سيرافينا "لعنة الكواكب"| seravena

الفصل السابع (إديني الحقنه بسرعه أرجوك محتاج الجرعه)

كانوا جميعاً ينظرون للمقطع الموجود على هاتف <<إيهان>> بصدمة و تفكير في سبب منطقي لما يحدش، فقال <<مالك>> الذي كان يشارك من مكالمه على هاتف <<نديم>>

°"طب ده ممكن يكون من إيه؟ ممكن تكون نوع كاميرا"

رد <<إيهان>> بعدم إقتناع

-"تؤ، لان في الأول الكاميراة الموبايل مكانتش جايباهم بس بعد كده جابتهم"

رد <<مالك>> بتفكير

°"طب جرب تاني كده دلوقتي يمكن تشتغل"

و بالفعل فتح <<إيهان>> كاميراة الهاتف و وجهها نحو الفتيات ليجد أن الوضع كما كان عليه من قبل، لم يظهرن على الشاشة فقال <<مالك>> بشك

°"إفتح فيديو كده يا إيهان يمكن لما تسجل يظهروا"

نفذ <<إيهان>> كلام دون أي رد فظل الوضع كما هو عليه لا يوجد لهم أثر في التسجيل"

فقالت <<ندى>> بضجر

°"الحوار ده خنقني، ما خلينا في المهم ياخويا منك ليه، هتهببوا إيه في البوليس إللي بيدور عليكوا ده"؟

فكر الجميع فساد الصمت للحظات و قطع الصمت صوت <<مريم>> التي قالت

-"دلوقتي مقدمكوش غير حلين، الأولاني هو إنكوا تسلموهم للبوليس بس أنا مش موافقه، و التاني إنكوا تتصرفوا و تشوفوا طريقة يرجعوا بيها كوكبهم تاني و ولا من شاف ولا من دري"

رد <<جاد>> و هو يسند أكواعه على أفخاده بتفكير

~"قبل ما نشوف هنرجعهم إزاي لازم نشوف إيه أبعاد الموضوع"

رد <<محمد>> باستفهام

-"قصدك إيه؟"

عاد <<جاد>> بظهره ليسنده على ظهر الأريكه و قال

~"يعني دلوقتي هما ميعرفوش غير إسمي أنا و ريان و الصور إللي إتعرضت دي مش واضحه يعني محدش يقدر يحدد مين دول بسهوله، و ثانياً أكيد مالك متراقب و بيمشي وراه مخبر من القسم"

رد <<مالك>> بتأكيد

°"فعلاً أول ما وصلت على أول شارع البيت لقيت عربيه بتمش ورايا من بعيد"

رد <<نديم>> بقلق

_"ده معناه إنهم شافوك و إنت هنا؟"

رد <<مالك>> بهدوء ليطمئنهم

°"لاء متخافوش العربية دي كانت راكنه و أول ما وصلت بدأت تتحرك"

أخذوا جميعهم أنفاسهم براحه فقالت <<سيريفالا>>

="كل ما علينا الأن هو الجلوس في مكان آمن حتى نستطيع التفكير في حل للخروج من هذا الكوكب"