نضال : مني هادي😒.
نسرين " غمزتله ": هادي يلي كلمتني عليها 😉.
" نضال في لحظه هادي انصدم ضغط علي يده بقوه ومسح بيده علي لحيته وامشي طلع وصكر الباب بقوه وراه وفاء انخلعت شافت جيهت الباب وقالت"
وفاء : خيره خوك .
نسرين " مدتلها الميه ": ديمه خوي هادا هكي .😐
" وقعدوا يهدرزوا انين وفاء جاها خوها وروحت ومشت نسرين ضمت حوسة المطبخ هيا وامها وركبت لدارها لقت سندس امقعمزه ع فونها "
نسرين " خاشه ": شن الديري.
سندس : نكلم في صاحبتي.
" وقدمت نسرين رقدت علي سريرها وفتحت الفيس قعدت تتصفح انين جتها صورة رواد كان متكي علي سياره فخمه وسوده ولابس سروال جينز اسود واتجاكه سوده وبلوزه بيضه وحاط نظارات كان طرررف😍😍 "
نسرين " الله محلاه 😍😍 وقعدت نسرين تتصفح وكلمت رواد عالرسائل شوي وخداها والنوم "
" ومرت هادي الليله... يلي راقد ومشتاق ودموعه علي خده زي رضى ..ويلي يفكر و قلبه مكسور ونادم على أول حب حبه زي نضال..ويلي كان يكلم في حبيبته عالرسائل ورقد وهوا متهني زي مراد ..ويلي نايضه علي فراشها وتبكي علي حظها زي نورا...ويلي نايض يتقلب علي فراشه يمين ويسار ويفكر زي سراج ...ويلي راقد ويتمنى بس لو يشوف حبيبته بس لحظه زي رواد ....ويلي نايضه تفكر وتدعي ان ولد خالتها يكون من نصيبها زي جوري......ويلي نايضات ويفكرن في هالعيشه يلي عايشينها زي وفاء وبسمه وياسمين .....ويلي راقد في سابع حلمه ومتهني ومايفكر في شي زي خالد وسندس ...... ويلي راقد وكان يفكر في في شخص خش لي قلبه بدون استأذان زي أيوب....ويلي نايضه وتفكر شن بيكون مستقبلها مع يلي بيكون خطيبها زي حنين......ومرت الليله في من مر عليه ليله عاديه وفي يلي لا"
- -- - - - - - - -- - - - - -- - -
في اليوم التاني:
" ناضت نسرين غسلت ووجها وتوضت وصلت ومشت خدت فونها لقت رواد باعتلها رساله "صباح الخير علي أجمل الجميلات ..مع اني ماشفتكش بس مشي الحال ههه😘" نسرين ضحكت وبعتتله رساله " صباح الورد عالحلو 😚 ...لا ماتخافش حتشوفني اليوم وبتندهش من جمالي هههه " رواد بعتلها رساله" والله حنشوفك اليوم " نسرين بعتتله رساله" والله يامهبول " رواد حط فونه على جنب ووقف فوق سريره وصرخ بأعلى ماعنده شوي تاني واتجي شبشب حمام علي ظهره من أخته.
رواد : ياعن شكلك.😬
فردوس : صبح يافتاح نوضتني من نومي😡.
رواد " ويحك في مكان ضربه خدي الشبشب وارماه عليها وخديه فونه وبعت رساله " والله هبلتيني في جرتك يا مجنونه " نسرين بعتتله رساله "انت مش أول واحد تقولهلي على فكره ....المهم وين نتلاقو "
رواد " منحجزلك يا مجنونه في أحلى مطعم "نسرين "هههه لا انت مشالله عليك بعقلك" رواد " ههه تمام نتلاقو في مطعم ال..... لكن مشكله مش اهني المشكله اني كيف حنعرفك " نسرين " اني نعرفك تو انجيك لعندك " رواد "تمام...وأخيرا بنشوف المجنوونه اليوم " نسرين "هههه تمام " حطت فونها في في جيبها ونزلت تحت لقتهم يفطروا كلهم الا مراد وخالد ...فطرت امعاهم وكلمت امه قالتلها اليوم منطلع ..غسلت نورا الماعين وقعمزت عالتلفزيون تحضر ...ونسرين ركبت نوضت خوتها ومشت لدارها تلبس لبست سروال بيج وبلوزه بيضه عليها كلام بالبيج واتجاكه طويله بيج ووشاح بيجي وسندل أبيض ودارت شويه بودره ومسكره وواست روحها "
- - - - -- - - - - - - - - - -
"في الدار "
ام نضال تتصل
سالمه : تفضلو تفضلو..في اي وقت البيت ببتكم.
سليمه ام سراج : مشكوره حبيبتي خلاص امالا الساعه 5:00 نكونوا عندكم.
سالمه : تمام ..هي بالسلامه.
سليمه : سلام " وسكرت"
عادل " يلبس في كبوطه : مني يلي بتجي 😕
سالمه : سليمه مرت خوك اليوم بيجوا بحددوا يوم العرس .
عادل : باهي انشالله علي خير ..هي اني سلام وقت عالشركه.
سالمه : تمام ...حتى اني نازله انبشر نورا " ونزلت قعمزت امعاها عالصالون وقالتلها لكن نورا مابانش الفرح علي وجهها"
نورا : ايه توا وين دار عقل وفكر زين .😦
امها : يابنيتي انتي عارفه سراج وظروفه شايل الدنيا علي راسه فامتلوميشي المسكين .
نورا " قريب تبكي: هادا مسكين ياماما هدا اناني😢 ...خطبني وبعدين معاش عدل عليا .
نسرين " نازله ووراها مراد وخالد": انت شن دخلك😑.
مراد : شن دخلني ...لابسه ومفتلكه روحه واتقول شن دخلني...قتلك وين ماشيه.
نسرين : ماشيه منفرهد علي روحي شوي.😞
خالد : مراد خلي اختك في حالها...هي امته طلعت.
نسرين : والله مافي احسن من خلووود.😜
مراد"ماشي جيهة امه : بالله عليك انتلفي هنتفكو من دوشتك.😒
نسرين "طالعه ": حتشوفوا طعمة الحوش بلاي .😏
امي : غير ردي بالك من طريق يابنيتي.😟
نسرين : حااضر " وطلعت "
خالد : اني طالع يامي تبي حاجه.
امي : سلامتك....وين نضال ماشفتاش اليوم.😟
مراد : طلع امبكري شوي للشركه .
امي : اه....باهي سلم وليدي منبعتك ع حاجات نبيهن ضروري اليوم "وفصلت عليها نورا"
نورا "بعصبيه : ماما اني ماشيه لحنتي منخليله الحوش بكبره منبيش نشبح وجهه😒😡."ومشت تجري فوق.
مراد :لا هدي هبلت رسمي.....عل شني تدوي هادي
- - - - - - - - - - - - - - - -
" اما عند نضال كان امقعمز في مكتبه ويفكر "
نضال " هادا حظي أول بنت خشت قلبي وحبيتها مدايره علاقه مع حد تاني......لكن والله مانقدر ننساها البنت خشت في قلبي " وقطع تفكيره محمد "
محمد : شن جو.😉
نضال : تمام.😑..
محمد : ماخبرتكش.
نضال : علي شنو.😕
محمد : انشالله اليوم بنخطب.
نضال : باهي مبروك..انشالله تمو علي خير.
محمد : الله يبارك فيك ...عقبالك حتى انت تلقى بنت الحلال يلي تناسبك.
نضال : انشالله.😩
- - - - - - - - - - - - - - -
" اما نسرين وصلت للمطعم ونزلت مشت خشت للمطعم وفي اللحظه هادي قلبها يدق وخايفه ان مايعجبهاش قدمت قعدت دور بس مالقاتاش بعتتله رساله وقدمت قالت ممكن يكون بعيد شوي مشت سألت راجل يلي يخدم في المطعم قالتله "
نسرين : لو سمحت ياخوي في اهني حد حجز مكان اسمه رواد ال.....
راجل : ايه "وأشرلها بيده " تلقيه اهني ليه ساعه جاي.
نسرين : تمام مشكور ياخوي .😆
راجل: العفو.
ومشت قسم العائلات لقاته مظلم وشموع في كل مكان وورد متناثر بس مافيش حد الا واحد امقعمز علي طاوله فيها شموع وكان لابس نظارات وسروال جينز أزرق وبلوزه سوده وحاط رجل علي رجل وشاد فونه قدمت باش تتأكد ان هوا رواد مشت جيهته وقربت منه لمح رواد حد تلفت وكلمها من طرف خشمه "
رواد : لو سمحتي اختي تبي حاجه 😞😒..اني المكان هاده حاجزه لشخص يعني مش حقك انك " وفصلت عليه نسرين " قلبها يدق💓 واتقول انشالله مش رواد بس ": انت رواد ال.. صح
رواد " وقف😍 ":ايه.. وانت نسرين ال..
نسرين " في لحظه هادي معاش قدرت قلبها يدق بسرعه مع انها شايفه صورته بس مش زي ماشافاته وجه لوجه " هزت راسها بمعنى ايه وهي ترعش علي بعضها .
" اما رواد يلي واقف وساكت وفي نفس الوقت مصدوم من جمالها 😍"
نسرين"ترعش :اا خيرك اا مش عاجباتك😟 .
رواد " حط يده علي خدها وكلمها بصوت حنوون": لا من قال ماسحبتش انك حتكوني هكي حلوه .😘
نسرين "تحشمت وحولت يده علي طول ":اه اا مانكش مقايل تفضلي.
رواد : تفضلي قعمزي ياعمري ...ماقلتليش شن رايك في الجو رومانسي😙 يلي درته.
نسرين : هههه هاده كله علي خاطري؟
رواد : نجيلي علي هضحكه...املا من عندي غير نوستي انديرله هكي.
نسرين : به قولي شن رايك فيا.😟
رواد : شن قصدك.😕
نسرين : انت فاهم ماتستعبطش عليا.😞
رواد : آآه ..قتلك ماتوقعتش انك حتكوني بالجمال هاده.😗
نسرين "مرتبكه: يعني عجبتك.😟
رواد :هههه خيرك خايفه انت " ووساوه تقعميزته وحط ايده في جيبه وطلع باكو صغير فتحه وطلع منه خاتمين منقوش عليهن" N+ R ♡ ".
رواد " مدلها خاتم ": هادا نبيك تلبسيه ومتحاوليشي بكل ..خليه ديمه في ايدك .
" نسرين ابتسمت😊 ومدت ايدها باش تاخده بس رواد حول ايده وقال "
رواد : لالالا اني لبس مجنونتي ."ابتسمت نسرين وحمرت 😶خدودها ومدت ايدها ولبسلها رواد "
نسرين : لا ومنقوش عليه حرفي وحرفك.
رواد : مش تعرفي بس.
نسرين : والخاتم التاني اكيد ليك صح ؟
رواد : هاده نبيك تلبسيهلي انتي ليه.
نسرين : ههه تمام " وخدت الخاتم ولبساته وهي ترعش جاي بتحول ايدها بس رواد شد ايدها .
رواد : حتكوني ليه وملكي اني بسس.
نسرين "حولت ايدها وغيرت الموضوع ": به عرفني عليك أكثر.
رواد : تبي تعرفي عن حياتي أكثر ........اسمعي أني واحد ماعمري حبيت بنت الا انتي من طريقه كلامك حبيتك ولما شفتك زاد حبي ليك 😍...يقولو ان اني واحد متكبر وشايف روحي هلبا بس اني نحس في روحي لا يعني شن دير بكلام الناس المهم....اني عندي تلاته خوت أكبر مني مش متزوجين وأختين أصغر مني وأخت أكبر مني متزوجه .....بوي واحد يموت في الفلس وغصب عليا اني وخوتي اننا ناخدوا بنات عمي لانه واحد مليونيرا يخدم تاجر بس احني رافضين الموضوع......اختي الكبيره خدت ولد عمي لكن مش متهنيه في عيشتها وكل يوم تجينا بدموعها ويرد فيها تاني يوم.....طبعا اني طالب في الطب وو..و عرفينا عليك انت توا.
نسرين : حكيتلك عن حياتي ..يعني شن تبي تعرف😆.
رواد : هههه حني خشينه في الهدرزه وانسنا نطلوبوا حاجه نكلوها .
نسرين : ههههه.
"وكلم رواد النادل وقعدوا يهدرزوا ويتكلموا مع بعض حتى انهم ما حسوش بالوقت يلي يمر وتعرفوا علي بعضهم أكثر وأكثر "
- - - - -- - - - - - - - - - - --
" اما عند نورا لبست وواست روحها ومشت لحناها بعد نكد طوييل لامها اما امهاضمت الحوش هيا وسندس وبخراته ومشت هيا وسندس في المطبخ ........"
- - -- - - - - - - - - - - - - - - - -
" وصل سراج اخته بثينه وامه وقعد مقعمز في سياره"
امه : تعال خش ياوليدي امعانا .
سراج "مايبيش يقابل نورا ولا حتى يشوفها باش مايزيدش الموضوع سوء : لا لا خشوا اني اهني قاعد في سياره انراجي.
امه : تمام به "ومشت "
- - - - -- - - - - - - - - - -
في مربوعه العم عمر"
مراد : والله يا أيوب هاده وين عرفتك شاعت " بخيل ".
أيوب : خيرني .
مراد : ليه قريب ساعه عندكم ومش مضيفني حتى طاسه ميه.
منذر : والله صدقت يامراد ....هاده وين كشفنا أيوب علي حقيقته.
أيوب " عدل تقعميزته وحط رجل على رجل وشبح فيهم بنص عين ": انتو جايين تهدرزوا ولا جايين تاكلو.
منذر: الزوز.
مراد : والله بشوفت عينك ياصاحبي انت عارفنه انجوك في الاسبوع مره المفروض توتينله وجبه مليحه😉.
أيوب : امالا انتم تحسابوني مقعمز ع بنك روما.
مراد : بري يابخيل جيبنله شاهي بري.
- - - - - - - - - - - - - - - - - - - -
يتبع 》》
