كرونيك : 💕بنت الحي💕

3⃣3⃣

الحلقة 33
و قبل ما يكمل حس بحاجة طحتت على راسو...رجالو الكل كانو شادين الحاكم الي متخبي في الحي ...ضحك على جنب و ارخف ليدو عليها مطمان..دزها مكمل طريقو بيها لدار وليد...هزت ساقها ضربتو على ساقو..زاد رخف ايدو عليها...دزتو و طبست فيسع جبدت سكين ..دارتلو و حبت تضربو في رقبتو..جبد بيها و خطفت الضربة في صدرو...صاحت ام رسيل مفجوعة ...دورها راجلها اخبيلها في وجهها...ترهوج من الضربة ..لكنو تحكم في روحو..خطفها من شعرها و بكل غل رمالها الفرد في فخضها ...ضربها بكرتوشة..عيطت متوجعة.. دزها عالقاعة..
-بصحتك جيت مرى...
قدم بو رسيل يسند فيه...حابلو رجالو كرهبتو...طلعوه فيها...و طارو بيه عجاجة بعد مهزو وليد و مرتو الي مفاهمين شي....
_____________
قاعد في المطار ساق عالساق ...سيڨار في فمو ..متكي لتالي عالكرسي...راجل على ايمنو و راجل على ايسارو..الماشي الجاي يغزرلو....الي تتغزل بيه و الي داهش في وهرتو و ضخامتو ...فد من غزراتهم ليه ...جبد تلفونو ابربش فيه ..اثبت في تصويرتها باش يعرفها....سمع حس حركة غريبة ...و تصفيرة متاع واحد ابزنسس....تمشي و تتميل ....صوت طالونها يتفرق على صوت طاونات النساء لخرين....هز راسو و عينيه طلعت من اللوطة للفوق ...لابسة شوميز بلون محشية تحت سروال فيزو في النوار...تكركر في فاليزتها بايد ...و فاست كويو نوار تدلل من ايدها لخرى.....قمحية و حلوة...شعرها مارون محلول على اكتافها...عينيها عسلية ...حواجبها خشان و شوافرها طوال ....تبسمتلو شطر تبسيمة....هز حاجيو ... قدمتلو خطوات...رمى تالفونو في جيبو...وقف عدل كوستيمو...وصلتلو رامت الفاست متاعها فوق الفليز ...و مدتلو ايدها باش تسلم عليه...
-صقر موش هكا!!؟
-oui مرحبا بيك ميرا ...نورت بلادك
-عيشك ..منورة بيكم (دورت عينيها تلوج) وسيم !!
-مجاش عندو ما يعمل...
جبدت ايدها بالشوية...عقدت حواجبها و ترسمت على وجهها صفات الخيبة...ضحك على جنب و تكلم...
-تفضل معايا....باش نوصلك للوتيل...
-موش باش نمشي لدار وسيم..؟؟
-لا ..وسيم عندو ضيوف في دارو...
نزلت على سنيها منرفزة...
-شكوون ؟؟
-منجمش نقلك..خلينا نمشيو ..اكيد راك تعابة من السفر...
نفخت فادة...خلاتو واقف و قدمت خارجة من المطار تغزل على وسيم...
خرجت و وقفت تستنى فيه ...لاحق عليها ...يمشي في عقل عقلو...ايدو في جيبو و ايدو لخرى شادد بيها سيڨار...نفخت على قصتها بعصب...زاد كمل عليها بالدم البارد متاعو...مخها تشوشط و هي تخمم وسيم شكون حاطط في دارو..حبت تتناسى الافكار الي عمال و ما تتغلل في بالها....لهات روحها بصقر ..بقاات اتثبت فيه...عرفت وسيم لشكون طالع مزيان ...وسيم حكالها شوية عليه ...و بالفعل هو كيما وصفو بالضبط...تنهدت و رجعت تخمم في وسيم الي متتعداش دقيقة في حياتها و ما يتعداش على بالها....."ميرا" بنت ال26 سنة..
مزيانة باتم معنى الكلمة...كل حاجة فيها مغرية ...من كلامها ...لزينها ..لحراكتها...لكن ورى هذا الزين موجود مرى قوية...مرى جبل ما يهزها ريح...مرى السلاح تلعب بيه لعب في ايديها....ذكية و خبيثة...فايقة للدنيا...ما عندها وين ادور الريح...ميرا تملك جنسيتين ...التونسية و الامريكة....عاشت مع امها و بوها في امريكا ...و لكن القدر شاء انها تعيش في ميتم بعد ما بوها و امها ماتو و عيالات والديها مقبلوهاش و سلمو فيها....وصلت لل18 سنة ...كبرت و خرجت رغما عنها للشارع...لعالم الاجرام و التشرد...و لحسن الحظ قدرها المرة هاذي جمعها بوسيم في وسط عركة مع اولاد الشوارع..نقذها منهم و هزها تعيش عندو ..بما انو هو زادا عاش في امريكا وحدو...خذات منو طبايعو...كبرت على ايديه ..و نهار بعد نهار تعلقت بيه..و اطور التعلق و ولا حب و هيام...لكن للاسف حب من طرف واحد..و ما اصعب هذا الحب...كتمت مشاعرها..و قررت انها تخافظ على صداقتو معاها...لكن و للمرة الثلاثة ادخل القدر في حياتها...و بعّد عليها وسيم ..الي روح قبل 8سنين لتونس بعد موت امو..بقات على تواصل معاه..لكن هذا مكفاهاش ..و بالعكس البعد و الاشتياق زاد على ما بيها ..
تعذبت في بعدو و حتى انها مرضت ....لكن تو ..تو هي سلمت في كل شي و جات على خاطرو...لمجرد انو قالها "محتاجلك "....طقطق صاوبعو قدام وجهها...رمشت عينيها مفجوعة...
-فاش سرحت ...قتلك هيا اطلع..
-اه ..اي سامحني مسمعتكش(هبطت راسها حشمانة)....
حلت باب الكرهبة و طلعت...ركب و ستنى رجالو اقدمو قدامو...ديمارو هوما و ديمارا هو اسوق في كرهبتو في وسطهم...دورت راسها للشباك...تتخيل فيه كيفاه ولا..ليها فترة مالي حكات معاه عالسكايب...ضربتها نسمة باردة في وجهها...لحمها قشعر..ظمت ايديها على روحها...نزل عالقرص سكر الشباك ..حسها متقلقة من عدم جاين وسين ..حمحم و تكلم و هو احاول اضحكها ...