كرونيك : 💕بنت الحي💕

4⃣

لحلقة 4:
وصل للخربة ..بلاصة سايبة ما يدخللها حد ..كان هو وجماعتو متسمية عليه و تابعتو...شافهم راكشين يستناو فيه ..زفرلهم من بعيد باش يعرفو الي هو جاء....هزو راسهم مفجوعين ..الي ازّطل نحى الطرف من فمو..و الي يشرب خبى الدبوزة في جنبو ...قرب منهم وقفو لكلهم ..شلق بيهم كانو عاملين قعدة ..هز حاجبو و عوج فمو ..
- وااا لولاد ..جوكم حفالي ؟؟!!..
-شوية و برا عشيري ...(اجواب فيه خايف )
-ههههه كيما تعرف صقر ..الازم لازم ..باش نجمو نشجعوك بالبڨدا ..
هز ايدو يطبطبلو على كتفو..
-نفهم فيك صاحبي ....
ادّخل "وليد" عشيرو و صاحبو الوحيد ..حب انقص من توتر الي داير بيهم...
- صقر هيا حظر روح ..شعيب عدو جاء ..سمعت الي عندو نهارين يترانا ..
قص عليه واحد اخر و هو يضحك بالقوي..
- مسكين يترانا عالفاضي ..
ضحكو الكل مع ضحكتو ..دخلو للصالة ..نحى خلعتو و بقى كان في شرط..طيش الساك متاعو في القاعة ..جبد البونداج لفها على ايديه..و بدا اسخن في بدنو...لحظات و البلاصة تعابات..ولاد لحوم لخرى وصلو ...و وصل معاهم شعيب....جبدو الفلوس و حطو الرّهان متاعهم ..الي يربح اهز الكل...طلعو للحلبة..وقفو قدام بعضهم...زفر وليد ..وبدات المواجهة بيناتهم.... هز ايديه قدام وجهو..وخر ساق لتالي و قدم ساقو لخرى لقدام..بقى واقف يستنى في شعيب يبدأ... و اول ما قربلو باش يضربو ..هبط ببدنو لوطة و في رمشة عين كان وراه ..ضربو على ساقو بالقوي ..طاح شعيب في القاعة ...و طلع فوقو صقر يخنق و يضرب فيه...ضرب و تضّرب ..كلاو بعاضهم ماكلة ..الزوز صحاح و مدربين مليح.. لكن صقر كانت عندو الافضلية...و ما قص عليهم كان صوت طفل جاي يجري و اصيح و انبه فيهم...
- صقرررر ..فلّل الحناااش (police) هدّو ..
خطف ساكو من القاعة..و هرب يجري عجاجة ..الحاكم ما هد كان عليه هو..عندهم مدة رامين عينيهم عليه...المصارعات الي يعمل فيهم ما هومش قانونين...و يقامر فيها...يجري ما غير ما يتلفت... اعطيه برك يدخل للحومة...موش خوف منهم ..اما هو وعد بوه باش اشد الثنية و يتصلح ..عرضو ساس قصير في راس النهج ..طلع فوقو و انڨز فوق سطح دار ..و كمل طريقو لدارهم و هو انڨز من سطح لسطح....وصل لسطح دارهم جاء ينڨز بطل..شاف كرهبة الحاكم كيف وقفت قدام دارهم..وخر لتالي ..تلفت ايمين و ايسار ..ضربو ضو بيت في الدار الي بجنبهم.....
مدت ايدها تلوج على دبشها..نفخت كيف ملقاتهمش..
-افف افف ..كنت لابس عليا دوشي وحدي و اموري كل وحدها...اميييي...امي
-اانعم ..شبيك رسيل
-جيبلي دبشي نسيتهم في البيت..
-لاهية بالعشاء بنيتي ..البس منشفة و اخرج.. بوك مشى اصلي المغرب في الجامع ...
لبست الكاب دوبن و هي تسب و تتكرم وحدها..مستانسة بالعز و الدلال ..خرجت من بيت البانو و تعدات على امها في الكوجينة...
-امي انا فديت و مليت ..لوقتاش باش نسكنو في هالدار الخربة..
-وه يا بنيتي ..ياخي وقتاش سكنها احنا باش تفد و تمل..رانا البارح كيف نقلنا..
- انا مفهمتش ..بابا شمجيبو بينا لنا ؟؟ ياخي البانكة فكتلو الفيلات متاعنا الزوز؟؟
-رسيل قص عليا هالهدرة ..كان جاء بوك في مقدورو اعيشنا في بلاصة ما خير ..رانا ما ناش هوني تو اما الله غالب اكا الكتب .. و برا اطلع لبيتك قبل ما تاخو برد ..
نفخت بغش ..مشات و هي تغزل...حلت باب البيت و لطختو وراها...شافت دبشها فوق الفرش ..وقفت قدامو وحطت ايدها فوق خيط الكاب دوبن باش تحلو.... و محست كان بايد تحطت فوق فمها..و ايد اخرى كبستلها فوق ايدها الي عالخيط...
قلبها تخطف..سقيها عكشت ..النفس متاعو سخون في رقبتها...يلهث من الجري الي جراه..ريحة برفانو المخلطة بريحة رجوليتو ..دوختها...بدنها لكلو اخض من الخوف ..هزت ايدها تبعدلو في ايدو من فوق فمها..قرّب فمو لوذنها و تكلم بصوت اقرب للهمس..
-ششش ..باش نسيبك ..ردبللك تعيط..
شفايفو الي تتحرك فوق وذنها ..خلات لحمها يقشعر..بدنها للكل نمل و هي تحس في صدرو لاصق فيها ..جبد ايديو منها و دورها بالسياسية ليه ..شهقت و هي ترى فيه ..
-ان..
حط صبعو على فمها..
-ششش ..
غزرلها من فوق لوطة..شعرها اقطر ..ريحتها بالجال دوش ..الكاب دوبن قصير و ما مغطي كان اي لازمو يتغطى ..دور عينيه لبعيد ...نحى صبعو فيسع من فوق فمها و تكلم بصوت ثابت
-كلمة لا...درج و نمشي على روحي ..
دار و مشى شيرة الشباك ..اطل على دارهم ..لحقت عليه ..وقفت وراه قدقد ..كتفت ايديها و تكلمت بصوت واطي..
-يظهر فيك مزلت تحب تتهنتل..
طفاها و حسب روحو مسمعهاش..
-نكلم فيك طرشت..الله اعلم شنية العملة الي عاملها..و هارب لديار الناس...
كيف كيف مرجعش عليها و مكفلش روحو حتى باش يتلفتلها..
-ملا مارك ..والديك مرابوكش تجاوب على كلام الناس ..(ضحكت بالقوي ) هههه نسيت اكيد جهّال ميعرفوش يربيو..
كلب و هبل ..جبدتلو والديه و تمنكيت عليهم عيني عينك..دارلها رابط ..كبس على ايديه ..عض شفتو منرفز..عينيه ما تتفسرش .. عود غزرلها..فد من لبستها.. موش عوايدو اثبت في البنات ..لكن هاذي فيها حاجة تخليه اركز بالسيف عليه..يمكن جرأتها....و الا عينيها الي صافية كالبلارة ..شيع راسو الوج على قرص الضو ...لمحو بجنب الباب ..تلفتلها و قدملها خطوة..تفجعت منو ..وخرت لتالي..قد ما يقدم قد ما توخر ..وصلها لوين احب ..لصقت في الباب ترعش ..قربلها اكثر ..تكلمت و هي مرعوبة ..
-نفسني شبيك..
طبس عليها شوية ...حلت عينيها على وسعهم اتبع في كل حركة يعملها ..هز ايدو ..شهقت .. نزل عالقرص طفى الضو ...