ရုပ်ရှင်ဧက္ကရာဇ်၏ ခေတ်ဟောင်းမှချစ်ဇနီးလေး (ဘာသာပြန်)

Chapter 1👥️

👥️Chapter 1

ည ဆယ်နာရီကျော်ကျော်ခန့်အချိန် .. လေယာဉ်ပေါ်မှ ဆင်းလာကာစ ယီချန်းယန်သည် လပေါင်းများစွာ ဆက်တိုက် ရိုက်ကူးရေး လုပ်ခဲ့ရသည့်အတွက် သိသိသာသာ ပင်ပန်းနွမ်းနယ်နေခဲ့သည်။ သို့သော် လေဆိပ်၌ ဝိုင်းအုံကာ စောင့်ဆိုင်းနေကြသည့် ပရိသတ်များ အများအပြား ရှိနေသောကြောင့် သူသည် VIP လမ်းကြောင်းမှတစ်ဆင့် ထွက်ခွာရန် မရွေးချယ်ခဲ့ချေ။ ပရိသတ်များက သူ့ကို မတွေ့ရသည်မှာ အလွန် ကြာမြင့်နေပြီ ဖြစ်သောကြောင့် လေဆိပ်ရှေ့တွင် အားတက်သရော စောင့်ဆိုင်းနေကြကြောင်း သိလိုက်ရသည်နှင့် တစ်ပြိုင်နက် ယီကျန်းချန်၏ စိတ်ဓာတ်များ ပြန်လည်တက်ကြွလာက မြောက်ဘက် ထွက်ပေါက်သို့ ဦးတည် ထွက်ခွာသွားလိုက်တော့သည်။

သူ့ပရိသတ်များ ဓာတ်ပုံရိုက်ကူးရာ၌ ပိုမို လွယ်ကူအဆင်ပြေစေရန်အတွက် သူသည် နေကာမျက်မှန်နှင့် မျက်နှာဖုံးတို့ကို ချွတ်ပေးလိုက်ကာ လက်ဝှေ့ယမ်းပြုံးပြပြီး နှုတ်ဆက်ပေးရုံသာမက စနစ်တကျ တန်းစီကာ လဲမကျစေရေးအတွက် ဂရုစိုက်ကြရန်ပါ တစ်ပါတည်း မှာကြားခဲ့လိုက်သည်။

ထို့နောက်တွင်မူ ယီချန်းယန်နှင့် သူ့မန်နေဂျာ လီယဲ့တို့သည် ဝိုင်းအုံနေသည့် ပရိသတ်ပင်လယ်ထဲမှ ထွက်ခွာကာ အပြင်ဘက်တွင် စောင့်ဆိုင်းနေသည့် အသေးစား ဗန်ကားလေးထဲသို့ ဝင်သွားလိုက်ကြ၏။

လေဆိပ်နှင့် တစ်ဖြည်းဖြည်း ဝေးကွာလာသည်နှင့်အမျှ စိတ်လှုပ်ရှားစွာ အော်ဟစ်နေသံများလည်း တစ်ဖြည်းဖြည်း တိုးဝင်သွားကာ အပြင်ဘက်တွင် စောင့်ဆိုင်းနေသည့် ပရိသတ်များ၏ ပုံရိပ်သည်လည်း တစ်ဖြည်းဖြည်း မှုန်ဝါး ပျောက်ကွယ်သွားတော့သည်။ ထိုအချိန်တွင် ယီချန်းယန်၏ မျက်နှာထက်ရှိ အပြုံးများလည်း မှိန်ဖျော့သွားကာ မျက်လုံးကို မှိတ်လျက် ထိုင်ခုံကို မှီထိုင်ပြီး အနားယူလိုက်တော့သည်။

လက်ထောက်တစ်ဖြစ်လဲ မန်နေဂျာဖြစ်သူ လီယဲ့က သူ့ကို လှမ်းကြည့်လိုက်သော်ငြား အနားယူစေလိုသည့်အတွက် အချိန်အချို့ခန့် အနှောင့်အယှက်မပေးမိရန် ဆုံးဖြတ်လိုက်သည်။