Ishq e Aatish By Sadiya Rajpoot

14

noor ul huda watan wapas laute to bohat dinon tak, farigh nahi reh sake.
foran hi garments factory ke qiyam ke silsilay mein daud dhoop shuru kar di aur aik bhar poor din guzaar kar raat jab woh lottay to thakan se jism toot raha hota.

magar yeh thakan bas qasr e Farooqi ki chokhat tak hi unka sath dey paati. kyunkey chokhat ke is paar aik larki
unke intzaar mein neend qurbaan kiye jaag rahi hoti aur unko dekhte hi woh muskarati hui uth kar paas chali aati
aur salam karne ke baad unse kehti .

aap fresh ho jayen,
mein khana le kar aati hoon.
“ phir jitni der mein woh fresh ho kar kamrey mein atey,

woh khana garam kar ke treyy mein sajaye kamrey mein chali aati.
noor ul huda usey dekhte hi
sofey par Jaa Beth tey.

woh khana shaam mein kha liya karti thi magar ab isne apni bhook ko taqseem kar liya tha. thodaa sa khana woh shaam ko baba jaan ke sath khati aur thoda sa khana raat mein noor ul huda ka sath deney ko khati.

magar aaj darwaaza khol kar andar pair rakhtey hue unhon ne khaali sofey ko dekha to wahein ruk gaye.

ik tum jo nahi ho to
lagta hai kuch nahi hai.
unhon ne apni sargoshi suni.

Saab! khana laga dun?
bahadur aik dam se
kisi koney se nikal aaya.

rehne do yaar! bhook nahi hai.
bohat be zaari se bol kar woh darwazey ke agey baney step par baith gaye.

bahadur sir hila kar
wapas gayab ho gaya tha.

noor ul huda ne coat Raan par rakha. aasteenein koniyon tak pehley se hi chadha rakhi thi.

tie ki gaat khech kar dheeli karte hue unhon ne garibaan ke button bhi khol diye. phir kalayi par bandhi ghadi par nazar daali aur muskura uthey.

is waqt inhen shadi hall mein
hona chahiye tha. woh jantey they,
Maliha is waqt be sabri se
unka intzaar kar rahi hogi.
khud woh bhi usey aik nazar dekh lainey ko be chain the magar phir yeh khayaal ke woh unki raah dekhte hue bas inhen soch rahi hogi, kahin ziyada Kaif agin tha. woh aik haath se guddi masalte khud se bole.

kabhi socha bhi nahi tha ke
aik larki mujh jaisey shakhs se
aisi immituare harkatein karwa legi.

khud par muskuratey hue unhon ne
coat ki jaib se cigrette ka packet nikala aur cigrette nikaal kar honton mein daba ke jaib se lighter nikaal kar jalaya.

cigrette sulgatein hue kuch yaad kar ke unke haath aik pal ko ruke,
phir aik gehri muskurahat ke sath sar jhataktey unhon ne cigrette sulga liya.

glass wall se guzar kar unki nazrein laonj ke is sofey par theri jis par baith kar
unka intzaar karte hue
woh pehli raat so gayi thi.
aur phir aney wali kayi raatain
noor ul huda ne usey isi sofay par baithy –apne intizaar mein jagtey paaya tha. noor ul huda ne aik gehra kash le kar dhuwan hawa mein choda aur
Maliha ko dekhney ki unki khwahish
ajeeb se dhang se poori ho gayi.

dhuwen mein lipta iska har naqsh
bohat wazeh tha.
band aankhon ko dhaktey  photo par
saji palkon ka saya
galoon par par raha tha.
hont neem wa they.
uljhey balon ki aik lut
iske gaal ko chhoo rahi thi.
gudaaz baho mein kushan daba rakha tha aur lamba dupatta aik taraf se zara sa shaney par tika tha aur doosri taraf se peeron ko chhota qaleen par be tarteebi se bikhra tha.

dhuwan tahleel hone laga to
aks bhi mitne laga tha.
noor ul huda ne aik aur kash le kar dhowen ki deewar apni aankhon ke samney khadi kar li.
aur woh be khabar husan phir se
unki nazron mein aa thera.

mohabbat ka yeh khel bhi kitna ajeeb hai ke dhundley manzar ziyada roshan,
ziyada saaf dikhayi dete hain.

Maliha ke aks ko dekhte hue
woh aahista se budh budhaye
phir apni hi baat par choank gaye.