كرونيك : 💕بنت الحي💕

9⃣

الحلقة 9:
هابطة في الدروج تجري و تصيح..
-ميساااء ..ميساااء
سمعت صوت عياطها وقفت تجري...
-ششش امك و بوك تو يسمعوك..شقلك ..احكيلي احكيلي..
تنقز في بلاصتها و تشطح في الشايح..
-قالي نعشقك..اه قلبي ..قلبي يا ميساء اختي (شدتلها ايدها وحطتها فوق قلبها) شوف شوف باش يخرج من بقعتو..
-و انت شقتلو ..
-شي ..
-بهيمة زايد ..هذا و انت من الصباح مارجتني عليه ..هو نطق و انت بكشت ..
-هههه والله لاني مصدقة روحي ..كيفاش و وقتاش حبيتو الله و اعلم..
-اه ..يا وخيتي و شفيه ما يتحبش اكا المخلوق ...
ضربتها على راسها..
-سخطة على راسك احشم نسيبك لزرڨ هذاكا..
طرشقت ميساء بالضحك..
-نسيبي لزرڨ!! منين جبتها هالكلمة ؟؟
-سمعت جارتنا تقول فيها لخطيب اختها هههه
-و انت عاد كالردار فيسع لقطتها..ههه يظهر فيك فيسع تأقلمت في الحومة رسيل..
-اه ..(عضت شفتها) نتأقلم عزيزتي نتأقلم ..على خاطر صقر كلو اهون..
-هيا برك لا دوخلي ..(شدتها من ايدها) ..ايا نطلعو نحب نقيس دبشك و نختار شنو باش نتسلف من عندك...
-هههههههه
-شبيك تضحك
باقي تضحك لين عينيها دمعت..
-تي شبيك رسيل .؟!!
-الدبش مشاو في خبر كان ..
-وه ..كيفاه متقوليش ..
-نقلك وخيتي نقلك..قطعملي طروف طروف..و قالي باش يشريلي دبش اخر على كيفو ..
-يا و الله حوال ..حزار هذا نسيبي لزرڨ..
-خزار و يكوي بالنار ..
-ههه و هءي متقليش تعلمتها جديدة زادة...
-هه اي اي ..هيا نطلعو للبيت تو نزيد نعلمك برشا كلمت جدد ..
- الله الله ..هيا ليلا هيا..اش في جرتنا الليل طويل عريض ..
دخل لدارهم من سكات ..محبش اقلق امو و بوه ..طلع ديراكت لبيتو..نحى دبشو ..و دخل ادوش ..حس روحو خفيف و طاير نهار ليوم تعدى سبسيال علاخر...مصدقش روحو الي قالها نعشقك..ضحك على روحو..طول عمرو قلبو مسكر على الحوايج هاذي...و عقلو كان ديما رافض هالحكايات ..في دنيتو فما مرا وحدة ..احبها و اموت عليها..و المرا هاذي هي حياة امو ..مكانش متوقع انو باش ايجيه نهار و طيح على راسو..و مع شكون مع وحدة لسانها ادور برقبتها..تمتم بالشوية و هو يتبسم..
-قزمة..
و بالفعل هي قدامو قزمة..كل وين ياقف يحكي معاها لازم اهبط راسو باش يغزرلها...تنهد و مد ايدو سكر الماء..كمل الدوش المتاعو ... جبد منشفة و لفها على خصرو ... وقف قدام المراية ..يغزر لوجهو كيفاه منور ..الضحكة ضاهرة من عينيه..في لحظة نسى غشو لكل ..بمجرد انو وقف قدامها و شاف عينيها تلمع بالدموع..ضحك كيف تفكر رعشتها و خوفها منو..غزر لسلسلتو الي تلمع في المراية ..حط ايدو عليها..السلسلة هاذي عزيزة عليه ..تفكر كيفاه حلات في عينو ..و خدم جمعة كاملة في المرمة باش قدر المد حقها و شراها . نحاها من رقبتو و قرر انو البسهالها كيف اشوفها غدوة ....عدى ايديو على شعرو ..داهش في تصرفاتو و هبالو ..خرج من بيت البانو .. ..لبس شرط و ترمى عالفرش رقد ..رقد طول من غير ميخمم..مرتاح البال و فرحان القلب..