اسير العشق

البارت الثالث والعشرون

علي . حاولت ما افكر او حتة اتصل بجمانة هاي الفترة حتة ما اتعلق بيهة اكثر اسئل عليهة حوراء تكول يوم زينة ويوم لا كلفت عمي محمود بنقلهة للمدرسة الجديدة لان مابقة شي للدوام ويأمنهة عد سايق ودائما احچي وياهم كامرة بس هية ما اشوفهة يجوز متريد تشوفني حقهة الي شافتة مني مو قليل على راحتهة يومية انام على عطر شالهة خلال هاي الفترة رحت لمجموعة اخصائيين علمود سجاد بلكي اكو علاج لحالتة وعرفت يجوز اذا كعد وفحوصاتة نظيفة اكو امل يعيش بس اذا صاير شي بدماغة لا سامح الله هيچ يصير غير حچي احتمال صاير عدة تلف بالشرايين لان طول وما كعد وهذا الشي يأكدوا منة ورة مايكعد يجوز اني ارجع بالعيد لان قبل لا اجي بيوم انفتح موضوع علا وعمي محمود وحوراء ومسلم اني مساند عمي محمود بس مسلم بعدني ما واثق بي احتمال احضر الخطبة وارجع
جمانة . مرت هاي الفترة بصعوبة علية لان علي مو وياي حسيت بضعف مو مثل زيد يجوز لان علي چان وياي انقلت بمدرسة جديدة ومجتمع جديد بس وداد مو وياي اول شي ضجت انوب اتعودت بس عندي اتصال بيهة ومرات تچيني هية وعلي حتة ما يتصل ولا اشوفة من يخابر مرت الايام وحضرنة لخطبة علا وعمو محمود وحوراء ومسلم الحمدلله راح ينجمعون  خلال الفترة الاخيرة شفت نظرات الحب من مسلم لحوراء ومن فاتحة بالموضوع قبلت وفرحت لعلا لان عمو محمود يريد يرجعهة للمدرسة والناس كلهة موجودة بس احس بنقص علي ماكو صوتة ولا عطرة احس بي موجود يمي بس ما اشوفة ادعيلي بصلاتي واتمنة الة الخير بس ما اكدر اتقبلة ابچي بالليل والصبح اكعد ابدي من جديد صار سنة مرت على شوفتي لزيد وتعرفت على علي فرحت وبچيت وتعرفت على ناس هواي بس مستقبلي مجهول اجة اول يوم عيد وملتهية بالتحضيرات لبست الشي الي اختارة الي علي من رحنة لكربلة ابدل واتمنى يشوفة علية بس هوة وينة عافني وراح نزلت نحضر ما رحت لبيت عمي كلت اكمل وقبل لا يرحون همة اروح لعلا طلعت احاچي مسلم وچان اشوف علي يسلم على عمي اني شفتة رجعت ليورة حسيت نفسي ختنكت اجت نرجس
نرجس . صدك علي اجة كرار كال
جمانة . اشرت اي برة واحس نفسي كوة يطلع مو اريدة يجي ليش هيچ اختنك من اشوفة نزلت دمعتي مسحتهة وكملت شغلي سمعت صوتة صاح على شمس رجفت ايدي حسيتة تقرب طلعت من المطبخ راحت كبل للغرفة يعني مو ردت يچي ليش هيچ يصير كعدت ورة الباب حسيت رجفة بجسمي قوية ما اسيطر على حركة ايدي اسمع صوتة جوة وخالتي تصيحني غمضت عيني هذا حلم كلة كابوس اني منتظرة زيد يچي اليوم عرسي وهذا الصوت والهوسة معزومين على عرسي اليوم راح اصير ملك لحبيبي وللابد راح ابقة بحضنة وما اعوفة نزلت دموعي لازم اكلة لا يتأخر حتة نظل نسولف هوواي كمت دكيت على رقمة مغلق ادك وما يرفع اهووو ليش هيچ يخوفني رجعت دكيت ماكو زيد الله يخليك جاوب كلي هذا حلم صحيني خليني اعرف طريقي وانت تكون شريكي بهذا الطريق لا تعوفني وحدي والله احبك ما اكدر بدونك جاوب بقت دموعي تجري على خدي انعاد شريط حياتي من يوم زفتي لهذا اليوم فتحت عيني باوعت للفراغ حسيت روحي هيچ مابيهة ذرة حياة او شي يستاهل ابقة علمودة شنو نهايتي ما اعرف بقيت افكر لحد ما سمعت الباب انفتح عرفت علي من خطواتة مسحت دمعتي وطلعت من الغرفة حتة اروح لبيت عمي خطية علا بوحدهة تذكرت من خطبني زيد بقيت حايرة منو يساعدني ما اريد اضعف كدام علي لازم ما اشوفة لحد ميروح نزلت اترخصت من خالة وعمو وصلني كاظم ابن عم علي الطريق كلة بالي افكاري نفسي متخربطة اريد ابقة يمة واريد ابعد ما اتحمل بعد اباوع تذكرت زيد ولهفتة وحبة ويوم الي اجة وشافني قبل الخطبة بيوم غمضت عيني تمنيت يطلع كابوس واكعد منة كعدني من امالي صوت كاظم
كاظم . وصلنة ام حسن
جمانة . تسلم ابو محمد تعبتك
كاظم . ولو تدللين اني اترخص
جمانة . الله وياك
جمانة . دخلت لكيت خالات علا وعمي موجود سلمت ورحت لعلا هلة بالعروس الحلوة
علا . هلة بيچ وچ تعاي شوفي مو چنة الفستان موحلو
جمانة . لا يا عمري يخبل لاتخافين تعاي خلي اعدل شعرچ
علا . اباوع على جمانة احس بيهة ضايجة شبيچ شو ضايجة
جمانة . مابية شي لا تخافين وابتسمت بس احس الحزن فاضحني
علا . شكو صار شي علي بي شي
جمانة . من كالت علي بچيت ما اتحملت
علا . شكو ليش تبچين علي بي شي
جمانة . اجة اليوم بس ما شفتة
علا . ليش ماشفتي هوة ما حاچاچ
جمانة.  اني ماحاچيتة
علا . ليش مو صار شهرين ما شايفتة وتردي يجي والله حار وياچ الولد
جمانة . كعدت لچ علا ما اكدر اعوفة ولا اكدر ابقة ويا اني جنت خطيبة زيد وحبيبة زيد مو علي اني بديت وية زيد ما اريد تكون نهايتي وية غيرة
علا . وانتي كلتي جنتي خطيبة زيد هسة انتي زوجة علي لازم تتقبلين الواقع لشوكت تبقين تنتظرين لشي ماتعرفين شنو نهايتة
جمانة . لاخر يوم انتظرة يجي
علا . ماكو فايدة من الحچي وياچ
جمانة . يلة اتحضري اكوم احضر وية عمة وانتي لاتخافين عمو محمود ما عندة صبر هههه
علا . اي غيري الموضوع عزة وچ متوترة
جمانة . لاتخافين اني وياچ
علا . شكرا رغم اني قصرت وياچ بهيچ يوم
جمانة . عادي حبي احنة اخوات طلعت واحضر وية عمة وكاظيتهة صفنات سمعت صوت الموسيقى عرفت اجو بس كون ما اشوف علي
علي . دخلت للبيت وكلي لهفة اشوفهة مالكيتهة جوة سلمت على اهلي وصعدت اشوفهة وكالعادة اتلقيت الرد البارد منهة مشتاق لكل تفاصيلهة عفتهة على راحتهة كلت انزل كدام اهلي تنجبر تحاچيني نزلت لكيتهة رايحة لبيت عمهة ماخذة اذن من ابوي ورايحة يلة يجوز متريد تشوفني يلة اول تالي اشوفهة باقي اسبوع اني كملت التحضيرات ورحنة لبيت جمانة اول شي وبعدين نرجع لبيتنة علمود حوراء ونرجس راح تبقة يمهة طلعنة عمي محمود الخطبة وسواهة عرس الموسيقى والركص فرحان حلو شعور الانسان من يحب شخص ويمتلكة بس اني احب الي مو ملكي حاولت ابقة طبيعي وصلنة هوسة وشفت زلم بالباب خوالهة لعلا وعدهم ولد شباب هم يطبون ويطلعون اكيد هاي جوة وكاعد يباوعون عليهة حتة ما انتبهت على لبسهة زين بس الي شفت ان لابسة الي اختاريتة وجبتة الهة  حلو بكل ونازكة بكل لبس صارت الخطبة وطلع السيد كان حاجز بين الزلم والنسوان بردة بس تفصل بين عمي وعلا والباقي محجبات يعني اكدر اشوفهن عيني ادور على جمارتي شفتهة تباوع من ورة الباب بس دموعهة تصب وتمسحهن عرفت اتذكرت زيد يعني ما اكره زيد لو احتقرة هذا اخوي بس احتقر نفسي اجبرهة علية شلون احبهة واتمنى اكون بمكان زيد بس الحمدلله انتبهت علية راحت متريد تصير كدامي ضعيفة اخ يابت گلبي ياريت اموت ولا اشوف معاناتچ خلصت الخطبة الحمدلله اتوجهنة لبيتنة جمانة صعدت وية امي وعماتي واني الولد وياي دخلنة وراحوا ولد عمي يجبون مسلم والبقية والتحضيرات واشوف جمانة تتحرك وية امي وماعافتهة وامي تحب شغلهة حتة متقبل بنرجس ولا وحدة غير جمانة بس احس بيهة ضايجة كلت اكيد راح افهم السالفة
حوراء.  جمانة وينچ تعاي
جمانة . ها حبي شبيچ
حوراء.  تعاي يمي عفية متوترة حلوة لو لا
جمانة . تخبلين ياروحي لاتخافين اني يمچ اهدي هسة يجي مسلم يمكن هوة اكثر خايف
حوراء.  يارب سهل الامور
جمانة . يارب عدلت الفستان مالتهة كالوا وصلوا بدت الهلاهل والموسيقى حسيت بصوت بأذني كلش قوي وبعد فترة كمت ما اسمع بس سمعت اسمي بس هذا صوت زيد حبيبي ادور علة بين الناس ماكو بس صوتة يصيحي بأسمي تعال حبيبي وينك منتظرتك فزيت من صوت الطلق بعد ما كمل السيد طلعوا الزلم بقن النسوان ضيفت الهن وچان وحدة تسئل انتي مرت علي
جمانة . اي خالة
اخت العروس
جمانة . ردت اجوب چان ام مسلم تچاوب
ام مسلم . لا بت عمهة هية يتيمة
جمانة . نصدمت ونقهرت من حچيهة بس سكتت ما اريد اضوج احد اليوم فرحانين
المرة . يا خطية الله يساعد اليتيم
ام مسلم.  يي احسن شي واحد عد اهل يربو ويعلموا الاصلو مو يبقة بيد الناس الغربة
جمانة . اسمع واحس نفسي صدك مالي احد بهل الدنيا ردت اجاوب وسكتت يعيروني بيتيمي حسبي الله عليكم
المرة . عد بيت عمهة متربية
ام مسلم . هوة ابوهة الحقيقي بس مرت عمهة ربتهة الي هية ام علا مرت محمود
جمانة . شنو ابوي الحقيقي كامت تحچي ام مسلم اني ابوي متوفي خالة عمي هوة مو ابوي
ام مسلم . لا انتي فاهمة غلط سئلي عمچ وانتي تفهمين
جمانة . بقيت افكر وافكر شنو قصدهة لازم اسئل راسي مابية افكر اكثر
علي . دخلت للبيت حتة اصيح النسوان وسمعت عمتي ام مسلم تحچي هيچ وية جمانة عصبت بس هديت من شفت جمانة ما خالفت احچايتي وردت عليهة كلت لازم احط حد الهة بس مو هسة كدام العالم خلي تخف الهوسة خلصت الهوسة ودخلت لكيت جمانة بالمطبخ هية وامي ونرجس بقن بس عماتي وعمامي عدنة كاعدات وهية تفتر تحضر عشة صحت جمانتي وينچ حضري الحمام
جمانة . اتفاجأت من اسلوبة عرفت لان عمامة كاعدين حاضر هسة
ام مسلم . شوف الحظ تالي ابن الحرام هيچ يچازة
جمانة . شنو قصدچ خالة
ام مسلم . والله انتي فهميهة بعد
علي . سمعت عمتي كالت هيچ عطت شنو قصدچ عمة
ام مسلم . تعلي صوتك علية علمود هاي العلة عليك
علي . عمة هاي مو علة هاي زوجتي وحالهة من حالي الي ميحترمهة يعني ميحترمني ماشي وخاف عبالچ ماسمعت حچيچ العصر وياهة بس لازم تفهمين شي واحد حتة لو مالهة اهل هية اني امهة وابوهة واخ وزوج وكلشي الهة وخاف احد عبالة مالهة سند بهل الدنية خلي يعرف علي بظهر جمانة لاخر يوم بعمرة فوتي اليوم على خير
ام مسلم . اي ليش لا اكيد بالتيك بسحر وهيچ مسوية بيك وشوف شلون توصل حچي حتة تسوي مشاكل
علي . عمة شنو هل الحچي مرتي واعرفهة شنو وماكالت بقت ساكت لان اني وصيتهة مترد ومتوصل حچي اني سمعت بأذني محد كلي
ام مسلم . اي روح شوف من اي ام جاية هية متعرف اصلهة وازوجتهة
علي . عمة كافي رحمة لوالديچ ترة مصختيهة جمانة كدامي للغرفة يلة
جمانة . اسمع بالحچي ودمعي ينزل بچيت بحركة علي خلاني ورا ويحچي ويدافع عني اني ما استحق هذا العذاب كلة ولا استحق ابقة يم علي الي ما اكدر اعوضة شوي عن وكفاتة وياي كان سند الي بكل المواقف صعدت كدامة وهوة وراي دخلت للغرفة وبوجهة للحمام قفلت الباب كعدت جوة المي بملابسي اريد ارتاح بي خنكة وصرخة وحسرة وألم ما اعرف احساسي بهاي اللحظة مجرد شعور قبيح ومؤذي
علي . دخلت للحمام خفت خاف تسوي مثل ذاك اليوم مسوي نسخة للباب اني اخذتهة وردت ادخل وراهة سمعت فونهة مكالمة رجعت اشوفة انقطع شفت السجل من وداد بس قبلهة متصلة برقم زيد تقريب 20 مرة عرفت مسجلتة حبيبي عفت الجهاز وتعوذت من الشيطان شبيهة دك علة ليش هيچ تسوي رحت دكيت الباب جمانة حاچيني لا تخوفيني عليچ اكثر من مرة صحت ماكو فتحت الباب شيصير خلي يصير اعرف خبالهة تسوي شي بنفسهة دخلت شفتهة جوة المي بملابسهة وتحچي وية نفسهة اتقربت منهة وكعدت اخذتهة لحظني ابچي صرخي اني يمچ وارتاحي
جمانة . اجة علي اني محتاجة الة حظني واني ضعت بحظنة درت وجهي صار بظهري وراسة على جتفي فتح شالي وبقة يمشي ايدة على راسي بچيت علي اني تخبلت اريد اموت بقيت ابچي واصرخ درت لحظنة وبقيت اشهك وهوة حاظني
علي . ما اكدر ارد عليهة بشي خلي تبچي بلكي ترتاح
جمانة . اليوم صاحني والله صوتة سمعتة يكول جمانة تعالي
علي . منو
جمانة . زيد وابچي
علي . اش اش ميخالف تتخيلين لا تخافين اني يمچ مستعد ادفع عمري بس اشوفهة فرحان ويرجع زيد الهة ادوس على گلبي واشوفهة ويا بس كون مرتاحة لشوي هدت كتلهة سبحي راح اچيبلچ ملابس حتة تنامين
جمانة . ماشي سبحت وطلعت بقيت كاعدة وانشف بشعري علي دخل للحمام وافكر بحچي ام مسلم شنو قصدهة طلع علي اكول
علي . كولي
جمانة . اخذني باچر الصبح لبيت عمي حباب
علي . ماشي
جمانة . شكرا
علي . على شنو
جمانة . على كلشي
علي . اممم خوش رحت انام درت وجهي اتمنى احظنهة وانام بحضنهة مشتاقلة صار شهرين ما نايم مثل البشر مرتاح
جمانة . دار وجهة نسيت اني حتة ماسلمت علية من اجة وتالي هيچ يوكف وياي عيب منة حطيت راسي على المخدة كتلة علي
علي . هممم
جمانة . حمدلله على السلامة نورت البيت
علي . درت عليهة بعد وكت
جمانة . اسفة جنت دايخة
علي . ادري بيچ واعرف بشنو دايخة لا تخافين تتغير الاحوال متبقة هيچ
جمانة . شكرا ادري بنفسي ما انحمل اعذرني مالي غيرك
علي . واني اريد مايصير عندچ غيري اتمنى انتي بس الي اتقربت منهة خليني احس بالامان
جمانة . عرفت قصدة فتحت ايدي ودفن نفسة بحضني حسيت بي اتنفس بعمق اعرف هذا الشوگ حاسة بهذا الالم والهفة تمنيت اعيشة وية زيد ردت اعوض علي ولو شوي عن الي سوا وياي حظنتة ونمت محتاجة الة من زمان مشتاقة لهاي النومة صار شهرين ما اعرف الي اسوي صح لو غلط بس اريد من  الدوامة مالت التفكير والطريقة الوحيدة علي والامان الي احس بي بحظنة نمت مرتاحة لحد الصبح
علي . نمت تعبان رحت لملجأي وارتاحيت فتحت عيني واني بين ايديهة تمنيت ما يطلع صبح واكوم من يمهة بقيت اباوع عليهة اعذرني زيد بس ما اكدر على نفسي والله يشهد علية حلالي ما مسوي شي حرام فتحت عينهة صباح الخير
جمانة صباح النور
علي . يلة كومي جوعان حتة نروح لبيت عمو ونفتهم حتة ترتاحين من التفكير
جمانة . بدون ما احچي عرف سبب الروحة وفكر براحتي كمت نزلت حضرت ريوك ولكيت خالة وعمو سلمت عليهة وكعدت خالة تسئل على البارحة وعرفت عمي داري ومن نزل علي فهمة كملنة ريوك ورحنة لبيت عمي وكلي خوف من الي راح اعرف
علي. حسيت بيهة توترت لاتخافين جمانة اني وياچ
جمانة . الله لايحرمني منك لا تخليني وحدي
علي . وصلنة ودخلت سلمت عليهم چان عمهة مبين تعبان
جمانة . عمو اني بت منو
حاتم……
يتبع 💭💭💭💭💭
مسائكم معطر بعطر الجنة 😍😍
شلووونكم حبايب اسفة هووووواي على التأخير اعذروني بس ظررروفي حيل تعبانة حاليأ اتمنى يعجبكم البارت مابقة شي للنهاية بارت يفصل عن النهاية غلسوا على السحك لان مو اكتب اركض اني 😆😆
لاتنسون التصويت والمشاركة لاستمتاع الجميع 😍😍😍 شكرا للتفاعل
دمتم في حفظ الرحمن🌼🌼
اختكم ياقوتة😚😚😚