ورود سامة

50

ورود سامة
للكاتب يحيى ادريس
‏50 part
ساعة 6:35 م
زهراء : لولي خوذي العصير
خذت الاء كاس العصير
زهراء قالت ف قلبها يمكن قسيت عليه الله لا يسامحني درتله الوكال اللي يحبه ما سمحه لقمه
الا بيه وليدي
الاء : ماما ناخذ الفطور مزال ع اذان 5 دقايق
زهراء : خوذي واتصلي بخوك ورد بالك تقوليله نا قتلك اتصلي بيه عشان يتأسف ويعرف قيمتي
الاء خذت تليفونها اتصلت عليه الرقم المطلوب خارج نطاق تغطيه
زهراء تنهدت قالت ف نفسها ربي يحميه يارب
عند الاذان ماجاش وكانت تبي تفطر بس مش قادرة
هي مش عارفه وين مكانه لان مش عند هلها اتصلت
ب ياسمين وما جبتلهاش سيرة ان آيآن عندهم الله لا يسامحني اكيد جيعان توا وهو صايم ليش تأخر بس
فجأة خبر عاجل ع احدى قنوات ليبية وهما ياكلو
انفجار ف صحراء *** على حدود المصرية ***
والضحايا 4 شباب من دولة ليبيا ماذا يفعلون على الحدود المصرية وكأن قلبها توقف عن النبض مقدرتش تبلع لقمه فجأة رن تليفون عبد الله
من متصل ف ه الوقت جابله اسر تليفون وقال ايوا
انا اسف ع الخبر بس عظم الله اجرك ف ولدك ربي
يتقبله من الشهداء انا لله وانا اليه راجعون زهراء قلبها يدق بقوة وهي تشوفله بخوف عبد الله عيونه حمر ويرتعد ناض من مكانه صبت وراه زهراء وين ماشي
عبد الله : نشوفه ..
زهراء : كذبه كمل فطورك يكذبو هيخش توا ويبوس يدي ويطلب رضاي عرفته نا ولدي صغير ع الموت مزال طلع عبد الله عشان يتأكد من الخبر ..
زهراء : قعمزت ع صالون ويدها ع قلبها ..
الاء : ماما كنكم تعالي افطري
زهراء : هزت راسها بنفي كولو انتو كولو
بعد ساعة اتصلت ب عبد الله ..
طمني ي عبد الله وينك اختفيت معش رديت
آيآن اكيد مع اصحابه قوله درتله بشاميل اللي يحبها
ومش هنفطر الا لما يجي ياكل معاي
عبد الله وهو يبكي آيآن مات شهيد
زهراء لا مستحيل كان يحكي معاي ف صبح وقال انه زعلان ومش هيفطر معاي اليوم حط تليفون ع وذنه
نا نحس لما يتنفس حبيبي ولدي الغالي الله يرضى عليك تعال وانا مش زعلانه منك بس عيش عصبني كيف ماتبي وامشي لياسمين ودير اللي تبيه رد انا راضيه عليك بس ماتخليهم يقولو متت باهي زعلان مني نا نراضيك
...
ياسمين تغسل ف العوايز وتضحك من اياد وفرح
اياد : يصب ف اميه لكن فرح احسن من يدير اندومي
ياسمين : لا سلمها والله سوايه
فرح : خزي عليك ماندير ف حلويات
اياد : احلى حلويات والله ديما طلبيات من الكافيهات
خش فجر سمعتو باللي صار ..
ياسمين : لا لا شن في ..
فرح قدمت وشاحها وجت بتطلع
فجر آيآن من ضمن الشباب اللي تفجرو ف صحراء
ياسمين طاح من يدها تبسي وشهقت
فجر : عطاكم عمره
اياد : يضرب جرة ال اميه ب كراعه اطيح تكسر ويطلع من كوجينه ودموعه ينزلو ..
ياسمين معش تحملت حطت يدها اسفل بطنها وعيطت اااااااااه فرح مسكت يد ياسمين انا لله وانا اليه راجعون وياسمين مستمره ف عياط عياطها كأنها والعه فيها نار آيآن وليدي وطاحت ع ركبها تبكي وفجر طلع من جنبهم يبكي
صوت اللي ناضت منه رضيه منفجعه شن في
نرجس كانت تفلي ف بنتها جوري صوت ياسمين وطلعن يجاران شافن وضع ياسمين تعيط بأسم آيآن
على خشة هارون هي يمي وتي روحك نمشو لحوش زهراء
رضيه : شن في
هارون : آيآن عطاكم عمره
نرجس : خبطت ع فمها وجعها آيآن دموعها نزلو
انما سحر تسمع ف صوت البكاء وتقول تستاهلو
زيدكم منه ان شاء الله تلحقوه واحد واحد ..
غفران وحمادي كانو يتباكو وهي مشت توتي ف دبشها ماهو تبي تبات ف العزاء ..
..
مهاب : احلى تشيز كليته ف حياتي
منار : ابتسمت ديرتلك فيها خطين
ضحك مهاب من غير خطين نا مسحور في عيونك
ضحكت منار اللي توتي ف فناجيل قهوة لصبايا ..
ميار . رهف جوك مش عاجبني ..
رهف : لا مافيا شي ..
امنه : حي عليك من ماما عشان ماغسلتيش عوايز وخليتي بنات يغسلن قالت نهار احرش غير يروحو
رهف : طز
ميار : عجبتني فيك ضاربه دنيا ب عرض حائط
رهف : طعمه دنيا عدت بعد عدت اجديده امنه
نسرين : غريبه زهراء مجتش مع اني كلمتها
قمر : اكيد خايفه من رضيه
نسرين : مدخلش جايه لشقتي هي توا نرن عليها
..
زهراء اللي خشت المستشفى كانت جايه مع عبد الرحمن وقالت وين ولدي
عبد الله كان طايح ع الارض غارق ف دموعه شيرلها ع غرفة اللي فيها خشت زهراء تجري وشافت مغطيينه ب شرشف ابيض لكن معبي دم بدت تصرخ ليش مغطيين ولدي ب شرشف قذر !!؟
رفعاته وشافت ولدها ساكن ولا حركه حبيبي صبي شوف جبتلك الاكله اللي تحبها معاي عشان تفطر صبي حبيبي كان تحبني صح صبي عشان نفطرو مع بعضنا حتى نا جيعانه تبي تسيبني جيعانه ؟
خش دكتور وهو شايل ف يده علبه خاتم وعلبه اسواره ذهب مكتوب همي رضاك ي امي هذ لقيناه مع ولدكم انهارت زهراء عياط ومسكت ب ماليه آيآن
تهز فيه يعني مش هتسامحني لكن قبل ماتمشي الله يرضى عليك دنيا واخرة ي روح وقلب امك
...
طلعت من الكوجينه قعمزت ف صاله تقلب ف قنوات بملل لعند شافت قناة محليه دايره تغطية
للخبر ضيقت عيوونها طلعو اسماء شباب قدمت للتلفزيون وصلت فيه وعاودت قرت الخبر جحظو عيونها لالا مش هو طلقت ريموت وهي تعيط ترن
ع رقم خالتها زهراء ماردتش رنت ع الاء ماردتش
ترن ع آيآن خارج تغطية خالتييي ترن ورقم مقفل
دموعها نزلو لالااااا لا ارجوك ياربي لا لا آيآن تصرخ بهلع لعند ناضت توليب من نوم مفجوعه طلعت
شافت حاله بنتها كيف تنطر وتقول لاااا
توليب مصدومه قالت بصوت مبحوح ملاك
هي سمعت صوت امها مشتلها تجري تحسب روحها تحلم وامها بتوعيها عشان تمشي لمدرستها ماما
توليب : كنك شن في
ملاك : آيآن آيآن مات ي ماما مات
توليب : حضنتها بقوة كانت عارفه بمشاعر بنتها اتجاه آيآن وملاك تعيط بنموت ياماما بنموت
طاحو دموع توليب
...
ثاني يوم ع الظهر كانو حاطينه ف مربوعه ..
خشت زهراء وراها نوارة وابتسام ورواند وردة  ورضيه ونسرين ونرجس انما ياسمين وتوليب ماعندهن عزم ماطلعنش قدمت زهراء ..
شافت وجه ولدها طلع حطت يدها ع راسه
وثبته عنده السؤال يارب غمضت عيونها وهي تبكي ثبته بقوم لا اله الا الله تبكي بالعبره نتلاقو ف الجنه حبيبي ان شاء الله وباست راسه عماته وخالاته وجداته يتباكن معاها ...
..
هارون سئل عبد الرحمن وين عبد الله ..
عبد الرحمن : طاح علينا وتوا ف العنايه
هارون : اصبروا مالا يدفن ولده
عبد الرحمن : اكرام الميت دفنه ي هارون بعدين طلعنا تصريح خلاص
هارون : وشن طلع معاه عبد الله
عبد الرحمن بأسف: جاه السكر
غمض هارون عيونه بأسف
صلو عليه صلاة جنازة وكل من عرفه يتباكو
مهاب بلال خواله عمامه اصحابه يتباكو كلهم
كل الاقارب
وقت دفن ..
ي جماعة وانا والله مزلت مش مستعد الموت !
والله مااستعديت للموت انا مانصليش انا مانصليش ماتدفنونيش انا كنت عاق ف والدايا
والله مش مستعد محد يدفني انا حي والله نشوفكم ونحس فيكم ماتدفنونيش ماتنزلونيش
نبي نتوب طلعوني والله نتوب
"إنك ميت وإنهم ميتون ثم انكم يوم القيامة عند ربكم تختصمون فمن اظلم ممن كذب على الله وكذب بالصدق اذ جاءه اليس في جهنم مثوى للكافرين والذي جاء بالصدق وصدق به اولئك هم المتقون
فتحت عيوني رؤية ...
شفت امي حذاي تقرا ف القرآن وتمسح ع راسي
دموعها ينزلو وشافتلي حمدلله وليدي حمدلله
قبل ترزيت فيك مش قادر ننطق حرف كيف عشت نا وكيف وصلت هنا الف سؤال بعدين خطرو عليا
آيآن عيسى رائد دموعي نزلو تكلمت ب شوي آيآن
الله يرحمه حبيبي الله يرحمه ف الجنه بديت نبكي بصوت امي امي اضبطتني بقوة وتمسح ع راسي
...
زهراء : طول عمري نقوله ماتقوليش امي عيطلي بأسمي تكبر فيا حرمته مني حرمته من حني الله لا يسامحني اهو عدا بكل ومعش نسمع صوته كل من يسمعها يبكي ع حالها ناضت من جنبهم
خشت لداره حضنت مخدته وتذرف ف لدموع
سامحيني حبيبي اخر حاجه قلتها لك سم انا اللي قاعده ف سم توا آسفه اهو ذقته نا السم يماما
ياسمين : توا عرفتي قيمته
زهراء : تبكي ومتضبطه المخده بقوة
ياسمين : آيآن رقد ف مربوعتنا اكثر من داره
كان انتي زعلانه عليه توا نا زعلانه عليه العمر كله
مش انتي امه نا امه نا اللي ربيته نا اللي لما يزعل يلجألي
زهراء بصوت باكي : خلاص حرام عليكي
ياسمين : لالا مش هنسكت نبي نقول اللي ف قلبي كله هنتيه قدامي وقدام غيري تلزو فيه وتكسرو
في خاطره تحرضي في بوه عليه انتي وبوه مافيش حاجه سو مادرتوها فيه شن استفاده من عياطك بعد مات وانتو حرمتوه من الحب وهو عايش
زهراء تبكي بالعبره والله نحبه انحبه وليدي روحي هذا انحبه ونبي نشوفه احسن حد ف دنيا نربو فيه
ياسمين : قوليلي وينه باهي ياريتني نشوفه يضحك ويدير اللي يبيه بس عايش وقاعد
انا عمري مانسامحك لانك على طول تقوليلي ماتدخليش وكنت نسكت وماندخلش لعند مات من وراكم كنت عارفه ان مات هارب منكم وكلامي صح لمًا سمعت الاء تحكي ف القصة على فكرة هو يحبك اكثر مني لكن نا يحبني عشان نسمعله ونحن عليه ..
نرجس : خلاص ياسمين سادها اللي فيها كافيها
نزلت ياسمين وهي تمسح ف دموعها ..
زهراء : شافت لنرجس سامحيني انا غلطت فيك واجد وخذيت منك حاجات كانن لك منحسبش ربي بيعاقبني هك اسفه ي نرجس سامحيني سامحيني
نرجس : حضنتها وبدت تبكي معاها مسامحتك
زهراء : انهارت بكاء ايآااااااان
...
غفران : حاسه بصداع
رهف : اكيد من لبكاء حتى نا راسي واجعني
ميار : يابنات وجه ملاك مش عاجبني
رهف : مسكينه مصيبتها كبيرة
كانت رضيه بعد كملت صلاتها ف دار لضيوف تدعي لحفيدها بالرحمه والمغفره وتبكي طق الباب برمت وشافت لقمر انتي شن جابك هنا متشمته صح متشمته
قمر : قدمت واضبطتها بقوة
رضيه : ساكته وتهز
قمر : ابكي ابكي ي خيتي خلاص تقاطعنا 28 سنة حرام عليكي خلاص دنيا مفرقه اليوم فيها بكرة الله اعلم سامحيني سامحيني سامحيني
ورضيه قعدت تبكي آيآن ي قمر صغير ي قمر صغير صغير وبدت تبكي ونسرين عند الباب تبكي معاهن
...
وردة : الو عبد الرحمن وينك
عبد الرحمن : في خيمة العزاء كنك
وردة : بنموت مصاريني بيتقطعو
عبد الرحمن : وتي روحك بسرعه واطلعي مع حد من صغار
وردة كانت لابسه عبايه وشاح اصلا طلعت مع حمادي ولد خوها ركبت سيارة عبد الرحمن وهي تبكي
عبد الرحمن : متخافيش كله خير اكيد من صيام
قتلك ماتصيميش ماتسمعيش ف كلام انتي
...
حمادي : نبي الحمام
اياد : ع يدك اليسار تلقاه
مشا اياد وهو حاس راسه صداع مسك بقوة ف الحوض وبدا يرجع وترجيع يطلع معاه ظوافر ودم
انصدم من المنظر وهو مش واكل شي اساسا
...
غادة : سامحيني ي زهراء انا لازم نمشي وراي فطور وعيله زي ماتعرفي
امل : حتى نا اللي ماسكه الحوش زي ماتعرفي راجلي وحيد امه ماعندهم من بيهم
زهراء : عاذرتكن عاذرتكن
نسرين : ريتي اللي مافيهن خير قعدنا ف عزاء بوهن وامهن لعند ال 40 طلعن توا يجارن
توليب : نحنا في ايش وانتي ف ايش
...
مع الاسف فقدنا جنين
عبد الرحمن غمض عيونه بألم ..
الدكتور : حاجه اخرى لازم تعرف ان المدام مش هتقدر تحمل مره ثانيه
عبد الرحمن دموعه نزلو والدكتور طبطب ع كتفه ربي يصبرك ..
ويسمع عياط وردة اللي قلب المستشفى
وردة : فنصت شن تقولو انتو لالااااااا ولدييي وطلعت منها اه بقهر ياربييي لعند بدت ترجع
ف ظوافر ودم الممرضه انصدمت بالمنظر  ..
وردة تبكي شن هذ ياربي ..
يتبع  ..