حيـاتـي💔(مكتملة)

الـحـلـقــة 19

حياتي 19

سلمى:-تؤ
مش هذا قصدي ....
قصدي أنك كذابه،،يعني انتي تضحكي على روحك وتكذبي على روحك.
مش على حد ثاني.
يعني يا قلبي شفتك ايامات ما كنتي مرتبطة بالصابر وايامات ما كنتي مرتبطه بـ فتحي حتى قبل ما تصير قصة امه.

أيام الصابر كنت نشوف في شرارة الحب في عيونك كنتي تموتي فيه وهو نفس الشئ لما كنت نحكي معاه اقسم بالله من كثر حبه لك وعشقه لك كان كلامه زي الشعر.
كان يتصرف بلا وعي....زي ما دار مع سندس.
و زي ما أنتي اصرفتي بلا وعي لما ضربتي سندس وقبل قتلتيها.

أنا:-بالله عليك اسكتي.
سلمى:-لا مش ساكته هذا الحق،،اها ليش تبحتي فيا؟؟
هذا الحق يلي حاولت نفطنك له قبل الفرح بس كنتي ومازلتي مصره انك تكذبي.
وتكذبي على نفسك.

أنا:-توا قصدك تندمي في؟؟؟؟
ناقصني ندم اصلا.

هدرزنا واجد حتى محاضراتي هذاك اليوم سيبتهن على خاطر سلمى..

جيت للحوش لقيت سعاد تجهز في دبشها.

أنا بحزن:-ماشيه يعني؟؟
سعاد:-اها الله غالب يا رجو راجلي وحوشي يبوني،،وعيت عمي رايفوا ع البوبو.
أنا:-خسارة عليك قهر.
سندس:-لمعلوماتك حتى أنا ماشيه اليوم.
أنا:-اخس والله كلا أنتي عطيبة الخوات حوشك قريب.

سندس طلعت،،جت سعاد قعمزت جنبي:-رجاء اسمعي نبي ننصحك نصائح تنفذيهن أو لا براحتك المهم تسمعيهن.
عمرك ما تجافي راجلك ازعلي هزبي ابكي صرخي عاتبي حتى نكدي عليه، بس ما تجافيه زي ما أنتي دايره توا.

أنا:-بس أنا مش مجافيته.
سعاد:-لا مجافيته تقدري تأخذي رقمه من اخته وتتواصلي معاه.
على فكرة طول الجفا حيخليه يكرهك ويحس ان وجودك زي عدمه لا ويخليه يتزوج عليك اخرى.

يا بال أنتي ظرفك خاص و زواجه حيكون اسهل من ايش.
وحتخليه يحس أن امه كان معاها حق لما رفضاتك.

والأسوء من أنه يتزوج عليك أنه يطلقك.

ووقفت أخره تضم في دبش النونو.

أنا:-يعني شن ندير توا؟؟؟؟
معقوله نكلمه انا،باه ليش هو ما عبرني ليش دارلي نقال.

سعاد:-كلميه عاتبيه وهزبيه ع الشئ هذا.
احسن من الجفا يلي ما يدير نتيجة.

أنا:-باه توا نأخذ بنصيحتك مع أن كرامتي ينداس عليها هكي.

سعاد:-تي هذا راجلك جنتك ونارك.
طاعته واجب.

ودعنا سعاد،،وبعد العشاء مشت سندس وأنا طحت رقدت.

طبعاً سندس تذم في حظها 24ساعه لأنها مزالت ما حملت لي توا وكارهه عيشتها.

اليوم الثاني بعد روحت من المعهد دزيت مسج لـ فاطمه نبي رقم فتحي.
وهي دزاته ليا.

اتصلت بيه وللعجب على طول رد.