كرونيك: 💖💖الوقوع_ في_ الحب💖💖

💞البارت 12💞

هبطو البنات، لقاو الضياف تم، البنات الاخرين مكانوش اقل اناقة منهم.
رهام دات ريم وتسلم على ضيافها، وسحر ومروى بقاو واقفين.
مروى: شوفي شكون جا.
سحر: اوووووففف ، هذا ما خص غير يزيد يلحقني هنا.
مروى تضحك : قلبو يقودو ليك.
سحر: متقوليش كي راني ساكتة يعني منيش فايقتلك ، راني نسمع في قلبك كي يخبط مين تشوف اياد.
مروى هبطت راسها.
سحر بصوت حنين: مروكو يا روحي اخطيك منهم ، هوما في عالم وحنا في عالم.
مروى: سحر علاه تقولي هكذا مادرت والو
سحر: نحذر فيك قبل ماتطيحي بقلبك.وفي قلبها(نحذر في روحي تاني)
*******
اياد يضحك: امين شوف زهرك.
امين بلا مايشوف : وحدة كيفها مش زهري.
اياد : اذا ما خطفوهمش الليلة راهم ملاح.
امين يشوف : شكون هوما.
جات عينو في عينها، بقا يوحد في ربي على زينها( كل خنفوس في عين حبيبو غزال)
اياد : راني حاير كيفاه قبلت تجي.
امين ميحبش هكذا حفلات، بصح في قلبو كان حاب يجي في جال يشوف سحر.
امين: لازم نحافظ على صورتي قدام الناس.
اياد : امممم صورتك.
امين : ونتا علاه تجي؟
اياد: جيت باه نشوف شخص معين.
اياد صريح جدا ، وميحبش يخلط الامور ، يحب يكون كلش صافي.
جات رهام عندهم: اياد ، امين، اهلا بصراحة متوقعتش تجو.
امين: بصراحة انا متوقعتش روحي نجي.
اياد يضحك ، مشا وخلاهم، راح عند مروى وسحر: مروى، سحر وشاورلهم براسو.
مروى خدودها وردي، سحر: اهلا اياد.
اياد: لاباس؟
مروى: الحمد لله ونتا.
اياد : الحمد لله ، نخليكم ، امين راه يستنا ، حبيت نسلم عليكم برك ونقلكم راكم الله يبارك عليكم.
مروى ولات حمرة ، سحر تضحك: الله يعيشك مرسي.
اياد : مروى خرجت عليك الروبة كيما قتلك تقول مخدومة ليك.
مروى : ايه مرسي.
اياد : هيا سلام
سحر : سلام. ودارت لمروى:خرجت عليك الروب كيما قالك؟
مروى : هو عطاهالي.
سحر : وعلاه مقلتيليش؟
مروى : مجاتش فرصة، نروح نتنفس برا شوية ونجي.
سحر: امممم اهربي اهربي.
راحت مروى خرجت برا للحديقة تبرد روحها من السخانة لي حستها من قرب اياد، قاعدة تمشي وتخمم مع روحها ، فاقت لروحها بدات تحبو . هي هكذاك ويجي ليها واحد.
مروى؟
مروى : ايه
- الله يبارك عليك راكي شابة ليوم.
مروى : مرسي .
بدا يقرب منها: علابالك ديما نشوفك في الجامعة وتعجبيني بزاف.
مروى حساتو سكران شوية من طريقتو في المشي والكلام، محبتش تكثر معاه الهدرة وجات ماشية ، شدها من يدها : وين رايحة يالزين .