مستر طارق جاء داخل ....اتكرر نفس المشهد بتاع امس بالليل....الابتسامة اترددت على شفايفي ثواني بعد داك ماتت موت مأساوي لما المستر سلم علي من غير ابتسامة..
.سألني من العيانة ووريته انها تمام ومافي مضاعفات....تاني سكت وانا بقيت ساكتة ...كان صمت قاتل ما طبيعي ..واضح انه مافي زول مننا عنده كلام يقوله للتاني ..ما في موضوع بيننا ..
تانيا هو عارف اني عارفة انه طريقة معاملته لي مختلفة من الباقين في الوحدة... وعارف اني بقيت اعامله بالمثل ...عشان كدة الوضع بيناتنا محرج ما مريح ..بس الحمد لله انقذنا من الوضع دة جية عبد اللطيف في اللحظة دي..بعد اطمأن انه العيانة كويسة بدأ يتكلم مع المستر... انا طوالي استأذنت منهم ومشيت...
مشيت الاستراحة استحميت و غيرت ملابسي..اتصلت على صفاء اشوفها وين قالت لي لسة في الحوادث ما ح تقدر تتحرك الا يسلموا النبطشية للناس البعدهم....كنت ناوية امشي اشرب معاها شاي في الكافتيريا...لكن مادام هي ما جاية قلت ما ح امشي الكافتيريا براي..احسن امشي مكتب الوحدة اعمل لي كباية شاي هناك ..السخان و العدة و الشاي و القهوة قاعدات...
لما وصلت المكتب لقيت مستر طارق و عبد اللطيف قاعدين اترددت شوية في اني اعمل الشاي لكن تاني قلت مافي داعي لوجع الراس و الصداع ...مشيت على تربيزة العدة مليت السخان وشغلته واتلفت على عبد اللطيف قلت ليه ( اعمل ليك شاي معاي )
طبعا بايت في المستشفى و اكيد ما شرب طوالي قال لي ( كويس شكر ليك...)
اترددت لحظات اسأل المستر عايز شاي ولا لا...شيطاني قال لي ما تسأليه ...من ظرافته معاك يعني؟ بعدين هو جاي من البيت اكيد بكون شارب الشاي...لكن لعنت شيطاني ما قلت ليكم انا طييبة و حنييينة.. و اتلفت على المستر وقلت ليه ( يا بوص اعمل ليك معانا شاي؟..)
طبعاركانت مرت مسافة كدة من سؤالي لعبد اللطيف...المستر عاين لي مسافة من غير ما يرد و نظرته لي كدة كأنه قرأ افكاري القبل شوية وسمع كلام شيطاني القاله لي..يا ربي عايز يحرد؟؟؟ لكن في الاخر رد ( مع اني شربت في البيت لكن ما بطال كباية زيادة شكرا...)
عملت الشاي و اديت كل زول كبايته وقعدت بعيد منهم اشرب ...طبعا الفترة الفاتت دي كلها ما حصل قعدنا قعدة زي دي انا و المستر في المكتب سوا...لو انا في هو بمشي ..ولو هو جاء انا بمشي ...
يا ربي يكون خلاص اقتنع انه مافي خطر من ناحيتي تجاهه و اني ما ح اعمل ليه عمايل البنات الفاتوا ديل؟ ان شاء الله يكون كدة... لانه والله الوضع كدة ما كان مريح ابدا ..ااي نعم من ناحية العلم و الشغل قاعدة استفيد ..لكن برضه الواحدة عايزة تكون مرتاحة نفسيا و ما تحس انها بعاينوا ليها زي الزول الاجرب ما عايزين معاها اي كونتاكت...
انا من ناحيتي ح اشوف ..لو غير طريقة تعامله معاي وبقت زي طريقة تعامله مع باقي البشرية انا برضو ح اتصلح معاه ...اصلا مافي حاجة شخصية بيناتنا ...هو مشكلته الاساسية مع علياء و البت القبلها ..وانا ديل ما عندي دعوة بيهم ولا ناوية اتصرف زيهم...
شوية شوية باقي ناس الوحدة جوا ومشينا عملنا الرواند... مرينا على العيانين مع المسترين..بعد كدة كل زول تابع تعليمات العيانين تبعه ...زي الساعة 11 كدة عبد اللطيف جاء قال لي ( يا امل بعد تخلصي حاجاتك مستر طارق قال ممكن تمشي البيت خلاص ..ما قصرتي ابدا امس ساعدتيني مساعدة كبيرة )
قلت ليه ( العفو..اصلا انا جاية هنا لشنو؟ ...)
فرحت برجعة البيت البدري دي مشيت لصفاء اشوفها لقيتها لسة بتعمل في ملفات العيانين الدخلوهم من الحوادث...قلت ليها ما بنتظرك امشي استفيد من الاجازة اللقيتها دي...
طلعت الشارع اركب الموصلات ...عادة بركب اي موصلات من قدام المستشفى تدخلني جوة لموصلات امتداد ناصر....ما وقفت دقائق كدة الا وجات وقفت قدامي عربية مرسيدس كبيرة ..يعني دة ما لقى الا يقيف قدامي ..زهجت منه وعايزة اتحرك من جنبه لقيت قزاز الشباك بتاع العربية نزل و زول قال لي (اركبي...)
اجيي اركب وين؟....اتلفت القاه دة مستر طارق..طبعا من الخلعة اتصبيت في مكاني و قعدت اعاين ليه زي البلهاء ...معقولة ؟ لكن ما للدرجة دي يا مستر...
قلت بتلعثم ( شكرا يا مستر..مافي داعي ..)
قبل ما اكمل كلامي الساعة الاداني ليك نهرة (اركبي...)
انا لمن نطيت و يدي مشت من غير ارداتي لباب العربية فتحته و ركبت سريع وقفلت الباب و عاينت قدامي من غير كلام ...
مستر طارق اتحرك بالعربية شوية كدة و اتلفت سألني(واصلة وين؟...)
قلت ليه براحة ( لو نزلتني جنب موصلات امتداد ناصر خلاص...)
قال (يعني ماشة امتداد ناصر؟...كويس في طريقي...)
انا سكت ساكت ما عايزة لي نهرة تاني..عاينت ليه بقعر عيني واتصدمت لما لقيته ظاهر عليه بكتم في ضحكته...بضحك علي يعني عشان اتهرشت؟...
العربية بجوة مريحة وريحتها حلوة و الجلد بتاع الكرسي ناعم لكن دة كله ما استمتعت بيه..لاني بس قبلت على شباك العربية وقعدت على وضع واحد لا بتحرك ولا بتلفت جاي لا جاي لما حسيت بعضلاتي اتصلبت...
امتداد ناصر دي الليلة مالها بقت بعيدة كدة...؟؟؟ يا الله حتى وصلنا شارع حي الصفاء ..طوالي مستر طارق اتلفت علي تاني وقال لي (لما نصل شارع بيتكم وريني...)
طبعا انا واضح اني ح انفذ الاوامر!!!! لما وصلنا قصاد شارع بيتنا قلت ليه ( خلاص انا بنزل هنا....)
قال لي ( دة شارع بيتكم؟..)
قلت ليه (ااي ...لكن انا بنزل هنا ما...)
كنت عايزة اقول ليه مافي داعي تدخلني جوة ...لكن هو طوالي اشر و نزل بالعربية على شارع بيتنا انا قلت خلاص بعد دة البقت بقت..اشرت ليه على بيتنا...اول ما وقف بالعربية قدام بابنا ..انا طوالي سريع فتحت الباب ونزلت واتلفت عليه ( شكرا يا مستر ..) سكت شوية كدة وقلت ليه ( اتفضل..)
عاين لي مسافة من غير ما يتكلم كانه بقول لي (عارفها دي كشكرة ساكت..) تاني قال لي (شكرا...مرة تانية ) واتحرك بالعربية...
انا فتحت الباب ودخلت و قفلت الباب خليت فرقة صغيرة قعدت اتاوق بيها لعربية المرسيدس الماشة ...لما قلت ليه ماشة امتداد ناصر قال لي..في طريقي...يا ربي طريقه وين؟ ..ماشي وين ؟
يتبع.....
