Two-faced Husband, Have Some Decency! ( Myanmar Translation )

၄၃

Unicode :

အခန်း ( ၄၃ )

ပြုံးစနဲ့နဲ့ နှင့် ရယ်သွမ်းသွေးနေတဲ့ အမူအရာတွေနဲ့ ဘယ်သူမှ မရိပ်စားမိတဲ့ သူ့ရဲ့ အဲ့ဒီမျက်နှာက သူမစိတ်ရဲ့အတွင်းထဲမှာ ထပ်တလဲလဲ ပေါ်လာနေသည်။ သူ့အနမ်းနဲ့ သူမအိပ်ရာပေါ်မှာ သူ စိတ်တိုင်းကျ နေထိုင်နေသည့် မြင်ကွင်းလည်း ရှိနေ၏။

စုန့်ယွီ နှုတ်ခမ်းတွေပူလာတာခံစားမိသည်။ သူမ မျက်လုံးတွေ မှိတ်ထားပေမဲ့ စပ်ဖျင်းဖျင်း ခံစားချက်ကြီးကြောင့် လူးလွန့်ကာ အိပ်လို့မပျော်။ ထို့ကြောင့် အခွင့်အရေးရတာနဲ့ အိပ်ရာခင်းနဲ့စောင်တွေ အမြန်ဆုံး လျှော်ပစ်ရမည်ဟု စိတ်ထဲမှာ ဆုံးဖြတ်လိုက်မိ၏။

…
…
သောကြာနေ့ရောက်တော့ ချီချန်ကျီးရဲ့ဆုံးဖြတ်ချက်ကို ဒါရိုက်တာကျောက်အား စုန့်ယွီ ပြောပြလိုက်သည်။ ဒါရိုက်တာကျောက်က နောင်တတွေရနေ၏။ ဝမ်လီဝေ့ကြောင့်သာမဟုတ်ရင် ဒီပရောဂျက်သည် ချန်ရှစ်ရဲ့ပရောဂျက်ပဲ ဖြစ်နေလိမ့်မှာဖြစ်ပြီး ဒီလိုအဆင်မပြေမှုတွေ ဖြစ်လာမှာ မဟုတ်ပေ။

စုန့်ယွီ အလုပ်သွားတော့ လက်ဂေ့ချ်ပါ ယူလာခဲ့သည်။ ပိတ်ရက်လေးပဲ သွားမှာဖြစ်တဲ့အတွက် ခရီးဆောင်အိတ်ရိုးရိုးလေးတစ်လုံးပဲ ပါကာ သူမ ပစ္စည်းတွေ အများကြီး ယူမလာခဲ့ချေ။ အလုပ်ဆင်းတာနဲ့ ထိုအိတ်နဲ့အတူ ချီလင်ကို ဆက်ခဲ့၏။

“ စုန့်စုန့် ” ချီလင်ဝင်ပေါက်ကို မရောက်ခင်မှာပဲ သူမကို လက်ပြနေသည့် ကွမ်းရှောင်လင်ကို တွေ့လိုက်သည်။ ကွမ်းရှောင်လင်က ပြုံးပြီး သူမဆီလျှောက်လာခဲ့လျှင် နှစ်ယောက်သား ဝင်ပေါက်ဆီ အတူလျှောက်ခဲ့ကြ၏။

“ နင် ဘယ်လိုဖြစ်လို့ကိုယ်တိုင်ရောက်ချလာတာလဲ ” စုန့်ယွီ မေးလိုက်သည်။

“ ဖေဖေက စိတ်ပူနေတာလေ လိုအပ်ရင် ကူညီလို့ရအောင် ငါ့ကိုပါ သွားစေချင်တယ်တဲ့ ” နှာခေါင်းလေးရှုံ့ကာပြုံးရင်း ကွမ်းရှောင်လင်က စုန့်ယွီကို ဖက်ထား၏။ “ ဖေဖေက ဒီအလုပ်နဲ့ပတ်သက်ပြီး တကယ် ဆန္ဒစောနေတာဟ။ ချန်ရှစ်ကို ပရောဂျက်အပ်လိုက်ပြီလို့ ချီလင်က ကြေညာတုန်းကတောင် သူက လက်ခံချင်ခဲ့တာမဟုတ်ဘူး။ ဒါပေမဲ့ အပေးအယူပျက်ပြီး ချီလင်က ကွမ်းယွီကို စဉ်းစားပေးမယ် လုပ်တော့ ဖေဖေက ပြောတယ် ဒီတစ်ခါ သူ ရှုံးမှာမဟုတ်ဘူးတဲ့ ”