أعطيت لحبك فرصة فخدعتني

✨الفصل السادس عشر ✨

كنا قفلنا الفصل اللي فات علي أما ياسمينا اتفاجئت بالضيوف وكنا قولنا ياتري مين الضيوف دي وايه هيحصل في المقابلة دي !! يلا بينا نكمل
                  ✨قراءة ممتعة ✨
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ياسمينا تدخل وهي تحمل صنية عليها بعض المشروبات وقبل أن تقدمها تنظر أمامها لتقع منها أرضًا بقوة لتنتفض ياسمينا من أثر الصدمة
حسين: بس خلاص حصل خير ..خدت الشر وراحت
ياسمينا واتوترت وطلعت تجري بسرعة لتسرع ورائها ملك
سهير: احنا اسفين جدا ياجماعة غصب عنها معلش
محمود: لا مفيش مشكلة احنا أللي اسفين اننا جينا فجأة كدة
ياسمينا وقد أدخلت لغرفتها سريعًا وورائها ملك
ملك: ايه اللي حصل خلي الصنية تقع منك بالشكل دة !!
ياسمينا بتوتر: دة أدهم المهدي مديري في الشغل وصاحب الشركة أللي بشتغل فيها وشديت معاه اكتر من مرة وكنت هسيب الشغل ..ياتري ايه جايبه وايه علاقتهم ببابا ويعرف اني بنته ولا لا !! اعمل ايه دلوقتي طيب !!
ملك بصدمة: بجد !! اكيد مايعرفش زيك واكيد اتفاجئ هو كمان ..بس السؤال هنا بقي بابا يعرفه منين وايه علاقته مع بابا !!
ياسمينا بتوتر: انا مش عارفة اعمل ايه دلوقتي ولا اتصرف ازاي ..قوليلي اعمل ايه ولا اتصرف ازاي !!
سهير وهي تدخل: انتو هتفضلوا واقفين كدة كتير وسايبين الناس قاعدين برة !! ووجهت نظرها لياسمينا: وانتي يا ياسمينا ايه أللي حصل دة !!
ملك بسرعة: لا احنا خلاص طالعين اهو ياماما وراكي علطول مش هنتأخر
سهير وهي تقترب: مالك يا ياسمينا في ايه !! انتو مخبيين عليا حاجة !!
ملك بتوتر: ها ..لا..لا..خالص ياماما هنخبي عليكي ايه بس !! مفيش حاجة ..كل الحكاية إن أدهم المهدي يبقي مدير ياسمينا في الشغل وصاحب الشركة أللي ياسمينا بتشتغل فيها ودة أللي خلي ياسمينا اتصدمت أول أما شافته وعشان كدة وقعت الصنية
سهير: اه عشان كدة الدنيا صغيرة فعلا ..طب يلا عشان عيب نسيب الناس كدة
ياسمينا: ماما ..انا مش عاوزة اتجوز دلوقتي
سهير بتعجب: ومين قال في جواز !!
ياسمينا بتوتر: مش انتي قولتيلي ياماما أنهم جايين يتقدموا !!
سهير: لا انا قولت ابوكي حاسس بكدة إنما هما ماتكلموش معانا في حاجة زي كدة يعني ممكن تكون زيارة عادية وانا عرفتك عشان أما تقعدي معاه تتعرفي عليه وكدة وماتتفاجئيش
ياسمينا بتوتر: لا انا مش عاوزة ياماما ومش موافقة
سهير بتعجب: مش موافقة !! هو انتي لسة عرفتيه ولا قعدتي معاه عشان تقولي موافقة ولا مش موافقة !! بطلي دلع البنات دة بقي واطلعي للناس يلا عشان عيب مش معقول الناس جاية بيتنا ونسيبهم كدة
ياسمينا: أيوة ياماما اعرفه مش مديري في الشغل !!
سهير: ياحبيبتي تعامل جوة الشغل حاجة وبرة الشغل حاجة تانية ..ويلا بقي عشان الناس قاعدة عيب كدة مش وقت دلع
ياسمينا: بس ي ماما ا.. قاطعتها سهير: من غير بس ويلا عشان تطلعي تقعدي مع الناس ..وتركتهم وذهبت
ياسمينا: ها قوليلي بقي اعمل ايه انا دلوقتي ولا اتصرف ازاي !!
ملك باستسلام: مفيش حل غير انك تطلعي وتقعدي معاه زي ما ماما قالت
ياسمينا: لا مستحيل ياملك مستحيل ..بقولك شديت معاه اكتر من مرة واخر مرة كنت هسيب الشغل ..وهو دايما بحسه بيتلككلي على اي حاجة وانا مش عاوزة اديله الفرصة لكدة ياملك اكيد هيستغل الفرصة ويطلع دة كله عليا
ملك: اهدي يا ياسمينا كدة وبطلي كلامك دة وبلاش تفكري بالطريقة دي ..انتي دلوقتي لازم تطلعي عشان عيب واقعدي معاه واتكلموا وبعدها قرري براحتك بس دلوقتي لازم تطلعي وبعدين ايه خلاكي متأكدة أنه جاي يتقدم مش يمكن زيارة عادية احنا لحد دلوقتي مش معانا اي حاجة تأكد أنه جاي يطلبك ..يلا بقي..وذهبا كل من ملك وياسمينا للخارج
ملك بإحراج: احنا اسفين جدا ياجماعة على اللي حصل دة
سميحة بإبتسامة: ولا يهمك ياحبيبتي حصل خير واحنا أللي اسفين اننا جينا فجأة كدة من غير ترتيب ميعاد قبلها ولا حاجة والموضوع جيه فجأة
ياسمينا وهي تنظر ف الأرض بحرج: انا اسفة جدا مقصدش
محمود بإبتسامة: ولا يهمك يابنتي تعالي اقعدي
حسين بإبتسامة: تعالي اقعدي يا ياسمينا ماتتكسفيش
محمود بإبتسامة: احنا أللي آسفين اننا جينا فجأة كدة بس هي زيارة جت فجأة كدة معلش
ياسمينا بإرتباك: لا خالص ولا يهم حضرتك ..انتو شرفتونا
محمود بإبتسامة: ربنا يخليكي يابنتي ويبارك فيكي ..قوليلي بقي انتي خريجة ايه وبتشتغلي فين !!
ياسمينا بتوتر: انا خريجة هندسة وبشتغل في شركات المهدي عند حضرتك
محمود بصدمة: دة بجد !! وبص لأدهم: يعني انت تعرفها كدة !!
أدهم ببرود: أيوة اعرفها شغالة معانا في الشركة
محمود: سامحيني يابنتي انا معرفش اصل أدهم هو أللي ماسك الشركة دلوقتي ومسئول عن كل حاجة ..وعشان كدة اتصدمتي اول أما شوفتي أدهم ..لا حقك الصراحة مديرك في الشغل زهقانة منه طول اليوم وتيجي تلاقيه في البيت كمان وراكي وراكي حتي في البيت
"ضحكا الجميع علي طريقة محمود"
حسين: ياه علي الصدف ..تصدق انا مجاش ف بالي الموضوع دة خالص قبل كدة ترتيبات ربنا فعلاً
محمود: القدر لعب لعبته وجمعنا من تاني
"وقضوا معًا بعض الوقت في سعادة وفرح وبعد أن انتهوا من جلستهم تلك استأذن محمود المهدي وأسرته لكي ينتقلوا إلي منزلهم متقدمين بالشكر لحسين وعائلته ووعد بينهم أنهم سوف يلتقيا مرة أخري"
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭
في الطريق بسيارة أدهم
محمود: ها يا أدهم ماقولتليش ايه رأيك يعني !!
أدهم باستعباط: رأيي في ايه يابابا !!
محمود: انت هتستعبط !! رأيك في ايه !! رأيك في العروسة !!
أدهم: اه ..عادي يعني يابابا
محمود: يعني ايه عادي دي مش فاهم !! يعني عاجباك ولا مش عاجباك !!
أدهم: عادي يا بابا كويسة يعني ومادام حضرتك تعرفهم خلاص
محمود: انت أللي بتتعامل معاها بقي وعرفها
أدهم: كويسة يعني عادي .. وبعدين دة تعامل في الشغل بس واكيد مش هعرف احكم عليها من تعامل الشغل
سميحة: يعني نتوكل على الله ونخطبهالك يابني !!
أدهم: أللي انتو شايفينه صح اعملوه
سميحة ببعض العصبية: ايه اللي انتو شايفينه صح اعملوه دة هو احنا أللي هنتجوزها ونعيش معاها ولا انت !! ماتريحني ولو لمرة واحدة في حياتك بقي
أدهم: وانا قولت ايه بس ياماما مانا بقولك اهو أللي عاوزينه
محمود: يعني ايه أللي عاوزينه !! وانت رأيك فين !!
أدهم: انتو عارفين رأيي من البداية وبيزعلكم بس جيت معاكم عشان مازعلكوش وعشان كدة بقولكم أللي يريحكم
محمود: مينفعش لازم يبقي ليك رأي مش هنروح للبنت وانت رافضها مثلاً مينفعش ..اومال احنا عملنا دة كله ليه وخليناكم تقعدوا مع بعض مش عشان تتعرف عليها وتعرف شخصيتها وطريقة تفكيرها وكدة وتقدر تاخد قرار انك عاوزها ولا لا !!
أدهم: خلاص يابابا حدد يوم مع باباها نروح نتقدملها فيه
سميحة بإبتسامة: ربنا يسعدك يارب ويجعلها نصيبك الطيب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ياسمينا: من امتي وبابا بيعزم صحابه في البيت !!
ملك: وفيها ايه بس يا ياسمينا عادي يعني ..صحاب بقالهم سنين واتقابلوا صدفة وبابا عزمه والراجل قاله أنه هاييجي مش معقولة يقوله لا ماتجيش
ياسمينا: محمود المهدي !! بابا ليه علاقة بعيلة المهدي !! الدنيا صغيرة فعلاً
ملك: قوليلي طيب شديتي مع ابنه ليه !!
ياسمينا والتفتت إليها: كذا موقف كدة حصل خلاني أشد معاه
ملك: زي ايه مثلا !!
ياسمينا وقصت عليها كل ماحدث: بس دة كله اللي حصل مكنش بيصبر يسمع للآخر حتي يعني يوم أما فلاشة تصميمي كانت ضايعة يعني وكدة وقولتله فبقي كل حاجة تحصل اكون انا فيها مثلا يصدق وميديش فرصة يسمع ولا يعرف وكل حاجة شايفني مهملة عشان مرة بس بقيت في نظره مهملة واي حاجة يقولي مانتي حصل منك كذا وكذا فطبيعي تكوني انتي برضو أللي يضيع حاجة مرة يضيعها الف مرة والكلام دة ..عارفة زي لو حد كدب عليكي في حاجة لو جيه قالك اي حاجة تاني مستحيل تصدقيه مع أنه ممكن يكون صادق ويحلفلك بس انتي عشان حكمتي من أول مرة واول موقف فرتبتي كل اللي جاي على اول مرة دي وهو عمل كدة وعلمني درس هنا مهم اوي إن البداية مهمة ..مهمة اوي وأننا لو بدأنا صح هننهي صح
ملك: اختيار البداية اصعب حاجة لانه بيترتب عليه كل أللي جاي بعد كدة وعشان كدة واحنا بنختار لازم نكون عارفين احنا بنختار ايه وليه وعشان ايه ..لازم نختار صح عشان مانرجعش نندم
ياسمينا: بالظبط كدة ..وانا الحمد لله اختارت البداية غلط عشان كدة كانت النهاية غلط لانك زي ماقولتي اختيار البداية بيترتب عليه كل أللي جاي بعد كدة ..يعني حتي لو اختارنا البداية غلط وحاولنا ف النص نصلح عشان النهاية تطلع صح مش هتطلع صح برضو لأن الأثاث غلط عاملة زي اثاث عمارة لو اتعمل صح هتكمل صح ولو اتعمل غلط يبقي العمارة باظت وهتقع لأن الأثاث غلط أصلا .. واحنا أللي بنختار الاثاث دة يكون ايه عشان بنبني عليه حياتنا أللي جاية وليطلع صح ويكمل من غير ما يقع ولا يتأثر بشوية هوا جامدين يإما يطلع غلط بقي ومن اول شوية هوا جامدين تلاقيه بقي ع الأرض ..
ملك: انسي ..انسي يا ياسمينا ..انسي وعيشي حياتك من جديد عوض ربنا أحلي بكتير وحلو اوي بجد أما تشوفي عوض ربنا بعينيكي وتحسي بفرحته هتعرفي انك كنتي غلطانة انك زعلتي في يوم على حاجة ماتستاهلش
ياسمينا بألم: انسي !! انسي ايه !! هو بسهولة كدة انسي !! عارفة ياملك ايه أللي واجعني !! مش أنه خبي عليا لا .. اللي واجعني وعده ليا وفي قلبه غيري  وقربه مني قدر ازاي يقرب منه وهو بيفكر في غيري !! قدر ازاي يوعدني !! كل كلام الحب أللي قالهولي كان بيقولوا ازاي وهو مش طالع من جواه ليا !! كل الكلام دة كان ليها مش ليا وهو كان بيشوفها فيا لانه كان بيحاول ينساها بيا انا كنت مجرد مطب في حياته فكر أنه يقدر يعدي بيه مرحلة في حياته .. بس انا أللي غلطانة اني صدقت بس مكنتش اعرف وكانت أول مرة حد يقولي بحبك فصدقت ماكنش عندي الخبرة الكافية في الحب كنت خايفة في الاول اكون بظلمه بحبي ليه كنت خايفة اكون مابحبوش زي مابيحبني كنت خايفة اكون مجرد حبيت حبه ليا فعشان كدة حبيته بسبب الحب دة ..بس هو اللي ظلمني مش انا ..شوفتي بقي انا كنت بفكر في ايه وهو عمل فيا ايه !! شوفتي بقي اول قصة حب في حياتي عاملة ازاي !! علمني ..علمني مش اي حد يقولي بحبك يكون بيحبني فعلاً ..علمني محبش تاني لأنه حطم قلبي ماخلاش منه حاجة ولا مكان فيه يقدر يحب تاني
ملك واحتضنتها: مفيش حلاوة من غير نار والحب زي ماهو حلو بس لازم يكون في وجع مفيش حب من غير وجع وزعل وكسرة قلب ..عندك انا واحمد اهو بنحب بعض جدا بس برضو ساعات بيحصل بينا شوية مشاكل كدة بس بنحلها مع بعض من غير ماندخل حد بينا اي اتنين مهما كان حبهم لبعض كبير فلازم تاتش في النص كدة .. لأن الحياة لو بقت كلها حب بس هتبقي مملة ولو بقت كلها خناق بس هتبقي مملة برضة فلازم من دة علي دة لازم شوية حب وشوية خصام عشان يحصل توازن ونقدر نكمل
ياسمينا: بس الوجع من حد بعيد عنك أهون بكتير من الوجع من حد كان أقرب ليكي اكتر من نفسك
ملك: لازم تتوجعي من القريب منك عشان تتعلمي صح وتاخدي بالك بعد كدة إنما البعيد عنك فهو كدة كدة بعيد ومش فارق معاكي إذا كان يبعد أو يقرب إنما حد قريب منك بيفرق معاكي كل خطوة بيعملها بيفرق معاكي يبعد ولا يقرب وعشان كدة بتتعلمي صح
ياسمينا: كلامك صح وحقيقي فعلاً
ملك: انسي بقي وكفاية حزن عاوزاكي ترجعي ياسمينا بتاعت زمان الفرفوشة الشقية القوية
ياسمينا: ادعيلي ..ادعيلي ربنا يهون عليا
ملك: ربنا يفرح قلبك يارب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
حازم بهزار: سمعت انك روحت تخطب مصدقتش نفسي والله
أدهم ببرود: انت مكلمني عشان تتريق ولا ايه !!
حازم: لا مقدرش ياصاحبي أنت عارف ..بس قولي بقي عملت ايه !!
أدهم: ماعملتش حاجة
حازم: نعم ياخويا !! اومال كنت رايح تعمل ايه !!
أدهم: مانت لو تصبر علي رزقك هفهمك
حازم: سكتت أهو اتفضل فهمني
أدهم وقص عليه ماحدث: بس ياسيدي وابويا قالي نروح واشوفها وكدة ونتكلم وبعد كدة نشوف بقي
حازم: طيب وانت ايه عجبتك ولا ايه !!
أدهم: مش عارف ..مش هتصدق لو قولتلك هي طلعت مين أصلاً
حازم: مين !! اوعي تكون البنت ..قاطعه أدهم: أيوة هي ياسمينا البنت أللي دايما بتخانق معاها
حازم بصدمة: ياه علي الدنيا ..وابوك يعرفها منين !!
أدهم: هو وابوها صحاب من زمان واتقابلوا في خطوبة هند بنت عمتي
حازم: ايه اللغبطة دي انا مش فاهم حاجة
أدهم: بقولك سيبني دلوقتي وبكرة ابقي افهمك مش وقته دلوقتي اقعد اشرح ..يلا سلام
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
وفي صباح اليوم التالي
حنان: مالك ياحازم سرحان في ايه من الصبح مش معايا خالص
حازم: معلش ياحبيبتي ..كنتي بتقولي حاجة !!
حنان: مالك سرحان في ايه مخليك بعيد عني كدة أللي واخدك مني !!
حازم بإبتسامة: مفيش حاجة تقدر تاخدني منك وانتي عارفة كدة
حنان بلطف: طيب كنت سرحان في ايه بقي !!
حازم: أصل أدهم راح عشان يخطب امبارح
حنان بصدمة: يخطب !!
حازم: اه يخطب مالك اتخضيتي كدة ليه !!
حنان: لا انا اتصدمت بس ..أصله فجأة كدة !! وكمان عشان بحس انه رافض الموضوع دة ودايما بشوفه جامد من برة كدة مش بيفرق معاه حاجة 
حازم: لا عادي ولا تتصدمي ولا حاجة كدة كدة كان اكيد لازم يخطب وييجي اليوم دة ماهو اكيد مش هيفضل طول عمره كدة ..أدهم ولا قلبه جامد ولا حاجة زي مانتي فاكرة أدهم اطيب واحد في الدنيا بس الحياة جت عليه والظروف علمته يكون كدة من كتر ماكانت بتيجي عليه اوي
حنان: صح عندك حق هو اكيد مش هيفضل كدة
حازم: مش هتصدقي العروسة تبقي مين بقي هو اتصدم اصلا
حنان: مين !!
حازم بضحك: ياسمينا أللي اتخانق معاها اكتر من مليون مرة ومرمط بكرامتها الأرض
حنان بصدمة: ايه !! ياسمينا !!
حازم: انا اتصدمت زيك كدة بالظبط اول أما قالي مابالك هو بقي كان عامل ازاي !!
حنان: هو ماكنش يعرف !!
حازم: لا أبوه وأبوها يبقوا صحاب وأبوه طلب منه أنهم يروحوا يشوفها وكدة ويقعد معاها الاول
حنان: والله !! طب كويس
حازم: ربنا يجعلها نصيبه الطيب يارب ..أدهم تعب كتير ياحنان وادي حب كتير جيه الوقت بقي أللي ياخد حب هو كمان ويعوض دة كله
حنان: ربنا يقدمله أللي فيه الخير
حازم: يارب ياقلبي ويتمملنا على خير
حنان: يارب ياحبيبي إن شاء الله
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
حسام: يوم الخميس الجاي الساعة 8 بليل يناسبك !!
منال بتفهم: اشمعنا !! في حاجة ولا ايه !!
حسام بإبتسامة: اهم حاجة ..هاجي اتقدملك واطلبك من ابوكي رسمي وتبقي ليا وحلالي
منال بفرحة: بجد !! بجد يا حسام !!
حسام بسعادة: بجد ياقلب حسام ..ها قوليلي مناسب ولا نغيره !!
منال بفرحة: مناسب ..مناسب اوي كمان
حسام بإبتسامة: خديلي معاد من بابا بقي وعرفيه أني جاي اتقدملك
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
سميحة: أهلا أهلا ياكوثر وانا اقول ايه النور دة .. سعدية هاتي حاجة سقعة بسرعة
كوثر: لا مالوش لزوم تتعبي نفسك انا جاية اقعد معاكي شوية عشان وحشتيني
سميحة: انتي عبيطة ولا ايه !! اعملي حسابك هتتغدي معايا النهاردة
كوثر: معلش ياسميحة مش هينفع انا جاية اطمن عليكي واقعد معاكي شوية وماشية عشان العيال كمان
سميحة: عيال مين دول !! هما لسة بيرضعوا !! دول كبروا ماشاء الله
كوثر: كل مابيكبروا همهم بيكبر معاهم اكتر
سميحة: دة الطبيعي ياكوثر
كوثر: كنت اقول امتي يكبروا عشان مشيلش همهم اكتشفت أنهم كل مابيكبروا كل مابشيل همهم اكتر ومهما كبروا ببقي شايفاهم لسة صغيرين
سميحة: ومين بيقدر يشيل عياله من دماغه بس ياكوثر مهما كبروا بيفضل همهم هو همنا وبنفضل شايلين همهم اكتر من الاول كمان
كوثر: صح عندك حق والله ياسميحة محدش فينا بيقدر يشيل عياله من دماغه ..المهم انتي عاملة ايه وادهم
سميحة: دة انا نسيت اقولك لقينا عروسة كويسة اوي لأدهم تبقي بنت صاحب محمود ..وروحنا شوفناها وكدة عشان أدهم يقعد معاها وكدة بس..بس لسة متكلمناش ف حاجة قولنا يشوفوا بعض الاول ولو عجبته نبقي نتكلم
كوثر بفرحة: بجد !! الف الف مبروك ياسميحة وربنا يتممله علي خير يارب ويفرح قلبه
سميحة بإبتسامة: الله يبارك فيكي ياحبيبتي وعقبال حاتم وآمال وحنين كدة يارب إن شاء الله
كوثر: يارب ..يارب ياسميحة
سميحة: مالك ف ايه !! مش عاجباني حساكي في حاجة وساكتة
كوثر: مفيش ياسميحة شوية مشاكل ومشاكل العيال انتي عارفة والضغط بس
سميحة: لا مش حكاية كدة انتي ف حاجة تانية مضايقاكي انا عارفاكي
كوثر: صدقيني لو في حاجة هقولك ..هو بس زي ماقولتلك ضغط وكدة ومشاكل العيال وخصوصًا آمال
سميحة: مالها آمال !!
كوثر بحزن: آمال مابقتش آمال ياسميحة مابقتش آمال الوردة المفتحة أللي كلها بهجة وحيوية آمال اتغيرت ومابقتش هي بقت حياتها كلها عبارة عن حزن وعياط وانعزال لوحدها مابقتش عارفة اعملها ايه قلبي بيتقطع عليها أما بشوفها كدة مهما كان هي بنتي وانا ام ياسميحة
سميحة بحزن: ربنا يطمنك عليها يارب
كوثر: يارب ياسميحة يارب ..هي غلطت ولازم تتحمل نتيجة غلطها عشان بعد كدة تتعلم ..يلا الحمد لله ..ولازم تشرب من نفس الكأس أللي سقت بيه غيرها ..اصل الدنيا دي كأس وداير علينا كلنا بنملاه باللي احنا عاوزينه عشان يوم ماييجي دورنا نشرب منه من اللي احنا اختارنا اننا نملاه بيه وهي اختارت وملت الكاس بتاعها فلف ورجعلها وشربت منه باللي هي اختارت أنها تملاه بيه فتستحمل بقي نتيجة اختيارها
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
حازم: مالك ياعم في ايه !!
أدهم: مجتش النهاردة حاجة غريبة !!
حازم: هي مين دي اللي مجتش النهاردة !!
أدهم: هتكون مين يعني !! ياسمينا
حازم: اوبا انت وقعت ولا ايه ياصاحبي
أدهم بنظرة اخافت حازم: وبعدين معاك بقي انا غلطان اني بتكلم معاك اصلا
حازم: خلاص ..طب مجتش ليه !! تفتكر تكون سابت الشغل فعلاً !!
أدهم باستغراب: سابت الشغل !! لا ماعتقدش
حازم: ماتعتقدش ليه !! أنت مش كان اسلوبك معاها اخر مرة زي الزفت وقالتلك انها هتقدم استقالة وتمشي
أدهم: مقدمتش استقالة ولا جالي حاجة منها
حازم: طيب وهتعمل ايه دلوقتي انت ولا هتعرف ازاي إذا كانت مشيت فعلاً ولا لا !!
أدهم: انا خلاص عرفت انا هعمل ايه
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
منال بفرحة: أيوة ياياسمينا ..حسام جاي يقابل بابا يوم الخميس عشان يطلبني منه
ياسمينا بفرحة: بجد !! مليون مبروك ياحبيبتي وربنا يتمملكم علي خير يارب
منال بفرحة: بقولك ايه انتي لازم تبقي موجودة وهو جاي يتفق مع بابا وتحضري قراية الفاتحة اديني قولتلك اهو
ياسمينا بسعادة: طبعا ياحبيبتي ربنا يسعدك يارب
منال بحزن: وعقبالك يارب
ياسمينا بحزن وضحكة مكسورة: لا عقبالي ايه بقي انا جربت حظي مرة خلاص مش هبلة عشان اغلط نفس الغلطة مرتين
منال: نصيبك لسة مجاش بس ..لسة الايام جاية قدامك وهتقابلي أللي يحبك ويعوضك وينسيكي اي حاجة وجعتك وحبك ليه هتنسي كل حاجة وجعتك في يوم ..وهتبقي ذكري بس بقت تراب ومش هيكون ليها اي اثر
ياسمينا بإبتسامة: إن شاء الله ياحبيبتي إن شاء الله خير ..المهم سيبك انتي من اي حاجة دلوقتي وافرحي
منال: ربنا يخليكي ليا يارب
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
سوزان: يلا ياشاكر هنتأخر
شاكر وهو يتجه نحو الخارج: انا خلاص خلصت أهو ..شوفي العيال فين ويلا
سما وهي تمسك بشنطة صغيرة علي كتفها: انا اهو يابابا يلا بينا عسان نمسي بتي (عشان- نمشي- بقي)
شاكر وهو يكاد يموت من الضحك علي منظر ابنته: ايه اللي انتي شايلاه دة ياسما
سما وهي تحاول اعتدال الحقيبة: سنطة يابابا بتاعت خلوج زي بتاعت ماما (شنطة- خروج)
شاكر: طيب دخليها يلا واندهي ماما ويلا عشان نمشي
سما: لا هنده ماما ومس هدخلها بتولت دي سنطة خلوج اسمعنا ماما (ومش هدخلها بقولك دي شنطة خروج اشمعنا ماما)
شاكر: عشان دي بتاعت كبار وماما كبيرة أما تبقي تكبري ابقي البسيها
سما: لا انا كبيلة بلضو لازم ابقي سيك تدة (لا انا كبيرة برضو لازم ابقي شيك كدة)
سوزان: يلا ياشاكر ..سما ايه اللي شايلاه دة ادخلي دخلي الشنطة يلا
سما: لا ياماما عسان اتون زيك (عشان اكون زيك)
سوزان واجلست علي ركبتيها أمامها: دخليها وانا هجبلك شنطة صغنونة كدة علي قدك تخرجي بيها ايه رايك !!
سما: لا بتضحتي عليا (بتضحكي)
سوزان: لا بجد بس يلا سيبيها بقي
سما: خلاص ماسي يلا بقي (ماشي)
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭»
آمال مستيقظة من النوم وإذ بباب الشقة يُفتح لتري والدتها التي كانت بالخارج
آمال: الله !! كنتي فين ياماما كدة !!
كوثر وهي تجلس: كنت بجيب شوية حاجات كدة وعديت علي خالتك اقعد معاها شوية
آمال: حمد لله علي سلامتك
كوثر: الله يسلمك ..انتي كنتي نايمة ولا ايه !!
آمال: اه لسة صاحية واستغربت أما مالقتكيش
كوثر: مانا نزلت ولقيت نفسي قريبة من عند خالتك قولت أما اعدي اقعد معاها شوية ومسكت فيا بقي اتغدي معاها فاتغدينا وجيت علطول أهو
آمال: وادهم كان هناك !!
كوثر: وانتي بتسألي علي أدهم ليه بقي !!
آمال: لا عادي يعني ياماما ..ماتقلقيش انا خلاص نسيت الموضوع دة
كوثر: يكون احسن برضو ولو منسيتيش فلازم تنسي لأن أدهم مابقاش ليكي خلاص ولا بقي ينفع يكون ليكي
آمال بقلق: قصدك ايه ياماما مش فاهمة !! خالتو عرفت وقالتلك حاجة ولا ايه !!
كوثر: خالتك عرفت كل حاجة آخر مرة كنا هناك وقالتلي مش هنخسر بعض عشان خاطر العيال احنا اخوات قبل مايكونوا هما ولادنا وقبل مانكون احنا أمهاتهم
آمال: عرفت !! عرفت ازاي !!
كوثر: أدهم حكالها كل حاجة عشان كانت عاوزة تخطبك ليه وهو رفض من غير مايعرفها حاجة وقالها انك زي أخته لحد ماكنا هناك وبعد مارجع من معانا كلمته تاني وفتحت معاه الموضوع ورفض برضو فاتخانقت معاه فاضطر يحكيلها كل حاجة عشان كانت عاوزة تعرف ايه سبب رفضه ليكي
آمال بصدمة: معقولة !! انا غلطت ..غلطت
كوثر: لازم تنسي بقي
آمال: هو دة السبب يعني أللي عاوزاني انسي عشانه !!
كوثر: لا مش هو دة السبب
آمال: اومال ايه هو السبب !!
كوثر: أدهم هيخطب
آمال بصدمة: ايه !! أدهم ايه !! هيخطب !!
كوثر: أيوة هيخطب مش من حقه ولا ايه !! راحوا وشاف العروسة ولسة هيروحوا بقي ويتكلموا ويتفقوا علي الخطوبة
آمال بصدمة ودموع: لا..لا..لا ياماما قوليلي انك بتضحكي عليا
كوثر: لا بجد ..انتي مش لسة قايلة انك نسيتي يبقي انتي مالك بقي يخطب ولا لا !!
آمال بدموع: كنت بحاول ياماما كنت بحاول أو بقنع نفسي اني نسيته بس الحقيقة لا ..مالي اني لسة بحبه ..لسة بحبه ياماما
كوثر: لازم تنسي يا آمال لازم تنسيه كفاية اوي أللي حصل زمان خلاص وكنت ممكن اخسر اختي أللي ماليش غيرها بسببك كفاية بقي لحد كدة وانسيه وماتفكريش فيه تاني
آمال: كان عندي امل اننا نرجع ونتجوز ونعيش مع بعض وكل حاجة هتتصلح
كوثر: انتي بتحلمي مفيش حاجة كانت هتتصلح ولو دة كان حصل واتجوزتوا فعلاً كان هيفضل فيه حاجز بينكم بيبعدكم كل ماتحاولوا تقربوا ومع أقل مشكلة ولا اصغر خناقة الماضي دة هيظهر ويقطع فيكم ويبعدكم اكتر كانت المسافات بينكم هتبعد اكتر وكان كرهكم لبعض هيزيد وحبكم هيتحول لكره وحياتكم لجحيم ..مينفعش يحصل اللي بتقوليه دة لانه صعب جدا التعايش معاه ونسيانه ..الافضل ليكم انتو الاتنين هو البعد
آمال: ليه ياماما ماكلنا بنغلط احنا مش ملايكة عشان منغلطش
كوثر: صح معاكي حق كلنا بنغلط بس مش كلنا بنقدر نسامح وننسي ..قوليلي يا آمال لو كنتي اتفاجئتي بخطوبة أدهم علي واحدة غيرك وهو مرتبط بيكي كان هيكون ايه احساسك ساعتها !! كنتي هتوافقي ترجعيله لو كان سابها وجيه طلب منك ترجعيله !!
آمال سكتت ومعرفتش ترد تقول ايه ..فاكملت كوثر: سكتي يعني !! سكتي عشان مكنتيش هتوافقي وأللي ماتقبلهوش لنفسك يبقي ماتقبلهوش لغيرك
آمال: ماشي ياماما انا عارفة اني غلطت وكان نفسي يسامحني
كوثر: وانتي ليه مكنتيش هتسامحيه !! انتي مكنتيش هتسامحي يبقي هو هيسامح !! اشمعنا طيب !!
آمال: عشان أللي بيحب بيسامح ياماما وانا كنت ممكن اسامح عشان كنت هكون بحبه وعشان أكسبه هو واكسب حبه كنت هسامحه وكنت هحاول انسي
كوثر: وأللي بيحب برضة مش بيخون ولا بيبعد ولا بيخذل ولا بيوجع ولا بيجرح وانتي عملتي دة كله يا آمال .. أللي بيحب بيحافظ علي أللي بيحبه ويراعي غيابه قبل وجوده ومش بيخون حبه ليه ووعوده ليه  وانتي خونتي ..أللي بيحب بيقرب وبيسند أللي بيحبه لو اتخذل من الناس كلها وانتي خذلتي ..أللي بيحب بيهون وبيخفف وجع وانتي وجعتي وزودتي الوجع ..أللي بيحب بيداوي جروح وانتي جرحتي وظهرتي الجروح دي ..وبعد دة كله تقولي أللي بيحب بيسامح !! مكنتيش انتي عملتي دة كله لو كنتي بتحبي فعلاً يسامحك علي ايه ولا ايه !! وانتي اثبتيله انك عمرك في يوم ماحبتيه باللي عملتيه دة ..انسي ..انسي ياآمال عشان هو نسي .. فبكت آمال فأكملت كوثر: وفري دموعك دي لنفسك الدموع دلوقتي مالهاش لازمة ولا هتعمل حاجة ولا هترجع أللي راح لأننا لو كنا نقدر نرجع أللي راح كنا حافظنا عليه من البداية قبل مانضيعه .. "وتركتها وذهبت تتألم وتبكي من الالم الذي تشعر به نعم فهو لم يكن الم ظاهر بالجسد يُري ولكنه ألم القلب فهو اصعب ألم يشعر به الإنسان فليس الالم يكن الم ظاهر فقط نشعر بألمه فربما يكون ألم خفي ليس له آثار تظهر علينا ولكنه اصعب من الالم الظاهر الذي نعلمه ..ولكن من المخطيء بالنهاية نحن المخطئون ام الدنيا ام النهاية كانت قاسية علينا !! ام نحن من اختارنا البداية خطأ فأصبحت النهاية خاطئة أيضًا ونحن من نتحمل نتائج اختياراتنا .. إذًا فمن المخطئ !! "
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سماح(والدة هند): يا أهلا وسهلا يا أهلا وسهلا تعالوا اتفضلوا
شوقي: يا ألف مرحب تعالوا اتفضلوا انتو نورتونا النهاردة ايه النور دة كله
مختار: ربنا يخليك يارب دة نوركم والله
شوقي بإبتسامة: ازيك يامصطفي يابني عامل ايه
مصطفي بإبتسامة: الحمد لله تمام ازي حضرتك ياعمي
شوقي: الحمد لله يابني
سماح وهي تحمل صنية بها بعض المشروبات: انتو نورتونا النهاردة والله ..دقيقة واحدة بس اشوف هند وراجعة علطول
شوقي: وصافي بقي اصغر واحدة صح ؟!
مصطفي: اه صافي اختي الصغيرة وسوزان تبقي أختي الكبيرة ودة شاكر جوزها وسما ومروان عيالها
شوقي: ماشاء الله ربنا يخلي ..وانتي لسة بتدرسي بقي ياصافي ولا مخلصة !!
صافي: لا انا مخلصة
شوقي بإبتسامة: ماشاء الله ماشاء الله ..وانتي خريجة ايه بقي !!
صافي: انا خريجة صيدلة
شوقي بإبتسامة: ماشاء الله ربنا يبارك
هند بإبتسامة وإحراج: السلام عليكم
سامية وهي تسلم عليها: أهلا أهلا عروستنا الحلوة زي القمر ماشاء الله ربنا يحفظك يارب
سوزان بإبتسامة وهي تسلم عليها: ازيك ياهند عاملة ايه ياحبيبتي
هند بإحراج: نورتونا النهاردة
مختار: انتي واقفة ليه يابنتي تعالي اقعدي ..اقولك علي حاجة اقعدي جمب خطيبك يلا حاسبي يابت صافي
صافي بإبتسامة وهي تقوم: ايه مازهقتوش من بعض طول اليوم في وش بعض يعني هنا وفي الشغل .. فابتسمت هند علي طريقة صافي
مصطفي بهمس: وحشتيني ..ومسلمتيش عليا سلمتي عليهم كلهم وانا لا براحتك براحتك 
هند بهمس: مالحقتش لسة هسلم عليك قعدتوا تقولوا اقعدي وصافي قامت واديني قعدت هسلم ازاي بقي !!
مصطفي بنفس الهمس: ماشي ..ماشي براحتك
سماح: يلا اتفضلوا ياجماعة الغدا جاهز 
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
حنين بخضة: ايه دة آمال مالك في ايه !!
آمال بدموع: أدهم هيخطب ياحنين هيخطب
حنين: طب مايخطب وانتي مالك وهو عشان هيخطب تقومي تعملي في نفسك كدة !!
آمال بعصبية: سيبوني مالكوش دعوة بيا هاممكم اوي اني ابقي كويسة أو لا !! مش هو دة أللي انتو عاوزينه أنه يخطب عشان انا أنساه !! طيب اديه اهو هيخطب ومش هنساه برضو ..محدش حاسس بالنار والألم أللي جوايا انتو مش حاسين بيا ولا هتحسوا بيا وانتي مش فارق معاكي لانك ماجربتيش وجع القلب مجربتيش يعني ايه قلبك يوجعك ماجربتيش إن حبيبك يكون مع واحدة غيرك واخدة مكانك في قلبه وفي حياته
حنين: خلصتي كلامك !! وبعدين اشمعنا هو استحمل يشوف حد غيره واخد مكانه عندك !!
آمال بدموع: لا لسة انا مهما اقول وأتكلم مش هعرف برضو اوصف أللي جوايا وأللي حاسة بيه حتي لو عرفت محدش هيحس بيا ولا بالوجع اللي جوايا لانه ماتحطش في نفس مكاني كله بيحكم بالظاهر وبس إنما مالوش دعوة الشخص دة من جوة عامل ازاي ولا مر بايه هده ..هتقوليلي اني مامرتش بحاجة هقولك اصعب حاجة وجع القلب وكسرته وكل الناس أللي عندها مشاكل في حياتها او مرت بظروف صعبة فمش بتكون علطول كدة ولا هي جاية كدة لا دي بتكون حاجات صغيرة في الاول وفضلوا يخزنوا يخزنوا ويكتموا لحد اما عملت تراكمات جواهم بقت تقيلة ومن كترها هما مش عارفين هو ايه أللي مزعلهم ولا عامل فيهم كدة فبتتلخص في جملة بنمر بمشكلة الايام دي ومتحملين فوق طاقتنا وهي ولا كبيرة ولا حاجة بس تراكمات حولتها لشبه كبيرة في نظرهم ..زي لو كلتي في طبق ورمتيه ف الحوض وشربتي في كوباية ورمتيها ف الحوض وكلتي في طبق تاني وهكذا وفضلتي ترمي في الحوض أما تيجي تدخلي المطبخ هتلاقي الحوض مليان مواعين بعد ماكان فاضي خالص وبعد كدة بقي طبق واحد وبدل واحد بقوا اتنين وهكذا لحد اما اتملي فكل دي تراكمات فوق بعضها رغم أنها في الاول كانت صغيرة بس مع الوقت بدأت أنها تكبر جوانا ومعانا وتأثر فينا ..ودة اللي حصل معايا وانتو مش مقدرين حاجة زي كدة كلكم بتيجوا عليا وبس وتغلطوني عرفت اني كنت غلطانة بس خلاص بقي دة ربنا بيسامح ..بتجرحوا فيا ولا هاممكم احساسي ايه من كلامكم دة ..محدش قادر يقدر ولا يحس ولا يحط نفسه مكاني ويحس بنفس احساسي ..انا اتوجعت اصعب وجع ممكن اي حد يتوجعه في الدنيا انا اتوجعت من اللي بيعت أدهم عشانه واتاكدت إن محدش حبني بجد من قلبه غير أدهم وفهمت كدة بس اما جيت ارجع لادهم كان خلاص نسيني ولا عاوز يفتكرني مابقاش يحبني هو كمان ووجعي من مهاب أللي كان خطيبي كان أكبر وجع اتعرضت ليه عارفة يعني ايه تكوني بتحبي خطيبك اوي وبعتي حبيبك عشانه عشان حسيتي بحاجة ناحيته وهو أللي قرب وعلقني بيه وفي الآخر ييجي بكل بساطة يهد دة كله في لحظة بس اقولك على حاجة انا الغلطانة أيوة انا عشان انا اللي بصدق اي حد يقولي بيحبني انا عشان بحسسهم اني من غيرهم ولا حاجة ..تعرفي مهاب أما قرر يسيبني انا طلبت منه يفضل معايا مايسيبنيش وقولتله عشان خاطري ماتسبنيش بس سابني في الآخر برضو معرفش ليه بيحصل معايا كدة ليه محدش حبني زي مانا حبيته بس عرفت بعدها إن دة حق أدهم وزي ماعملت فيه اتعمل فيا وساعتها بس عرفت انا ظلمته اد ايه
حنين واحتضنتها: احنا حاسين بيكي وباللي جواكي وعشان كدة احنا خايفين عليكي خايفين عليكي تتصدمي للمرة التانية انتي بيتهيألك انك بتحبي أدهم بس لا انتي عاوزاه عشان مفيش حد دلوقتي فحسيتي انك ظلمتيه وعاوزة تكفري عن دة احساسك بالذنب ناحيته انك في نفس مكانه ونفس إحساسه فعاوزة تعوضيه عن دة وتنسيه الاحساس دة .. بس مش واخدة بالك انك بتغلطي للمرة التانية وانك بتصحي جراح جواه هو موتها ماتحاوليش تفتحي في الجرح أللي اتقفل تاني عشان ميعلمش ويسيب علامة لصاحبه كل مايشوفها يفتكر وجعه منك ومش هيقدر يسامحك سيبي الجرح مقفول ومتداوي وماتحاوليش تخربشيه بضوافرك لأنه لو اتفتح اول واحدة هتتأذي منه ويجرحها هي انتي وساعتها جرحك هيعلم ومش هيروح ويفضل علامة ليكي ماتنسهاش مهما مر بيكي الزمن والايام.
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
في بيت منال
طلعت (والد منال): أهلا وسهلا يابني انتو نورتونا النهاردة
رفعت (والد حسام): ربنا يخليك دة نورك ..نخش في الموضوع علطول بقي
طلعت: اتفضل انا سامع حضرتك
رفعت: احنا الحقيقة جايين النهاردة نطلب ايد الآنسة منال لابننا البشمهندس حسام ودة طبعا شرف لينا اننا نناسبكم .. وتحت امرك في أللي تطلبه
طلعت بإبتسامة: انا كل طلباتي أنه يحافظ عليها ويخلي باله منها
حسام بإبتسامة: دي في عنيا ياعمي وطول ماهي معايا ماتقلقش عليها خالص
طلعت: تسلم يابني ربنا يخليك وربنا يتمملكم علي خير يارب
"وخرجت منال ومعها ياسمينا"
رفعت بإبتسامة: بسم الله ماشاء الله تبارك الله
طلعت بإبتسامة: تعالي اقعدي يابنتي البشمهندس حسام جاي وطالبك مني
منال بكسوف: أللي تشوفه يابابا
طلعت بإبتسامة: ايه اللي اشوفه دة انتي رأيك ايه !!منال بكسوف: موافقة ..موافقة يابابا
رفعت: نقرأ الفاتحة بقي ..والخطوبة بعد شهر إن شاء الله من دلوقتي عشان تاخدوا وقتكم
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
وفي صباح اليوم التالي
أدهم يجلس بمكتبه مشغول بعدة اوراق أمامه فسمع صوت طرق علي الباب فأذن بالدخول دون أن يرفع نظره من الأوراق التي أمامه
آمال: ازيك ياأدهم
أدهم وهو يرفع وجهه ويتمني أن لايكون ماظن به صحيحًا: انتي ايه جابك هنا !!
آمال: ايه مش هتقولي اتفضلي ولا ايه !! بلاش عشاني علي الاقل راعي اني لسة بنت خالتك
أدهم: انجزي ياآمال وقولي جاية عاوزة ايه من غير لف ودوران انا مش فاضيلك ولا فاضي للعب العيال بتاعك دة
آمال بضيق: ايه مستعجل اوي كدة ومش فاضي عشان تروح تخطب !!
أدهم بتعجب: وانتي عرفتي منين اني هخطب !!
آمال: يعني الموضوع بجد بقي !!
أدهم: معرفش عرفتي منين وازاي ولا من مين بس بيتهيألي دة من حقي وشيء مايخصكيش في حاجة ..واه مستعجل ومش فاضي عشان عاوز ألحق اجهز بقي فانجزي وقولي جاية عاوزة ايه 
آمال: كنت جاية أتأكد إن الكلام مش صح بس طلع صح ..ومين دي بقي إن شاء الله
أدهم: بيتهيألي دة برضو شيء مايخصكيش تعرفي مين لانك ماتعرفهاش ولا عاوزك تعرفيها ..بس كل أللي عاوز اعرفهولك انها واحدة نضيفة اوي واحدة تستاهل اني احبها فعلاً واحدة في نظري ماتتقارنش بحد
آمال بدموع: أدهم انا لسة بحبك
أدهم بضحك: اه مانا عارف عشان كدة روحتي واتخطبتي لغيري وقولتيلي انك مش بتحبيني وكان مجرد إعجاب بتحبيني عشان كدة بعدتيني عنك ونجحتي في دة بجدارة بتحبيني عشان كدة راجعالي بعد ماسابك ..قاطعته آمال بصريخ: خلاص ..خلاص ..عرفت اني غلطت وغلطت اوي كمان وراجعة ندمانة اهو
أدهم بزعيق: لا مش كفاية ..بتحبيني عشان كدة روحتي ورقصتي في حضن واحد تاني بتحبيني عشان كدة اما سألك عليا قولتيله اني اخوكي وانك بتحبيني زي اخوكي بتحبيني عشان كدة قولتيله انك كنتي واخداني تسلية بسبب اهتمامي بيكي وإن بعد ماشوفتيه مش عاوزة حد غيره في حياتك ..هو دة الحب في وجهة نظرك !! وجاية وزعلانة اوي أما عرفتي اني هخطب !! طيب علي الاقل انا مابعتكيش ولا روحت اخطب وانا معاكي زي مانتي عملتي ..انتي يا آمال حطمتي قلبي حطمتيه بمعني الكلمة مخلتيش فيه حتة سليمة تقدر ترجع تحب وتعشق من تاني .."ومسك كوباية زجاج علي المكتب ورزعها علي الأرض بقوة فانكسرت الكوباية لقطع زجاج صغيرة: اتفضلي رجعيها زي ماكانت لو الكوباية دي رجعت زي ماكانت سليمة انا قلبي هيرجع يدق ليكي من تاني .. أللي اتكسر مابيتصلحش وانا أللي اتكسر دة قلبي وصعب يرجع يحبك من جديد ..لانك لو اتعورتي من حاجة مستحيل تمسكي الحاجة دي تاني عشان ماتعوركيش تاني وانا اتجرحت منك ومستحيل اسمح لقلبي أنه يتجرح منك تاني ..انا قلبي نسيكي يا آمال نسيكي ومش عاوز يفتكرك تاني .. نسيكي واتعود علي بعدك خلاص
"وهنا دخل حازم وهو يتحدث: أدهم بقولك ايه ب...ولم يكمل كلامه عندما رأي آمال: طب ارجعلك انا كمان شوية"
أدهم: استني ياحازم ماتخرجش ..وقتك معايا انتهي يا آمال
آمال ببكاء: حازم قوله اني لسة بحبه خليه يسامحني انا لسة بحبه واكتشفت اني محبتش غيره
أدهم: اكتشفتي دة أمتي !! اقولك انا أمتي ..أما فسختي خطوبتك ومالقتيش حد فقولتي ارجع لأدهم بقي واهتمامه انتي جاية راجعة مش عشاني ولا عشان بتحبيني انتي واخداني وقت فراغ وقت فراغك امليه بنفسك
آمال: كفاية بقي يا أدهم حرام عليك
أدهم: لا مش كفاية ..انا كل أما بشوفك مابفتكرش غير الوجع وبس وجاية عاوزة ترجعيلي !! عشان اعيش طول حياتي في وجع !! ابعدي يا آمال ابعدي وانسيني لاني خلاص مابقتش احبك ولا هعرف ارجع احبك من تاني ..انتي لو مسكتي حتة ازازة وعورتك مستحيل ترجعي تمسكيها تاني وانتي كنتي بالنسبالي الازازة دي وغرستيها في قلبي وخلتيه ينزف وماهانش عليكي توقفي النزيف دة
حازم: خلاص اهدي يا أدهم ..وبص لآمال: وانتي بعد اذنك اتفضلي من هنا احنا مش ناقصين وفينا اللي مكفينا ومش فاضيين لحواراتك دي
آمال بدموع: حتي انت ي حازم !! دة انت كنت اكتر واحد كنت عارف علاقتنا عاملة ازاي !!
حازم: وعشان انا اكتر واحد كنت عارف عشان كدة بقولك امشي لاني عارف أدهم حبك ازاي ومخدش منك غير وجع خدتي منه حب واهتمام وكل حاجة ومادتهوش غير وجع وجراح وبس ..امشي بقي وانسيه وسيبيه يركز في حياته بعيد عنك عشان راحته ف بعده عنك ولو بتحبيه فعلا زي ما بتقولي فسيبيه يكمل حياته أللي يوظتهاله بعيد عنك ..وعلي العموم وجودك مالوش لازمة دلوقتي لانه كدة كدة هيخطب خلاص ورايحين نتفق الاسبوع الجاي إن شاء الله
آمال وبدأت تدوخ: اه ..انا دايخة ..وفجأة وقعت أغمي عليها
حازم بسرعة: آمال ..وحاول يفوقها بضربات خفيفة علي وجهها ولكن دون جدوي ..وبص لأدهم الثابت مكانه: ايه ي أدهم واقف ليه كدة هنعمل ايه !!
أدهم: انقلها اي مستشفي
"وذهبا أدهم وحازم ونقلا آمال الي احدي المستشفيات ووقفا ينتظران الدكتور بالخارج ليطمئنهم عليها .."
الدكتور: هو ايه أللي حصل !!
أدهم: مفيش كنا بنتكلم عادي وفجأة لقيناها وقعت واغمي عليها كدة
الدكتور: هي اتعرضت لصدمة عصبية شديدة ودة نتيجة زعل ودة عملها هبوط في ضغط الدم ودة ادي لحالة الاغماء ..هي دلوقتي كويسة واديناها علاج لضبط الضغط وبقت كويسة الحمد لله..بس يستحسن تبعدوها عن اي ضغط نفسي او عصبي واي زعل
أدهم: تمام شكرا جدا لحضرتك يادكتور
حازم: وبعدين يا أدهم هتعمل ايه !!
أدهم: ولا اي حاجة انا ماشي اصلا
حازم: أدهم ماشي رايح فين !! الواجب تفضل معاها لحد ماتطمن عليها .. ياعم افتكر أنها بنت خالتك
أدهم: ماحنا اتطمنا عليها خلاص اهو من الدكتور هقعد اعمل ايه بقي !! قعادي مالوش لازمة ولا كويس عشانها .. هدفع مصاريف المستشفي قبل مامشي ..يلا سلام
"وذهب أدهم بالفعل وترك آمال ..هل وجع الحب يصل لهذه الدرجة من الوجع !! هل وجع الحبيب لمن يحب يجعل قلبه لايتأثر به إلي تلك الطريقة !! هل كان الوجع كبيرًا لتلك الدرجة !! ما أصعب وجع الحب حقًا أنه وجع للقلب وليس لوجع القلب دواء يداوي به جروحه الذي دامت تدمي دون توقف ..ولكن السؤال هنا هل يوجد حب بدون وجع !! وإن كان يوجد هذا الحب بالفعل فماذا يسمي  الحب الذي نحن فيه إذًا !! "
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
وبعد مرور شهر تقريبا وفي مساء يوم من الايام
حسين: أهلا وسهلا أهلا وسهلا انتو نورتونا النهاردة والله
محمود: ربنا يخليك دة نورك والله ..بص بقي بصراحة كدة ومن غير لا لف ولا دوران احنا جايين نطلب ايد بنتك ياسمينا لابننا أدهم ودة طبعا يسعدنا ويشرفنا
"وملك وكانت تستمع إليهم فذهبت تجري علي ياسمينا بسرعة لتخبرها"
ملك: ياسمينا ..ياسمينا ..
ياسمينا: ايه ياملك في ايه مستعجلة علي ايه بلبس وطالعة اهو خلاص حاضر
ملك: لبس ايه ..طلبوا ايدك من بابا خلاص
ياسمينا بصدمة: نعم !! أدهم المهدي طلب ايدي انا !!
ملك: لا أبوه محمود المهدي طلبك لابنه
ياسمينا: لا دة مستحيل يحصل أبدًا ..حاسبي كدة
ملك وهي تجري ورائها: رايحة فين خدي هنا يخربيتك ..ولكن لم تلحق بها
أدهم: انا طبعا يشرفني اطلب ايد آنسة ياسمينا بنت حضرتك ياعمي ..قاطعته ياسمينا بخروجها المفاجئ وردها الصادم عليه في وسط صدمة وذهول من الجميع: طلبك مرفوض يا أدهم بيه
أدهم: .............
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
وانتهي الفصل السادس عشر علي رفض ياسمينا لطلب أدهم وصدمة الجميع من ردها المفاجئ

-ياتري رد فعل أدهم هيكون ايه !!
-‏ياتري ياسمينا هتصمم علي الرفض !!
-‏ياتري أدهم ممكن يدي آمال فرصة تانية !!

يارب يكون الفصل عجبكم ومستنية رأيكم في الفصل وفي الرواية وماتنسوش التصويت بليز ومستنية توقعاتكم للأحداث القادمة إن شاء الله ..♥️✨
وبعتذر جدًا على التأخير انا عارفة اني اتأخرت عليكم اوي سامحوني معلش غصب عني والله استحملوني شوية ♥️✨

وإلي اللقاء في الفصل السابع عشر إن شاء الله ..♥️✨
بقلم_صباح_وحيد  ♥️✨