مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله

~ 23 ~

<< وفي ارجاء شركة ~ A.H.C ~ >> ، تحديدا عند عقاب الي دخل للـ شركة و استغرب من الهدوء الواضح ، طلع لـ الدور الثاني و صادف تميم الي ابتسم يقول : صبحك الله بالخير يالمدير
ضحك عقاب وقال : شدعوه ياتميم لا تقعد تقول لي مدير
تميم : اجل ؟ استاذ ؟
عقاب : عقاب
رفع تميم عاجبه بـ استغراب و نطق : متأكد ؟
ابتسم عقاب ينطق : ابد متأكد
تميم : طيب
عقاب : يلا ي استاذ تميم على مكتبك
ضحك تميم وقال : خل اسولف معاك شوي
عقاب : اجل مشينا لـ مكتبي
تقدموا اثنينهم و دخلوا ع مكتب عقاب ، جلسوا ع الكراسي و طلب عقاب قهوه لهم اثنينهم ، و نطق عقاب : ها بشر ؟ عسى الشغل زين معاك انت ؟
تميم : ابد ابشرك ممتاز مره
عقاب : حلو ، و البنت الي معاك اختك صح ؟
تميم : ايه اختي ، وهي بعد مرتاحه بالشغل الحمد لله
عقاب : الله يوفقكم و يوفقنا جميعاََ
ابتسم تميم يقول : امين امين ، ايه عطنا علومك و اخبارك ؟
قاطعهم دخول عهد الي داهمت المكتب بـ عصبيه و نطقت بصوت عالي : عقاب يالحيواااا...ن
تجمدت مكانها من شافت تميم الي كان موجود مع عقاب و نطقت بـ احراج : ااء اعذرني ازعجتكم
انكتم تميم يمسك ضحكته و نطق عقاب بـ حده : ايه ازعجتينا ، على مكتبس بعدين اتفاهم معاتس
طلعت عهد وهي متفشله من الي سوته ، و نطق تميم : شهالميانه الزايده شلون تقول لك الألفاظ هذي ؟ ومن هي اصلا ؟
ابتسم عقاب يقول : ماعليك اختي ..
فتح عيونه بصدمه ينطق : هذي اختك ؟ و موظفه هنا !
عقاب : زي ماسمعت
تميم : اها ، الله يقويكم الظاهر آل حمد منتشرين بكل مكان
ضحك عقاب و نطق تميم يكمل : اجل انا استأذن ع مكتبي ، اعذرني ان كان ازعجتك و مشكور ع الاستضافه
ابتسم وقال : العفو العفو
طلع تميم و اخذ ثواني قليله و دخلت عهد الي نطقت : عقاب اسفه والله مـ..
قاطعها يقول بـ عصبيه : وش الي اسفه فشلتينا عند الرياجيل تصارخين و تقولين ذي الألفاظ ؟ وش الي حيوان بالبيت قاعدين احنا ؟
عهد : عقاب والله اني م اقصد والله ! لوهله عصبت لانك نسيت م تاخذني معاك ، اسفه
اخذ نفس وقال : روحي مكتبس ..
وقفت تبي تطلع و زفر عقاب بهدوء وهو مايحب يعصب على خواته ابد ، نطق يقول : طيب تعالي اقعدي .. وش كنتي تبين تقولين ؟
عهد : ابد سلامتك
ابتسم وقال : قولي قولي وش تبين ؟
عهد : يبوي خلاص م ابي شي اذلف عن وجهي
ضحك من شافها طلعت و قفلت الباب بقوه ، و زفر بهدوء من وقف يبي يطلع يتجه لـ مكتب ابوه ، طلع يتمشي بـ ارجاء الشركه و بالمره دخل على مكتب ابوه الي كان متواجد هناك و نطق : السلام
ابو عقاب : وعليكم السلام
قرب و قعد يقول : يايبه شرايك نوظف تروك عندنا ؟ يصير بدال سطّام
ابو عقاب : تصدق فكرت فيها .. دامه فاضي يجي الافضل
عقاب : اقوله ؟
ابو عقاب : ايه إذا رجعت مب لحين
عقاب : ان شاء الله
عم الصمت بينهم لـ ثواني معدوده و نطق ابو عقاب يقول : ي عقاب
فز عقاب وقال : سم يبه ؟
ابو عقاب : ياولدي م فكرت فـ الزواج ؟ خلنا نفرح فيك اختك جاها النصيب وانت بعدك
زفر يقول : باقي يايبه وين وين
نطق ابو عقاب : وشهو الي باقي ! عمرك 28 متى تبي ان شاء الله ؟ بتطب الثلاثين وانت بعدك على هالحال معقوله مافيه بنيه فـ بالك ؟ علمني وانا ابوك
اخذ نفس ونطق : يبه واذا قلت لك ان فيه ؟
تبسم ابو عقاب وقال : بشر من هي
عقاب : مب مننا
قطب حاجبه يقول : اجل ؟
عقاب بهدوء : يبه موجوده بالشركه
ابو عقاب : ورا م تنطق و تخلصنا
نطق يقول : وهج
فتح ابو عقاب عيونه بصدمه يقول : هذي الي توها من فتره توظفت !
عقاب : ايوا هي
ابو عقاب : منهي بنته و وشهو اصلها
عقاب : بنت سالم آل جراح
ابو عقاب : والله طيرتنا بعيييد ي عقاب وش ودانا لـ آل جراح حنا ! الله يصلحك بس
عقاب : هذي هي الدنيا يبه وش نسوي بعد امنع نفسي عن حبها ؟ مايهمني ترجع ل وشو و بنت منهو البنت خُلق و أخلاق و كامله و الكامل الله
ابو عقاب : عسى خير ان شاء الله
-
فـ المستشفى تحديداََ ، طلعوا هياء و عُلا متجهين للـ كافتيريا ياخذون لها اكل و صادفوا الاء الي نطقت : دكتوره هياء ..
فزت هياء تلف و نطقت : هلا ؟
الاء : ممكن اسالك سوال ؟
هياء : تفضلي
الاء : وش صار على الدكتور سطّام ؟ و اخوكي ؟
نطقت تقول : الحمد لله مافيهم الا العافيه
الاء : الحمد لله
هياء : ايوا تبين شي ؟
الاء : لا ابدا بس وصلي سلامي ل الدكتور سطّام
اخذت هياء نفس و رصت على اسنانها تنطق : خير ان شاء الله خيرر
ضحكت عُلا تسحبها على جمب وقالت : هيون ريلاكس ! تراها متعمده تسوي كل هذا لا تهتمين
هياء : تكفين عُلا والله تقهرني وش الي وصلي سلامي تمونين يالغاليه ! كله من سطّام معطيها وجه مره
ابتسمت عُلا تمسك يدين هياء و نطقت : ياحبيبتي انتي رسميا انخطبتي و صرتي مُلك لـ سطّام وش الي خايفه منه دامه صار لس ؟ و بعد فتره قليله زواجكم ارتاحي
زفرت وقالت : اهه ريحتيني الله يريح بالس ي عُلا
ابتسمت وقالت : آميييين جميعا ..
قاطعهم صوت الدكتور وائل الي تجه لـ صوبهم وقال : السلام عليكم
نطقوا بصوت واحد : عليكم السلام ورحمة الله
الدكتور وائل : دكتوره هياء ، يقول المدير ان سطّام يوم اجازه فقط غير كذا مايقدر يعطيه و المفروض من بكره يبدأ يداوم خلاص
شهقت تقول : وشووو ؟
وائل : زي ماسمعتي
هياء : تستهبلون صح ؟ الرجال توه طالع من المستشفى خله يرتاح ولو يومين ع الاقل !
الدكتور وائل : تناقشي مع المدير مب معاي
طلعت هياء تتجه لـ مكتب المدير و كانوا وائل و عُلا خلفها ، دخلت و نطقت بـ عصبيه : دكتور حسن ، وش الكلام الي تقوله كيف يعني تبي سطّام يداوم وهو توه طالع من المستشفى !
الدكتور حسن : صوتك قصريه ، وكلامي واضح م بعيده .. من بكره يبدأ يداوم
ضربت هياء على الطاوله بقوه و نطقت : م راح يداوم
وقف الدكتور حسن و نطق بـ عصبيه : هذا أول إنذار لك ي دكتورة هياء ، اطلعي عشان لا يصير شي م يعجبك
هياء : اجل من الحين اقولك ، سطّام ماهو مداوم بكره و الانذار الي مفروض يروح ل سطّام خله لي و بكذا يكون عندي انذارين ..
طلعت و قفلت الباب خلفها بقوه و رجعت لـ مكتبها ، دخلت عليها عُلا الي كانت مصدومه و نطقت : حلال من باس راسك الآن ! وش هالقوه ياهيون مااااعرفتكك
زفرت تقول : الله يعدي اليوم على الخير ..
ضحكت عُلا وقالت : والله قويه ! تسوين هذا كله عشان سطّام بس !! اشهد انه محظوظ فيك
قاطعهم رنين هاتف هياء ، و فزت تطلعه من الشنطه و ابتسمت تلف الجوال على عُلا و نطقت : عمره طويل
عُلا : يلا اجل انا بـ مكتبي ان خلصتوا تجيني
هياء : تمام ..
طلعت عُلا و استجابت هياء بالرد على سطّام ، و ابتسمت من كان يرحب فيها و نطقت : شهالترحيب الي يخليني اروق ؟
ابتسم ينطق : يجعله دوم الروقان يادنيتي
ابتسمت تقول : وياك ياحبيبي ، ايوا أمرني بغيت شي ؟
نطق يقول : ليه إذا اتصلت لازم يكون ابي شي ؟
هياء : اجل ؟
سطّام : يمكن مشتاق لصوتس ؟ مايصير بعد ؟
تبسمت و نطقت بـحُب : فدييييت المشتاااق ينااس
ابتسم يردد وراها : بس بس كثير ع قلبي كذا
ضحكت وقالت : خلاص يلا عطيتك وجه
سطّام : ابوس هالوجه ذا
ابتسمت بخجل وقالت : سطّام !!
ضحك وقال : يلا زين خلاص بقفل
هياء : شاطر يلا و انتبه لنفسك
سطّام : حاضر
-
و فـ ارجاء قصر آل حمد ، بـ الحوش تحديداََ عند رهف و قاعَد الي كانوا قاعدين يسولفون و يضحكون ، ابتسم وهو يتأملها وهي تسولف و تضحك ، و نطقت رهف وهي تشوفه سرحان : قاعَد ؟
تبسم ينطق : لبيه
ابتسمت تقول : لباك ، وين عقلك صار لي ساعه اسولف وانت مب معاي تهوجس ف وشو ؟
ارتخى ينطق وهو هايم فـ جمالها و برائتها : اتأمل ذا الزين الي قاعد يسولف قدامي !
نطقت بـ خجل : بس عاد لا يسمعك احد
و فـ نفس اللحظه قاطعهم صوت رنين الجرس ، فزت رهف برعب و نطقت : يمه من ف ذا الوقت !
ضحك من شافها خافت و قام بهدوء يقول : ادخلي انتي انا بقوم اشوف
رهف بتوتر : قاعَد انا بقوم اقعد انت
قاعَد : يارهف
رهف : ي قاعَد !
قاعَد : طيب لا تطلعين برا من الباب شوفي منهو
رهف : طيب
تقدمت رهف تفتح الباب و تصنمت تنطق : تفضل اخوي تبي احد ؟
تبسم وهو يناظرها وقال : تركي موجود ؟
رهف : موجو....د
قاطعها صوت قاعَد الي نطق بحده : ادخلي ، وانت من ؟
راكان : انا راكان خوي تركي ..
قاعَد : ادخل حياك
دخلت رهف مسرعه و دخلوا قاعَد و راكان للـ مجلس ، قعد راكان و نطق قاعَد : بقوم انادي لك تروك ، تبي قهوه شاي شي ؟
راكان : شاي
قاعَد : طيب
طلع قاعَد و اتجه للصاله و نادى تركي و راح تركي للـ مجلس ، طلع معاهم قاعَد و دخلوا كلهم للمجلس
نطق راكان : ان كان مابه ازعاج بس منهي بنته الي فتحت الباب ؟
قطب تركي حاجبه وقال : هاه ؟؟
قاعَد : وليه ؟
راكان : مزيونه
تركي بحده : اعقب شهالكلام استح على وجهك ، بعدين من الي فتحت ؟
اخذ قاعَد نفس و قال : مهوب لازم يعرف ، خله يلزم حدوده بالكلام وبس
طلع قاعَد بعدم استماع لـ ردهم و تقدم يدخل للصاله و جلس امام رهف و نطق : انا قلت لس خليني افتح
رهف : ها ؟
قاعَد : الرجال داخل قاعد يقول مزيونه ! عنس انتي ي رهف
ضحكت رهف تقول : لحق يقول مزيونه ! مو طبيعي
قاعَد : وانا وش ذنب قلبي يحترق عليتس
نطقت بـهدوء : وليه يحترق وهو داري اني لك ؟
تبسم وهو يشوفها قدامه و تعترف بأنها له و انه لها ، أكتفى بـ انه يبتسم و طلع لـ غرفته يرتاح ..
-
و بـ الشركة تحديدا عند مكتب ابو عقاب ، طلع من مكتبه و اتجه لـ مكتب وهج بهدوء و طق الباب ، فزت وهج و نطقت بخوف : يمه شصار شسويت
ضحك وقال : م سويتي شي يابنيتي ، مايصير ادخل ؟
وهج : تفضل
دخل ابو عقاب و قعد أمامها و نطقت : امر استاذ سهم فيه شي ؟
ابو عقاب : اسمعي جاي اتكلم معاس بموضوع
وهج بتوتر : تفضل ؟
ابو عقاب : عقاب ولدي
وهج : شفيه ! صار له شي ؟
ابو عقاب : لا لا ابد ، انا اليوم تكلمت معاه عن موضوع الزواج .. و قلت له نبي نفرح فيك و من هالكلام الي انتي خابرته ، و عقاب فـ باله وحده و علمني عنها
بلعت ريقها و نطقت : ايوا ؟
ابو عقاب : موجوده معانا بالشركه
وهج : طيب ؟
ابو عقاب : ماتبين تعرفين منهي ؟
وهج : لا
ضحك بخفوت و نطق : وراتس عصبيه ! باقي م كملت كلامي ..
وهج : اعذرني استاذ سهم ، كمل
ابو عقاب : عقاب ولدي يبيتس انتي و يقول انتس عاجبته ، انا ابي اسمع منس إذا انتي موافقه لو تقدم لس ؟؟ عقاب من عرفته ما فكر يحب ابداََ ، لأول مره قرر يحب وانتي الي جيتي و خليتي ولدي يحبتس ان كنتي م تبينه ولا تفكرين انس تصيرين حلاله من الحين علميني انا مابي ولدي يندم ع قراراته لانه اختار بنت ماهيب مننا ولا من قبيلتنا !
بلعت ريقها بصدمه وهي تسمع له و نطقت : والله م ادري وش اقول !!
ابو عقاب : حاسه بـ شيء اتجاهه ؟
نزلت راسها بـ احراج و سكتت بعدم رد ، و نطق : ها شلون الحين ؟ مافيه امل يعني
نطقت : فيه
ابتسم ينطق : متأكده ؟.
وهج بهدوء : انا بكون معاك صريحه ، من البدايه عقاب كان عاجبني ، شخصيته و اسلوبه و جديته فـ العمل ، و غير كذا انه وقف معاي كثير و اظن انك تدري بأنه هو الي تكلف بـ علاج امي ، و طرد سكرتيره كانت معاه من زمان بس لانها رفعت صوتها علي ! نقدر نقول انه مُجرد إعجاب بس حُب باقي
ابو عقاب : طيب ان شاء الله كل خير ، ولا تعلمين عقاب او اي احد اني جيتس و علمتس !
وهج : تمام ..
طلع ابو عقاب من مكتبها و اخذت وهج نفس عميق و كانت مصدومه تماماََ من الحوار الي صار ، ابتسمت تقول بينها و بين نفسها : معقوله طلع يبادلني نفس الشعور ! اخخخ شلون بطالع فيه انا بعد الي قالي ياه ابوه !!!
-
و فـ بيت ابو جراح ، نزلت الماس عند الدانه و نطقت : دنو
فزت الدانه وقالت : عيونها
الماس : شرايتس نسوي لنا شي ؟ كوكيز و قهوه نروق
الدانه : تممم تمم
ضحكت الماس و تقدموا ثنتينهم للمطبخ يطلعون مهاراتهم بـ الطبخ ، الي سوت الكوكيز و الي سوت القهوه .. نطقت الدانه : لموس
الماس : هلا
الدانه : بعدس زعلانه من جراح ولا رضيتي ؟
ابتسمت تقول : ليه هو خلاني ازعل ؟
ضحكت تضربها على كتفها بخفه : خفيييفه !
ضحكت تقول : يازينه والله م تركني زعلانه ابد وانا شفته وش كثر كان ندمان و اعتذر لي اكثر من مره ليه ازعل بعد خلاص نقطع الشر
الدانه : صح عليتس ، الا بقولتس م سالتي كم لس حامل؟
الماس : لا ، بكره بروح ان شاء الله
الدانه : ان شاء الله ، يلا الله يقويتس و تولدين بالسلامه
ابتسمت تقول : امييين ياروحي و عقبال نشوف عيالتس
انفجرت تضحك وقالت : وين بسم الله باقي بعدني صغيره خير
ضحكت تقول : وين صغيره خلاص ندور لس العريس
الدانه : الله يجيب الي فيه الخير
الماس : مافيه احد في بالتس ؟
الدانه : لا ابداََ
الماس : و وهج ؟
ضحكت وقالت : وهج غرقانه بالشركه
ضحكت بصدمه وقالت : أحلفي انه من الشركه !
الدانه بهمس : مدير الشركه بكبره
شهقت الماس وقالت : احلفييييي
الدانه : لحد يدري بس
ضحكت الماس وقالت : محد بيدري م عليتس ، وش يرجع ذا المدير ؟
الدانه : ياحبيبتي بتنصدمين زياده
الماس : وشو وشوووو
الدانه : شركة آل حمد م عرفتيها معروفين ذول عاد
فتحت عيونها بصدمه و نطقت : كذابه ! لا تقولين وهج حبت ولدهم !!!
الدانه : اي والله هذا الي قالته لي
الماس : الله يجيب الخير
-
يُتبع
-
( ياهلا بـ احباب قلبي ، اعذروني على القصور و الأخطاء الإملائية ، اتمنى البارت عجبكم و اعذروني لانه قصير هذا الي قدرت عليه ، اضغطوا على النجمه لأجل نكمل سوا 🌷-)