دامك زرعت الحب في داخلي ورد‏ أنا ما ابي غيرك من الناس يسقيه

البارت الثاني عشر

سبحان الله وبحمده.. سبحان الله العظيم 🤎
.
نجمه تقديراً لتعبي ⭐️
.

<< المالديف >>
مرّت ثلاث اسابيع من اجمل الأسابيع على روح
واليوم هو اخر يوم لهم بالمالديف
تنهدت بتعب وقفلت شنطتها وقرّب كاسر يمد لها كوب العصير ونطق : بنزل للمسبح قبل نمشي تجين معي؟
هزت راسها بالنفي تاخذ رشفه من العصير : لا بشوفك بس
هز راسه ومشى جهة المسبح يطب ويسبح بكل مهاره
ابتسمت بهدو تنزل رجلينا بالمسبح ورفع نفسه وقرّب منها يسند ذراعينه على فخذها : وجهك مو عاجبني فيك شي؟
هزت راسها بخجل : عادي تعب ماقبل الدوره
مدت يدها تلعب بشعره ونطق : ماودك تنزلين؟
هزت راسها بالنفي : ماودي كاسر
مسك يدينها يقبّلها وناظرت جوالها : يكفيك يلا باقي ساعه على رحلتنا
طلع من المسبح ونثر شعره وتوردت خدودها من منظره
اعتدلت بوقفتها ومشت عنده تاخذ عبايتها وتلبسها
رفع الشنط وناظرها : تأكدي انك مو ناسيه شي
تلفتت تشهق من شافت دبدوبها واخذته : يمه كنت بنساه
ابتسم وطلّع الشنط واخذها العامل ينزلها للتاكسي وطلعوا سوا
ركبت ورفعت جوالها وتنهدت : رينا ماترد علي
هز راسه : نرجع وتشوفينها
صدت تناظر الشارع ورفع جواله يتصفحه وبعد مده وصلوا للمطار
نزلوا وتوجه يشحن الشنط وبعد مده من الوقت سمعوا نداء طيارتهم
جلست بمقعدها وهو جنبها ونطقت بهمس : جوعانه
ابتسم وهز راسه : اصبري تقلع الطياره ويوزعون الاكل
هزت راسها وما ان استقرت الطائرة بالجو لف يشوفها نامت
ضحك واخذ القهوه من المضيفه ينطق لها انه يبي لروح بطانيه
مدتها له وفتحها يغطيها ولبس سماعاته يتفرج فلمه
<< مطار الملك خالد الدولي >>
وقفت رينا وبجانبها ضيدان واشرت بيدها : هذوليك هم
ابتسمت روح من لمحت زول رينا
فتحت رينا يدها تضم روح بكل قوتها : وحشتيني!!
ضحكت روح تبتعد عنها تنطق : عروستي الحلوه
تبسّمت رينا بخجل وطالعت كاسر وتقدمت تحضنه وهمست : ترا شايله عليك بخاطري كثير
عقد حواجبه وابتعدت عنه تحضن ذراع ضيدان وهمست : يلا نمشي
مشوا سوا وركبت روح وقربت رينا منها تنطق بهمس : ما فيه شي بالطريق؟
توردت خدودها بخجل : لا
ابتسم ضيدان يطلّع من درجه سلسله منحوت عليها اسم روح ومدها لكاسر : عطها زوجتك هديه
ابتسم كاسر بهدوء : ماتقصر ياخوك
مد يده من عند الباب وابتسمت روح باعجاب من شافت السلسلة ودخلتها شنطتها
دخل اسوار القصر ووقف سيارته وجا العامل ياخذ الشنط
نزلت روح بجنب كاسر تنطق : وحشتني عمه جمانة
ابتسم يحاوط اكتافها : ادخلي بتكلم مع رينا وبجيك
هزت راسها ودخلت داخل ووقفت جمانة بلهفه : يامرحبا فيكم تو مانورت دارنا
ابتسمت روح تركض تحضنها : وحشتيني عمه
مسحت جُمانة على ظهرها ونطقت : كيف كانت سفرتكم
ابتعدت تمسك يد جمانة : حلوه بالحيل
لفت تشوف غِنى وآيلا ومشت عندهم تضمهم
ضحكت آيلا ونطقت : وحشتيني يا بنت!!
ابتعدت روح تنطق بعبوس : والله بنات ماقدرت اجلس هناك صح الوضع هادي وروقان بس احس يبي لك ونيس
طالعتها غِنى بخبث : وكاسر ماكفّاك؟
ضحكت بخجل وهزت راسها : تهاوشت معه
وسعت غِنى عيونها بضحك : لا فيه علوم اجلسي
بالخارج~
تنهد وجلس جنبها : يابنت الحلال ممكن تشرحين لي وش صار؟
مسحت دموعها ونطقت : صرت بعيد عني حيل
ابتسم ومد يده يحضنها : رينا
ابعدت يده ونطقت بقهر : وش اللي يخليك تنشغل عني؟
تشغلك عني بنت يتيمه؟
رفع راسه ومسح على وجهه من شاف روح واقفه
" قبل لحظات ~
ابتسمت روح توقف : كلمني كاسر عن خطبة رينا ما قالت لكم متى بتخليها؟
هزت آيلا راسها بابتسامة : قالت لنا بس انها موافقة
لفت عليهم تنطق : بروح اسألها
اخذت طرحتها وطلعت برا تمشي للمجلس الخارجي
وقفت عند الباب تسمع جملة رينا وبلعت ريقها
ناظر كاسر برينا بحده ووقف : روح
وقفت رينا وبلعت ريقها : روح اسمعي
لفت تطلع وركضت تدخل للصاله وطلعت للغرفه
قفلت الباب وفتح كاسر : روحي
عضت شفايفها بدموع وفتحت شنطتها تطلع بجامتها ونطقت بهدوء : لا تنشغل عن اختك روح لها
قرب منها وسحبها لحضنه وهمست : ابعد
قبّل راسها ورفع شعرها : ناظريني
هزت راسها بالنفي وكمّل : ما كانت تقصد
رفعت يدها تغطي فمه : لا تكمل ، خلاص ما تنلام لو تزعل بيوم وليله اخوها يبتعد عنها عشان زوجته
تنهد وشد عليها : تبي تكلمك ادخلها؟
هزت راسها بالنفي وابتعدت عنه ونطق بعلو : رينا ادخلي
دخلت رينا وزمّت شفايفها : روح
ابتعد روح عنهم واخذت ملابسها ونطقت : بنام اتركوني
ميّلت رأسها بدموع : روح اسمعيني
لفت عليها ونطقت بهدوء : وش اسمع رينا وش اسمع؟
ما الومك لان لو انا بمكانك عندي اخ يبيع الدنيا عشاني بزعل لو انشغل عني كم يوم ، اطلعوا ابي انام
صدت عنهم ودخلت الحمام ونطق كاسر : شاطره يا رينا
تأففت بدموع تنطق : والله بالغلط والله
مسح على ظهرها ونطق : انزلي انا بتكلم معها
هزت راسها وطلعت من الغرفة
طلعت روح بعد مده ومسكت ريموت المكيف تحط الدرجه اعلى شي وتمددت على السرير
دخل الغرفه وارتعش جسمه من برودتها وقرب منها يرفع البطانيه وشافها نايمة بعمق
انحنى يقبّل راسها وخدها واخذ الريموت يعدل التكييف وطلع ونزل للاسفل
جلس بينهم ونطق ضاحي : كاسر يبه كيف سفرتكم؟
ابتسم وهز راسه : كويسه يا ضاحي
ناظر بهاج ورفع حاجبه يأشر له : عيني عليك هالفتره انتبه
ضحك بهاج بتوتر وهز راسه : شدعوه ياخوي
ناظر كاسر براجي : متى الملكه؟
ابتسم راجي يطالع بهاج ورينا : ننتظر العرسان يحددون
ابتسمت رينا بخجل ونطقت : شوري من شور بهاج
ابتسم بهاج ونطق : بعد اسبوع يناسبني جدا
وسعت عيونها وضحكت بصدمه ترتكي بظهرها على صدر ابوها
ابتسم راجي يقبّل راسها وحضنها : الا وحيدتي يا بهاج ترا
عدل زياد جلسته ينطق : ودام ان الكل متجمع انا ياعمي سلمان اطلب يد بنتك آيلا على سنة الله ورسوله
ضحك زايد بصدمه ينطق : وشور ابوك يالعاق؟
ضحك زياد ينطق : هذا انت دريت ، والله ياعمي انا ودي ببنتك تكون زوجةٍ لي وأمٍ لعيالي
ابتسم سلطان يتلفت وعقد حواجبه : وين آيلا
كتمت رينا ضحكتها تنطق : انحاشت ، بقوم اشوفها
وقفت رينا تمشى للمطبخ ودخلت تشوف آيلا تشرب مويا ووجهها احمر من الخجل
ضحكت رينا تركض عندها تدغدغها : يناسو اللي بتتزوج
ضربتها آيلا تنطق بقهر : طالعه منها يعني
ابتسمت رينا بخجل : تفكرين زي ما افكر؟
هزت آيلا راسها بحماس : ملكتنا تكون سوا
حضنتها رينا تنطق : اموت على اللي يفهمني خلاص نجلس مع روح وغِنى ونقرر
هزت راسها وزفرت بتوتر : كيف اطلع لهم الحين؟
ضحكت رينا تصد عنها : تعالي تعالي
مشوا للصالة وجلست آيلا جنب بهاج ونطق سلطان بابتسامة : يبه آيلا ما عطيتينا ردك؟
توردت خدودها ونزلت راسها وابتسم بهاج : وش؟
همست بخجل : موافقه
ضحك يحاوط كتفها ينطق : ارفعي صوتك خلي الرجال يسمعك
علّت صوتها ونطقت بحياء : موافقه
هز ضاحي راسه ينطق بفرحه : الله يتمم لكم يا عيالي
يلا قوموا نامو عشان نلحق على صلاة الجمعه
دخل غرفته يشوفها ما زالت نايمه وقرب منها يتحسس حرارتها بقلق وتنهد يفك ثوبه وتمدد جنبها
تحركت بانزعاج ورفعت نفسها تدور ريموت المكيف
طالعها ينطق بهدوء : فيك شي
ابعدت يده من على بطنها ونطقت : لا تلمسني
تنهد وحط ذراعه تحت راسه وجلست تمسح على وجهها
قامت للحمام ركض وانحنت على المغسله تستفرغ كل شي
وقف يمشي وراها ومسكها من بطنها يمسح على ظهرها : بسم الله عليك
رفع شعرها بيده وشهقت تبكي وغسلت وجهها وفمها
لفها عليه يمسح دموعها ونطق بحنيه : ليه الدموع يابنتي
هزت راسها بالنفي : متضايقه مره كاسر وبطني يوجعني
قبّل راسها بعمق ورفعها بين يدينه يمشي للسرير
غمضت عيونها بتعب وصدت للجهه الثانيه وطلع من غرفته واتجه لغرفة امه يدق الباب
طلعت له جمانة وهي لابسه جلال صلاتها : وش فيك يمه
كاسر بقلق : روح
هزت راسها وطلعت تمشي وراه ودخلت غرفته وشافتها ضامه نفسها
قربت منها تمسح على كتفها : يمه روح ، طالعيني
لفت روح تشوف جمانة وابتسمت جمانه بحنيه : وش تحسين فيه
صدت ببكي تنطق : بطني هنا يوجعني
توسعت ابتسامة جمانه تنطق : اي يوم تنزل دورتك
غطت على عيونها بدموع : ٢٧
هزت راسها وهمست لكاسر : كم التاريخ
رفع جواله ونطق : ١٧
رفعت يدينها تبتسم : يارب لك الحمد
حضنت كاسر تقبّل خده : الف مبروك يا امي
عقد حواجبه بعدم فهم : امي وش فيك 
شدت جمانة على اكتافه ونطقت : روح مية بالمية حامل تصحون الصبح من بدري وتروحون تكشفون
هز راسه يطالع روح بصدمه وطلعت جمانة وقرّب منها يمسح على خدها بقفا يده : روحي
طالعته بدموع وميّل شفايفه يحاول يستوعب كلام امه
انحنى يقبّل بطنها وابتسم ورفع نفسه يتمدد وحضنها
دفنت راسها بعنقه وضمها بقوه ورفع البطانيه : نامي والصبح يصير خير
هزت راسها وسرعان ما استسلمت للنوم وهو وراها
١١:٣٠
وقفت قدامه تلبسه الكبك وابتسم يقبّل راسها
مسكت المبخر تولع الفحم وغطت بيدها تهفّ عليها
اخذت العوده وحطتها فوق الفحم ورفعت شماغه تبخره وابتسم ينطق : طاب طيبك وعاش حبيبك
ابتسمت بخجل تنطق : حبيبي قدام عيوني الله لا يحرمني منه ، يلا تقبل الله
مد يده يرفع شعرها باصبعه من على رقبتها وتورّدت ملامحها بخجل من نظراته على نحرها : ابعد تبي تشوف فعايلك فيني يعني؟
ضحك وعدّل شماغه ينطق : ارجع من الصلاه القاك لابسه عباتك طيب؟ هزت راسها وابتعدت عنه تاخذ جلالها ولبسته وطلع من الغرفه وهي وراه
نزلت تحت تشوف الرجال طالعين من الباب لجل الصلاه ولمحت رينا وصدت عنها تتجه لجمانة : عمه
لفت جمانة تمد ذراعها لها : عيون عمتك تعالي
حضنتها روح تنطق بهمس : قلتي لاحد؟
هزت راسها بالنفي وابتعدت عنها : ما بتكلم انتوا تتكلمون يا امي
هزت راسها وابتعدت عنها تتجه للمطبخ تشوف ليلينا تجهز القهوه ونطقت ؛ لولي
ابتسمت ليلينا ولفت عليها : نعم مدام
طيرت عيونها وضحكت : اسمي روح مو مدام رووح
هزت راسها ونطقت : مدام روح
ضربت جبينها ونطقت : الله يعين ، وين النوتيلا؟
فتحت ليلينا الدولاب وطلّعت علبة النوتيلا وسرعان ما شهقت تسحبها : بابا كاسر قال مانعطي مدام روح النوتيلا
رفعت حواجبها بعدم اعجاب ونطقت : عطيني عطيني انا اتفاهم مع بابا كاسر
هزت راسها تمد لها علبة النوتيلا : خلاص خذيها بس بعدين انتي ما يقول لبابا كاسر عني
ضحكت وهزت راسها : تمام يا لولي تمام
صدت بتطلع لكنها شافت البنات داخلين وابتسمت
قرّبت منها آيلا تضمها : اوف وحشتيني
قربوا يضموها كلهم وضحكت بخجل ونطقت ليلينا من وراهم : بابا كاسر يشوفكم يقتلكم مدام روح حق هوا بس
ابتعدت رينا تنطق بصدمه : من متى يحظي؟
هزت ليلينا اكتافها ونطق : الصباح انا يطلع فوق ودي ملابس وسمعت بابا كاسر يقول لمدام روح انتي لي
وسعت عيونها وغطت على وجهها : اص اص تكفين انتي فضيحه
ضحكت رينا بصدمه تنطق : ياربي ما أتخيل كاسر كذا
دخلت الجده مُنيه وفزت رينا تساندها : جده تدرين اني احبك
ضربتها على كتفها بخجل وضحكت روح تناظر ليلينا ونطقت : لولي جيبي عبايتي بسرعه
هزت راسها وطلعت تجيب عبايتها ونطقت غِنى : طالعه مكان روح؟
هزت روح راسها : بطلع اخلص مشوار مع كاسر وبرجع ماراح اطول
هزو روسهم بتفهم وقرّبت ليلينا تمد لها عبايتها ولبستها وطلعت تجلس بالحديقة تنتظره يجي
سهت تناظر الفراغ وحطت يدها على بطنها تحاول تتقبل موضوع ان فيه روح بداخلها
فزت من حست فيه يقبّل راسها من الخلف ولفت تناظره وابتسم ينطق : مشينا؟
هزت رأسها ووقفت ونطق : ممكن نترك الهواجيس
ابتسمت تحضن ذراعه : اهوجس فيك
رفع حواجبه يجاريها : بوش ياترا؟
زمّت شفايفها ترفع يدها تمسح لحيته : افكر كيف هالجمال كله صار من نصيبي
ضحك وفتح لها باب السياره وركبت ونطقت : كاسر
رفع راسه لها ومسكت وجهه تقبّل ثغره : والله إنك أعذب وأحن ما جابته لي الايام
ابتسم يمسك يدها يقبّلها ونطقت بخجل : ابي قصيدة
ضحك ونطق :
تطلبين القصايد وانتِ اجمل قصيده
في عيونك بحور وفي رموشك مواني .
عضت شفايفها بخجل وضمته : أحُبك
قبّل جانب راسها ينطق بخبث : صادقه قولي هالكلام بالغرفه مو وسط الحوش عشان ما اسوي لك شي
وسعت عيونها وضربت صدره : قليل ادب!
ضحك وعدلت جلستها وقفل الباب ورح جهته وطلع خارج اسوار القصر
ابتسمت من شافت قطرات المطر ونطقت : حبيبي افتح السقف
هز راسه بالنفي : تتعبين يابنتي
تأففت وصدت عنه وابتسم : شكل هالحمل بسبب بيننا مشاكل
هزت راسها : ايه لانك ماتلبي طلبات زوجتك وولدك
مسك يدها يقبّلها : وش ودك الحين طيب؟
ناظرته بعبوس : ابي المطر
هز راسه بقلة حيله : تدرين انك اول وحده تمشي كلمتها علي؟
ابتسمت بانتصار من ضغط الزر وفتح سقف السيارة
وقفت تفتح ذراعينها تستشعر الهواء وقطرات المطر وابتسم ينطق : يكفيك يابنتي لا تمرضين
ناظرته وهي مبتسمه ومسكت يده تصرخ : أحبك
ضحك واخذ يدها يقبّلها ونزلت نفسها وضغط الزر يقفل السقف ومسح وجهها : شفتي بتتعبين
طلّعت جوالها ورفعته : صد صد
صد بوجهه وصورته وارسلتها للبنات : كاسر
همهم لها ونطقت : الحين تخيل لو صدق اكون حامل؟
ابتسم وطالعها : تخليني املك الدنيا كلها
إبتسمت وميّلت راسها على كتفه ووقف بمواقف المستشفى وقفل السياره ونزل وراح جهتها يفتح الباب
نزلت ونطق : بشويش انزلي
رفعت راسها وابتسمت تناظره ومسك يدها وطلّع المنديل من جيبه يمسح شفايفها ونطق بحده : مو لازم الروج ترا
ضحكت وابعدت عنه ومشى معها لداخل المستشفى
وقف أمام الاستقبال ونطق : السلام عليكم
؛ وعليكم السلام تفضل اخوي
كاسر : ابي موعد مستعجل عند دكتورة نساء وولادة
طالع باللابتوب ثم رفع راسه : الدكتورة بإجازه حالياً
هز راسه ينطق : موجود دكتور ولا؟
: موجود ، اقرب موعد بعد نص ساعه
هز راسه بهدوء ونطق الرجال : عطني المعلومات
كاسر : روح بنت صالح آل فيصل
: الهويه
كاسر : ١١********
طلع الرقم ورفعه لكاسر ينطق : راح تجي الممرضه تنادي بالاسماء
هز راسه ومسك يدها يمشي وجلس بالانتظار
جلست جنبه وابتسمت من شافت اثنين قدامها وأشرت : كاسر شوف
طالع بالبنت الحامل وزوجها جنبها وابتسم ورجع يطالع جواله ونطق : روحي
همهمت له ونطق بجديه : تبين ترفعين قضية عنف على صال ومَهاب؟
ناظرته وماردت عليه وتنهد يهمس : مو وقته انت بعد تفتح الموضوع هنا
مسك يدها يقبّلها ونطق بابتسامة : اسف يابنتي اسف
حطت راسها على صدره ومرّ الوقت لحد ما سمعت الممرضه تنطق بـ : روح آل فيصل
وقفت بتوتر وطالعته : خايفه كاسر
ابتسم وشد على يدها : انا معك
دخلت للدكتور والقى كاسر السلام بصوت واضح ورفع الدكتور راسه : وعليكم السلام ، استريحوا
جلست روح تشد على شنطتها واعتدل الدكتور بجلسته يناظر الكمبيوتر : روح صالح
هزت راسها وكمّل : وش الحاصل يا روح
ناظرت كاسر وغمض عيونه بمعنى تتكلم وبدت تسرد له
هز راسه ينطق : بنسوي لك تحليل دم نتأكد بعدها سونار نشوف كم لك
هزت راسها وبعد مده دخلت الممرضه ومعها اغراض سحب الدم وطالعت كاسر بخوف تهمس : كاسر لا
كتم ضحته وقرّبت الممرضه منها : مدي يدك اختي
هزت راسها وسحبت يدها : انا بخير خلاص ما يحتاج كاسر سو شي
مسكت يدها بقوة وسحبت الدم ونطقت بحنق وغضب : اوجعتيني
ناظر الدكتور بالممرضه ونطق : كم تحتاج عشان توضح
الممرضه بهدوء : ساعه الى ساعه ونص
هز راسه وطالعهم : ارجعوا لي بعد ساعه
هز راسه ووقف ووقفت معه وطلعوا
رفعت يدها تنطق بدموع : اوجعتني الحقيره
ناظر يدها يشوف نفختها ورص على فكه : اجيب اسمها بنت اللي ماني بقايل ، تعالي معي
مشت معه وطلعوا لحديقة المستشفى ونطق بحنيه طاغية : تبي شي تشربينه؟
هزت راسها بالنفي ورفع يدها يقبّلها ونطق : جعله بعمري
نطقت بنعومة : جوعانة
ابتسم ووقف : يخسي الجوع والله
وقفت معه وهي مبتسمه ونطقت : تدللني كثير ياكاسر
نزل نظارته ينطق : برد عليك بالبيت
تبسّمت بخجل وطلب لها وبعد مده اخذ الكرواسون والعصير : سدي فيها جوعك واذا خلصنا نتغدا برا طيب؟
هزت راسها وجلست بأحد الجلسات وهو قدامها
ناظر يده ونطق : يلا نروح
هزت راسها ووقفت ومشى معها لمكتب الدكتور ودخلوا
ناظر الكمبيوتر ونطق : دورتك كم لها متأخره ياروح؟
توردت ملامحها بحياء : ٢٠ يوم
هز راسه يطالعهم : الف مبروك التحليل ايجابي
ابتسم كاسر بوسع وسرعان ما تحولت ملامحه للجمود أول ما نطق الدكتور : تفضلي معي وارفعي بلوزتك
هزت راسها وقربت الممرضه تضغط الكريم على بطن روح ووقف جنبها وكان الدكتور يطالع الشاشه فقط ما يطالع بطن روح : نزليه تحت شوي
نزلت الممرضه الجهاز بأسفل بطنها وأبتسم يأشر على الشاشه : تشوفونه؟
ابتسمت روح بدموع وطالعت كاسر ونطق الدكتور : اللي واضح لي انه لك اسبوع من وقت حملك
هزت راسها ومدت الممرضه المنديل ومسحت روح على بطنها واعتدلت بجلستها وراحت تجلس قدام الدكتور
ناظر الدكتور بكاسر ونطق : طيب أخ كاسر لازم تسمعني كويس ، كم عمرها؟
كاسر بهدوء : ٢٠
هز راسه الدكتور : تعتبر صغيره جدا على الحمل وبنية جسمها ما تتحمل ، طالع لي انها من قبل دخلت المستشفى بسبب نوبات الربو اللي تتعرض لها
هز راسه كاسر وكمل الدكتور : لازم العناية المكثفة ومايحتاج نتكلم من الناحيه النفسيه ، راح تلاحظ تقلبات مزاجيه ونفسيه وهذا ابدا ماهو شي يخليك تقلق وبرضو الوحام راح ترغب بالاستفراغ بشكل مستمر خلال اول ثلاث شهور وهذا طبيعي
في حال تعرضت لآلام وتقلصات سواء خفيفه أو قويه راح تتوجه عندنا على طول
ناظر روح ونطق : اهتمي بالاكل الصحي عشان سلامة طفلك
هزت راسها ونطق الدكتور : الف سلامه
مدت الممرضه صور السونار لروح واخذتها ووقف معها ومسح على ظهرها وطلعوا
فتح لها الباب وركبت وقفله وراح جهته
ركب ورفعت الصور : كاسر شوف مره
قطع كلامها من قبّل ثغرها بعمق وابتعد عنها بهدوء يهمس : الحمدلله
توردت ملامحها بخجل وابتسم يمسك الصوره وعلّقها بالمرايا
مد يده يمسك يدها ونطق : ودك تتغدين؟ ولا نرجع القصر
هزت راسها تنطق بحماس : لا ابي نرجع بقول للبنات
زفر بملل : البنات والبنات ، متزوجتهم هم ولا انا؟
تبسّمت بحب : احبهم وش اسوي
مسك ذقنها يطالعها : وانا تحبيني ؟
هزت اكتافها وصدت : انتبه للطريق
ضحك وهز راسه : على امرك يا ام عيالي
شدت على يده وبعد مده من الوقت دخل لأسوار القصر ووقف سيارته ونزل وراح جهتها يفتح لها الباب ومسك يدينها : بشويش
ابتسمت بعبط وقبّل راسها ونطقت بخجل : انت قول لهم
رفع حاجبه وابتسم : وليه انتي ماتقولين؟
هزت اكتافها بخجل : استحي
ضحك وهز راسه يدخل : ابشري
ناظرهم وسلّم بصوت عالي : السلام عليكم
ردوا عليه السلام ونطقت رينا : الله يديم هالابتسامة ويديم سببها
ضحك ونطق : آمين آمين
رفع راجي حاجبه : عسى هالابتسامه وراها شيٍ زين
وقفت روح ورا البنات تهمس : بنات تعالوا مجلس الحريم
وقفوا معها ودخلت تجلس وتهز رجلها بتوتر ودخلوا وراها ونطقت غِنى : روح فيه شي؟
هزت راسها : اجلسوا
تربعت رينا تنطق : اسلمي شعندك
ابتسمت وطلعت صورة السونار وحطتها على الطاوله
رفعت رينا نفسها وصرخت تغطي على ثغرها : حامل؟
هزت راسها بالايجاب ونزلت دموعها ونطت آيلا تحضنها بقوه ونطقت غِنى بدموع : ياربي ما اصدق هالنونو في داخلها نونو كيف كذا روح
شهقت روح تبكي وغطت على وجهها وابتعدت آيلا : روح؟
هزت راسها وابعدت عنهم : بطلع
ميّلت رينا شفايفها باستغراب وهزت راسها
دخلت الغرفه وانحنت تفتح الصندوق واخذت صورة امها وابتسمت بدموع وجلست على السرير : ماما
مسحت على بطنها ونطقت بدموع : انا حامل ، ماما وعد لو كانت بنت بتكون مثل اسمك عشان احبها
هزت راسها تشهق : ماراح اسمح لها تعيش الي انا عشته
بس ماما هي عندها اب كويس ، كاسر يحبني ويدلعني كثير ، مايرضى ان حرارتي ترتفع و
رفعت راسها تشوف دخوله وفز عندها : روحي!
ابتسمت بدموع ووقفت تقرب منه وحضنته بقوه 
مسح على شعرها ونطق بقلق : فيك شي؟
هزت راسها بالنفي ورفعت نفسها تقبّل ثغره بعمق
مسك راسها من الخلف يثبتها وابتعد عنه وهي تتنفس بصعوبه
انحنى يقبّل نحرها وشدت على ذراعينه ونزلها على السرير ومسكت يده تنطق برجفه : كاسر
حضنها بقوه يقبّل راسها : الحمدلله
ناظرته بخجل وقبّل نحرها وميلت راسها : اوف كاسر
ضحك ورفع راسه : انتي جايتني والحين تبعديني؟
ضحكت وضربته : ابعد
رفع جواله يشوف رسالة الحارس بإن مَهاب ينتظره بالاسفل
فز يعدل جلسته وناظرت جواله واخذته ووقف
مسكته بقوه تنطق برعب : ما تنزل
طالعها بحده ونطق : بشوف هالكلب وش يبي؟
عزت راسها بدموع : انا انزل له ، بيسوي لك شي كاسر ما افرط فيك
تنهد ونطق بحده : ماتنزلين له فاهمه؟ انا حالف انهم ما يشوفونك خلاص
ابعدته وفتحت الباب تركض للاسفل ونزل وراها ركض وصرخ بغضب : روح قسم بالله ان تتعدين الباب مايحصل لك طيب
وقف زياد بقلق : وشفيكم؟
كاسر بغضب : مَهاب الكلب برا بيسوي شي
طلع زياد معه وصرخ كاسر : صد جعلك العمى ماهي لابسه حجابها
دخل زياد وطلع راجي من مكتب ابوه بخوف : وش صاير
دخل مَهاب من بوابة القصر وهو ماسك سلاحه وابتسم ونطق : اووه اختي هنا
سحبها كاسر ورا ظهره وابعدت يده ونطقت بحده : ليه جاي؟
رفع حاجبه وضحك : طلع لك لسان والله!!
رفعت راسها وهي ترتجف خوف لكنها تتصنع القوه قدامه ونطق كاسر بحده : مَهاب اكسر الشر ونزل سلاحك نتفاهم
ضحك مَهاب بسخريه : تتخبى ورا بنت يال**
وسع عيونه بغضب وطلع راجي ونطق كاسر بحده وصراخ : لحد يطلع ، وانتي ادخلي
ناظرت مهاب تنطق : ماتجي الا عشان الورث
هز راسه ونطق : زين ماكلفتي علي اتكلم جيبيها
هزت راسها وضحكت : قلتها لصالح واقولها لك الورث تاخذونه على جثتي فاهمين؟
إبتسم مَهاب ببرود : نقتلك وناخذه
ضحكت وهزت راسها : انا قدامك ، مايفرق معي شي ولا عندي شي اخسره
شهقت جمانه ومسكتها رينا من اختل توازنها : يمه
هزت راسها برعب : بنتي لايسوون فيها شي بنتي
مسكتها آيلا : عمه تكفين اهدي كاسر معها ما يجيها شي
عشّق سلاحه ودفته : كاسر
سحبها ورا ظهره وابعدته وابتسم مهاب بكل برود وضغط على السلاح يطلق وكان متقصد كاسر لكن الطلقه اصابت روح ببطنها
وسع كاسر عيونه وبلع مَهاب ريقه وجا بيطلع ولف لكنه لقى فهد وراه ولكمه : وين رايح يبن الكلب وين
صرخ كاسر برعب : دقوا على الاسعاف بسرعه
صرخت رينا برعب وركضت برا وانحنت عندهم ونطق كاسر بخوف : روح ابوي ، روحي تكفين روح ، رينا سوي شي تكفين رينا لا اخسرها
رفعت يدها بصعوبه على خده ونطقت بصوت متقطع : اختك تحتاجك
هز راسه بالنفي ولأول مره من سنوات عديدة تنزل دموعه : طالبك ماتخليني ياحبيبتي طالبك
طبطبت رينا على خدها : روح كلميني خليك معي لا تغمضين طيب؟
نزلت دموعها تنطق بألم وصوت متقطع : ولدي يعيش؟
مسح على خدها وكحت وطلع الدم من فمها ورفع راسه يشوف دخول سيارة الاسعاف ووراها سيارة الشرطة
نزل الطاقم الطبي من السيارة بعجله وقرب الدكتور ياخذ الشاش يثبته على بطنها ونطق لكاسر : ساعدني نرفعها
هز راسه وساعده ونطق الدكتور : وش فصيلة دمها؟
كاسر : O+
هز راسه الدكتور ودخلوها السياره وطلعت السيارة من اسوار القصر
مشى عند فهد يمسكه من ياقته : محد يحاسبه الا انا فاهم ؟
هز راسه وضغط على اكتافه ينطق : اهدا والحق زوجتك
ابتعد عنه يعتدل بوقفه ودخل عند الحارس ونطق بحده : طلع لي التسجيلات بطلع ابدل لو انزل وما اشوفها جاهزه مابيصير لك طيب
دخل القصر وطلع لغرفته وقرّب بهاج من رينا : قومي معي
شهقت بدموع ونطقت : كانت فرحانه بحملها ، بهاج انا زعلتها
هز راسه ورفعها من يدها : اهدي
نزلت راسها على صدره وابعدها ينطق : ما تحلّين لي يابنت راجي
ابتعدت عنه تدخل داخل وفزت من شافت امها : يمه
قربت منها ونطقت جمانة : وينها بنتي؟
مسكتها رينا من اكتافها تنطق بدموع : اخذها الاسعاف
اعتدلت بجلستها تنطق بقهر ودموع : ما ارتاحت هالبنت ما ارتاحت
لفت انظارها لكاسر اللي نزل وهو لابس لبسة العسكري ومتجاهل ندائهم له وطلع يركب سيارته ورفع انظاره على صورة السونار ونطق بقهر : والله ما تسلم مني يا مهاب
ناظر الفلاش اللي بيده ومقاطع تسجيلات لقبل دقائق معدودة
طلع من اسوار القصر يتوجه للمقر ووصل بعد مده
دخل يمشي بجمود وناظر فهد : وينه؟
مسكه فهد ينطق بحده : تحكم بنفسك يا كاسر
هز راسه وزفر : استدعوا صالح وفارس
.
.
. انتهى