عزام : مرت 5-ايام ورجعوا العرسان جانوا فرحانين كلش محمود ابتسامتة متفارك وجهة و عيونة تلمع بس يشوفهة لشدن و طاير بيهة . محمود عبارة عن بشر صعب وصفة صح مرات يصير عصبي بس عبالك ملاك و يمشي على الكاع . اذا دخل للبيت اكو فد ريحة طيبة اتصير بالبيت غريبة هو عبارة عن انسان كلشي بي غريب بحيث من نحجي ويا شنو هاي الريحة الي بيك يضحك و يكول و الله عطري مثل عطركم .
من اتخرج و اتعين يطلع نسبة من راتبة و يطيها لدار ايتام و اذا عرف اكو ناس محتاجة لازم يندل بيتهم و يطيهم فلوس او يشتريلهم مواد غذائية شوف همة شنو الي محتاجي
بحيث اني اتعلمت من عندة هاي الفقرة لازم اساعد اي محتاج .
محمود صح اكبر مني بسنتين بس هو تؤام روحي بكلشي نتشابه الفرق الي بيناتنة محمود ما عندة قابلية يسمع واحد يشكيله همة و ينصحهة واذا ينصح كلمات بسيطة تطلع منة بس هاي الاحرف الي تطلع منة ترفع معنويات الواحد بأبتسامتة الملائكية عكسي اظل احجي،وية الشخص المقهور حتى لو ساعة بحيث محمود يكولي المفروض اتصير قاضي مثل ابواسماعيل و يضحك.
شدن : مرت يومين قبل السفرة للشمال محمود مقابلني و كاعد و نطلع برة الغرفة على كد الاكل و نرجع حنيتة اجنن احس روحي اعرفة صارلي سنين قبل السفرة بيوم دك تلفوني
محمود: شدن وينج تلفونج يدك ؟
شدن : هذا استاذ فراس شعندة ؟ معقولة ديباركلي
بوكتهة حسيت محمود اتحول من الانسان الملائكي لوحش من العصبية
محمود : و شعندة هذا يخابر عليج و ليش،مطيتة تلفونج ؟
شدن : شبيك محمود هذا مديري رجال كبير بكد بابا و احتمال رايدين شي مني
محمود : المفروض اريج اتخابرج مو هو
سحب التلفون مني و طلع السيمكارت
شدن :،شدسوي؟
محمود : تخلص اجازتج و ارجعة الج و اهلج من تلفوني تتصلين بيهم انتي ملكي هاي الايام ما اريد احد يشاركني بيج احبج شدن و اغار عليج مو بيدي
شدن ابتسمت : اوكي حبيبي براحتك . شتطلب مني اسوي الك يا تاج راسي
محمود : يسلملي راسج
باسني من راسي و كصتي و رجع وجهة الملائكي هو يتغزل و اني اضحكلة
عزام :دانزل من الدرج بيوم سفرتهم سمعت محمود يصيحني
محمود : عزو حبيبي تعال
عزام : ها حمادة
محمود:حبيبي اكولك هاي وزعونة مكافأة بالوزارة و احنة الولد طلعنة نسبة منهة و صارت خوش مبلغ شتكول نطيهة لبيت ابو ليلى ما دام عندة بنات صغار و محتاجين
عزام : اي و الله خطية و اني هم اليوم استلم راتب احطهة بظرف و أوديهة الهم
خطية بنتة الصغيرة صحتهة ابد مو زينة اتفقت ويا اليوم ناخذهة للمستشفى و نسويلهة فحوصات
محمود : اي خطية لتقصر وياهم اوصيك بيهم عزو ترة حالهم يبجي الصخر
عزام : لتوصي حريص اخوية يا ابو قلب الطيب
محمود : ادعينة
عزام : الله يحفظك يا خوية
شدن : سافرنة للشمال جانت احلى ايام قضيتهة وية محمود منظر الجبال و الشلالات يجنن هو يروح يذب روحة بشلال و اني اخذلة صور و اذا عيني راحت بعيد عنة يذب مي على وجهي
محمود : وين الحلو صافن . اريد عيون هذا الحلو بس عليه
شدن : شوف هذا الطفل ابو حاطة جوة الشلال ميخاف عليه
محمود: خطية ديطلعلة سنون و ديبردة
شدن : احنة هم من يصير عدنة اطفال نجيبهم هنا
محمود : تحبين الاطفال .
شدن : اي كلش.
محمود : شوكت اتصيرين حامل ؟
شدن ضحكت بخجل و نزلت راسي : صارلنة اسبوع من مزوجين مراح يبين شي هسة
حضني كدام العالم و باسني من كصتي و شاورني اريد منج 5 اطفال
شدن : ليش الا خمسة ؟
محمود : احب هذا الرقم
شدن : الله شكاتب يصير
محمود : و نعم بالله
شدن : عيب محمود من العالم عوفني احنة مو بالغرفة
محمود : هههههه شكد معقدة لج اني رجلج قابل شيمسوي
مرأة كبيرة بسن كاعدة : انتوا عرسان جدد؟-
محمود : اي خالة
الحجية : ربي يحميكم و يحفظكم من كل شر
محمود : الله يسلمج و يحفظج خالة
