكنتش كملت معاك لاني مش هظلمك كده عشان انسي بيك شخص تاني مبقاش موجود واشيلك ذنب مش ذنبك انا مش قاسيه للدرجة دي في حبي ياحازم
حازم ويمسك يديها: عارف ..عارف ياحبيبتي ..انا اسف متزعليش مني حقك عليا بس انا بحبك
حنين بابتسامة: مش زعلانه وانا كمان بحبك
حازم بابتسامة: يلا ناكل بقي الأكل تلاقيه برد
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
سهير بصدمة: أدهم !!!
أدهم: ازي حضرتك ياطنط اقدر ادخل ؟؟
سهير بتلعثم: ا..اه طبعا اتفضل
أدهم وهو يدخل: تعالي يا وفاء اتفضلي
حسين: مين ياسهير ؟
أدهم: ازي حضرتك ياعمي عامل ايه
حسين وهو ينهض: اهلا اهلا ياادهم يابني تعالي اتفضل ..وينظر للفتاة: اتفضلي يابنتي اهلا بيكم
أدهم: اسف اني جيت من غير ميعاد
حسين: متقولش كده يابني ده بيتك نورتنا
أدهم: ربنا يخليك ياعمي ..انا بس كنت جاي اتكلم معاكم في موضوع كده يخص ياسمينا ياريت لو موجوده بس
حسين: طبعا يابني ..وينظر لسهير: ادخلي لياسمينا قوللها اني عاوزها
سهير: حاضر عن اذنكم
حسين: خير يابني ؟؟ ومين الاستاذه ؟
أدهم: هتعرف كل حاجه دلوقتي ياعمي ماتقلقش
ياسمينا: نعم ي..وفجأة لاحظت وجود أدهم وهي تقول بانفعال: انت ايه اللي جابك تاني مش اللي بينا كان انتهي ؟؟
حسين بزعيق: ياسمينا عيب اللي بتقوليه ده
سهير وهي تزجرها: هو ده الادب اللي ربيتك عليه ؟؟
ياسمينا: انا مش عاوزه اشوفه تاني مش عاوزه .. وتوجه كلامها لادهم: اوعي تفتكر انك أما تيجي البيت كده بتحطني قدام الأمر الواقع واوعي تفتكر انك هتأثر علي ابويا أنه يرجعني ليك غصب عني
أدهم: ممكن تهدي وتعرفي اللي جاي عشانه وبعد كده ابقي قرري إذا كنتي عاوزه تشوفيني تاني ولا لا ؟؟ وإذا كان كلامك ده صح ولا لا
ياسمينا: انا مش عاوزه اسمع منك حاجه انت شخص كداب
حسين بعصبية: انا تقريبا معرفتش اربيكي عشان تعملي اللي بتعمليه ده اقعدي ومسمعش صوتك فاهمه ؟؟ ..وينظر لادهم: معلش يابني حقك عليا انا امسحها فيا
أدهم: متقولش كده ياعمي مفيش حاجه انا بس جاي في موضوع تسمعوني وتقرر براحتها بعد كده وانا حبيت أنه يكون قدامكم عشان اشهدكم ولو قررت انها مش عاوزه تكمل برضو بعد الكلام اللي هيتقال انا هحترم ده وهنسحب من حياتها نهائي ومش هتشوفني تاني بس ابقي عملت اللي عليا وبرأت نفسي عشان بعد كده يكون قرارها هي حرة فيه ويكون ضميري مرتاح اني مظلمتهاش ولا جيت عليها ولا خبيت عنها حقيقه عرفتها
سهير بقلق: خير يابني في ايه ؟؟
حسين: استني بس ياسهير عشان نفهم ..اتكلم يابني خير في حاجه ؟؟
أدهم: متقلقوش خير ..وفاء هي اللي هتحكيلكم كل حاجه اسمعوا منها ..وينظر لوفاء: اتفضلي ياوفاء
وفاء بتوتر وقصت عليهما كل ماحدث وكل ماتعرفه: والله انا مكنتش موافقة علي اي حاجه كانت بتعملها أو عملتها وياما حاولت احذرها وأبعدها عن طريقهم لكني فشلت وكنت خايفه اجي اتكلم مع حد فيهم يفهمني غلط ويفتكر اني السبب لكن أما لقيت كل حاجه باظت فعلا مقدرتش اسكت اكتر من كده وقولت حرام يروحوا ضحية حنان وحرام الحب اللي بينهم يروح كده وكسر القلوب وحش محبتش اشوف حياتهم بتبوظ واقف اتفرج وانا معايا الحقيقه اللي ممكن ترجعهم يكملوا حياتهم
حسين: لاحول ولا قوة الا بالله
سهير: دي مخلوقه من ايه دي ؟؟ دي مش طبيعية بجد أنها تأذي حد كده
ياسمينا بصدمة: يعني كل اللي حصل ده كان ترتيب حنان ؟؟ معقوله تكون رتبت وخططت ونجحت في خطتها ؟ وكل ده ليه عشان توصل لادهم ؟؟ هي فعلا ذكية ..ونجحت في أنها تبعدنا
أدهم: بيتهيألي انك كده عرفتي اني كنت مظلوم
ياسمينا: بس انت فعلا كنت قاعد مع امال دي في الكافيه هي مكدبتش
أدهم: امال دي بنت خالتي و..قاطعته ياسمينا قائله بسخرية: وحبيبتك القديمة
أدهم بنفاذ صبر: كانت ..كانت .. وكل واحد راح لحاله وكل اللي بينا انتهي ومن سنين مش من دلوقتي
ياسمينا: اومال كانت جيالك ليه ؟؟ حنت ليك من تاني ؟؟
أدهم: انا ساكت احتراما لأهلك واني في بيتكم .. بس انا لو كنت حابب ارجعلها كنت رجعتلها من زمان مش من دلوقتي
ياسمينا: طيب ماتقولي نزلت معاها ليه ماهو مالهاش تفسير تاني
حسين: ماتصبري يابنتي عشان يفهمك انتي مش مدياله فرصة يتكلم
أدهم: معلش ياعمي انا اسف ممكن بس اتكلم مع ياسمينا لوحدنا
حسين: طبعا يابني خد راحتك البيت بيتك ادخل اوضة الصالون واتكلموا براحتكم
ياسمينا: وانا مش عاوزه اتكلم معاك ولا اقعد معاك
حسين بنفاذ صبر: انتي مالك في ايه ؟؟ في حاجه اسمها احترام وتقدير حد دخل بيتنا انتي ايه اسلوبك ده ؟؟
ياسمينا: يابابا ا.. قاطعها حسين بحدة: مفيش بابا اتفضلي اقعدي اتكلمي مع خطيبك شوفيه عاوز يقولك ايه واسمعيه
ياسمينا وهي تدخل بعصبية وكاد ادهم يذهب خلفها بينما أوقفه حديث حسين وهو يقول له: معلش يابني حقك عليا انا ..ولو قالتلك اي حاجه وانتو قاعدين مع بعض امسحها فيا انا
أدهم ويكتفي بابتسامه ويذهب لمكان وجودها ليجدها واقفه بانفعال لاتطيق كلمة من أحد وتزفر بقوه وتهز رجليها سريعا بانفعال حيث تحدث ببرود: اهدي شوية ليطقلك عرق ولا حاجه ويقولوا انا السبب
ياسمينا بعصبية وتلتف له: افندم خير ؟؟ اتفضل عاوز تقول ايه
أدهم: طيب اهدي الاول وتعالي نقعد عشان نعرف نتكلم هنتكلم ازاي كده ؟
ياسمينا: احنا مفيش بينا حاجه عشان نقعد ونتكلم
أدهم: حتي بعد ماسمعتي الحقيقة بتقولي كده ؟؟ انتي عمرك ماحبيتي ولا تعرفي يعني ايه حب علي العموم آمال تبقي بنت خالتي واه كانت حبيبتي القديمة لكننا سايبين بعض بقالنا فترة كبيرة جدا وقبل أما اخطبك ولحد أما خطبتك كانت بتحاول أنها ترجعلي وانا اللي رفضت .. اليوم اللي جاتلي ونزلنا وشوفتينا عشان كان عندها مشكلة ولجأت ليا لأن زي ماقولتلك في البداية اننا أهل وبنت خالتي واللي كان بينا مالوش علاقة بصلة قرابتنا لأنها هتفضل بنت خالتي شوفي اللي يريحك يابنت الناس واعمليه انا كده خلصت ضميري من ناحيتك وعملت اللي عليا معاكي .. بس عاوز اقولك حاجه اللي بيحب بجد بيخلق الف مبرر عشان يكمل واللي بايع بيخلق الف سبب أنه يبعد وبيرفض يشوف الحقيقه حتي لو كانت قدامه وده الفرق بيني وبينك اني مسكت في أول سبب يخلينا نرجع وانتي رفضتي أول سبب لرجوعنا وكل واحد بيتحمل نتيجه أفعاله واختياراته .. سلام ..ولم يعطيها فرصه للرد وخرج وتركها في صدمتها من أثر كلماته فهو محق بكل كلمه لماذا هي ترفض حتي وبعد أن عرفت الحقيقه فهي بالفعل لاتعرف معني الحب
حسين ويقابله وهو خارج: رايح فين ياادهم انت لازم تقعد تتغدي معانا
أدهم: معلش ياعمي عشان مستعجل عشان سايب الشغل لوحده
سهير: ده ثواني والغدا يكون جاهز
أدهم: معلش ياطنط مره تانيه إن شاء الله عشان ورايا شغل والله وهوصل وفاء واطلع علي الشركه
حسين: ربنا معاك يابني سلملي علي ابوك
أدهم: الله يسلم حضرتك ياعمي ..عن اذنكم
حسين وسهير يدخلون لمكان ياسمينا ليقول حسين: ايه اللي حصل ؟؟
سهير: ماتردي يابنتي قوللنا في ايه اللي حصل
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭٭
أدهم وهو يقف أمام منزل وفاء: حقيقي انا ممتن ليكي جدا شكرا ليكي بجد من كل قلبي
وفاء بابتسامه: علي ايه انا ماعملتش حاجه ربنا يسعدكم ويصلح الحال بينكم
أدهم: انا حابب اعملك حاجه اشكرك بيها
وفاء: لو عاوز تشكرني بجد بلاش تأذي حنان انا عارفه انها غلطت واي حاجه هتعملها هتكون حقك بس انا مش عاوزه اكون سبب اذي ليها
أدهم: ماتخافيش انا مش هأذيها ولا حاجه ..بس انا مش فاهمك
وفاء: مش فاهم ايه ؟؟
أدهم: يعني جيتي وقولتيلي علي كل حاجه وانتي عارفه انها ممكن تتأذي وفي نفس الوقت مش عاوزاها تتأذي ليه بجد مش فاهم حاجه ؟
وفاء: لأنها في الاول والاخر صحبتي وبينا عيش وملح وانا صايناه وحاولت أبعدها كذا مره عن الطريق اللي ماشيه فيه لكنها مسمعتش قولت شويه وهتبعد لقيتها لسه ماشيه فيه وغوطت اوي وفي نفس الوقت مقدرتش اشوف الحق واقف اتفرج من بعيد مقدرتش اشوف قلبكم بيتكسر وانا عارفه الحقيقه وواقفه وحياتكم بتبوظ وإنقاذ حياتكم في ايدي واقف بعيد مقدرتش اكون عارفه السبب اللي بوظلكم حياتكم وابقي ساكته متخيل تشوف حياه حد بتبوظ وانت معاك حقيقه نجاته وواقف تتفرج علي حياته اللي بتبوظ ؟؟ مقدرتش اشوف كده بجد فكان لازم اجي واتكلم وأبين الحقيقه
أدهم: بجد انتي انسانه كويسه جدا ياوفاء وتستاهلي كل خير وبكرة ربنا هيجازيكي خير علي قلبك الطيب ده وعلي كل حاجه عملتيها
وفاء: شكرا جدا لحضرتك وربنا يوفقكم ويسعدكم
أدهم: انا كنت حابب بس اطلب منك طلب
وفاء: طبعا اتفضل
أدهم: ممكن تقبلي انك تيجي تشتغلي معايا في الشركه اظن دي اقل حاجه اقدر اقدمهالك علي اللي عملتيه معايا
وفاء بابتسامة: شكرا جدا لحضرتك بجد ..مش عارفه اقول حضرتك ايه
أدهم: قولي انك موافقة
وفاء: موافقة ..موافقة ..اللهم لك الحمد
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
سالم وهو يدخل: سماح .. ياسماح
سماح وهي تنهض بابتسامه: بابا جيه اهو يامريم واحنا عملناله مفاجأه فاجئيه بقي ..وتذهب إليه: حمد لله ع السلامه ياحاج احضرلك الغدا
سالم: اه ياريت وانا هغير هدومي وارتاح شويه كده عقبال أما تحضريه
سماح: لا ده مش هياخد وقت يادوبك هغرف بس تعالي اقعد وثواني الغدا يكون جاهز
سالم: ماشي ..هند هنا ولا فين
مريم: مينفعش مريم طيب ولا ايه ؟؟
سالم بصدمه وسعاده: مريم حبيبه قلبي وحشاني اوي
مريم وهي تحتضنه: انت اكتر والله يابابا وحشتني اوي اوي عامل ايه ياحبيبي طمني عليك
سالم: الحمد لله ياحبيبتي ..ويسلم علي كريم: ازيك يابني عامل ايه ؟!
كريم بابتسامه: الحمد لله ازي حضرتك ياعمي
سماح بابتسامه: ايه رأيك بقي في المفاجأة دي ؟؟
سالم: أحلي مفاجاه والله بس برضو زعلان ازاي متقولليش كنت جبت اي حاجه حلوه معايا من اللي مريم بتحبها
سماح بضحك: اقولك ازاي كان لازم افاجئك زيي اومال اتفاجئ انا لوحدي يعني ..انا برضو اتفاجئت بفتح الباب لقيت مريم في وشي
سالم: انتي تباتي معانا النهارده انتي وحشانا اوي
سماح: ده اكيد طبعا وهي عاوزه تمشي ولا ايه ؟
مريم: معلش يابابا مش هقدر عشان كريم مبيعرفش يبات بره وكده والله وعنده شغل
سالم وهو يوجه كلامه لكريم: ايه ياكريم وهو انت في بيت حد غريب ؟؟ انتو لازم تباتوا معانا النهارده وهو احنا بنشوفكم كل يوم يعني ؟
كريم بابتسامة: والله ياعمي انا مقدرش علي زعلكم بس عشان الشغل والله
سماح: ده يوم واحد ياكريم
مريم: معلش ياماما م..ليقاطعها كريم بابتسامة: خلاص يامريم خلينا معاهم النهارده عشان ميزعلوش
مريم بسعاده: بجد ياكريم !! بجد هنبات معاهم ؟
كريم بابتسامة: اه ياحبيبتي
سالم بابتسامة: يلا ياسماح بقي جهزي الغدا عشان نتغدي كلنا مع بعض
سماح بابتسامة: حالا اهو حالا
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭٭٭
ملك: مالك ياست الحزينه
ياسمينا: اكيد عرفتي من ماما طبعا
ملك: اه عرفت بس عاوزه اعرف منك ليه عملتي كده ؟!
ياسمينا: ارجعله ازاي ياملك ده مسمعش مني
ملك: مانتي كمان في الاول خالص مارضتيش تسمعي منه ولا نسيتي ؟؟ وبعدين ده كان غصب عنه ياياسمينا أنه ميسمعش منك بعد اللي حصل وانتي لازم تقدري حاجة زي كده وانتي اللي غلطانه وانتي اللي بعدتيه مع أنه حاول يقرب ويشرحلك لكنك عملتي كل حاجه تبعده عنك واهانتيه وجايه دلوقتي توقعي عليه اللوم ؟! وبعد ده كله هو برضة اللي جالك لحد بيتك ورفضتيه برضو ليه كل ده ؟؟ فهميني ليه بتعملي كده ولا ناويه علي ايه ؟
ياسمينا: في ايه ياملك انتي معايا ولا معاه
ملك: انا ولا معاكي ولا معاه انا مع الحق انتي غلطانه ومش معني انك اختي يبقي مغلطكيش وانتي غلطانه
ياسمينا: اعمل ايه طيب انا اتهددت بقتله ياملك عارفه يعني ايه حد بيكلمني بيقولي ولو عرفتيه يبقي انسيه بقي لأننا هنخلصلك عليه ؟ انا اترعبت ياملك خوفت اخسره وخوفت عليه ..وتنظر إليها بدموع: انا حبيت ادهم ياملك ومازلت لسه بحبه معنديش استعداد اخسره أو أنه ممكن يتأذي بسببي
ملك: بس انتي روحتيله بعد كده عشان تقوليله يعني النتيجة في الاخر واحدة .. يبقي ليه أما جالك مستغلتيش ده ورفضتيه؟؟
ياسمينا: عشان لقيت نفسي مش عارفه اعيش من غيره وفي نفس الوقت قولت ازاي ممكن اكون عارفه في خطر حواليه وسايباه لازم احذره عشان يخلي باله
ملك: مقدرة كلامك ده كله بس ياحبيبتي هو جالك لحد عندك وبرضو رفضتيه ليه ؟؟ وبعدين الدنيا مش سايبة كده زي مانتي فاكرة وخصوصا إن ادهم مهندس كبير وتقيل جدا وطبيعي ووارد يكون ليه أعداء غيرانين منه ومن شغله فعاوزين يشوفوه مكسور مهزوز لأن اللي عمل كده هو عارف كويس بيعمل ايه وعارف إن ادهم حبك وأنه أما يتكسر منك كسرته هتكون صعبه ومش هيرجع زي الاول ويمكن كان في شغل مهم حبوا أنهم يخسروه فيه عشان يوقعوه ويبقي ضعيف ويشمتوا فيه أنهم لاقوه مكسور قدامهم كده دي كلها اسباب بقولك عليها لأنها وارد تحصل بعد كده .. والمفروض انك مكنتيش اديتي الفرصه لحد أنه يعرف يوقع بينكم ويستغل ده لانه لو فشل مرة ورجعتوا هيحاول تاني لأن عارف إن علاقتكم قابله للكسر بكل سهوله فده هيخليه يحاول بدل المرة الف مرة عشان بس يوصل لهدفه لانه في المرة الأولى كان بيجرب وجابت نتيجة فمفيش مانع أنه يجرب مرة تانيه وتالتة وعاشرة كمان لحد ما يوصل لهدفه زي أما حنان عملت بالظبط كده واستغلت النقطه دي ونجحت فيها
ياسمينا: يعني افكر ارجعله ؟
ملك: انتي لسه بتسألي ؟ جالك لحد بيتك عشان يراضيكي مع أنه مش غلطان واول أما عرف الحقيقه جيه عشان يعرفهالك انك ظلمتيه واحد غيره كان كبر دماغه منك وبعد مايعرف الحقيقه مفيش حاجه تتغير إنما هو شاريكي ومعني أنه يجري عليكي اول مايلاقي خيط بس يخليكي ترجعيله يستغله فده حد بيحبك .. ادهم بيحبك يا ياسمينا بلاش تخسريه وتكوني الظالمه في الحكايه وانتي اللي غلطانه قدري أنه جالك لحد عندك كان ممكن ميفرقش معاه فكري وشوفي هتعملي ايه بس انا بقولك هتخسري ادهم
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
بعد مرور أسبوع
ياسمينا: صباح الخير يابابا
حسين: صباح النور الساعه ٣ العصر .. رايحة فين كده
ياسمينا: نازله اقعد مع أمل شويه ونخرج
حسين: طيب تعالي اقعدي عاوزك
ياسمينا وهي تجلس: خير يابابا في ايه ؟؟
حسين: خير يابنتي ماتقلقيش .. انا شايف انك مبتنزليش الشغل بقالك فتره من ساعه اللي حصل بلاش تخسري كل حاجه حتي شغلك
ياسمينا: بابا انا هسيب الشغل خلاص لأن الشغل مع ادهم وشركته هروح بس اخد شهاده من هناك اني اشتغلت فتره واقدم في أي شغل تاني
حسين: ايه علاقه الشغل بادهم ؟؟ الأمور متتاخدش كده ده مكان شغلك ونفترض انك عملتي كده ومالقتيش شغل وانتي عارفه إن مفيش شغل الايام دي ومش سهل اي حد يشتغل يبقي خسرتي شغلك ؟؟
ياسمينا: عشان مبقاش ينفع افضل موجوده يابابا اللي بيني وبين ادهم انتهي خلاص ومفيش اي حاجه تربطني بيه ليه افضل في الشغل بتاعه ؟؟
حسين: عارفه زمان وانتي صغيره غلطتي مره وديتك الدرس وهربتي منه وخدتي الفلوس خرجتي بيها مع صحابك من ورانا ومكناش نعرف لحد مره لقيت الميس بتاعتك بتكلمني وتسألني ياسمينا مبتجيش ليه بقالها حصتين بتطمن عليكي لتكوني تعبانه وقتها استغربت ده انا اللي بوصلك كل يوم ازاي يعني مبتجيش وجيت في مره وصلتك ودخلتي قدامي ووقفت بعيد اشوفك هتعملي ايه لقيتك خرجتي ومشيتي وأما جيتي البيت سألتك حضرتي الدرس كدبتي وقولتي اه ومن سوء حظك كان في امتحان في اليوم ده سألتك عملتي ايه في الامتحان كدبتي برضة واستغربتي امتحان ايه ساعتها قولتلك وريني الامتحان عملتي ايه معرفتيش تردي وقولتلك إن الميس بتاعتك كلمتني وقالتلي انك مبتحضريش وأما سألتك ليه عملتي كده وكنتي بتروحي فين قعدتي تعيطي وتعتذري خايفه لاضربك مع اني مكنتش همد ايدي عليكي بس عاقبتك عقاب صعب خدت منك الموبايل وبقيت بدخلك بنفسي لحد الدرس وكل يوم اكلم المدرسين بتوعك اشوفك وأشوف مستواكي وحرمتك من المصروف وكل الحاجات اللي بتحبيها ومبقتش اكلمك خالص لمده اسبوع ووقتها قعدتي تعتذريلي وتقوليلي عشان خاطري يابابا انا خلاص اتعلمت من غلطي .. انا بحكيلك عشان بس ابينلك إننا كلنا بنغلط ولازم نسامح لو كنت عملت زيك دلوقتي بقي مسكتلك علي غلطه ومرضتش اسامحك كنت هفضل زعلان منك لحد دلوقتي عاوز اوضحلك انك بتحتاجي حد يسامحك فلازم انتي كمان تسامحي لانك مش ملاك عشان متغلطيش سامحي يابنتي سامحي ومتخليش قلبك يبقي قاسي لانك هتخسري كتير وزي مانا سامحتك زمان وكنتي عاوزاني اسامحك وعملتي المستحيل فادهم كمان عمل المستحيل فلازم تسامحيه .. سامحي عشان أما تغلطي تلاقي اللي يسامحك
ياسمينا: والله يابابا مش عارفه اقولك ايه بس انت معاك حق
حسين: انا مش بقولك كده عشان تقوليلي حاجه انا بقولك عشان ميبقاش قلبك قاسي وتتعلمي انك تسامحي لأن بطريقتك دي كل حد هيغلط في حقك مش هتسامحيه هتخسري كل اللي في حياتك لأن محدش عنده طاقه يستحمل انتي بتبصي من اتجاه واحد بس علي نفسك وهو انك متسامحيش في حقك إنما اللي حواليكي يسامحوا في حقوقهم لو انتي الغلطانه عادي يعني انتي كنتي عاوزه ادهم يسامحك بس انتي مش مسامحاه وأما سامحك فعلا وجالك انتي رفضتي تسامحي ليه ؟؟ ماهو سامح في حقه !! دي اسمها انانيه يابنتي واوعي قلبك يطوله انانيه اتعلمي تسامحي عشان تلاقي اللي يسامحك أما تغلطي ميعملش زيك واتعلمي أما حد يشتري خاطرك متكسريش بخاطره اتعلمي تحبي صح .. وبعدين ده ربنا بيسامح واحنا مش احسن من ربنا شوفي انتي بتغلطي في حياتك اد ايه وربنا كل مرة يسامحك حتي لو نفس الأخطاء
ياسمينا: عندك حق يابابا انا حسيت اني وحشه اوي لازم اعود قلبي علي اللين والحب مش القسوه انا هروح الشركه بس مش عشان اخد شهاده لا عشان اشوف أدهم واقوله نبدأ صفحه جديده مفيهاش زعل
حسين بابتسامه: هو ده الصح يابنتي ادهم بيحبك ولو مش بيحبك ماكنش فرق معاه يثبتلك الحقيقه وأنه يدور علي اي باب يدخل منه كان استغل انك قفلتي بابك في وشه وبعد خالص إنما اللي يستغل اي فرصه بعد كل اللي حصل عشان يرجعلك أو يبينلك الحقيقه يبقي بيحبك
ياسمينا: شكرا علي وجودك اللي مقويني وساندني ودايما موجهني للصح
حسين: متقوليش كده مفيش شكر مابين اب وبنته ..وبعدين يلا بقي قومي انزلي شوفي رايحه فين عشان تلحقي
ياسمينا بابتسامه: ماشي سلام ياسحس
حسين بابتسامه حنونه: ربنا يسعدك يارب يابنتي
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
صافي: انا خارجه ياماما مش عاوزه حاجه ؟
سوسن: لا ياحبيبتي خلي بالك من نفسك ومتتأخريش
صافي: حاضر سلام ياحبيبتي
مصطفي ويصطدم بصافي: رايحه فين كده ؟
صافي بمكر: هقابل هند ونخرج شويه كده
مصطفي بتذكر: اه صح دي كانت قالتلي وانا نسيت خالص
صافي بغمزه: اللي واخد عقلك يادرش
مصطفي: يلا يابت روحي شوفي رايحه فين ومتتأخريش
صافي: حاضر ياعم متزقش بس .. وبخبث: تحب اسلملك علي هند
مصطفي وهو يدخل يجلس بجانب والدته قائلاً: شكرا ياختي ماهي كانت لسه معايا
صافي: ماشي ياعم انا حبيت اساعد بس
مصطفي: يلا يابت روحي شوفي انتي رايحه فين
صافي وهي تذهب: ماقولنا خلاص متزقش
مصطفي وهو يحدث والدته: هي صافي بقت عامله ايه دلوقتي ؟!
سوسن: الحمد لله هند الله يباركلها كلمتها واقنعتها بالعافيه أنهم ينزلوا عشان تخليها تغير جو
مصطفي: هي فعلا كانت قالتلي انها عاوزه تيجيلها وكده بس ماكنتش حابه في البيت عشان تخرجها من اللي فيه شويه
سوسن: الله يباركلها ويفرحنا بيكم قريب يارب ياحبيبي
مصطفي: يارب ياامي ادعيلنا
سوسن: دعيالك دايما ياحبيبي ربنا يسعدك
مصطفي: ربنا يخليكي ليا انا هقوم انام بقي شويه عشان تعبان
سوسن: ماشي ياحبيبي وأما تصحي يكون الغدا جهز نتغدي
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭٭
حاتم: اموله الأمورة قاعده لوحدها ليه
امال بابتسامه: ولا حاجه اجازه النهارده ولسه صاحيه
حاتم: ممكن طيب اقعد معاكي ولا ايه
آمال: اه طبعا انت بتقول ايه
حاتم: حبيبتي يالول احكيلي مالك
آمال: انا زي الفل انت اللي عندك الجديد
حاتم: جديد !! جديد ايه يابنتي ؟!
آمال بغمزه: حب جديد مثلا
حاتم: لا مفيش الكلام ده طب ياريت ياختي اهو الواحد يلاقي حد يهتم بيه شويه
آمال: اخص عليك ياتومه يعني احنا مش مهتميين بيك
حاتم: هو انا بشوفك يابنتي ده لولا انا اللي بدخلك
آمال: والله ياحاتم يابخت اللي هتاخدك بجد ومش عشان انت اخويا لا إنما عشان هتاخد احن واطيب انسان في الدنيا مفيش اخ بيعمل اللي بتعمله معايا انا وحنين ده بجد عرفت تكون اخونا وصاحبنا عرفت تكون قريب لينا وتخلينا نحكيلك من غير مانخاف بجد ياحاتم انا خدت حظي من الدنيا في اني عندي اخ حنين زيك كده ربنا مايحرمني منك ولا من اهتمامك بينا وتفضل دايما سند لينا
حاتم: ياسيدي ياسيدي علي الكلام الحلو وانتي يابخت اللي هياخدك وهتقوليله الكلام الحلو ده
آمال بضحك: والله مش بعرف اقول كلام حلو وبعدين ايه بقي مش هنفرح بيك وتجبلنا مرات اخ نطلع عينها كده
حاتم: يامسهل عندك عروسه طيب ؟
آمال: بس خلي بالك هغير منها أنها خدتك مننا
حاتم: انا محدش يقدر ياخدني منكم انتي وحنين مش اخواتي بس .. انا دايما حاسس انكم حتة مني مسئولين مني مفيش حد هيقدر ياخد مكانتكم عندي
آمال: ربنا يخليك لينا يارب
حاتم ويقبل رأسها: ويخليكم ليا ياحبيبتي واطمن عليكم
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
هند وهي تحتضن صافي: وحشتيني ياصافي
صافي: وانتي اكتر ياهنوده والله وحشاني اوي
هند: يعني لازم انا اللي اكلمك واتحايل علي معاليكي عشان تتكرمي وتنزلي
صافي بضحك: لا والله معلش حقك عليا
هند: شوفي يلا هناكل ايه مش وقت رغي واعذار ونشوف الكلام ده بعدين
صافي: ماشي ياستي يلا
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
هدير: أهلا بشمهندسه ياسمينا ازي حضرتك حمد لله علي السلامه
ياسمينا بابتسامه: الله يسلمك ياهدير ادهم بيه موجود ؟؟
هدير: لا والله للاسف بشمهندس ادهم مش موجود
ياسمينا: تمام هبقي اجيله وقت تاني
هدير: طب حضرتك ممكن تدخلي تستنيه لحد ماييجي
ياسمينا: لا مفيش داعي انا هبقي اعدي عليه وقت تاني مفيش مشكله .. عن اذنك
وذهبت ياسمينا وهي تحاول الاتصال بأدهم لتجده مغلق لتري امل تتصل بها لتجيب: ايه ياامل
أمل: انتي فين يابنتي
ياسمينا: جيالك اهو خلاص ..سلام
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
أمل: اخيرا ياهانم ايه التأخير ده كله
ياسمينا: معلش ياامل انا اسفه غصب عني
أمل: مالك ياياسمينا في ايه ؟؟
ياسمينا: مفيش انا تمام اهو
أمل: وهو انا تايهة عنك يعني ؟؟ انتي مالك في ايه وجايه منين كده ؟؟
ياسمينا: انا كنت في الشركة أما كلمتيني كنت لسه طالعه
أمل: رجعتي الشغل اخيرا
ياسمينا: مين قال اني رجعت مرجعتش
أمل: بت متجننيش انتي مش بتقولي انك كنتي هناك يبقي اكيد رجعتي الشغل
ياسمينا: لا ياامل مش شرط ومرجعتش الشغل ولا حاجه
أمل: اومال ايه ؟ ماتتكلمي علطول انتي هتنقطيني كلمه كلمه ولا ايه ؟؟ اومال منزلاني ليه ؟
ياسمينا: انا روحت لادهم عشان اتكلم معاه واعتذرله و..لتقاطعها امل بسعاده: اخيرا رجعتوا بقي
ياسمينا: يابنتي اصبري وانتي تعرفي اسمعي للآخر .. روحت مالقتهوش وكلمته تليفونه مقفول وانا قلقانه يكون حصل حاجه
أمل: خير بإذن الله ماتقلقيش وكل حاجه ترجع احسن من الاول
ياسمينا: يارب والله ادعيلي
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
هند: مالك ياصافي حساكي مش مبسوطه وفي حاجه مضايقاكي
صافي: لا ياحبيبتي انا كويسه متقلقيش
هند: انا عارفه انك ممكن تكوني قلقانه وده حقك بس خلي عندك ثقه في ربنا إن الله لا يحمل نفسا إلا وسعها واكيد ده اختبار وانتي اده والا ماكنش ربنا حاطك فيه صح ولا ايه ؟؟
صافي: معاكي حق ونعم بالله طبعا وانا راضيه الحمد لله ومش قلقانه لاني واثقه في ربنا وفترة وتعدي
هند: ربنا يشفيكي ويعافيكي يارب ويبعد عنك كل حاجه وحشه يارب ياحبيبتي
صافي: يارب متحرمش منك ابدا
هند: طب ايه بقي مش هتقوليلي مالك برضو ؟؟ مش احنا صحاب ولا ايه ؟؟
صافي: واكتر والله ربنا يعلم معزتك من معزة سوزان والله وبعتبرك اختي مش خطيبه اخويا
هند: طيب مادام كده بقي ممكن تحكيلي ايه اللي مضايقك ؟؟
صافي: مفيش موضوع قديم كان اتقفل من سنين واتفتح من تاني رجعلي كل حاجه في ثانيه والوجع اللي حاربت سنين عشان امحيه
هند: طب احكيلي يمكن اقدر اساعدك واوعدك أنه كلام بيني وبينك محدش يعرف عنه حاجه ولا حتي مصطفي
صافي: انا ورامي ابن خالتي كنا بنحب بعض وكنا المفروض هنتخطب ونتجوز ولكن محصلش نصيب حصلت مشكله بينا عادي وبعدنا شويه ومتكلمش غير بعدها بشهر تقريبا وانا كنت شايله اوي أنه ازاي يسيبني ده كله واتفاجئ بعدها بخبر خطوبته كنت هموت في اليوم ده ومش مصدقه أنه حصل واكيد بحلم ومريت بحاله نفسيه وحشه اوي ومبقتش عارفه اعمل ايه ولا اتصرف ازاي من صدمتي وبعدها بأقل من سنه اتجوز وكان فرحه علي واحده غيري ومطلعش حلم زي ماكنت بتمني وفين وفين عقبال أما اتعافيت من الوجع اللي جوايا وأما اتعافيت واتعايشت جيه رجع تاني أما تعبت القدر حب أنه يجمعنا .. وفتح معايا في جراح اتقفلت بصعوبة وطلب اننا نرجع ونتجوز طب اتجوزه ازاي بعد مابقي مع واحده غيري ؟؟ وليه عمل فيا كده ؟ وليه سابني وراح لغيري ودلوقتي جاي عاوز يرجعلي ليه كل ده اصلا ؟!
هند: وانتي عملتي ايه ؟؟
صافي: بقيت قاعده مصدومه مش عارفه ارد كل الكلام مبقاش موجود ولقيت نفسي بقوله لا مبقتش عاوزاك بيتك ومراتك وعيالك أولي بيك وانا مبقتش الزمك .. شوفت في عينيه نظرة شوق لكن ده مغيرش حاجه معرفتش ارجع وادي فرصه لانه مبقاش ينفع ومن يومها والوجع مبيهداش جوايا
هند: حبيبتي اللي عاوزه اقوله ليكي إن كل اللي حصل ده نصيب حتي لو كنتو كملتوا مع بعض مكنتوش هتتجوزوا برضو لانكم مش لبعض .. الإنسان دايما نظرته بتكون محدوده أنه عاوز يحقق اللي قدامه وخلاص وبيشوف انها سهله ويوقع اللوم علي الشخص اللي معاه مع إن الحكايه كلها في الاخر بتندرج تحت كلمه النصيب يمكن لو كنتو كملتوا مكنتوش ارتاحتوا مع بعض وتنفصلوا يمكن مكنش هو الشخص المناسب ليكي ولشخصيتك وانتي كمان برضو كده بالنسبه ليه محدش فيكم ليه ذنب في حاجه ولا في اللي حصل بس هي كلها ترتيبات ربنا وربنا مش رايدكم لبعض لانكم لو كنتم لبعض كنتو هتبقوا مع بعض مهما حصل بينكم ولو ربنا رايد أنه يجمعكم وأنكم لبعض فهتاخديه دلوقتي حتي لو دلوقتي بتقولي لا وشايفه أنه مستحيل .. حياتنا كلها ماشيه بترتيبات ربنا احنا مجرد سبب نحقق القدر اللي ربنا كاتبه لكل واحد فينا .. عندك انا ومصطفى مثلا بعدنا اد ايه ؟؟ سنين كتير ويشاء القدر أنه يجمعنا من تاني لأن ربنا كاتب لينا النصيب اللي نتقابل فيه وكل حاجه بيكون ليها وقتها المناسب يمكن قبل كده ماكنش وقت مناسب اننا نكون مع بعض لأسباب كتير احنا منعرفهاش عشان كده لازم تكوني واثقه في ربنا وفي اختياراته ليكي ولحياتك مش احنا اللي بنختار إنما ربنا اللي بيختارلنا وبيوجهنا وفي الاخر محدش هياخد اكتر من نصيبه ولا اكتر من اللي مكتوبله
صافي: صح عندك حق في كل كلمه الحمد لله علي كل شيء وربنا يعوضنا كلنا يارب ويجبر قلوبنا بكل خير وسعاده
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
حسين: طمنيني ياحبيبتي عملتي ايه ؟
ياسمينا وتجلس بجانب والدها: ولا اي حاجه يابابا زي ماروحت زي ماجيت مالقتهوش موجود فقابلت امل قعدنا شويه وخلاص
حسين: إن شاء الله خير يابنتي وربنا يصلح الحال يارب
ياسمينا: يارب يابابا ادعيلي
حسين: بدعيلك دايما ربنا يفرحك ويريح قلبك
ياسمينا: ربنا يخليك ليا يابابا .. بس هو انت شايف إن قرار اني ارجع لادهم قرار صح ولا ممكن ارجع اندم عليه بعدين ؟؟
حسين: مش انا اللي اشوف انتي اللي تشوفي لانك انتي اللي عارفه مفيش اي حد يقدر ياخد قرارات نيابه عنك غيرك لأن كل اللي هياخد قرار ويقولك اعملي كذا هيكون بياخده من المظهر اللي باين ليه إنما مش مكانك ولا جوه الموقف فانتي اكتر حد يقدر يقرر إذا كان صح ولا غلط لانك انتي اللي هتعيشي معاه ودي حياتك محدش يقدر ياخد قرار عن حياتك غيرك لانه مش هيعيش مكانك وكل اللي هيحكم هيحكم بظاهر الموضوع مش هيبص للتفاصيل .. وكل واحد هياخد عن طريقه تفكيره وشخصيته ففي اللي هيشوف مفيش مشكله ويقدر يتعايش وفي اللي هيشوف أنه مبقاش ينفع فكل واحد هيكون برأي مش هيريحك لأن كل واحد بيحكم من شخصيته وطريقه تفكيره وطبعا كلنا مختلفين عن بعض .. وكمان محدش هيحب يشوفك احسن منه
ياسمينا: ايوه بس ده لو حد تاني مش انت يابابا وانت اكيد هتخاف عليا وعارف مصلحتي وعشان كده انا باخد رأيك
حسين: حتي انا يابنتي مقدرش اخدلك قرار انا ممكن اقولك وجهه نظري واحكم باللي ظاهر قدامي وغالبا اي اب بيكون في صف ولاده غصب عنه لأن العاطفه بتسيطر عليه فلو قررت نيابه عنك أو ممكن قراري يأثر علي قرارك فأنا كده مش هكون بخدمك اد ماهكون بضرك لاني كده مش بعودك تاخدي قراراتك بنفسك وتعتمدي علي نفسك لازم تاخدي القرار بنفسك عشان تحسي بقيمه نفسك وإن ليكي رأي .. يعني مثلا من وجهه نظري انك انتي الغلطانه فانتي شايفه انك مش غلطانه لأن رد فعلك كان لفعل حصل فهنا في اختلاف وجهات نظر بسبب نظرتي للموضوع من بره ونظرتك للموضوع انك طرف منه بتبرري فعلك لنفسك فاهمه يابنتي ؟ انا شايف إن الموضوع مش مستاهل يوصل لكل ده علي حسب شخصيتي انتي شايفه إن الموضوع يستاهل من شخصيتك وده لأننا مختلفين عن بعض في الشخصيه إن في اللي يقبل حاجات ممكن حد تاني ميقبلهاش حتي لو كانت حاجات صغيرة فعشان كده بقولك محدش هيقدر يقرر غيرك لانك انتي اللي هتعيشي معاه فهل شايفه انك متقبله ادهم وعيوبه الموجوده وقادرة تتعاملي معاها ولا بالنسبالك أمر صعب ؟؟
ياسمينا: عارف يابابا كل مره بتكلم معاك بتعلم منك حاجات جديده وبتحسسني انك صح فعلا في كل كلمه بتقولها ومبعرفش أرد عليك لاني بقتنع بكلامك اللي كله حكمه
حسين: الحياه مدرسه يابنتي وتجاربها دروس ومواقفها وناسها وافعالها امتحانات بنتعلم منها مش هتكتسبي الخبرة الا أما تمري بتجارب كتير تعلمك حاجات كتير وممكن وجود شخص في حياتك دوره أنه يعلمك درس معين اوعي تفتكري وجود الناس اللي في حياتنا دي كده وخلاص لا كل واحد ليه دور في حياتنا وكلنا بنأثر وبنتأثر ببعض لأن كل واحد فينا بيتعلم من التاني حاجه
ياسمينا: صح يابابا والله عندك حق ومحدش بيتعلم ببلاش
حسين بضحك: مانتي بتتعلمي ببلاش اهو
ياسمينا بمشاكسة: مانا عشان معايا مصدر التعليم نفسه وادفع فلوس كمان ده يبقي حتي عيب ياسحس
حسين: قومي طيب يابكاشه اعمللنا كوبيتين شاي
ياسمينا: ياسلام بس كده أحلي كوبايه شاي .. عن اذنك هوا وتكون عندك
حسين بضحك وهو يحدث نفسه: ربنا يفرح قلبي بيكي ويطمني عليكي
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
في صباح اليوم التالي
أدهم: صباح الخير ياهدير .. حد سأل عليا امبارح ؟
هدير: اه يافندم بشمهندسه ياسمينا جت وسألت علي حضرتك وأما مالقتش حضرتك مشيت
أدهم: مقالتش كانت جايه ليه ولا عاوزه ايه ؟
هدير: لا والله يافندم
أدهم: تمام ياهدير اتفضلي انتي واطلبيلي قهوه بعد اذنك
هدير: حاضر يافندم بعد اذن حضرتك
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
أمل: عملتي ايه مع ادهم كلمك ؟؟
ياسمينا: لا بس تليفونه اتفتح
أمل: تليفونه اتفتح وانتي قاعده كده بكل برود وبتقوليها عادي ؟؟ يابرودك ياشيخة
ياسمينا: اعمل ايه يعني مش فاهمه ؟ اقوم ارقص
أمل: لا بس تكلميه مثلا ؟؟ يابنتي انتي هتشليني انتي مش كنتي عاوزاه مادام تليفونه اتفتح يبقي تكلميه لانه اكيد هيرد
ياسمينا: وهو ميتكلمش ليه إن شاء الله ؟ هو اكيد شاف اني رنيت عليه المفروض يتصل هو بقي
أمل: بت انتي .. هيتصل ازاي بعد اللي عملتيه معاه بانهي وش يعني ؟؟
ياسمينا: ماشي مانا كلمته يعني المفروض يتصل عشان انا كنت رنيت فمعني اني رنيت يبقي كان يرن عادي .. وغير كده اكيد نزل الشغل وهدير قالتله اني جيت وسألت عليه يبقي اكيد في حاجه
أمل: حتي لو زي ما بتقولي مش هيعمل كده عشان أما جالك لحد عندك انتي احرجتيه في بيتك .. رني عليه ياحبيبتي ربنا يهديكي يارب
ياسمينا: لا مش هرن انا
أمل: يابنتي رني بقي ربنا يهديكي انتي اللي عاوزاه مش هو وانتي اللي مبوظه الدنيا يبقي انتي اللي تصلحيها .. الراجل جالك لحد بيتك وقابلتيه مقابله زي الزفت وعايزاه اول مايشوفك كلمتيه وروحتيله يجري عليكي بعد اللي عملتيه معاه؟؟
ياسمينا: لا بس انا روحتله ورنيت عليه كان من باب الذوق عرف شاف رقمي يكلمني
أمل: ممكن يكون مخدش باله لان مش كل الناس بتدخل علي المسدجات وحتي لو ياستي .. هو استحاله يتصل حتي لو لقاكي رنيتي مليون مره عشان اخر مره انتي حرجتيه اوي وطريقتك مكنتش الطف حاجه معاه فلو رن يبقي معندوش كرامه ماتحطي نفسك مكانه لو هو اللي عمل معاكي كده وكان رن عليكي كنتي هترني ؟؟ بطلي شغل اطفال بقي وكلميه احنا بنصلح مش بنبوظ
ياسمينا: عندك حق بس انا خايفه
أمل: خايفه من ايه ؟؟
ياسمينا: خايفه يحرجني أو يكلمني بأسلوب وحش
أمل: معتقدش أنه يعمل كده وبعدين جربي ياستي متتوقعيش البلاء قبل وقوعه
ياسمينا وهي تمسك بهاتفها تتصل بادهم: اهو أما نشوف اللي هيحصل
أمل: خير إن شاء الله
ياسمينا: مش ب..ليقاطعها صوت أدهم: الو
ياسمينا بتخبط: ا..الو ازيك يا ادهم عامل ايه ؟
أدهم: الحمد لله بخير .. اتفضلي خير ؟
ياسمينا وهي تتوعد لأمل: كنت عاوزه اتكلم معاك في موضوع وجتلك الشركه امبارح بس مكنتش موجود
أدهم: اه .. اه .. هدير قالتلي أما جيت .. كنت في مشوار .. خير يعني في حاجه ضروري ؟
ياسمينا: اه لو ممكن نتقابل ونتكلم لو فاضي ؟
أدهم: عندي شغل بخلصه تقدري تعدي عليا في الشركه لو الموضوع مهم
ياسمينا: لا مش هينفع في الشركه خالص لو ممكن بعد الشغل حتي لو ينفع ؟
أدهم: تمام ماشي
ياسمينا: هبعتلك اللوكيشن اللي هنتقابل فيه
أدهم: تمام
ياسمينا وهي تغلق الخط: اعمل فيكي ايه كلمني بأسلوب زي الزفت
أمل: ماهو ده الطبيعي اومال عاوزاه يكلمك ازاي يعني ؟
ياسمينا: قومي من وشي ياامل وربنا يستر وانا ماشيه وراكي كده وأما اقوم اجهز نفسي عشان انزل
أمل: اتفضلي ياختي ربنا يهديكي
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وبعد مرور ثلاث ساعات تقريبا .. تجلس ياسمينا في أحد الكافيهات علي احدي الطرابيزات في انتظار أدهم لتجد هاتفها يرن باسمه لتجيب: الو
أدهم: انا في المكان بس مش عارف انتي فين
ياسمينا وهي تتلفت حولها: استني كده هشاورلك
أدهم: تمام خلاص شوفتك
وذهب ادهم لطرابيزة ياسمينا: ازيك عامله ايه
ياسمينا: الحمد لله تمام
أدهم: خير كلمتيني قولتيلي عاوزاني في موضوع مهم اتفضلي
ياسمينا: أدهم قبل أما اتكلم في اي حاجه انا بعتذرلك علي اللي عملته كان غصب عني
أدهم: مالوش لازمه الكلام ده دلوقتي وعلي العموم حصل خير مفيش حاجه
ياسمينا: انا طلبت اقابلك عشان فكرت كتير وقولت لازم اتكلم معاك
أدهم: اتفضلي
ياسمينا: أدهم انا فكرت كويس ولقيت اني كنت غلطانه في تصرفاتي وافعالي وفكرت في كلامك اخر مرة ولقيت اني فعلا غلطانه وقررت نبتدي صفحه جديده مع بعض ننسي فيها كل الماضي وندي نفسنا فرصه تانيه جديده
أدهم: ....
ياسمينا: أدهم انت ساكت ليه ماتتكلم
أدهم: عاوزاني اتكلم اقول ايه ؟
ياسمينا: قول اي حاجه اللي عاوز تقوله
أدهم: ......
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وقفلنا الفصل ال31 علي طلب ياسمينا أنها ترجع
- ياتري رد فعل ادهم هيكون ايه ؟!
- ياتري ممكن ادهم يدي فرصه تانيه لياسمينا ؟
لسه معانا احداث كتير هتحصل هنعرفها مع بعض الفصول الجايه ويارب تعجبكم وشكرا لكل اللي بيقرا وبيقولي كلمه حلوه يشجعني بيها اني اكمل ♥️ وبعتذر بشده عن التاخير بس والله بيكون غصب عني الكليه بتضغط عليا جامد طول الترم تسليمات مبلحقش افوق ادخل ع الفاينال علطول فسامحوني اني بتأخر عليكم غصب عني وادعولي اتخرج بقي ع خير 🥺♥️
الي اللقاء في الفصل الثاني والثلاثون ♥️
#بقلم_صباح_وحيد ♥️✨