#أمانتي
البارت 2
بقلمي ملاك الصمت
.. 2005 ..
صار عمري 15 سنه دخلت ثالث متوسط ..
ديلر رغم شغله وسفرة ع طول بس كلما يجي اجازة يسويلي مشكله علمود لبسي وحجابي صرت اكرهه وصرنه رسميا اعداء واحنه اصلا من زمان رويسيه وفكرت اذا اكبر يفك عني ياخه شويه بس هو ابد وشكد طلبت منه يعوفني بحالي ومعليه بيه الحايط يسمع وهو ميسمع ..
جنت اشكيه لابويه ابويه يضحك ع عركاتنه ومرات اشكي لعمو عبد الهادي ابوه عليه وهم يضحك ويلتفت لبابا يكوله هسه عركات شوفهم باجر عگبه يكومون واحد يموت ع اللاخ واني اگوللهم يااا شنو تخبلت واحب ديلر عمو يكولي بابا اسمه مقدام مو ديلر .. وحته بهاي جنت اعاند ديلر لان اعرفه يكره هالاسم ..
واكثر عركاتنه جانت ليش طلعتي وليش ضحكتي وشنو هذا لبسج جان لبسي كوله كيلوت بس لان اني دبدوبه مربربه حتلو الملابس عريضه فتقاطيع جسمي بارزة ومربربه خاصة الشامه الي بوجهي تجذب ..
ديلر من جان يجي اجازة من سفرةجان يصر الا هو ياخذني ويجيبني من والى المدرسة حته روحاتي لصديقاتي لازم ابلغه وهم هو ياخذني ..
حاسب نفسه مسؤول عني ماعرف ليش .. من ضحك عمامي ع عركاتنه حسيت اكو بيناتهم مثل الاتفاق يخصني ويخص ديلر وصح جان عمري صغير بس جنت نبهه والکفهه وهي طايرة فاستنتجت انو بابا ناوي يزوجني لابن عمي ويمكن المسأله مسألة وقت بين ما اخلص دراستي او اخلص السادس ع الاقل ..
سولفت لبيبي ماستغربت من كلامي يمكن بابا ملمحلهه بالموضوع ..
شلون هيج يتفقون هو اني 5دقايق مااكعود ويه ديلر بدون ماتعارك وياه انوبينه اتزوجه ..
ظليت اراقب الوضع التصرفات مال بابا وعمو وكلامهم من اشكيلهم من ديلر ودائما ياخذون كلامي وشكوتي من ديلر بضحك وهالشي ينرفزني ويخليني اعانده اكثر واتعمد العصر اطلع لصديقاتي اقرة وياهن وماكوله حته يوصلني بس اكون مستأذنه من بيبي وبابا ..
ودائما من ارجع يلزمني ..
تكررت هالحالة مرة ثنين يشوفني ويرزلني ويوميه موجهلي انذار بس اني ولا عليه بكلامه ولا اهتم بأنذاراته ..
احنه من فترة انتقلنه من بيتنه بالرمادي لبيت اكبر وقريب ع بيت عمو عبد الهادي بالشارع الي وراهم وهمين بصفه مشتمل صغير اخذه خالو سراج لان بعد زواجه استقر وعزل رغم رفض بيبي لهذا الشي بس هو اختار راحته وبقيت بس اني وبيبي وبابا .. لاخالو عافنه ولا زوجته خطيه خالو يتسوگ للبيت مع انو بابا ممقصر وباجي علياء (زوجة خالو سراج ) تطبخ وهم بيبي مراضيه بس هو خالو اشترى راحة باله لان سوالف العمه والچنه لو بعد الف سنه متخلص ولايكدر يطي ببيبي امه ولا بزوجته لان هي كرديه وبعيده عن اهلهه يعني منو سند الهه غيرة هو ..
عصريه من العصريات جنت راجعه لبيت اهلي من بيت صديقتي لبنى .. بيتهه يبعد 3شوارع عن بيت اهلي ..
وصلت لفرعنه براس الشارع فاتت من يمي سيارة سوده ..
اعرفهه واعرف الصاعدهه .. ديلر ماكو غيرة ..
مشت السيارة امتار عني ليكدام وبعدين رجعت ليورة ..
كلت بيني وبين نفسي .. يبووو شافني ..
وكفت السيارة نزل الجامه .. نزل نظاراته الشمسيه الجان لابسهه ..
هيفين شعدج طالعه ؟
كتفت اديه وصديت عنه جاوبته واني ماباوع ع وجهه واعوج بحلگي ماعاجبني ..
جنت يم صديقتي ..
شكوو رايحه ؟
غير ثالث وبكلوريا ودنقرة سوة ..
هااا بكلوريا .. وليش مگتيلي اوصلج ..
شكد ينرفزني من يدخل روحه باي سالفه تخصني ويطي لنفسه الحق انو يحاسبني ..
شنو ليش مكتلك ..اخذت الاذن من بابا وبيبي انت شكو واخذ الاذن منك ..
يمه ه ه ه عبالك فتحت ع روحي باب جهنم اعرفه يكره جملة وانت شكو بيه يگب للستار من يسمعهه وهذا الي صار ..
ولج شو انتي فد نوب لاتحترمين لاتعرفين تسولفين ..
صار عصبي عليه ونزل من السيارة ..
اني هنا طرت للبيت ركض لان شفت بابا واكف بالباب مال بيتنه عبرت البيوت ركض وتسبعت بابويه ..
هايابه شكوو شكوو
شبي مقدام وياج ..
صعد مقدام سيارته وثواني وصار بباب بيتنه واني دا احجي الموقف الي صار لبابا هو نزل ..
صرت ورة ابويه ..
عمي شلون تخليهه تطلع وحيدهه والوكت مو امان ..
طلعت راسي من ورة بابا وحجيت كلام قصدي احرگ دمه بيه ..
وانت شكو بيه .. رحت لصديقتي .. ابويه وقابل انت شدخلك
يايمه شااط للسما ..
شوفهه عمي شوفهه شلون لسان ..
ضميت راسي ورة بابا الي كام يضحك ..
دفوت يابه فوت وكملوا عركتكم جوة ..
بابا يكول عليه مااحترم وماعرف احجي ..
زاد ضحك بابا ..
فتنه جوة وسدينه الباب اني ركضت ليجوة يم بيبي وبابا استقبله لمقدام بالهول ..
عمي شوفلك صرفه ويه بنتك ترة ميصير هيج لبسهه وحجابهه نص ردن وتطلع وتطب بكيفهه ..
لا مقدام يابه لا بنتي تربيتي ممرجيه منك هاي .. شنو تطب وتطلع بكيفهه ماتطلع اذا ماتكولي واذا مموجود اني لو بيبيتهه لو خالهه ..
اعذرني عمي مو هذا قصدي .. الدنيا مو امان وانت دتسمع يوميه خاطفين وكاتلين والله اليستر وطلعتهه وحيدهه خطرة ..
جنت اتسمع عليهم وكتله ..
وهو اني و
تكمله بارت 2
#امانتي
ملاك الصمت
