#تراتيل القدر

ضغط غير مبرر

#تراتيل القدر
همس ليل
البارت الرابع
_نور ...شنو موضوعكم...اشو احس اكو توتر بينكم
_بين منو
_فريقكم...انتي وحيدر وباسم
_ماكو شي ...شغل بينا ...
_باعي ...اعرف شي مايخصني...بس اني حاسبتج صديقة لي مقربة...وهاي الشركة هواي نفاق بيها وحجي زايد...مو من سهولة تلكين شخص تثقين به
_مها اني هم حاسبتج صديقتي...بس شنو مناسبة هالحجي
_اذا هيج ليش ماحجيتيلي على باسم
_ماردت احرج الولد....بعدين مين تعرفين..
_انتي صدك تحجين ...كلنا نشوفه شلون يباوعلج ويتابعج...وتوقعنا هالشي...فمن خطب تفاجأ الكل
_معقولة اني مامنتبهة له ...
_ماعرف والله...
_هسة فهمت حيدر شيقصد بحجيه....بس اني شعلية اذا هو اباله شي
_حيدر شعليه بالموضوع...
_بسمر بالحجي كم مرة
_اعتقد قصده النصح ...بس هو اسلوبه جاف...وانتي نوعا ما متعالي
_اني...مها انتي تشوفيني هيج
_نور ...الي مايعرفج يكول شايفة نفسها...وحقج حلوة ومهندسة وعائلة...بس واقع الحال اطيب من كلبج ماكو ...
_يعني لو اتمضحك وية الرايح والجاي..واشاقة شقة مابي معنى مثلهن...لو اصير شايفة نفسي.
_معليج بيهم...والدليل كم واحد اجى خطبج من الدائرة..وهنة قبلج وظالات ...هاي الغيرة
_الله يرزقهن...اكو هواي بنات حبابات ومؤدبات
_فعلا
_بس ردت اسال ...شمدريج باسم تقدم لي
_حيدر كال
_ليش...وشنو المناسبة
_مو كتلج باسم جان واضح عليه وتعرفين دائرة بيها الحجي هواي...وانتو فريق واحد...ودائما يشرحلج ويعلمج...فعبالهم اكو شي
_مايخافون الله يتهمون العالم هيج...وشنو حيدر كال تقدم ورفضته
_اي...من سألوا شعجب اذا هو رايدج خطب
سكتت واني متفاجأة من الي اسمعه....هم الحجي الي صار علية...واني اتعامل بطيبة وية الكل...وهم من تصرف حيدر
صح محمد نصحني من نفاق الدوائر...بس معقولة يحجون ويأولون هيج...
واني وين...اشو ماكو يوم انجمعت وية البنات وسمعتهم حجوا على احد...
ولو مكضيتها بين الشغل وبين بنات قسمنا...
ماعندي اختلاط وية الكل...لذلك مايوصلني الحجي..
بقت الحجاية ادور ابالي ...
من حجيت لزينب...كالت حيدر راد يوضح موقفج..
حتى محد يكول عافها وخطب غيرها...
ثاني يوم من داومت ...ردت احجي وية حيدر
كلت خلي افهم ...بيومها ماطلعت ابد من الغرفة...
واجت الفرصة من فرغت الغرفة ...بس اني وحيدر
ميزه جان مسافة عن ميزي ...واحد ماقبيل الثاني
بس هو ابعد شوي...
جان يكتب على الاوراق...كل شوي ارفع راسي له
اريد احجي...وفد شي يمنعني...
اخر شي شجعت ...
_ردت اشكرك
هو تفاجا...رفع راسه يباوع علي ...وبعدين التفت يمنى ويسرة...كانما يشوف الحجي وياه لو اكو احد غيره...
حركته ضحكتني...
شفته تبسم...
_راح اسجلها بالتاريخ
_هية شنو
_تبسمت
_ليش شايفتني كئيب...
_صراحة ماشايفتك تضحك...
سكت...على شنو تشكريني
_على شغلة باسم ...صراحة تفاجأت من الحجي
_ها ...مو كتلج انتي ماتدرين شيصير وراج...بعض التصرفات بطيبة ...تجيب الحجي لصاحبها خاصة البنات انتو
_وليش ماكو نية سليمة للاخرين
_هاي الدوائر...تجمع اشكال البشر...وكل واحد واخلاقه
_اني اصلا تفاجات اباسم من اتقدم...ولا جنت اتخيل هالشي...وتفاجأت بحجيهم اكثر
_صوجج انتي انطيتي امل...
حجايته كلش نرفزتني...اني انطيته امل...شوكت وكدامك احنة نشتغل
_لا تشرحين ولا تفهميني...خلي اكولج شي...باسم والده متوفي من همة صغار...وامهم اشتغلت خياطة حتى تربيهم وتكبرهم ...وكلهم ماشاء الله بين المهندس والصيدلي...فتقدير لامه ولان تعبت خطب بنت خاله...
من داومنة ...فسخ الخطوبة بعد فترة ...وانتي افهمي
_شفهم...تقصد فسخها بسببي...
ماكملنة حجي ودخلن البنات...بس ظليت الوب
شسويت وانطيته امل...
بعد هذا الموقف ...قررت علاقتي بالولد تكون محدودة اكثر من قبل....وبس الشغل.
وصدك صار تعاملي جاف نوعا ما...بس وية البنات اضحك واشاقة
يوم صار انفجار...ومحمد خابرني مايكدر يجي...
كال بابا خابر ابو امجد يرجعج...
اجاني ابو امجد للغرفة ...كال يلا نور
نزلت ومن دامشي بالبارك مال السيارات...وصلت لسيارته
دافتح الباب التفت شفت حيدر ورانا يمشي...
جان شكله عصبي وهو يشوفني اصعد وية عمي...
بعدها ولايام اسلوب حيدر جان حدي وياي...
وهواي يعلق على الاغلاط بالشغل...ويتنرفز من اقل سؤال
ويضغط بالشغل هواي...
بحيث حيل تعبت اعصابي...
بالبيت حياتي عادية لان الكل بالشغل الصبح...ومن نرجع بين التنظيف وبين حجي وية زينب وماما والحجي
لمتنا على العشى تجمعنا كلنا...
ومشاكل بيداء زادت وية امي الصبح...
يوم كان عدنا شغل هواي...وجنت كل ما اسلم لحيدر شي...
لازم يطلع بيه خطا...
لنهاية الدوام ...بعد ماتحملت ...ضغط الايام السابقة...
كله انجمع وصلت المرحلة النهائية من التحمل
_هاي الحسابات بيها غلط ...تاكدي منها اولا
جان يحجي وهو لازم الاوراق موجهة باتجاهي وعينه على الميز...مايباوع علية...
طكت روحي وحسيته مجاوزني حيل...
وضغط الاسبوع كله طلع بلحظتها...
_ترة مو مرض معدي اني...
رفع عينه لي وهو متفاجأ...
_اذا مايعجبك شغلي...وتشوفني مو من مستواك تتعامل وياي...تكدر تكول وينسبولك احد ثاني...
عموما ...اني مابقى بفريقك...راح اقدم تنسيب لغير فريق
جان بس يباوع علي واني منطلقة بالحجي...وباسم يباوع علينا...
_ست نور ...استاذ حيدر مايقصدك...جاوبني باسم
_لا يقصد ونص...
عفتهم وطلعت ...لان حسيت الدمعة وصلت لطرف عيني
بالحمامات..اباوع لنفسي بالمراية ...الدموع تصب من عيني..
شبيها ...ليش راسا ادموعي تنزل...شكد جبانة انتي
جنت احاجي نفسي بالمرية...
سمعت صوت قرب...غسلت وجهي راسا...
ونشغلت اعدل حجابي...لحد ماطلعن البنات ...
رجعت الدموع الي ماتقبل تسكت...
_شبيج نور...شصار...اجى صوت مها من وراي
_مابية شي...بس طكت روحي..احسه متعمدني
_ما اعتقد...بس هو اسلوبه جاف
_بس وياي اسلوبه هيج...وبعدين صار اكثر من اسبوع شاشتغل...
لازم يطلع بيه غلط...شنو ناسي اني جديدة
_ميخالف حبي...انتي حساسة زيادة ...تعاي شوفي
ويانة شديسون...بس يريدون غلطة علينة
_انتي شمدريج...
_ها...هو حيدر اجى كال شوفيها
_شبيه هذا خبل
_ههههه...لا ولج والله انتي فاهمته غلط...
غسلت وطلعت ...بس عيوني بقت حمرة...
من دخلت للغرفة ...باسم طلع ...ومها هم...
حسيتهم تعمدوا ...حتى يفرغون المكان لنا
اني الهيت نفسي ادور بالجنطة...ماجنت اريد شي معين
...بس من الارتباك...
سمعت صوت شحطت الكرسي...سحبه يم ميزي
وكعد من الجانب...بس كعد ساكت..
هالشي زاد من ارتباكي...
_مالكيتي المضيعته
_شنو...رفعت راسي له
_شمضيعة بالجنطة...ليش هيج دمعتج سهلة...
سكتت...ورجعت نزلت راسي لان حسيت ..الدموع رجعن اجمعن بعيني
_ماقصدت اضغط عليج...بس هو شغل المفروض تتحملين..انتي مهندسة
_اريد افهم شي...انتي ليش وياي بهالشكل...
_يعني شلون وياج هيج
_ما اعرف ...بس احسك ماخذ موقف مني...غلطانة وياك بشي...بادر مني شي
سكت ...انتي لو فطيرة زيادة عن اللزوم...لو
_لو شنو...فهمني...ترة تعبت والله من تصرفك
نزلن دموعي يسابقن...هو سحب كلينس ونطاني
_لا تبجين كافي....شنو موضوع ابو امجد
_شدخل ابو امجد بالموضوع...
_دخله ...مكابلته طول اليوم...وطلعتج وياه...وهو معروف شنو اخلاقه هنا
من كال هيج تخبلت وكفت ...ترة طوخته انتة ...مااسمحلك
_مو شغلة تسمحيلي او لا...انتي ردتي تسمعين...اثناء مايحجي وكف ..ودفع الكرسي الي وراه...
طلع وعافني واكفة حايرة...هو شعليه ماعرف
من رجعت ...ظليت متأكبة...حتة وكت العشى
_بابا شبيج اليوم ...شو ساكتة
_مابية شي حجي لا تشغل بالك
_طبعا ما متعودين.تضمين لسانج
_محمد عوف اختك ...هم راح تتناكرون...جاوبته ماما
_سهلة ...خلي يجون جهالك...والعب بيهم جولة
_شحدج...ماكافي الي سويتي بينا...
من دخلت لغرفتي لحكتني زينب...
_صدك اليوم شبيج...حتى من اجيتي عيونج حمر جانن..مال وحدة باجية
_بس لا انتبهوا...لج خبلني ...حجيت لها الي صار
_ليش مافهمتيه شيصير منج ابو امجد
_وليش اشرحله وابرر...اذا هو تفكيره مو نظيف
_لا مو شغلة مو نظيف...هاي ذبة المحافظات يحاسبون البنية على كل حركة ...وبعديم عمج سمعته رنانة بالدائرة...
وبعدين تعاي اذا ماكو داعي تشرحين وتتبررين...شكو ضايجة وشايلة هم ...فهميني شنو الموضوع
_شو كومي روحي لرجلج...مالي خلك لج
دفعتها خارج الغرفة وهية تضحك ...
ثاني يوم تاخرنا .....ومن وكفنا على تقاطع اجت سيارة وضربت سيارة محمد...
اكلنا هبطة معدلة ...وخفت اكثر لان محمد نزل يتعارك وياه...
بعدين من شافني اصفريت اخذلي تاكسي ...
وصلت للدائرة واني ارجف...
دخلت الغرفة...وراسا كعدت ورة ميزي...بدون حتى ما اسلم...
جانت الخوفة بعده بية ...وصوتي مايطلع
_شبيج نور...تلكتني مها...وجهه اصفر
باوعت عليها...سوينا حادثة هسة من جينا...
_يا حمد لله على السلامة...جابتلي كلاص مي..
_بيج شي...ترحين للمستشفى ...رفعت راسي شفت حيدر ديحجي وياي...
هزيت راسي بلا...بس هبطت لان شفت اخوي يريد يتعارك
_وين هو هسة ...نروحله
_لا ...خابر على اخوية اجاه...
ماجنت منتبهة للي حولي ...شوي شفت ايد نمدت باكيت عصير …باوعت شفت حيدر جايبه
_اشربي...لا ينخفض ضغطج...
مافشلته اخذته منه...شكرا...
هو رجع كعد بمكانه...بس اشوفه كل شوي يلتفت علية
خبلني هالولد ...
جنت احاول اتصل بمحمد اريد اشوف شسوة بالي ظل يمه..
_نور تحبين ابقى يمج...مها سألتني
_لا حبي ...شوفي شغلج مابية شي
فرغت الغرفة...حتى حيدر طلع...
شوية رجع حيدر وخله كم نستلة كدامي...باوعت عليها...
ورجعت باوعت عليه....
_اكلي شي حلاة...من وصلتي لسة ترجفين
انتبهت على ايدي فعلا يرجفن...بس ماجنت مركزة وياه..
بالي كله يم اخوية..
_ليش تعبت نفسك اشكرك....ما اشتهي
_حاولي لو نص وحدة...
وية رجعته لمكانه ...دخل ابو امجد
_يول عمي....شنو صاير..
_عمو ماكو شي لا تخاف
_كالو مدعومة سيارتكم...سلامات
_اي من ورة انضربت
_محمد شلون خامة تاذى
_لا مابي شي والله
_وين الحين نطلع له...
_ماعرف اخابر عليه مايجاوب...بس هو خابر احمد وعمر يجوه...
_اخابرو الحين....وبالليل اجيب ام امجد ونجي لعدكم...هم نشوف الحجي والدتج...
_كل الهلا بيكم...هواي سلم لي على خالة ام امجد
طلع...وشفت حيدر يباوعلي بنظرة غريبة...
خلصت اليوم بقلق...ومن رجعت بالخط بيومها...تلكتني زينب
_لا تحجين كدام عمي انضربت السيارة...محمد كال وصوا نور..
_ليش مايكوله..
_ماعرف.
المهم خلص اليوم طبيعي...جانت زينب تسوي عشى واني اثرم زلاطة بالمطبخ
_هاجبونة....شلونج..محمد اجى وكف يمي وهو يخربط بشعري
_اوي دوخر ....عاد انتة النجر
_لج هاي عليمن... منو الي كام يرجف ويبجي اليوم
_مابجبت...وبعدين شي طبيعي واحد يرجف لان جفل
_لاعفية محمد لا تتعارك...حبابة تعال فدوة لك... .جان يقلد صوتي بمسكنة...
_تصنف علي...فوك ماخاف يلزموك ويكتلوك
_عفى لمن يكتلون كل هالطول وانكتل...قابل اني صرصور مثلج مانشاف ....وانتي اعرف بالباقي
_اني صرصور بسيطة....بابا ...بابا تعرف محمد شسوة
ركض وراي محمد يحاول يسد حلكي...لج اسكتي ...عود وصيتج
_مو اني صرصور
جانت زينب واكفة تضحك علينا...صوجك انتة تحارشت بيها...
_ما اسكت الا تطلع اجيب علاكة حلويات ....وتاخذني نهاية الاسبوع تشتريلي ملابس
_ولي يا ملابس...هسة مصلح السيارة بكومة فلوس...
_خلص لعد...بابا...اني متضررة وعقد ومايكفي اشتري
_لج بابا اسكتي...على اساس معتمدة على راتبج...وامدادات الحجي وين راحت
_وانت شعليك...هسة اخر حجاية
_صوجي وصيتج...نسيت انتي البلبل الفتان...خلص طالع...والملابس على الراتب خليها..
_هيج اقبل من البداية ولا تشعلي كلبي
كفخني على راسي وفات
_شلون تكدرين هيج تحصلين منهم...
_ههههه..قصدج استغلهم...همة كلهم يخافون من الحجي...غير ماشايفة من يصيح على واحد يخرسه بمكانه
ثاني يوم بالدوام من وصلت ...سلمت وكالعادي بدينا شغل..
بس من شفت حيدر اذكرت موقفه البارحة...
واليوم جان اكو سؤال بعينه...بس مافرغت ابد للغرفة...واني هم تعمدت اطلع من الغرفة ..
لنهاية الدوام...يلا رجعت
جنت اشوف اكو نظرة غريبة بعينه ...واعرف زين ...
عرف ابو امجد عمي...لان سال مها ...هية كالت
بس ما نطيته مجال ...يسأل او يحجي وياي...
لنهاية الاسبوع....اسلم واستلم شغلي منه...
واصعد يم عمي ...يمه ميز فارغ اكعد اشتغل لنهاية الدوام..
مرات سمر وكيلة رئيس القسم تسال عليه...
من تشوفني اشتغل تسكت...عبالها مثل باقي البنات...يرحن لغير اقسام للسوالف....
بداية الاسبوع الثاني...من داينطيني الشغل ...
_ممكن تبقين اليوم اريد احجي وياج...
صفنت بوجه...اوكي...
بس جنت مترددة اخاف يكول حجاية يغثني بيها...
واني بعدني متحاملة عليه من حجابته السابقة...
بيومها مافرغت الغرفة ...مجموعة اطب ومجموعة تطلع...
حسيته تعصب...واني هم لميت اوراقي...وطلعت..
تعمدت ...خلي شوي يوزن حجيه ...ومايجرح غيره
بس ظليت الوب اريد اعرف شيريد مني...
هسة لو ماصاعدة بلكت يصير مجال يحجي..
ما صبرت شوي ورجعت نزلت ...لكيت باسم يمه..
ضجت ...بس مو مال ارجع...بس باسم مابقى وطلع
اني هنا تربكت...من نبقى سوة ماعرف ليش ارتبك..
بس اي شخص ثاني عادي...ولا يهمني...
_ليش صعدي مو كلتلج اريد احجي وياج...
وللحكاية بقية ....