البارت 13
#أمانتي
بقلمي ملاك الصمت
مرت الايام يمكن 3اسابيع بالتحديد وصار لازم طلاب المرحله الاولى يباشرون بكلياتهم ..
ابد هالفترة ماشفت ديلر رغم دائما اني يم بيت عمو ..
انطيت الصوغه الي اشتريتهه لبيت عمو من الامام قبل فترة بس بقيت السبحه الذهبيه الي جبتهه لديلر يمي على امل اشوفه وانطيهه اله بنفسي..
ردت فرصه علمود اشوفه اخر مرة قبل لا التحق لكليتي .. ..
خالو كال باجر يوديني واني ظليت اليوم كوله احوص اريد فرصه مناسبه ..
الصبح البنات جانن بالدوام لان المراحل المتقدمه قبلنه يبدون الدوام احنه مرحله اولى نتأخر فماگدرت اروح لبيت عمي انتظرت للعصر ورحت بحجة اودعهم البنات وعمو وخاله بس ديلر مموجود ..
رجعت خايبه ..
مابقالي حل غير بس اتصل بي ..
سويت العشا وگعدنه اني وبيبي نتعشه كملنه گمت غسلت المواعين ونظفت المطبخ ع السريع وصعدت غرفتي ..
لزمت التلفون وبدون تردد دگيت رقمه ..
الوو ..
هلاو ديلر ..
وعليكم السلام ..
شلونك ..
بخير .. شعجب اجينه ع بالج ..
مو .. مو باجر اروح لبغداد واجيت ودعت البنات وعمو وخاله وانت مموجود ..
اي صحيح .. تدرين شغل ميخلص ..
اي الله يساعدك ..
عندي امانه الك ..
امانه ؟
اي .. صوغه من الامام ..
اممممم شفتهم قبل فترة يحجون وانتي ناسيه تجيبيلي ..
مناسيه اجيبلك ..
ها يعني عندج صوغه الي ..
ههه اي في الحفظ والصون ..
عندك مجال هسه تجي تاخذهه ..
اي عندي .. دقايق ..
سديت التلفون منه ركضت نزلت جوة .. رتبت شعري ع المرايه ..
ركضت لغرفة بيبي اطيهه خبر بجية ديلر بس لگيتهه نايمه ..
اندكت الباب طلعت برة افتحهه ..
فتحتهه بثگل ع كيفي ..
بانت ملامحه رغم خفوت الضوة لان دنيا ليل ..
ابتسمت ..
هلااو ..
هلو بيج ..
دخل يتمشى ..
جنت حاطه السبحه بجيب تراكي وايدي بالجيب واخرخش بيهه ..
هدوء وصوت الخرخشه ينسمع ..
شفته ابتسم ..
هاي دتخرخشين بصوغتي ؟
ضحكت اي ..
وطلعتهه من جيبي مديت ايدي نطيتهه اله ..
اخذهه مني .. تلامست اصابيعي ويه ايده حسيت جسمي كزبر وكهرباء سرت بجسمي ..
السبحه جانت ذهبيه وبيهه اسود وخرزهه كبار كولش انيقه .. وكانت الموده بين الشباب يلفوهه ع معصم ايدهم لفتين والثالثه تنكمش بالاصابع حته متفلت وتوگع وكولش دارجه ..
باوعلهه ورفع راسه ..
حلوة عاشت ايدج ..
بالعافيه ..
عجل بيبي وين ..
تعشينه ونامت ..
كانت خطواته تتقدم بالطارمه لمدخل البيت بس من سمع بيبي نايمه وگف ..
ايد بجيبه وهم حاط السبحه ويخرخش بيهه وايد يلعب بلحيته ..
لعد اترخص اني .. مترهم افوت للبيت وبيبي نايمه ..
ها براحتك ..
مشى خطوات باتجاه الباب ووگف وكأنه يفكر او يريد يگول شي ..
حدري هين ..
تقربت منه تطلععت بعيونه منتظرة منه شنو راح يگول ..
انتي رايحه لمكان جديد .. هناك محد يحكمج بس تربيتج واخلاقج .. الاطلبه منج تديرين بالج ع نفسج واي شي تحتاجينه روحي لطارق وصيته عليج ..
هزيت راسي ..
صدوك انت راح تعوف الشغل ويه عمي وتتعين بشهادتك ..
ابتسم ..
يافتانه بيهن گالتلج ..
لا والله عمو گال .. خطيه شايل هم منو يلزمله الشعل بعدك ..
هو الخير والبركه ان شاء الله منحتاج احد واني مجرد ماارجع من الدوام ان شاء الله اوكف ع راس العمال ..
اي ..
ماوصيج بعد ..
اي ..
يله تصبحين ع خير ..
مشت خطواته لحد الباب ..
وانت من اهله ..
باوعلي نظرات ماعرفت شلون افسرهن ..
بس اسد الباب قفليهه ..
اي اكيد ..
يله في امان الله ..
الله وياك ..
سد الباب وراح ..
ظليت دقايق صافنه ع مكان وگفته طوله ظله نظرات عيونه المختلفه اليه ..
خرعني صوت دگة الباب بقوة ..
گلت بفزع .. منووو ..
اجاني صوت ديلر .. ليش لسه ماقفلتي الباب ..
ابتسمت .. گتله .. هسه ..
صدوگ بسرعه قفلت الباب بزنجيل وطكيت القفل معناهه انقفلت وظليت مبتسمه ويه نفسي ع الموقف الي صار ..
دخلت للبيت وهم قفلت باب المطبخ وصعدت لغرفتي دسيت نفسي بفراشي ..
الابتسامه مفارگتني .. لزمت اصابيعي الي صارن بتماس ويه ايده مجرد اعاده تذكر الشعور كزبر جلدي مرة اللخ وغمضت عيوني بحصرة ..
ياربي شديصير بيه .. كولشي بي ديعجبني ..
نمت واني افكر بي ..
