الخلفاء الراشدين

الحلقة 11

اللهم اغفر لنا ذنوبنا وارحمنا انك انت ارحم  الراحمين 
........................................................

خلي الامل بالله موصول:
(11)

عرفنا امبارح أن بعد وفاة النبى عليه الصلاة والسلام حصلت مشكله كبيرة  وهى أن قبائل العرب كلها أرتدت ماعدا مكة والمدينة والطائف واختلفت أنواع الردة ففى ناس منعت الزكاة .. يعنى قالوا مش هندفع تانى زكاة .. طب ازاى !! ده النبىﷺ قايل بنى الاسلام على خمس أركان .. منهم ركن الزكاة .. فالزكاة فرض .. وعلى فكرة فى فرق بين أنك تبقى عاصى لله فماتصليش أو ماتزكيش أو ماتتحجبيش وبين أنك تقول الصلاة أصلاً مش فرض والحجاب مش فرض .. أصل أنت لو مابتصليش عشان شايف أن الصلاة مش فرض ..  يبقى كده أنت كفرت بالله ..

المهم  بعض المرتدين  قالوا مش حندفع زكاة لأن  ربنا قال: " خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِم بِهَا وَصَلِّ عَلَيْهِمْ ۖ إِنَّ صَلَاتَكَ سَكَنٌ لَّهُمْ ۗ وَاللَّهُ سَمِيعٌ عَلِيمٌ " [سورة التوبة]
فقالوا أن ربنا فى الآية كان بيكلم النبيﷺ ويقصد خذ يا محمد .. فخلاص محمد مات .. فمش حندفع زكاة بقى خلاص .. طبعا ده كلام باطل .. المهم قال الخليفة أبو بكر: هؤلاء كفروا فوالله لأُقاتِلنّهم .. بس الصحابة كانوا مترددين فى قرار سيدنا أبو بكر فقال لهم رضى الله عنه:
والله ما رأيت ربى ذكر الزكاة إلا مع إقامة الصلاة قال تعالى:  " وأقيموا الصلاة وءاتوا الزكاة " .. فمن فرَّق بينهما قاتلته وحاربته ..

فوقف عمر بن الخطاب وقال: يا أبا بكر أنحارب ناس شهدوا أن لا إله إلا الله وأن محمد رسول الله ؟! فينفعل سيدنا أبو بكر ويقول: يا بن الخطاب أجبار فى الجاهلية وخوار فى الإسلام ؟!( يعنى يا عمر بقى ايام الجاهلية كنت قوى .. وأيام الإسلام وانت معاك الحق تقوم تضعف ! )  ويصر سيدنا ابو بكر على رأيه ويقول: والله لأقاتلنهم ..

ناس تانية قالت: كذب محمد ولو كان نبياً ما مات .. ولو كان نبي لظل على قيد الحياة .. وبيقولوا الكلام ده لمين؟ للصديق رضى الله عنه ..(اللى بيصدق النبى عليه الصلاة والسلام من قبل ما يتكلم ) شوفتوا بقى يا جماعة ليه كان لازم الصديق هو اللى يبقى الخليفة بعد وفاة رسول الله .. فقال أبو بكر والله لأقاتِلنَّهم حتى آخر نفس فى حياتى .. ( ازاى يكذبوا النبىﷺ !! )

كمان ظهر ناس مدعين النبوة .. طلع فى اليمامة واحد اسمه مسيلمة  وده أتباعه كانوا ٤٠ ألف وطلعت واحده اسمها سجاح وأتباعها بردوا ماكانوش قليلين

ومسيلمة أتجوز سجاح وأتلم أتباعها على أتباعه وبقى فى جيش كبير من المرتدين وكل دول كانوا فى اليمامة

طيب تعالوا نشوف بقى حكاية مسيلمة .. فى الحقيقة هو كان موجود من قبل وفاة النبىﷺ بس بدأ يظهر أكتر بعد وفاة النبىﷺ .. مرة  مسيلمة بعت رساله للنبىﷺ وقال : من مسيلمة رسول الله إلى محمد رسول الله .. قد بعثنى الله نبياً كما قد بعثك نبياً .. فأجعل لى نصف الأرض ولك النصف الآخر ..

فالنبى عليه الصلاة والسلام وصل له الجواب وواحد من الصحابة قراه عليه .. ويرد النبىﷺ على رسالة مسيلمة ويقول: "من محمد رسول الله إلى مسيلمة الكذاب إن الأرض لله يورثها من يشاء والعاقبة للمتقين" .. النبى عليه الصلاة والسلام هو اللى أطلق اسم الكذاب على مسيلمة .. فأشتهر  بالأسم ده بين العرب ولحد دلوقتى كمان بقى أول ما يجى اسم مسيلمة بيتبعه على طول كلمة الكذاب .. وده عقاب لأى حد يتعدى على النبي ﷺ وكان لازم مسيلمة يتعاقب فى الدنيا والآخرة
طب إيه اللي هيحصل بعد كده 💘

نكمل بكرة ان شاء الله
..........................................................

اللهم  انك عفو تحب  العفو فاعف عنا