أصفاد المجتمع سبب إنكساري ( ࢪبــاب)

الجزء 9

#أصفاد_المجتمع_سبب_إنكساري (ࢪبـــاب)
#ميار_إنصاف
#الجزء_التاسع

خرجنا من عند طبيبة رحنا للفارماسي شرينا دواء وصلني رضا لدار وهو راح يخدم، فت عند عجوزتي وريتلها لإيكو يمااا راني بلكرش باركيليي، هزت واحد زغريتة حارة الجيران ويكونو سمعوها بقات تحضن فيا وتبوس، مبروك عليكم ابنيتي ربي يثبتلك حملك ويعطيك وقفة ساهلة، ان شاءلله ايما، الحمدلله ياربي صبرتي ونلتي وش قاتلك صحتكم لباس قداه عندك حمل، عندي ثمن اسابيع حمل واحتمال يكون عندي سكر الحمل، ربي يبعد عليك البلا ان شاءلله خير، وش رايك نديرو عشاء نعرضو فيه لافامي بمناسبة حملك .. كيما تحبي ايما بصح يخي علبالك هذوك مكالاه تعرضيهم كيما انا منهمهمش اكيد لبيبي تاعي مراحش يهمهم ومراحش يفرحولي، ايه كونك هانية ابنتي اصلا مستحيل يزيدو يدخلو لداري، تعيشي ايما نروح نبدل حوايجي ونهبط نعاونك، اليوم نديرو العشاء بيناتنا ونعرض وغدوة نديرو العشاء لافامي، اوكي يما ربي يحفظك ويطول في عمرك ويخليك لينا ياربي، امين عزيزتي ويحفظك، طلعت لشومبرتي لبست بيجامتي فتحت تواقي تتهوا دنيا فرزت سع داري باسكو صباح خليتها فحالة وخرجت كي كملت هبطت عند يما خليتها مع الغداء وانا سيقت وفرزت دنيا نشايخو ونخدمو وكي كملت رحت عاونتها فالغداء، جا رضا وشيخي تغدينا سلفي مكانش يقرا قالت يما لشيخي على حملي وفرحلنا ودعالنا باركلي ليا ولرضا كي كملنا غسلت ماعن لغداء وطلعت انا ورضا لدارنا العشية مايخدمش كليت دوايا و دخلنا درنتا دوش خفيف لبست شورت وبيستي شعري زاد طوال على اخر مرة قصيتو شيحهولي رضا خليتو مطلوق ودخلنا لشومبرتنا ضلمنا الحالة وحكمنا بلايصنا نتفرجو، حبيبي وش متوقع يكون لبيبي طفلة ولا طفل، والله لي مكتبو ربي مرحبا بيه مهم يكون بصحتو، ايه اكيد بصح قول برك وش متوقع يكون، ممم حاسو طفل ومعرف وانت، انا حاستها طفلة قبيل يما قاتلي بلي لي تتوحم على الحلاوة جيب طفلة وانا نسخف غير على الحلاوة شفت لبارح فالليل كيفاه ناكل فالبسبوسة كي الملهوفة، هههههههه ايه شفتك كنتي تباني زي هذاك لي عمرو ذاق نعمة بصح اعمري لازم تحبسي الحلاوة خاصة اذا كان عندك سكر الحمل صحتك اهم، ايه ان شاءلله علبالك ارضا بلي نحبك وراح نبقى ديما نحبك جامي توقعت في حياتي بلي يجي يوم وتكون انت راجلي ونجيب منك اولاد بصح هذي احسن حاجة صراتلي حق ربي عندي زوج امنيات فحياتي منزيدش فوقهم الاولى يخليك ليا ومايحرمنيش منك وثانية ربي يثبتلي حملي ويخلينا ديما مجمولين، ياعمري ربي يخليك ليا أدنيا حتى انا نحبك ونموت ونفنى عليك بصح انا مشي كيفك ماتوقعتش نديك انا ملي بديت نكبر وغير انت لي فبالي وفقلبي حبيتك وتمنيتك حلالي وربي ماخيبنيش هاكي فداري وبين يديا وهازة ولدي فكرشك ربي يخليكم ليا، امين يارب حبيبي زعمة يجي نهار وتخليني؟ موحال وش الهدرة هذي ماتفرقني عليك غير الموت وان شاءلله ربي يطولي فعمري باه نبقا معاك ونشوفك كيفاه تكبري وتشيبي وتولي عجوزة بصح اذا مت قبل ماتنساينيش ابقاي ديما متفكرتني وادعيلي بلخير معلباليش دنيا وش مخبيتلنا بصح ديما كوني فرحانة وماتخلي حتى واحد يبكيك لي يرميك بوردة ارميه برصاصة جامي تحملي ذل والحڨرة على روحك انت اميرة يليقلك غير دلال والمعزة والحب والاحترام مترضايش بالقليل اذا حياني ربي راح نعاونك تكملي قرايتك بعد ماتولدي هذي الحاجة الوحيدة لي ندمت عليها حياتي كاملة هي كي مخليتكش تكملي تقراي بصح بربي ان شاءلله نصلحها، هو يهدر وانا نبكي نبكي وحاطة يدي على فمي نكتم بيها شهقاتي منين كمل هدرتو حضنتو وزيرت عليه وبديت نبكي ونشهق بصوت، بعيد شر عليك فيا ولا فيك ان شاءلله موتي قبل موتك ارضا منقدرش نعيش بلا بيك حياتي بلا بيك كانت ظلمة غير انت لي نورتها منقدرش نحمل فراقك اعمري والله مانقدر نمووووت اربي نموت ياربي اديني قبل ماتديه، ولا يضحك عليا اشش المهبولة راني هدرت برك ماقلتش راح نموت واذا صح ومت هذي هي دنيا ومكتوب من عند ربي لازم ترضاي بالمكتوب بصح دوك هاني معاك استغلي كل ثانية معايا كأنو اخر مرة راح تشوفيني فيها