أصفاد المجتمع سبب إنكساري ( ࢪبــاب)

الجزء 21

#أصفاد_المجتمع_سبب_إنكساري (ࢪبـــاب)
#ميار_إنصاف
#الجزء_الحادي_و_العشرون

وشراكي رباب معلكش، لباس الحمدلله سوال عليك انت، لباس الحمدلله وش الغيبة هذي عندك بزاف مابنتيش .. راكي علبالك بحالتي كيفاه كانت مشي ساهلة مات راجلي وولدي فنفس العام كي ماهبلتش راني مليحة، ربي يرحمهم ويصبركم ان شاءلله؛ امين يارب اهيه اسوسو وانت وش مدايرة فيها دوك صاي ديتي ديبلوم ياك؟ ايه ياحصراه ملي ديتو وفتحت حانوت كنت ديما نعيطلك ونلقى تيليفونك طافي، سكرولي لابيس ومزال ماشريتش وحدة جديدة، ااا معليش مهم جيت عندك نسقسي عليك ومنها نعرضك لخطبتي واذا تشفاي على وش قتلك من قبل اذا تولي تخدمي معايا فالحانوت تاع القاطو ماقدرتلوش وحدي وسيرتو مع خطبتي دوك نولي مانقعدش ليه كامل اذا تولي تحكميه انت وجيبي وحدة تعاونك وساعة ساعة نجي انا نطل عليك وشرايك، والله معلبالي اسوسو ويخي علبالك ماكملتش قريت بعد ما مات ولدي ربي يرحمو .. يخي الدورة ماطولش ارباب ويومين برك فسمانة اقراي واحكمي الحانوت موحال تكوني ماتعرفيش ديري القاطو خلاص؟ اواه نعرف ندير بصح ليطارت لالا خلاص مالا انت ديري لقاطو وانا ليطارت وجيبي وحدة خلاف تعاونك باه الايامات لي تقراي فيهم هي لي تعس الحانوت؛ والله معلبالي اسوسو نشوف ونقولك، نطقت يما على واه تخمي ابنتي انت اصلا قاعدة برك اخرجي تخدمي وتقراي على روحك وزيدي عاودي سجلي الباك ليبر تاعك الشيء لي مدرتيهش العام لي فات ديريه العام هذا ومنها تخرجي من العزلة لي راكي فيها، زعمة صح ايما؛ ايه ابنتي روحي ديري مستقبل لروحك غير قرايتك لي تنفعك، اوكي مالا خلاص، وكتاه نبدا اسوسو هيا معايا من دوك ليوم شوفي برك ونفوتو تسجلي فالاكادمية، اوكي معليش وخطبتك وكتاه حڨا مبروك عليك ربي يهنيك ان شاءلله، الجمعة الجاية ان شاءلله ويخي تجي، والله مانكذب عليك مازلت حازنة على راجلي وولدي مازلت منقدرش نروح للمناسبات هك بصح بلاك نجي على حساب نفسيتي، ان شاءلله كيما تحبي وماذا بيا تجي، ان شاءلله فيها خير، هيا نوضي البسي حجابك وهيا نهبطو تروحي تسجلي ونفوتو للحانوت، شفت مع يما قاتلي نوضي ربي يوفقك ابنتي نضت سلمت على راسها وطلعت لبست حجاب كحل خيمار ابيض باسكات وساك فلون الخيمار وزدت فاست تاع جين وهبطت لقيتها واقفة تسنى فيا خرجنا كيف كيف ركبنا فطموبيل تاعها، تعيشي اسوسو اختي والله جيتي فوقتك كنت اصلا كارهة حياتي ومحتاجة لحد يشجعني باه ندير خطوة كيما هك ونخرج من عزلتي، والله بلا مزيتي اختي ياريت كون جيت نقدر نديرلك ماكثر من هك، ربي يحفظك رحنا الأكاديمية نفسها تاع العام لي فات سجلت ومبعد رحنا للحانوت لي فتحت كانت فاتحاتو في دارهم وقريبة لوين نسكن انا رحمة ربي فوت معاها نهار ثم علمتني كيفاه نهدر مع الكليون ونعتتلي البري تاع القاطو وكلش حتى العشية وصلتني لدار وروحت؛ فتحت الباب ودخلت لقيت شيخي وعجوزتي حاطين قهوة العصر يتقهواو سلمت عليهم وطلعت بدلت قشي ورجعت هبطت قعدت معاهم، وشراك ابابا معلكش؛ كي تكوني ابنتي بخير حتى انا نكون لباس، الحمدلله ابابا، وش ابنتي قاتلي يماك بلي راح تولي تخدمي مع صحبتك وراح تقراي والله فرحتيني ربي يوفقك ان شاءلله مهم تخرجي من العزلة لي كنتي فيها وتكملي حياتك منين حبستيها ، امين ابابا تعيش ربي يخليكم ليا انت و يما؛ وشرايك ابنتي تروحي تديري بارمي ثاني طموبيل تاع راجلك ربي يرحمو راهي هكذاك فلڨراج خير ماتبقاي رايحة جاية على رجليك تتعبي، والله معرف ابابا نشوف ونقولك معليش ابنتي كيما تحبي وكشما تحتاجي راني هنا ماتحشميش مني، تعيش ابابا راني علبالي بلا ماتقولي  …