مرو أسبوعين علي وفاة عبدالله نتيجة إنتشار مرض السرطان في جسمه ورفضه أخد الكيماوي فاانتكست حالته للاسف وطاح مرة وحدة...
نجاح طول هالاسبوعين كانت مع لجين اللي كسرها موت بوها وهدها...
نجاح: لجين حبيبتي كولي حاجة ليك أسبوعين وإنتي علي هالحالة تاكلي بالسيف...😩
لجين مقعمزة علي سريرها حاطة راسها بين رجليها ودموعها علي خدها...
نجاح: لوجي ردي عليا ....
لجين: ياتري بابا راضي عليا لما مات عمتو 😢
نجاح: أكيد ياعمري...بابا عمره مازعل منك...صح مرات يضايق من تصرفاتك ...بس أكيد يحبك انتي وحيدته
لجين: ندمانة ياعمتو...ولو الندم يقتل كنت متت. ياريتني كنت زي مايبي بابا 😢
نجاح: آه يالوجي رد الفايت محال😩...كلنا نقولو ياريت...بس توا الفايدة في اللي جاي...كوني زي ماكان بوك يبيك وأكيد حيرتاح في قبره
لجين: كسرني موته ياعمتو 😭 حاسة حاجة داخلي تهدمت حاسة بفراغ مافيش حد يقدر يملاه غيره 😭...سامحني يابابا سامحني
نجاح تحاول تبان قوية قدام لجين بس هي من داخل منهارة اكثر منها...
تعنقتها وقعدو يبكو الاثنين علي شخص كان أهم شي في حياتهم ...وخداه الموت منهم علي غفلة..
هيثم: خلاص ياعلاء...انت عارف ان هاذا قدره راجل
مريض وموته شي طبيعي
علاء: بس لو كنت لحقته بسرعة ممكن....
هيثم: استغفر ربك انت راجل مؤمن شن هالكلام؟!
علاء: ندمان ياهيثم بنموت....جرحت البنت بكلام ماليشي داعي وربي أعلم بحالتها وقت إتصلت بيا 😩
هيثم: معليش اعتذرلها وأكيد حتتفهم
علاء: مااعتقدش...ثقلت العيار الحق 😩
نجاح: علاء ألحقني...لجين مش قادرة توقف
علاء: خيرها 😨
نجاح: من قلة الماكلة..خلي نرفعوها لعيادة يديرولها حتي تغدية ع الاقل
علاء: اوكي جهزيها...وأني حنجهز السيارة
غيرلتها نجاح حوايجها ونزلتها بشويا هي وهيثم..
علاء فتحلهم الباب...وجعه منظر لجين كانت صفراء وعيونها من السهر والبكي حالة...
امشو للعيادة وفعلا ركبولها تغدية كان ضغطها هابط مع قلة ماكلة سببلها فقر دم...
نجاح مع هيثم وعلاء في الانتظار...
نجاح تنهدت: الله يرحمك ياعبدالله 😩 تبهدلنا من بعدك
علاء: عيب ماتقوليش هالكلام أني قاعد وبإذن الله مش حتنقصكم حاجة...انتي ولجين أمانة في رقبتي
هيثم: نجاح شن هالكلام وأني وين امشيت 😡
نجاح: أسفة والله من حرقة قلبي علي خويا نقول هكي
الممرضة: خلاص الانسة كويسة تقدرو تاخدوها للحوش....
روح بيهم علاء....وامشي لحوشهم...
~~~~~~~~~~~~~~~~~~
وقف علاء السيارة قدام الحوش وكيف بيخش شاف ربيعة تقص في الطريق كعادتها امروحة من الجامع...
في هاذيكا اللحظة رجعوله جميع ذكرياته معاها تهدريزهم وتخطيطهم لمستقبلهم مع بعض..دمعو عيونه وحس بغصة لأن حلمه الجميل ضاع منه....
ماقدرش يخش للحوش لين إطمن عليها وقصت الطريق...
علاء: السلام عليكم 😩
ابوعلاء والاء: وعليكم السلام...
الاء: كيف حالها لجين اليوم علاء؟!
قعمز : الحمد لله كويسة
ابوعلاء: ربي يصبرها مسكينة فقدت كل حد ليها في هالدنيا الاء: اي والله وجعتني ...ياريته عندها اخ او أخت ع الاقل يونسوها
ابوعلاء: الله غالب....اي حقا برا شوف خوك ضياء قال بيسافر لبنان 😏
علاء ماكانش معاهم....عقله في مكان ثاني مع ربيعة ....
ابوعلاء: علاء تسمع فيا 😕
علاء: آه....نعم .....
ابوعلاء: خوك من الصبح يجهز في شناطيه قال بيسافر...برا شوفه
علاء: كيف بيسافر امالا لعب😒... وقف: تو نكلمه
الاء: نحط الغدي علاء؟!
علاء: لا خليه تو نشوف ضياء ونجي نصبه
الاء: باه خلاص تو نجهز الصفرة
علاء: تمام
ضياء ممدود ع الفراش في المربوعة وسارح...
علاء: وين علي خير....قالو مسافر 😏
ضياء: بنمشي لربا 😪
علاء: ومنين ان شاء الله...شن حصلت فلوس 😒
ضياء: انت بتعطيني 😒
علاء: ومنين ياحسرة...ماعنديش 😌
ضياء: اليون مشيت للضمان وسألت قالو التعويض خديته 50000 😒
علاء: هاذم ماتحلمش بيهم😡..بنزيد عليهم كان سخر ربي وناخدو شقة..او قطعة أرض
ضياء: باه أعطيني منهم حتي 2000 بس 😣
علاء: لا 😏
ضياء: علاء...البنت نبيها وضروري نمشي نخطبها قبل مااضيع من إيدي..مش قادر نعيش بلاها وهي بعيدة عليا...عييت والله عييت .أرجوك عطيني فلوس 😩
علاء ملامحه تغيرو وتأثر بكلام خوه ...أول مرة يشوف ضياء خاضع ويترجا فيه...وهو أكثر واحد مجرب الفراق ونار الحب
علاء: بنعطيك ألفين بس ودبر راسكم بيهم 😡
ضياء: تمام وأني موافق....
علاء: باه والتذكرة منين بتجيب حقها؟!
ضياء: ماتخافش دبرتها...صحابي جمعولي وخدوهالي 😌
علاء: باهي طلعت منهم بفايدة جماعتك😏
ضياء: أكيد فيهم فايدة...هما صح كلاب لكن وقت الجد يعجبوك 😉
علاء: وامتي بتمشي؟!
ضياء: حجزت غدوة...الظهر الطيارة
علاء: خلاص الصبح نمشي للمصرف ونجيبلك الفلوس
ضياء: امنور ياكعك امدور 😁
~~~~~~~~~~~~~~~~~~~~~~
YOU ARE READING
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
