"Kar leh ah in exam tawh dawn a lehkha zir ngaihtuah tawh rawh Games ri ngawt buaipui tawh lo in mi zawng zawng in awl an tih ber mizo i thiam lo ber a, mi zawng zawng deuh in har an tih ber mathematics i thiam ber thung a, Mizo a i failed chuan pawl i sawn thei dawn chuang lo ania", zan riah kan kil lai chuan ka pa chuan atia, ami zilh ber Puipuia erawh in chaw lian deuh deuhin abar a ka pa thusawi hria ang pawhin alang lo.
Ka kham rual in "i chaw ei a tui meuh nange", nu mawitei chuan a lo ti a, sil hmuna kal pahin "tui hiah hiah tak ani, ka puar pang pang lutuk", tiin ka thleng chu ka dah a ka kut sil sawk sawk in fridge a tui bottle chu la chhuakin ka in zui nghal khawlh kawlh bawk. Kan chawi ei na hmun hnawk kimi nen kan ti fai a, thlengsil erawh ka awl hneh thin khawp mai Kimi hian a ban nghal chat zel a chu ti na na na ka tia ka chuhpui duh bik lo ka leh awl a anuam phian
"Naktuk atangin University i tan dawn a, mu hma ang che", Sitting rooma ka va phei ve chuan ka pa chuan alo ti nghal zat a, ka pa thu chhuak hi chu by order ani tawp zel a, ka sual achhuah phei chuan ka zawm duh ngai lo. "Hmeichhe fa si enkawl i har e mai", min ti tawh nghe nghe kha mi tum pawh khan bazar ah nu mawite te nen kan kal a, ka pheikhawk duh kha amipa emai adang thlang rawh ati tlat pek a, kei lah in kha lo kha chu ka duh si lo a, nu mawitei'n a duh zawng chu lei sak mai ang atih pawhin ka pa khan hmeichhe thil deuh chu a awm ve lawm tiin a duh zawng pheikhawk kha min lei luih sak a hmun danga kal tur kan la ni chung khan taxi lain ka haw san daih a, an duhna ah pawh kal lo in in ka thlen hnu rei vak loah an lo thleng ve a, pheikhawk min lei sak min pek an tum in "kha tiang ka bun ngai lo duh leh hnathawh nan hmang ru, keiman ka duh zawng chu ka lei ve mai ang", ka ti a ka lak sak duh lo kha ania. Kha mi tum a ka pa ka ngei zia kha aw tun thleng hian kan la bazar dun leh tawh lo hrim hrim bawk.
"Zorina fanu ania in in kawm thei khawp ang", ka pa bawkin atih leh chuan "amah ka hre silo a engtin nge ka tih vak anga", ka lo ti let ve thuai a "naktukah ka rualin i kal dawn nia", lo ti tu chu Ben a nge Ezra zawk pawh ka hre lo. "Athat hlauh chu", tih leh ka room lam pan ka rual a room chhung ka luh rualin khumah ka mu nghal zat, IG ah lut in uncle Tim masage chu ka reply a ka nu nen pawh kan in be zeuh zeuh. Kan hun ain mil loh em vangin kan hman hun hunah kan in bia ani ber. Nu leh pa in then hi fate'n kan tuar ber an lo tih hi adik chiah kan chhungkua pawh kan keh der a keimah in ka tuar ber a, ram pa hnih ka in kar tawn zak zak a ka tlan kual zak zak ani ber, ka pa hian fanu leh fapa anei tawh tho a, kei chu ka nu bulah min dah hle hle awm hi ania min la tawn sawk sek a achang chuan bo daih te hi ka chak thin.
"Tawite, tawii i harh em", tia min sawi nawk nawk tu chu ning zet in ka in leh san thawk a ka tih dan ngaite in lukham in ka beng ka hup a manglam ah ka cheng leh tan chiah tih ah "Tawite, bawihi atlai tawh ania in ti harh rawh", tia min rawn sawi leh tak ah chuan ning zetin ka thu chhuak a mit nuai chat chat in ka ham bai bai bawk. "Dar eng zat nge ni tawh", mut chhuak aw zet a ka tih chuan "8:30 ari dawn" nu mawitein arawn tih chuan ka in perh tho nghal zawt a bathroom ah lutin ka in ti fai nghal sawk sawk a ka kawr hak tur zan lama ka dah chhuah lawk sa vek chu ka ha nghal mawlh mawlh a, ka sam ni thlar a ahring tih dawn a buang lam deuh si mawi em em mai chu Hair-clip in ka kilh tawm vek a, ka hmai chei em em ngai lo a tha ve tak mai ah chuan suncream leh ka hmai hnawih ka hman thin bik chu ka in bel tawp a, lipgloss ka hmuiah chuan ka hnawih leh tawp bawk. Ka hmel hi darthlalangah in hmu fo tawh mahila mi te hian mit meng nalh leh hnar ngul mawi min ti fo vang hian ka in en ningthei thin lo min koh duatna hi Tawite tih ni mahse Fit 5'6 laia sang ka ni ve tih ka lo sawi tel ve mai mai.
"Tiang khan maw i kal dawn", in hnuai ka thlen thlak rual a ka pa in alo tih chuan ka in chei dan chu ka in thlek vut vut a, denim jeans jacket lian ve lam pang ka kawng fek thleng vela chhing leh denim jeans kekawr bul ka malte vel thleng ka ha a, Puma CA pro ka bun bawk, ka nu min thui sak Tote bag nalh zet a ak bawk. "Dik lo a awm pawh ka hre lo", ka tih chuan "mizoram ah i awm tih hre ta che i kekawr hak kha han thlak rawh", ka pa bawk in atih chuan Ezra leh Bena lo awm dun chu en in "atu zawk nge ni zana min hruai tura in sawi zawk che u kha", ka tih chuan helmet dum keng zawk chuan "keimah", alo ti vat a, an in chei dan ain zul thei sia he mite pahnih hi hriat chhian vat ka ngai ani.
