System of Codex

Chapter 3: A Knock on the Door

Chapter 3: A Knock on the Door

Luna's Point of View

"Pinapatawag din kayo?" pinilit kong ngumiti para alisin ang kaba ko. "Close office ni sir, mukhang walang tao."

Hindi umimik si Triz at maging ang mga kasamahan nito. Napalunok ako at tinignan ang babaeng marahan pang nilalaro ang hawak na bat at pinapalo sa isang palad nito.

Anim silang lahat kasama si Triz. Nakangisi ang babae sa akin habang hawak nito ang kadena. Nakalikha pa ng ingay ang pagkiskis ng kadena sa semento dahil sa simple niyang pag-galaw.

"Uhm," napayakap ako sa strap ng bag ko. "S-sige aalis na ako. K-kita nalang tayo bukas." I bit my lip for stuttering. Nagmadali akong maglakad.

Pero parang ang bagal ng oras noong naglalakad ako sa gilid nila. Malakas ang tibok ng puso ko at tila nag slow motion pa ang lahat. Ramdam ko ang mga tinging ipinupukol nila sa akin.

"At sa'n ka pupunta?" napatigil ako. Pumikit ako at hindi sila nilingon.

"Uuwi na ako, hehe." Napalunok ako at nagdasal nalang.

Marami na akong nabalitaang estudyante na dumiretso sa ospital at walang nakakaalam kung sino ang gumawa. Puno ito ng mga pasa at halos mawasak ang mukha. Pero usap-usapan na grupo ni Triz ang may gawa. Wala nga lang ebidensiya at malakas din ang kapit ni Triz sa school dahil isa sa mga board ang papa niya.

"Alam mo ang gusto ko kay Jessa, sinusunod niya ako kaya napapakinabangan ko siya," pabigat nang pabigat ang nararamdaman ko habang humahakbang palapit sa akin si Triz. "Kaya naisip ko, bakit ko siya sasaktan kung mapakikinabangan ko pa siya?"

Tahimik lang akong nakatayo. Malakas ang kabog ng dibdib ko, ramdam ko na rin ang mga butil ng pawis sa aking noo. Hanggang sa nakalapit siya sa akin. Nanatili si Triz sa likuran ko.

"Pero may mga taong humaharang sa mga gusto ko. And I don't think I can use Jessa as I please if there's someone stopping me. Kaya naisip ko, magagamit ko lang si Jessa kapag nawala ang taong iyon." Inilapit ni Triz ang mukha niya sa kanang tenga ko na siyang nagpatindig ng aking balahibo. "At ikaw iyon Luna." Tumawa nang mahina si Triz. Katapusan ko na ba ito?

Napapikit ako nang sinabunutan ako ni Triz gamit lang ang kanang kamay niya. Napahawak ako sa kamay niya.

"Triz, wala akong kasalanan. Ginawa ko lang ang sa tingin ko ay tama," napapikit ako at tiniis ang sakit.

"Pagsisisihan mo ang ginawa mo!" mas humigpit ang pagkakasabunot niya sa buhok ko. Pinigilan ko ang sarili na sumigaw.

"Anong ginagawa n'yo?" napamulat ako ng mata at halos umiyak ako dahil nakita ko si Ella.

"And here comes the transferee," saad ni Triz at ngumiti. Medyo lumuwag ang pagkakasabunot niya sa akin.

"Ella," banggit ko sa pangalan niya. Napakainosente ng mukha ni Ella.

"Anong ginagawa mo rito, transferee? Gusto mo bang madamay?" parang hindi narinig ni Ella ang sinabi ni Triz at nagpainis ito kay Triz.

"May hinahanap kasi ako, may kilala ba kayong Charles?" walang bahid ng takot ang mukha ni Ella. "Charles Ion Stern fullname niya. May dala nga akong picture niya eh, teka ha."

Naging busy si Ella sa bulsa niya. Habang nakatuon ang pansin niya sa bulsa ay sinenyasan ni Triz ang kasamang may hawak na dalawang bola ng volleyball.

Maya-maya lang ay lumipad ang isang bola papunta kay Ella, sa bilis nito ay siguradong matatamaan si Ella.

Parang wala lang kay Ella ang nangyayari.