#تراتيل القدر
همس ليل
البارت السابع
اشتاقيت له....لعصبيته...لحدته...
لصوته...حتة اشتاقيت لامور بسيطة مثل
من يدك بالقلم على الاوراق من انطيه الشغل...
جنت اظل اباوع على يده...بدون تركيز...
اشتاقيت لركة الكلمة من يحجي....
جنت صافنة بهاي الافكار واني كاعدة بغرفتي الجديدة...
انتبهت لنفسي...حاولت اصلح مسار افكاري ....
وابطل ماافكر بيه...
بس شكد ماحاولت ...جانت افكاري ترجع له...
الايام صارت مالها طعم بالدوام....
حتى بالبيت ...مو مثل قبل اشاقة واسوي مقالب...
اهلي انتبهوا...يسألون اكول لهم تعبانة من الشغل
اليوم...جنت صافنة...عيني على الميز...بس
بالي بعيد...ذكرت حجاية مها من كالت فد يوم توكعين
وكعة قوية...اثاري صعبة تحبين شخص...
وتحسيه مو لج....صعب هالاحساس ومر
رفعت عيني شفته واكف بالباب ....
شلون روحي ردت بشوفته...
دخل سلم واخذ شغلة من ابو امجد ....وطلع
حتى مالتفت علية...ولا وجه سلام خاص..
مثل واحد خنكني....دمعت عيني..
دنكت ماردت احد يشوفني...
ليش هيج يصير ...معقولة هاي حوبة كل الي صديتهم..
شدحجي تخبلت ...واذا شخص ما احبه عادي ارفضه
حوبتيش...هذا وصلني اهذي وية نفسي...
هو شنو شايف نفسه....لازم ادوس على نفسي...
ثاني يوم داومت ...تفاجأت ابو امجد يكولي رجعتي لقسمج
_عمو شنو رجعت...شلون
_والله عمو ماعرف ...اليوم تبلغت ...نزلت للمدير...تعذر
كال بس كم يوم تخلصين الذرعات وية فريقكم
_يعني ماكو مهندسين لو مهندسات ينسبوهم
_هواي اخذوا اجايز بسبب الوضع هسة
ماكدرت اظل الح خاف يشك اكو شي او يسأل احد مضوجني...
لميت اوراقي واخذت جنطتي ...بس بقى ابالي اسال
من طلب من المدير...
_عمو منو دخل للمدير وطلب هالشي...
_رئيسة قسمج....تكول الوكيلة طلبتها لان رئيس فريقج
كايل اكو نقص بشغلج...
من كال هيج...وعرفت حيدر ورة هالطلب...فارت اعصابي
شيريد مني...خبلني...يمه ...يتعصب علية …ومايطيق شوفتي
نزلت واني اغلي...طبيت لكيته يشتغل وحده بالغرفة...
سلمت...وكعدت احاول اسيطر على اعصابي
بعدين ماصبرت...
_ممكن اعرف شنو قصدك من الي سويته
رفع راسه باوعلي...وبشكل بريء كانه مامسوي شي
_مافهمت ...على شنو
جنت اباوعلها...شلون متوترة ..وجهها احمر..
كلش يعجبني من يحمر وجهها...عيونها تلمع من الغضب
_ليش لغيت نقلتي
_اني....رئيس القسم تريد نكمل الذرعات...ومانسبت
احد جديد...وانتي عفتي شغلج على النص
_ماعفت شي ...وكتلك بوقتهة اذا تحب اكمله كولي
_ماصار شي كمليه هسة...
جانت تحجي واحسها تضغط على اعصابها...
بداخلي جنت مستمتع بمداهرتها....
_جان اكو هواي مهندسات تكدر تنسبون لك ...
تساعدكم بالشغل
_فعلا ...ليش ماكلتي لعمج هيج...ويخلي المدير ينسب ويانة وحده...
من كال هيج ضرب اخر جزء من اعصابي جنت مسيطرة عليه
كمت بدون احساس من مكاني وصلت ليمه...
خليت ايدي على الميز ودنكت عليه ...
_شنو قصدك...شدخل عمي بالموضوع...
تفاجأت من اجت باتجاهي...اباوع لخطواتها العصبية...
وعقلي يحاول يستوعب شنو خطوتها التالية...
شراح تسوي...
من دنكت باتجاهي...مافهمت شنو حجت...
بالي جان يم عطرها الي ملة انفاسي...
يم عيونها الي تبرقع مثل عيون البزون..
حسيت كلبي نسى دكة من دكاته...
ورجع يسابق الخيل بدكاته...
بلعت ريكي حتى اكدر اجاوب...رغم ماعرفت شنو سؤالها...
بس ردت افهمها خطوتها جانت مو صحيحة..
كمت فجأة من مكاني...جان ممكن انضرب بوجها بكومتي
لان هية واكفة عبر الميز ...
بس تحاشيت هالشي...هية فزت ورجعت راسا ليورة
تبسمت من حركتها....
_بعض التصرفات لازم تكونين حذرة بيها...
لان ماتعرفين ردت المقابل عليه...
ماجاوبت بس حسيتها حيل ارتبكت ...
رجعت لمكانها وكعدت ...
حسيتها مثل طفلة ...سوت خطأ وتعاقبت..
شكلها هيج جان يوحي...عجبني حيل
بس ضجت من تصرفها السابق...
**********************
شجاني هيج تصرفت ...شنو تخبلت ...هذا الرجال
فقدني سيطرتي...وخلاني اطلع من طوري...
حتى حجايته ماجانت تستجوب هيج تصرف….
بس جنت عصبية ومقهورة منه...
حسيته ديكولي انتي بزود عمج تمشين....
هاي جانت الافكار ادور ابالي...وماتقبل تفكني
من رجعت من الدوام ولغاية لسة...
عيني ماتقبل تاخذ نوم...الوم بنفسي شلون سويت هيج
خليته ينطيني درس ما انساه ...لو غيره جان ممكن بتصرف غير تصرف...
رحت للدوام وعيوني حمر من السهر...بسرعة يبين علية
******
اشتعل عمي ...ما اكدر انسى شكلها من دنكت باتجاهي...
كل ماغمض عيني اشوف صورة وجهها وهية قريبة مني...
كل شوي اسحب نفس اريد نفس عطرها ...
رغم تستعمل عطر هادئ مو قوي...بس من قربت
جان واضح...
تكلبت طول الليل ...اريد بس تغمض عيني...
هية لنهاية الدوام بيومها ...خنست...وابد ما كامت من مكانها...
نقهرت عليها...حسيتها نحرجت حيل...
داومنا ثاني يوم...اجت عيونها تعبانة...
وجانت هادية حيل...شكد حاولوا البنات وياها...
جانت اجاباتها مختصرة ....
طلعنا بشغلة ...رجعنا باسم من الباب طلع للكوت ...واني دخلت للدائرة...رغم جان نهاية دوام ....بس باجر ماداوم
عدنا خطوبة ابن عمي ولازم نحضرها ..ومالحك اجي لبغداد ...وارجع
فردت اشوفها لان يصادف وراها جمعة...
دخلت للغرفة جانت فارغة ...بس هية بيها
شابكة ايديها على الميز...ومخلية راسها عليهن...
ماحست من دخلت ...تمشيت لميزي...واني اباوع عليها
مغمضة عيونها...ومن نفسها المنتظم عرفت نايمة..
كعدت بمكاني...اتأمل بوجهها ...بحاجبها ورمشها وخدودها...نزلت لشفايفها ....صافن وراح بالي لبعيد
...كون تصيرين حلالي...واضمج بنص كلبي..
صوت بالممر...وعاني...استغفرت ربي...
سحبت المجر ودفعته حيل...هية فزت راسا
_شلون تنامين هيج دخل احد هسة...
تعصبت واني اتخيل غيري ممكن يدخل...ويشوفها...
هية جانت صافنة بوجهي...مثل واحد فاز من حلم
نور....جنت كلش تعبانة...ونعست حيل ...بقينا اني ومها..
حيدر وباسم طلعوا شغل...وتوقعنا مايرجعون...
وباقي البنات مجازات
_مها حيل نعست...لج اريد افتح عيني ماداكدر
_نامي...شوية واكعدج بس اكسري نومتج
_لا شلون عيب...اجى احد..وبعدين عندي شغل
_ادري راح تجريها نص ساعة…هية كلها ربع ساعة
اكسري بيها نعاسج...
راح اسد الباب...واكعدج....
صدك خليت راسي ...لان حيل كام يوجعني...بعد ماحسيت
فجاة فزيت على صوت طبة...عبالي انفجار...شفت حيدر كدامي
بس جنت مامستوعبة ...عيوني مغوشة...وفازة من الطبة
بس صحتني حجايته
_شو ماعندج تقدير للامور....لو داخل شخص غريب...احنة بدائرة
_اوكف ....شبيك اخذتني حاصل فاصل...هو شنو ماعندج تقدير للامور
_هاي بس بيج لسان طويل.... بس انتباه لتصرفاتج ماكو...
عافني وطلع....خلاني اغلي....صدك هاي وين راحت وعافتني...شكد عيب حقه اني شنيمني...
وهو شعليه....ياربي راح انجلط من ورة هالدائرة
.......وللحكاية بقية
YOU ARE READING
#تراتيل القدر
Romanceقصة واحداث حقيقة ....حدثت وقت الطائفية والظروف الصعبة الي مرت على العراق وبالذات بغداد.....حب ...فراق... ...وحدة شعب...اختلاف اراء...واحداث كثيرة ...تابعونا
