البارت 22
#أمانتي
بقلمي ملاك الصمت ..
مرت 3 ايام الفاتحه طلعت روحي .. اختنكت من البيت والبجي والمله الي تجي تقرة عبالك تحط ع جروحنه ملح .. ميرحمن ابد واشوف خاله ياسمين وبنات عمو يملخن بروحهن باللطم والبجي ..
والله تمنيت اطرد شكو مله اجتي تقرة وتنعي كافي ارحمن بحال اهل الميت ..
ورة ال 3ايام رجعت ويه بيت عمو ثامر لبغداد لان عندي دوام ماكدرت ابقى اكثر ..
وظلينه كل نهايه اسبوع خميس وجمعه ننزل للانبار نسوي ثوابات لروح عمو الله يرحمه لحد يوم الاربعين ..
مرات انزل بي اني وعمو وخاله سهاد وفروحه لان الولد امتحانات ومرات ينزلون ويانه يحضرون الثواب ..
ابتعد عني مقدام .. رغم اني ماعفته مكالمات وروحات بس هو صاير عصبي فول مااكدر افك حلكي واحجي وياه حجايه وحده رأسا يعيط بيه واسكت اقدر. الظرف الهوة بي وفقدان الاب والمسؤوليه ..
روحه صارت بطرف خشمه والمسؤوليه تعبته حيل وميكدر يشكي ولايكول محتاج ايد تنمدلي ..
احسه غرگان بحزنه ع عمو بس ميكدر ياخذله ركن يرتاح بي لان صارن بركبته مسؤوليه 3يتيمات وامه ..
بالاربعين اجينه جنت لابسه بنطرون اسود وفوكاه قميص عريض اسود فوگ الركبه بشويه ..
لبسي مستور ومو ضيق وهو منبهني لازم ويه البنطرون شي طويل يغطي جسمي واني شفت لبسي عريض مابي شي بس هو لان فوك الركبه بشويه ..
فجنه واصلين من الظهر وهو ديلر لسه ماشايفني يجهز بعشى الزلم يجيبون طباخين يطبخون كل خميس ..
بالليل ورة العشه كفت الناس واني والبنات خلصنه غسل المواعين وتنظيف المطبخ ..
جعت ممتعشيه توني حطيت اكل دا اتعشى طب هو للمطبخ ..
اسبوع كامل لاشايفته ولامسلمه عليه لان مشفته ..
مشتاقتله استقبلته بابتسامه ولفهة حبيبه ..
كمتله دا اسلم عليه رأسا باوع للبسي من كعدت وكمت قماش القميص جان شايل ليفوك ..
هلاوو حبيبي ..
باوعلي من فوك ليجوة ..
خزرني ..
هاي شلابسه بنت الكل ...
جمدت مكاني .. تلاشت الابتسامه من وجهي ..
لگمه بحلگي اريد ابلع ريكي بلعتهه بدون لوك واختنكت ..
دمعت عيوني ..
ذبيت الاكل من ايدي .. گتله .. رحم الله والديك ..
عفت المطبخ وطلعت للهول منه لغرفه مقدام جنت حاطه جنطتي هناك وملابسي ..
اخذت جنطتي وجنطه ملابسي وصحت ع عصام يوديني لبيت اهلي ابات يم بيبي ..
وصلنه المطبخ هو سمعني من صحت ع عصام وشطلبت منه ..
واكف متخوصر يم السنك ..
مريت من يمه شاف طولي وشاف ملابسي وتأكد مستورة وحتلو ممستورة مو من حقه يشتم ابويه الميت .. هالشي حيييل هضمني .. ومنو يشتمني ابن عمي ابويه يصير عمه ..
اخذ عصام الجنطه مني وطلعنه ..
ظل عصام بالطريق يحاول يستخلص مني كلام منو زعلني لو شبيه مقدام وياي وشسوالي بس اني ابد ماحجيت شي بس جانت دموعي تجري ..
وصلني لبيت اهلي تلگتنه بيبي جانت راجعه قبل شويه وماقبلت ارجع وياهه لان مجنت شايفه ديلر وجنت مشتاقتله .. هه خوش تلگاني ..
فاستغربت من طبيت عليهه ..
سلم عليهه عصام وطلع ..
شبيج يمه شصايرلج ليش هيج عيونج ..
انفجرت كمت ابجي حيل واشاهك ..
بيبي شتم ابويه ..
منو ..
ديلر وع شغله سخيفه ..
سكتت ماحجت شي ..
ظلت بس تسمع اليه ..
تعبت من البجي ونمت بحضنهه بغرفتهه بملابسي ..
باجر الاربعين والمفروض من الفجر نروح نزور القبر قبر عمو الي اني ابد طول الاربعين يوم اني مارحتله ..
صار الفجر گعدتني بيبي غسلت وبدلت ملابسي النمت بيهه ..
سوت الهه لفه واستكان جاي كالتلي تعاي اكلي رغم اني ممتعشايه وجوعانه بس كابرت وجنت صدوك كولشي مااشتهي ولانفسي يم الاكل اصلا ..
ردنه نطلع دورت مبايلي مالكيته تذكرت نسيته بغرفه مقدام ع الشحن ..
السيارة منشأة جبيرة مستأجريهه علمود نروح للمقبرة مرت علينه مارحنه لبيت عمو ..
صعدت بيبي وصعدت وراهه ..
باوعت بطرف عيني شفته كاعد ع كرسي ورة الباب من ينسد الباب هو ينشاف ..
الطريق طويل للمقبرة وعيوني من البجي بسرعه تورم والله يذب عليه النوم بهيج مواقف حجزت مكان بالاخير وكعدت ..
بس تحركت السيارة نمت وكضيت الطريق كوله نايمه ..
كعدتني شهد وصلنه نزلنه مشينه مسافه وصلنه القبر ..
اريد اتجاوز كل هالذكريات لان مجرد التذكر يوجع روحي ..
وزعوا اكل لفات وموز وعصير ضميت حصتي مااكلت ظليت كاعده بمكاني وحدي ..
اباوع ع القبر واحجي بكلبي ..
دموعي تنزل وامسحهه وترجع تنزل ..
عيني جانت ع قبر ابويه مو ع قبر عمو ..
ماعرف عتابي لابويه ليش عافني بعمر صغير اعتراض ع حكم رب العالمين .. ماعرف ربي شكاتبلي بعد اشوف هل ياترى الراحه نصيبي لو ينتظرني بعد عذاب وقهر ..
احساس بلاوعي .. جسمي
كاعد بمكاني وروحي طلعت من جسمي هيج احس وتفتر بين قبر ابويه وبين قبر عمي ..
من الدموع غوشت عيوني كمت بعد ماشوف بوضوح الشمس مو قويه شهر الرابع المفروض بال ربيع احنه بس صرت احس اشعتهه تدوك براسي ..
صدت عيني لمقدام .. صارت عيني بعينه .. عيونه حمر شفته باجي ..
شسويلك الله يصبرك محد مات ورة الي ماتوا ..
تكمله البارت 22
#أمانتي
بقلمي ملاك الصمت ..
حاولت اكوم افترت بيه الدنيا عرفت نفسي هبط ضغطي لا اكل ولا شرب والشمس دكت براسي ..
لزمت ميس ردتهه تنتبهلي صدوك لزمتني قبل لااوگع ..
صاحت .. مي مي ..
ركض ديلر وبيبي وشهد سندوني ..
اخذ ديلر بطل مي وغسلي وجهي صديت عنه ماريد عيني تصير بعينه ..
جابتلي شهد بطل لبن شربته وشويه صرت احسن ..
بيبي حجت عليه لان ماتريكت والبارحه بدون عشه حسيت نظراته تثقب روحي يباوعلي بلوم لان مماكله وهو يسمع كلام بيبي ترزل بيه ..
جبرتني بيبي اكل لفه ووياهه بطل لبن ثاني ، حسيت روحي تقويت شويه وصارت بيه طاقه ..
نهض كال يله ..
سندني من خصري يريد يگومني وخرت ايده عني وخزرته ..
گمت ع حيلي وحدي ..
تمشيت ويه ميس وشهد وميس كالتلي ولج روحي حللي شبيج كلساع توگعين خاف بيج فقر دم كتلهه ان شاء الله اروح اشوف نفسي ..
رفعت راسي هو مر من يمنه وتعدانه باوعلي نظرة كآنه سمع كلامنه ودار وجهه وراح ..
صعدنه بالسيارة وهم حجزت الخانه الاخير ونمت الطريق كوله ..
للحكايه بقيه ..
