الهوى والحُب اعظم خطاياي

بارت 15

الهوى والحُب آعظم خطاياي
بارت - 15

رفعت حواجبها نجلاء : زواج مين ؟ وليه الرساله من لمار ؟
نطق عزام : زواج اخوك على بنت خالك
شهقت نجلاء : اخوي مين ! ومين بنت خالي تلعبون معي انتم ؟
هز راسه تركي بالنفي : لا ، وبعد بكره الملكه للمعلوميه
ميلّت شفايفها نجلاء : مايهمك وجودي ؟
مارد تركي وتجاهلها يدخل عند أيهم وعقد حواجبه أيهم لانه لمّح نجلاء من وراء تغطي فمها وعزام يحضنها والتفت لتركي اللي جالس يطالع فيه ونطق خالد يتنحنح : حياكم الله ، ملكة ولدي تركي بعد بكره باذن الله
ناظروه كلهم باستغراب ونطق سالم : متى خطبتوا انتم ؟
خالد باحراج من فعل ولده وزوجته : صار كل شي بسرعه
تكتفت سُميه تنطق : كل شي بسرعه عن اهلك ؟
رفع راسه أيهم على دخول نجلاء وعزام ووقفوا جنب الباب يتركون ظهرهم على الجدار وحطت راسها نجلاء على كتف عزام

بعد مُدّه
دخل الدكتور : انتهى وقت الزياره واساساً بيطلع بكره
هزوا راسهم يطلعون كلهم بعد ماسلموا عليه ماعدا نجلاء اللي جلست على الكنبه ولف عليها : تعالي اجلسي زي قبل مايجون
لفت عليه ووقفت تنزل عبايتها ورفعت شعرها كله وتقدمت تجلس على السرير وبعّد أيهم يشوف ظهرها يمدّ يده وانسدحت نجلاء وضمّ ظهرها بيده وراسها على صدره
ونطق أيهم : وش قال تركي يوم طلعتوا ؟
اعتدلت نجلاء بسدّحتها تسرّد له كل اللي صار
ونطقت تختم كلامها : يخبّون علي ؟ اهلي واخوي اللي كان اقرب لي من كل الناس تغير تغير حتى اللي يحبها تغير عليها متخيل ؟ كسر قلبها مهما كان ماارضى على شخص يكسر شخص تدري مين اللي يحبها ؟ اختتك ! لمار لمار اللي بحسبة اختي واكثر

وقفت نجلاء تعدل حجابها تشوف من المرايه أيهم اللي يتاملها ينطق : وين رايحه ؟
لفت له : بروح اتفاهم مع اللي يتسمون اهلي وبجي
رفع حواجبه : على وش ؟
جلست على السرير : على انهم خبوا علي ، واذا صاملين بخلي بكره الزواج والملكه مابتحمل اشوف نفس الوجيه على نفس المناسبه ملكه وزواج نخلص منهم بعدها ماتشوفهم عيوني !
تنهد بتعب منها لان من امس وهي تتوعد فيهم ووقف بتعب ووقفت تسنّده لانه مايقدر يتحرك بشكل كامل : ماتحتاج اسنّدك ؟
ابتسم بتعب : ثقيل عليك
مااهتمت تسنّده ودخل ياخذ شور وجلست تنتظره لانها فهمت انه هو بيروح كمان وبعد دقايق بسيطه طلع لاف المنشفه على خصره وبيده منشفه صغيره ينشف شعره وتقدمت تاخذها تنشف شعره زين وطلعت لجل يبدّل وبدّل ملابسه يرتب شعره بعشوائيه ، ولبس ثوبه بدون شماغ وناظرته تقفل جوالها تحطه بشنطتها تشوف الخصل اللي طايحه على وجهه وتقدمت تسنّده وحرك رجله بثقل لحد ماوصلوا السياره وركبت جنبه تنطق : مافي سواقه تعرف ؟
لف لها وربطت حزامها تحرك لبيت اهلها تنويهم

بيت خالد
عدلت جلستها نوره : الحمدلله نجلاء وتركي بوقت واحد
نطق خالد بغضب وقهر : ماعلمتوا نجلاء !
لفت نوره : تركي قال مااقولها بيسوي مُفاجأه لها مدري عنه
انقطع كلامها تشوف نجلاء داخله بغضب والاكيد أيهم معاها ووقف أيهم وراها رغم انه مايحب يتدخل بالمشاكل العائليه بس مجبور لان نجلاء اذا عصبت ماتشوف احد قدامها ولازم شخص يوقفها ونطقت : سوال واحد بس !
ناظروها باستغراب ماعدا تركي اللي عرف الموضوع مُباشره ينتظر سواله يسمعونها : انا بنتكم ولا من الشارع ؟
ناظرها خالد باستغراب : بنتي ليه يابابا وش الطاري ؟
ناظرته بقهر : يعني لو عندكم بنت ثانيه مشيّتها شوي ، بس بنت وحده تخبون عليها موضوع زي كذا ؟ ، انا زيي زي اي شخص بالحياه تقولون لي حياك على زواج اخوك ! وينه اخووي اللي ماعنده قلب ولا مشاعر ؟ وينه ؟ انا مااابيه ، انا ابي اخوي اللي قبل اخوي اللي يميّز الحرام والحلال ! اللي يعرف وش يبي ويطالب فيه مو من اول محاوله غبيه يبعّد ويستسلم ! رجال هو يقول ابي فلانه ومايمشي على شوّر امه وابوه ذي حياته !
غمض عيونه أيهم لانه حاول يمسكها وتبعد عنه وتعبت رجله من الوقوف يجلس يستمع لهواشها وصراخها وصوتها المقهور يشوف نوره اللي نطقت : كيف مايمشي على شوّر امه وابوه جدران حنا ؟ واخوك رجال طرق عن خشمك
ضحكت نجلاء بسخريه : معنى الرجوله عندكم وش ؟ انه يمشي على شوّر امه وابوه !! وش ذا ايش ؟ بس كذا ؟ الرجوله مو افعال ؟ لازم يكون له شنب ودقن وخلاص رجال وارجل الرجال ؟ يخسي والله الرجوله افعااال وليس كلام هو يحب لمار بينكم بس بيت جدي ، يروح له ويخطبها ويقول بالصريح لعمي " ابي بنتك " كلمه مو صعبه ترا ! ماطلبنا يقول معرووض !
وقف تركي بغضب : ورحت وقلت ووش كان ردها ؟ قالت لا مافي نصيب اشق ثيابي يعني ؟ اصيح عند خلق الله واصارخ ابي لمار ؟ جربت الحلال والحرام عشان انساها وهييي ! ماحرك شي فيها راحت تتعالج وتكمل حياتها ، كملت حياتها وانا كملت حياتي بالحررراام تعرفون وش يعني حرام ؟ يعني اكل مخدر.ات واكلت ، شرب ؟ وشربت كلمت ؟ وكلمت وكللل ذااا ماخلاني انساها ويوم عرفت جت تقول وقف تاكل وتشرب عشان ربي وعشان تدخل الجنه مو عشاني ؟ اكيد اذا بتوب هي ماهي السبب بتوب لربي ! لكن ؟ مافااددد رحت اعيش حياتي واخطب واكمل نص ديني لعل انساها ووش ارسلت ؟ قالت لا توعد احد وانت مو قد الوعد ؟
ولا تحب احد وانت مو قد الحُب ؟ قالته وشفتيييه ! هل الرساله ذي بتعطيني مؤشر اني لو خطبتها بتوافق ؟ مابتوافق وبيجيها خطاطيب كثيير تتزوج اللي تبي الدنيا مو موقفه على احد
ناظروه بصدمه وعض شفايفه أيهم يشوفه يتنهد يستوعب انه بيكمل ولا كانه اهداهم صدمه مايتوقعونها وقف مُباشره ينحني من آلم رجله لكن ؟ رجع يعدل وقفته يسرّع خطوته لحد ماوصله يصير هو بوجهه يهمس : اهدأ لو كملت بتجيب العيد خلك ساكت افضل لك لا انا اكفر فيك الحين !
ناظره تركي يتنفس بغضب ومسك اكتافه أيهم يرجعّه لوراء او بالاصح يخليه يجلس وجلس جنبه يسكّته