مـأوى الـزهـور

حلقة (25)

مــأوى الــزهــور🥀
بقــلــم يــاســة الحلقة (25)

لا تقف ابداً موقف المتفرج عن الظلم
فـ القبر سيوفر متسع من الوقت للصمت

...............................

إمتنان :- الخوف اكل گلبي اكل الباب من جوى مسرگه يعني اكو احد بالبيت واني نزلت بدون تفكير اذا طلع ولزمني اروح بيها رجعت على السريع صعدت فوگ فتحت باب البيتونه وطلعت للسطح لگيت عذراء تباوعلي من الستارة اجيت سريع وهـي تگول

-- هاا

-- اكو احد بالبيت

-- لا ماكو كلهم طلعوا

-- لا باب الصاله مقفول من جوى

-- اني متأكدة شفتهم كلهم طلعوا ولا بشر بقى هنا

-- لعد شلون الباب انقفل من جوى

-- ما اعرف خاف هم قافلينه

-- شلون قافلينه من جوى ما فهمت

-- خاف من الشباك

صفنت بكلامها وجهه نظر صحيحه احتمال مادين ايديهم ومسرگينه من الشباك افتريت ورجعت اريد انزل صاحت وين رديت انتظريني نزلت سريع فتحت الشباك ومديت ايدي الباب كلش قريب من الشباك بحيث فتحت السركي وقفله سهلـه والظاهر من يطلعون هيج يسدون الباب فتحت السرگي بسرعـة انفتح باب الصاله اجيت دخلت للصالـه وامشي بحـذر اباوع للمكان بتركيـز

الصاله صايرة على كبر البيت وبداخلها باقي الغرف والمطبخ والصحيات فتت الاول غرفـه جانت غرفه مال اطفال بيها سريرين وكنتور صغير بسرعـة طلعت من يمها ودخلت للغرفه الثاني جانت غرفـة تصيح الامها وابو مال مره كبيرة احس گلبي وجعني من شفت غراضها بوفيه وعليها فراش وسرير خشب ابو النفر وكنتور ابو ثلاث خانات تمشيت بداخل الغرفـه وگلبي احسـه يفور وبكل زاويـة جاي اشم عطرها فتحت الخانـه الاولى ملابسها مرتبـه رفعت وحده من القطع وشميتها وبچيت

-- لك اخ شلون عندك گلب شلون عايشـة من بعدها وهي بكل زاوية الها ذكرى

سديت الخانه الاولى وفتحت الثانيـه بيها جراجف ولحف والخانه الثالثـة بيها سطل ابيض صغير وصندوق حديد يصير مقفول بقفل صغير شلت السطل اباوع بيه سبح وترب ودفتر صغير مكتوب بيه زيارة عاشوراء و جيس صغير بيه هيل وجيس صغير ثاني بيه شي مربع لونه برتقالي رفعته اشم بيه عطره يجنن واكو جيس وسط جذب انتباهي بيه حبات سود صغار كلش هواي

رجعت سحبت الصندوق شلته مو كلش ثگيل هزيته صار صوت خرخشـه بيـه شلتهن ثنينهن وسديت الخانات وراي وطلعت للصاله نزلتهن بالگاع وفتحت الغرفـه الثالثـة جانت غرفـه نوم ومعلگه صورة مال عرس بيها نـزار ومرته الحصان غميتهم بـ اثنين ايديـه ودرت وجهي للكنتور اول خانه جانت ملابسـه والخانه الثانيه ملابسها واذا اگول طاگه بيها عبوة تگولون تبالغ صايره خبط الشالات والداخليات والملابس تريد تفهم شي منها ماكو سديتها قوي لعبانه نفسي ورجعت افتح بـ الخانه الثالثـه ماكو ما تنفتح مقفوله حاولت اسحبها قوي ماكو طلعت اركض ادور على المطبخ بس فتت طگتني الزفـرة احس معدتي گلبت واني اشوف صينية الاكل بيها سمج وتمن وطرشي باقيه بدون غسل على الكاونتر اخذت سجين ورجعت للغرفـه