الشيخ والعنوديه

بارت 7

الشيخ والعنوديه
الكاتبه صفوو 💕

الشيخ سالار بعصبيه: لج والله يراد اكسر راسج عندج غرور اله اكسره انه الج بسيطه امشي كدامي يم امي يله
ليالي: طبعا ماعرف شوصفلكم خوفي بهذيج اللحظه من وصلت قصر الشيخ صكر خفت وضليت ابجي ودخلنه جوه وبقو يسولفون وهذا سالار مشال عينه عني انوب جابو الشيخ وعقدلنه وافقت بخنكه وغصه بداخلي لا ونوب من راحو اهلي كعد يصيح عليه استاذ سالار بس طبعا اني ليالي ام لسان ما اسكت نسيت توصيه امي ( حبابين لادكولون الامي طولت لساني لان تدفني ههههه) ومن اجه الشيخ صكر شكيتله وسويت روحي اني فقيره كدامه وخليته يحجي عل سالار بس صدكوني ماجان ابالي اي شي وانما بس ردت اوصل السالار فكره انو اني مو فصليه عاديه لا اني هم بنت شيوخ حالي من حاله والي احترامي والكل يعرفني بلصوب مالتنه اني الحفيده المدللة عند حمدان ويضربون المثل بدلالي ومال يكلي انتي مغروره هذا غلطان اريد اثبتله العكس انو اني مو مغروره المهم طلع هو من الديوان واني ورا طبعا كليدور بي 3 بيبان وحده مال ديوان والمقابيلها هم باب اتروح للممر والثالثه بصفها تروح للصاله دخلنه للممر من جهة اليمين اكو 3 غرف وحده بصف الثانيه وعل يسار باب هم يروح عل صاله واكوباب ثانيه من الجهة الثانيه مال الصاله يطلع على الموزع او ممر جبير مربع شوفو انتو شلون اتسمو المهم الموزع عل جهة اليمنه بي غرفتين ومن جهة اليسار باب المطبخ بي مطبخين الحار والبارد اما بلزاويه اكو الصحيات وعل جهة المقابيل الدرج يصعد فوك بلطابق الثاني غرف مسطرات وحده بصف الثانيه تقريبا 6 غرف وكل غرفه بيها حمام وعل جهة اليمنه باب السطح جبير واكو سطح ثاني بلطابق الثالث طبعا اعرف دختو بس هو القصر جبير كلش يعني اني لما حفظت الغرف والاماكن بلشافعات المهم دخلنه للغرفه مال ام سالار لكيتها مره جبيره بس مو كلش كاعده ولابسه اسود اعتقد لحد هسه حزنانه على زوجها ويمها بنات 4 اثنين ديفركن ايدها ورجلها وحده واكفه وكالبه خلقتها من شافتني عيونها كامت اتطلع شراره والثانيه كاعده من شافتني ابتسمت
الشيخ سالار: يمه جبت الفصليه
ام سالار: امشي اطلع بره لا انه امك ولا شي
الشيخ سالار: ليش يلغاليه تحجين هيج
ام سالار: انه مو كلتلك اتراجع عن الفصليه البنت مالها علاقه ليش تكطع ابختها يايمه
الشيخ سالار: يمه جا انه ابقه هيج بدون ما اخذ ثار ابوي لا يمه اعذريني بعد هاي الفصليه جبتها وخدامه الج
ام سالار: لا خدامه ولا شي البنت راح اعاملها حالها حال بناتي وانت بطل كلمه فصليه اكيد البنت عدها اسم وشوف دير بالك تأذيها من هسه اكلك البنت بأمانتي الحد متخلص المده فاهم لو لا يسالار
الشيخ سالار: تؤمرين يمه
تعالي انتي سلمي عل امي
-طبعا كل هل حجي واني واكفه بلباب وبس اباوع من كلي تعالي اتقربت وبست ايد امه وهي كعدتني بصفها
ام سالار: هل يمه هلا بيج
ليالي: وبيج خاله
ام سالار: بنيتي شنو اسمج
ليالي: اسمي ليالي
-شو اني كلت اسمي اشو البنيه البصفها شهكت ونطت من يمها
ديلار: قصدج انتي الشيخه الحفيده المدللة عند الشيخ حمدان
ليالي بخجل: اي اني
ام سالار: سالار بربك يا ابني شيخه وبنت شيوخ تاخذها فصليه انت ماتخاف من ربك ياوليدي
الشيخ سالار: وشنو يعني شيخه عل نفسها مو علينه
-اني كل حجيهم بجفه والبنيه الواكفه وتباوعلي بحقد مدها بس تجي تاكلني نضراتها الحقوده خبلتني عشتوو شبيها وهي وجه السطله
ديلار: اني اسمي ديلار عمري 18 اخت سالار الصغيره يعني اصغر العنقود هههههه
ليالي: ههههه هلا بيج حبيبتي
اديار: واني اديار هم اخت سالار عمري 20
ليالي: هلا بيج كلبي
-طبعا خوات سالار كلش حبابات والبنيه البتسمتلي اول مدخلت هم اجتي يمي
هاله: اني اسمي هاله عمري 17 بنت عم سالار
ليالي: اتشرف بيج حبيبتي
-اما هاي وجه السطل الواكفه جنها شمعه فكر هم عرفت عن نفسها اليشوفها يكول بنت وزير
رسل بتكبر وحقد: وانه رسل عمري 18 بنت عم الشيخ سالار وبنت الشيخ مروان وحفيده الشيخ صكر وعن قريب زوجه الشيخ سالار 😌
ليالي بستهزاء: هه ونعم منج يبنت الشيوخ عل راسي كل شيخ ذكرتي
-طبعا من كلت هيج اباوع عل سالار ابتسم ودنك راسه ويهزه عل كيف واباوع عل رسل اتباوعلي بحقد
ام سالار: يبنت شمالج ييمه لابسه البوشيه شوفينه وجهج الكمر اذا صوتج هيج حلو جا ييمه وجهج شلونه
-رفعت البوشيه عن وجهي وباوعت عل ام سالار هي ابتسمتلي
ام سالار: يمه صلاوات عل نبي الله مصلي على محمد تخبلين يبيتي عين البارده عنج
ليالي بخجل: تسلميلي خاله عيونج التخبل
سالار بعصبيه: انتي تعالي وراي
ليالي: اني
سالار: لا خيالج جا المن اصيح انه
ليالي بسهزاء: فكرتك اتصيح رسل بنت الشيخ ومرت الشيخ
-اباوع عل ام سالار والبنات ديلار واديار وهاله يضحكن بصوت ناصي اما رسل عيونها تطلع منها شراره وسالار خزرني
سالار بخزره: تعالي وراي
-طلع سالار وهنه خربن ضحك من ضحكن طلعت رسل تنافخ
ديلار: لج انتي عجبتيني تنطين السالفه بلكصه خايبه محد دوه رسل غيرج
ليالي: اكول هي صدك راح اتصبر مرت الشيخ سالار
اديار: على اساس نزوجها السالار غير امي مختارتها مادري شمالها امي لاعبات بعقلها رسل وامها رشيوه
ام سالار: يا يا يا فلك طرج شني لاعبات بعكلي انه مره سنعه يلعبن بعكلي هل نسوان
ديلار: اي والله ييمه يلعبن بعقلج من هاي قبل يومين تردين تزوجين سالار دعيت من الله ميزوج هل حيه الصفره
ليالي: ههههههه بنات انه حبيتجن الله شاهد وانتي يخاله بعد كلبي ونبي كلبي حبج وانشاءالله احطج بعيوني
ام سالار: ييمه انه مارايده شي منج بس اريدج تكونين ويه وليدي وتريحي لان تعرفين شغله بلولايه وهنا العشيره كلها براسه وانتي مره عاكله وسنعه اريدج تخلي يحبج يبنيتي
ليالي :انشاءالله خاله من عيوني
-دنسولف وجان اسمع صوت سالار هز اركان البيت
سالار بعصبيه وصياح: لج وييينج انه مو كلت تعاي وراي لو طرشه
ديلار: هلا هلا الحكي هاج الثور والبقره التلحك تهدي
ام سالار: الله يطيح حظج لج انتي ماتبطلين خبال ييمه لاتحجين عل اخوج ضبي السانج لا ينكص
ليالي: هههه خاله انه طالعه اشوف شيريد مني اترخص
ام سالار: روحي ييمه مهنايه بوليدي
-خجلت من حجيها كلش طلعت من الغرفه مالتها لكيته واكف علدرج ومدنك راسه بعصبيه وينافخ اجيت وكفت كباله
الشيخ سالار بعصبيه: انه مو كلت تعالي وراي
ليالي: جنت اسولف ويه خالتي والبنات
الشيخ سالار: بس انه اول اهتمامات ومو من اول ما اجيتي ذبيتي ميانه شوفي والخلقج ادفنج ومحد يعرف خبرج فهمتي لو لا
ليالي وترفع حاجبها: لا والله مو انه تايهتلك
الشيخ سالار بثقه: انتي فصليتي اتحكم بيج مثل ما اريد
ليالي:جا اذا انه فصليتك وتتحكم بيه شوفني مراجلك
-من حجيت هيج ما احس غير راشدي اجاني من سالار فر راسي فر احس حتى صفير يطلع من اذني والحراره نار من خدي اول مره احد يضربني اني اهلي مضاربيني باوعت عليه بحقد
ليالي بحقد: تضربني مو هاي مراجلك لك موش رجال اليمد ايده على مره
الشيخ سالار بعصبيه: قصدج انه موش رجال مو تعالي اليوم اشوفج الموش رجال منو
-كال هيج ولزمني من شعري وصعدني فوك سحل ودخلني الغرفه وقفلها واجه ضل يضرب راشديات بيه ودفرات موتني من الالم والوجع وكل مايضربني اني اصرخ واكله انت حقير حيوان مو رجال لو رجال ماتمد ايدك على مره وهو يتخبل اكثر يعني بختصار اول ما اجيت اخذتلي كتله معدله اتلوك الوجهكم هههههه لا اشاقه الله لا يوكعكم بمثل هل كتله طلع الدم من خشمي بقيت بلكع اتلاوه من الالم والوجع انطاني دفره عل ضهري شيغت روحي وعافني وطلع كمت عل حيلي على كيف كسرني تكسر باوعت عل روحي بلمرايه وجهي صاير فلم عبالك خريطه اثار اصابيعه والدم يجري من خشمي الله يكسر ايدك يسالار كوه رحت عل جربايه كعدت عل طرفها وكمت ابجي واناغش سمعت صوت مبايل يدك باوعت لكيت جنطتي بلغرفه كمت عل كيف فتحتها طلعت المبايل باوعت سهى جاوبتها رئسا
سهى: هلاو ليالي شلونج حبيبتي
ليالي بجي: انه مو زينه سهى سالار كسرني تكسر لج موتني
سهى بعصبيه: لج انتي تحجين صدك
ليالي بجي: اي والله موتني الحكيلي سهى خل يجي جدي ياخذني هذا سالار وحش وحقير
سهى بعصبيه: روحي ليالي هسه انه اتصرف
-سديت الخط من سهى واني ابجي على حظي وين جانتلج يليالي لج انتي الشيخه هيج يصير بيج بقيت ابجي الحد مندكت الباب
ليالي: منو
فهد: انه فهد ليالي افتحي الباب
-كمت على كيفي حطيت شال على راسي وغطيت وجهي بلشال وفتحتله الباب جان واكف ومدنج راسه من فتحتها رفع راسه
فهد: شبيج ليالي شصاير سالار ضاربج مو
-من حجه هيج كمت ابجي واهز براسي بمعنى اي ضربني
فهد: امشي وياي باعي وجهج حتى لو مغطيته مبين اثار الضرب
-وطبعا اني ماكلت باطل طلعت ويا ورحنه للمستشفى الدكتوره شافتني ضلت تحجي شلون صار هل اثار ماعرف شنو صار نزيف داخلي بخشمج وطك دم كومه اسأله خبلتني المهم داوت جروحي وانطتني مرهم للاثار حتى اتطيب بسرعه طلعنه من المستشفى اني وفهد ورجعنه للقصر اول مدخلت للقصر جرني سالار من شعري
الشيخ سالار بعصبيه : لج بنت ال .... وين جنتي بنت ال ..... شلون تطلعين بله مدكوليلي بعدج هلكدوتج عرمه مينكدرلج
فهد :سالار وخر عن البنت اني اخذتها وياي لك شفت روحك شمسوي بيها هاي فوكاها اخذت البنيه للمستشفى جات تبقه تنزف من خشمها
الشيخ سالار :كلشي مابيها هاك شوفها عرج ميطكها
ليالي: انت شبيك مادكولي انجلبت خوما نجلبت
الشيخ سالار بعصبيه: هاك استلم ودكولي ليش تضربها لج تعالي بنت الكلب انعل ابوج لابو اليطلعلج اشوف يا كو.... يطلع وراج انه الج لج انه نجلبت مو بسيطه بسسيطه
ليالي بجي: لك عوفني مادكولي شتريد مني انه شسويتلك فهمني ضربتني لان ذبيت ميانه ويه امك وخواتك شنو ذنبي بس كولي
-بقيت واكفه وره فهد وابجي من كل كلبي واباوع نسوان اثنين واكفات يطلعن بعمر ام سالار وحده مبين عل وجها الحزن عليه وحده لا تستهزء وتتمضحك من ابجي وديلار واديار وهاله وياهن ابنيه هم ماعرفها مشفتها لان ورسل وجه السطل واكفه وتتمضحك وام سالار هم واكفه متكدر تحجي شي لان سالار صاير نار كبره من العصبيه
ام سالار :لك يمه استهدي برحمانه شجالك مادكلي جا شني ييمه تريد اتموتها للبنت
الشيخ سالار بعصبيه وصياح: عساها ماتت عساها روحه بلا رده هاي نقمه موش مره انه الها ولك فهد بس جيبها يمي اله اربيها
-هو يحجي بعصبيه واني خاتله وره فهد اخاف لايرجع يضربني سمعت صوت الشيخ صكر وهو يصيح صوته ادكول عبالك زلزال وهجم القصر
الشيخ صكر بعصبيه وصياح: ساااالااااار
-باوعت لكيت الشيخ صكر واكف اباب الصاله ورا واكف منير واني من وره العيطه مالته اذا تذبحوني قطره دم متلكون بيه
الشيخ صكر بعصبيه: سالار ليالي لديوان ورايه بسااع
-راح الشيخ صكر لديوان وسالار اندار عليه وخزرني خزره ختلت وره فهد وابجي
الشيخ سالار بعصبيه: امشي كدامي يله
ليالي بجي وخوف: ما اروح وياك انت روح
الشيخ سالار بنفاذ صبر: شلون اتريدني ابتلي بيها لج امشي
فهد: عل كيفك سالار شبيك انه اجي وياكم بس امشو الخاطر ربكم
-سالار ضل ينافخ بعصبيه ومشه لديوان وفهد يمشي واني ورا امشي دخلنه لديوان شفت الشيخ صكر كاعد تعالو اوصفلكم هيبه الشيخ صكر هو رجال جبير بس مو كلش جبير يطلع عمره بستينات لحيته سوده وبيها ابيض يعني شويه بيها اسود ماعرف المهم هيج هي ولابس دشداشه وغتره وعكال وبيده عوجيه وسبحه واصابعه بيهن محابس كل محبس يكول اني وهو صح جبير بس الحيل بعده بي واكتافه عريضه وطويل يعني رجال من صدك وسالار طالع على الشيخ صكر نفس ملامحه وصوله وهيبته بلضبط يشبهة المهم نرجع دخلنه للديوان جان الشيخ صكر كاعد ويهز برجله ويلعب بسبحته وعصبي دخل سالار وكف يم جده ودخل فهد واني ورا وكفنه
الشيخ صكر: فهد اطلع بره
فهد: بس شيخ ....قاطعه
الشيخ صكر: انه شحجيت اطلع بره
-طلع فهد من دون كلام واني بقيت واكفه ومدنجه راسي
الشيخ صكر: بويه انت شمالك ويه البنت شوف شمسوي بيها وصاير رجال عليها كدام اهلك ونسوان عمك واخوتك شلون اتريدهم يحترمون مرتك اذا انت من اول يوم هيج اتعاملها
الشيخ سالار: بس جدي هي موش مرتي انه ماعتبرها مرتي هي خدامه هنا الامي وبس
الشيخ صكر: يعني قصدك اتفهمني انك ماتريدها
الشيخ سالار: اي ماريدها
الشيخ صكر: شوف سالار البنت ماطلع منها شي موخوش ومن اول ما جبتها موتتها كتل شني بويه هي مو بشر لو كالولك عنها حيوان اليوم تره جابوها واول كجابوها كتلتها شمالك يابوي شوف سالار وحق الله من اليوم لا انت الك شغل بليالي ولا ليالي الها شغل يمك
الشيخ سالار: هاهيه جدي التريده يصير وتؤمر امر وهذا احسن شي افتك منها
-حجه هيج سالار واترخص من جده وباوع عليه خزرني وطلع من الديوان بقيت واكفه
الشيخ صكر: يبنيتي انه يمج لاتشيلين هم ما احد راح يأذيج بوجودي اي شي تحتاجينه تعالي عليه وماعليج بهذا السكط سالار انه اله شاف نفسه كبر وكعد يعارض شوري
-من حجه هيج اتذكرت كلام جدي من يكلي يبنيتي وانه يمج لتشيلين هم انقهرت وبجيت
الشيخ صكر: بويه لاتبجين انه يمج محد راح يأذيج
ليالي بجي: شيخ عادي اصيحلك جدو مثل ما اصيح الجدي حمدان
الشيخ صكر بأبتسامه: طبعا عادي وانتي من اليوم بنيتي حالج حال البقيه شوفي ليالي انه اعرف انتي مطوله لسانج عل سالار بس سكتت وما حجيت تعرفين ليش ماحجيت لان سالار انه مربي واعرفه كلش زين شايل غرور ويكره النسوان وانه جنت رافض انهو ياخذج فصليه بس هو عاند بحجه ياخذ ثار ابو بس انه اعرفه هو اقتنع بيج وبلسانج انتي شغلتي بال سالار بلسانج وبحجيج بلبستان مالكم هسه ادكولين الشيخ صكر منوين عرف بلقائنه انه وسالار شوفي يبنيتي كلش يخص سالار يوصلني اول بأول وانه وافقت عل قرار سالار انو ياخذج فصليه من شفت تهجمج عليه بنص المضيف عرفتج راح اتروضين سالار وتعرفين شلون اتغيرين حياته اريدج يبنيتي اتغيرين حياه سالار للاحسن واذا دللتي واعتنيتي بي راح يسويج ملكه زمانج وانه هسه حجيت وياج فكري بكلامي عدل وزين ماشي يبنيتي
-معرفت شنو احجي ويا اكتفيت بأن اهز راسي بمعنى اي واترخصت منه وطلعت شنو يعني يريدني اغير حياه سالار لويش هو شبيها حياته ما اعرف دا امشي واحجي ويه روحي ما احس غير انضربت بشخص رفعت راسي واشوفه سالار العيون تجدح نار
الشيخ سالار بخزره: شالج عدلي شعرايه متطلع منج مفهووم وشي ثاني انتبهي عل طريقج لتصيرين ثوله
ليالي: شبيك انت وياي شمسويتلك انه
الشيخ سالار بعصبيه: لج انتي شنو هذا السانج عبالك برنو ميسكت الضاهر مفادتج الكتله باعي ليالي امشي عدل ولا تطلعيني عن طوري اتجفي شري احسلج مفهوم
-هزيت راسي بمعنى اي لان صدك مابيه حيل انكتل مثل قبل شويه بقيت واكفه بنص الموزع ماعرف وين اروح ما اندل جان تجي بنيه ما اعرفها
ايات: هلاو انتي ليالي الفصليه مو
ليالي: اي اني الفصليه
ايات: هلا بيج حبي اني اسفه لان كلتلج الفصليه بس داتأكد المهم اني ايات بنت عم سالار يعني بنت مروان اذا تعرفي
ليالي: قصدج اخت العوبه رسل
ايات: هههههه هاي شنو عرفتيها عوبه
ليالي: هههه اي والله اول ما اجيت اتباوعلي بحقد
-ضلينه انسولف طبعا ايات عكس اختها رسل تماما ماعدها حقد مثل اختها دنحجي ودخل ولد انتبهت عليه وشفته هو اي هو
ليالي بصدمه: هاي انت .......يتبع

تتوقعون ليالي شافت منو وانصدمت انتضروني بارت جديد وراح تعرفون اخليكم بلفضول مالكم هههههه يله اتفاعلو حتى انزللكم البارت الورا بسرعه ممممح
احبكم ❤
صفوو 💕