√ميار√
عداو ثلاث ايام و اليوم الخطبة تع انفال وحسام ، والله يبارك وشحال جاو شباب علكيف ، المهم تلمينا انا وياسمين و انفال و مريم اخت ياسمين ، مريم هاذي تحب سراج وتعشق فيه وهي قد ريهام فالعمر ، بصح عمرها ما كرهت ريهام و كانت تعتبرها ديمة كي ختها ، المهم ، روحو الخطابة و بقينا حنا لبنات بصح ريهام ماهيش معانا، قسمنا الطارطة وبدينا نطارشو على بعضانا حتى روحنا فيها خلاص ،و المشكلة انو في دار انفال كاين دوش في بيت انفال و واحد في بيت زينو و وحدة فبيت والديها و التصميم تعهم يجي ، انك مع تدخل للبيت بعد تلقى لاشومبر آ كوشي la chambre à coucher و مقابلها الباب تع الحمام (توالات حاشكم) و حداه الباب تع الدوش ، و لداخل في الدوش كاين لابينوار و لافابو و بيناتهم باب يديك للdressing غرفة الملابس ، امالا درنا القرعة كل وحدة وين تدوش و كانت هكا: انفال في بيت والديها ، ياسمين في بيت انفال و طبعا انا في بيت زينو و مريم تقعد نسنى اول وحدة تخرج تدخل هي وراها ، المهم هزيت انا البيجاما لي عطاتهالي انفال و المنشفة و رحت لبيت زينو مادامو مش ح يجي ليوم للدار كي عدنا فيها ، دخلت حطيت البيجاما فوق السرير و المنشفة في يدي و عمرت البينوار وااااااه على ديك الراحة ، المهم عداو ساعتين سمعت الباب تع لاشومبر تحل لحت ودني قدام الباب نتسمع قلت بالاك انفال ولا كش حمارة منهم ، ويااا ويلتاه راهو زينو ، انا سمعت حسو وحكمتني الركبة في فشايلي (ThLstHP)
قصدي الفشلة في ركايبي ، واول حاجة درتها اني دخلت للبيت تع الدريسينغ و قفلت لباب لبست 👙👙 لي ستر ربي دخلتهم معايا ، ومبعد لحت يدي اول حاجة جات فيها لبستها و كان تريكو بيض هكا جاني👇
وزربت خرجت من الدريسينغ و مبعد مالدوش كامل ، لقيت زينو في وجهي انا منطقتش بصح هو شاف معايا شاف شاف مبعد عيط
زينو: ااااااااع ميار وش راكي ديري هنا
وماهي الا ثواني حتى جات انفال البغلة اثر العيطة لي راني متاكدة بلي الزجاج تع المرايا تع الدوش تكسر بسبتها ، فهمتو كلش ة فهمتو انا حكاية التريكو و مبعد راحت انفال عند مها عيطتلها و انا كي نضت نلحقها قالي زينو
زينو: تريكويا متنحيهش جاك ابهى من بيجاماتك ، المهم وجهي خرجو فيه الوان الطيف كامل ومبعد و في غضون ثواني حدث التحول و دورت لزينو كي لوحش و قتلو
ميار: يخي قلت بلي تراعي لبنات و ماكش حتجي هنا على جالتنا وش جابك
زينو: دار ماما و بابا نتي وش دخلك نجي كيما نحب اصلا نسيت ورق تاعي تع الشركة وجيت نديهم كي عيطت لانفال تهبطهملي هزت عليا وحدة ابصر شكون قاتلي بلي انفال تدوش
ميار: ايه بلع برك تزيد متحشمش تعيط على طفلة
خزر فيا و بدا يشهد و يستغفر و خرج و شوي و رحت انا ولبنات لبيت انفال جبنا الدلاع و بدينا ناكلو و نتنادبو : الدلاع راه غالي (ThLstHP) و ناكلو و نلبزو المهم سمير كحل ، شوي و درنا لغنا و قلبناها شطيح هاو الشاوي ها لقبايلي هادا التهوال ها المصري و هداك سوري بلكتاف و السبحة المهم روبلناها ، و مبعد بدينا نقرجعو و نمنشرو و نقطعو و ساعة على ساعة نضربوها بتزغريتة على انفال و لا ياسمين كي يعطولهم حبايب البهم ، المهم روبلناها ، مبعد حكمنا لي غوب سواغي تع انفال و مادامنا في ثلاثة presque لا مام طاي لبسنا كل وحدة غوب : انا👇
انفال👇
مريم👇
ياسمين👇
مبعد بدينا نطلسو في وجوهنا هادا غوج آلافغ ، هادا فون دو تان ، هادا شعر جبيد و سيشوار و كي خلصنا درنا لغنا مرة خرى و بما ان الغرف عازلة للصوت واحد ماهو سامع بينا ، المهم درنا الغنا تع الانجليز و جبنا قراعي تع زعيم( ماركة تع قازوز) ذوق تفاح تشبه في لونها للخمر و بدينا نلعبو فيها سكارى و نمشيو و نملوحو حيط يدي و حيط يجيب زعما زعما و حنا نشطحو و يدخل علينا.....
لالا ماش زينو يدخل علينا اب انفااااال ، انا مدخلة لقرعة في فمي و انفال تشطح زي السكرانين مريم و ياسمين محضنين بعضاهم فاللرض و متمرغين بالضحك ، هو دخل باباها وحنا تجمدنا كيما رانا ، تخنزر فينا تخنزيرة تع موت وقالنا
اب انفال (مهدي): نحيو عليا الهم لي لابسينو و مطلسينو في خلايقكم و ارواحو تتعشاو
و قفل الباب وراح ، شفنا كامل مع الباب مبعد مع بعضانا مبعد طرشقنا بالضحك ، لمينا شعورنا مسح وجوهنا لبسنا بيجاماتنا و هبطنا كلينا و فرزنا لكوزينة مبعد جبنا بيسطاش و لوز و كاوكاو و كاجو و بوب كورن و درنا دي فيلم و بقينا نتفرجو حتى رقدنا فلرض كي لكلاب الميتة هههه
_______،
وش رايكم في بارت اليوم و في هبال الشخصيات
وش تتوقعو حيكون دور مريم اخت ياسمين مبعد وهل ممكن سراج يحبها و يتخلى على ريهام؟؟ نشوفو فالبارتيات الجاية
